Amulibambile Kujatikizya Cuulu Camyaka Cilaa Mpindu!
IBULELO bwa Kristo bwa Myaka iili Cuulu buyooleta zilongezyo zitaambiki kubantu. Mubweendelezi bwaluyando bwa Jesu, bantu bayoosumpulwa kuzwa kuciimo ceetezya akuba mubulondosi bwabulemu. Amweezeezye buumi mbomunga mwabaa mbubo naa camucitikila eco. Ibuumi bubotu! Amweezeezye kubuka mafwumofwumo lyoonse kamulimvwide kabotu kwiinda buzuba bwainda. Ituulunzuma twabaalumi, ibanakazi alimwi abana balangila kuyoopona kuciindi eco calukkomano. Balacilangila alimwi balacipailila. Ikwiiya Bbaibbele nkobaiya kwabapa kuti basinizye kuti izilongezyo ezi zilakonzya kubacitikila.
Pele, katanatalika Bulelo bwakwe bwa Myaka iili Cuulu, Jesu Kristo weelede kubagusya bantu boonse ibakazya bulelo bwakwe anyika. Eci uyoocicita kunkondo iitegwa Harmagedoni mu Bbaibbele. (Ciyubunuzyo 16:16) Banakristo beni-beni anyika tabakalwani munkondo eyo. Ninkondo ya Leza. Alimwi taikabi kubusena bomwe buyo anyika. Ibbaibbele lyaamba kuti iyoosika koonse-koonse munyika. Basinkondo babweendelezi bwa Kristo bayoojaigwa. Taakwe pe akati kabo uuyooloboka!—Jeremiya 25:33.
Mpoonya Jesu uyoobukila Saatani Diabolosi amadaimonaakwe. Amweezeezye cili mukucitika mbubwenya mulembi wabbuku lya Ciyubunuzyo mbwaakacibona naakati: “Ndakabona angelo [Jesu Kristo] uuza buseluka kujulu, ulijisi cijuzyo camulindi uutagoli. Mujanza lyakwe mwakali inketani impati, nkabela wakajata Simwaaba, eyo inzoka yaciindi iitegwa Diabolosi a-Saatani, akumwaanga myaaka iili cuulu.” (Ciyubunuzyo 20:1, 2) Kumbele, Saatani amadaimonaakwe bayoonyonyweedwa limwi kukabe kutamani.—Matayo 25:41.
“Inkamu impati yabantu batabaliki kumuntu naba omwe,” bayoofwutuka nkondo ya Harmagedoni. (Ciyubunuzyo 7:9) Kristo uyoobasololela aba “kutusensa twamaanzi aabuumi,” kuti bagwasigwe cakumaninina mbubwenya mweembeli mbwasololela mbelele zyakwe kumaanzi aapa buumi. (Ciyubunuzyo 7:17) Kakunyina kusinkilizigwaa Saatani amadaimonaakwe mukuyaambele kwabo munzila yakumuuya, aaba bantu ibayoofwutuka Harmagedoni bucebuce bayoogwasigwa kuzunda tumpenda twabo twacibi mane do kusikila ciindi nobayoolondoka!
Mubweendelezi bwa Kristo bwaluyando, ibukkale bwabantu bunooyaa bubota. Jehova Leza ikwiinda mumwanaakwe Jesu Kristo uyoogwisya zintu zyoonse zileta macise abuumba. “Uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa.” (Ciyubunuzyo 21:4) Kaamba zyabukkale obu, imusinsimi Isaya waamba kuti: “Lino meso aaboofu ayoobononona, amatwi aabasinke ayoosinkuka. Cilema unooya busotauka mbuli insya, alulimi lwasyaataambi luyooimbisya.” (Isaya 35:5, 6) Alimwi bafwu, “bapati abaniini,” bayoobusigwa kabajisi bulangizi bwakutafwa limbi!—Ciyubunuzyo 20:12.
Noliba lino “inkamu impati” yabantu ibayoofwutuka Harmagedoni bali mukubunganizigwa. Bali mukulibambila kujatikizya Bulelo bwa Kristo bwa Myaka iili Cuulu. Nokuba kuti tabazyi ciindi cini ibulelo obo nobuyootalika, basyoma kuti kuciindi ncabikkide Leza mwini, buyootalika. Mulakonzya kuba akati kabo, pele anywebo mweelede kulibambila, ikutali kwiinda mukusambala mpasya zyanu akuunka kubusena bumwi pe, pele nkubaa luzibo lwini-lwini lwa Jehova Leza alimwi amakanze aakwe kwiinda muciiyo ca Bbaibbele. Kakunyina kubbadela naa kulimvwa kusinikizigwa kuli koonse, Bakamboni ba Jehova bayookkomana kumutondezya mbocinga camugwasya nywebo amukwasyi wanu woonse ciiyo ca Bbaibbbele. Basikumwaya magazini eyi bayookkomana kumupa twaambo atumbi tuyungizidwe.
[Kabbokesi kali apeeji 7]
Imyaka Iili Cuulu—Sena Mmyaka Iini naa Kuli Ncoyiiminina?
Mbwaanga ibunji bwazibeela zyabbuku lyamu Bbaibbele lya Ciyubunuzyo zyakalembwa muzitondezyo, kuli mubuzyo uubuzigwa. Imubuzyo ngwakuti: Ino mbuti kujatikizya Bulelo bwa Kristo bwa Myaka iili Cuulu ibwaambwa mubbuku lya Ciyubunuzyo? Sena mmyaka ini-ini naa kuli ncociiminina ciindi eco?
Kuli bumboni bunji ibutondezya kuti myaka ini iili cuulu njeyaambwa. Amubone ceeci: Imwaapostolo Paulo waamba Bulelo bwa Kristo bwa Myaka iili Cuulu lyalo bantu nobayoobetekwa kuti mbuzuba. (Incito 17:31; Ciyubunuzyo 20:4) Imwaapostolo Petro wakalemba kuti ibuzuba bomwe (imawoola aali 24) kuli Jehova buli mbuli myaka iili cuulu. (2 Petro 3:8) Eco citondezya kuti obu “buzuba” bwalubeta mbwamyaka ini iili cuulu. Kunze lyaboobo, ku Ciyubunuzyo 20:3, 5-7, tulabala iziindi zyone imakani aamba “myaaka iili cuulu.” Eci caamba ciindi cini cibikkidwe icilaa mpocigolela.