Impindu Zijanwa Mukuyanda Jwi lya Leza
“Kobuyandisya [busongo], lino buyookutabilila. . . . Ubukakatile, kuti bukulemeke.”—TUSIMPI 4:6, 8.
1. Ino kuliyanda ncobeni Jwi lya Leza kujatikizya nzi?
IKUBALA Bbaibbele kulayandika kapati ku Munakristo. Pele kwiile kulibala buyo takutondezyi kuti muntu ulaliyandisya Jwi lya Leza. Ino mbuti naa muntu umwi ulalibala Bbaibbele pele ucita zintu nzyolikasya? Cakutadooneka Ijwi lya Leza taliyandi mbuli mbwaakaliyanda imulembi wa Intembauzyo 119. Ikuyanda Jwi lya Leza kwakapa kuti atobele nzyolyakali kuyanda kuti acite mubukkale.—Intembauzyo 119:97, 101, 105.
2. Nimpindu nzi izijanwa kubusongo ibuyeeme aa Jwi lya Leza?
2 Ikutobela nzyolikulwaizya Jwi lya Leza kuyandika kucinca-cinca lyoonse mukuyeeya amubukkale bwamuntu. Ibukkale buli boobo butondezya busongo bwabunaleza calo caamba kubelesya luzibo lugwasya alimwi akuteelela ikujanwa kwiinda mukwiiya Bbaibbele. “Kobuyandisya [busongo], lino buyookutabilila. Kobulemeka, lino buyookusumpula; ubukakatile, kuti bukulemeke. Buyoobika ingala iiebeka amutwe wako, buyookupa munsini wabulemu.” (Tusimpi 4:6, 8, 9) Takuliboteli kaka kukulwaizya oku kwakuti tuyandisye Jwi lya Leza akusololelwaa ndilyo! Nguni uutayandi kukwabililwa, kusumpulwa alimwi akulemekwa?
Ikukwabililwa Kumapenzi Aatamani
3. Nkaambo nzi Banakristo ncobeelede kukwabililwa ono kwiinda lyoonse, alimwi nkuzwa kuli ni?
3 Muunzila nzi muntu mwakwabililwa abusongo mbwajene kwiinda mukwiiya akutobela Jwi lya Leza? Ulakwabililwa kuli Saatani Diabolosi. Jesu wakayiisya basikumutobela kuti kabapailila kuvwunwa kumubi, Saatani. (Matayo 6:13) Sunu, ikubikkilizya kulomba ooku mumipailo yesu kulayandika kapati. Saatani amadaimonaakwe bakatandwa kuzwa kujulu mumwaka wa 1914, aboobo kuzwa leelyo Saatani ulijisi “bukali bupati, nkaambo ulizi kuti ciindi ncacijisi nciniini buyo.” (Ciyubunuzyo 12:9, 10, 12) Aciindi cino cakumamanino, ibukali bwakwe bweelede kuti bwaindila mbwayaabuzumanana kulwisya baabo “babamba milazyo ya-Leza akujata bumboni bwa-Jesu Kristo” pele katazwidilili.—Ciyubunuzyo 12:17.
4. Ino Banakristo bakwabililwa buti kukuyunga kwa Saatani atooye twakwe?
4 Mubukali bwakwe, Saatani wazumanana kuleta mapenzi kubabelesi aba Banakristo alimwi akukulwaizya kuti bapenzyegwe naa kuleta zisinkilizyo zimbi kujatikizya mulimo wabo. Alimwi uyanda kweena basikwaambilizya Bwami kuti babikkile maanu kumakani mbuli aakubaa mpuwo anyika, ikuyandisya kulyookezya, ikuyandisya kujana zintu zyakumubili akuyandisya kusobana muciindi cakubikkila maanu kumulimo wakukambauka Bwami. Ncinzi cili mukukwabilila babelesi ba Leza basyomeka kuti batatobeli kuyunga kwa Saatani nokuba kucegwa mutooye twakwe? Imupailo, icilongwe cibotu a Jehova alimwi alusyomo lwakuti zisyomezyo zyakwe ziyoozuzikizigwa ncobeni zilayandika kapati. Pele zyoonse ezi ziliswaangene aluzibo alimwi amakanze aakutobela ziyeezyo zya Jwi lya Leza. Iziyeezyo ezi zilajanwa kwiinda mukubala Bbaibbele alimwi amabbuku aagwasya kuteelela Bbaibbele, ikujanika kumiswaangano ya Bunakristo, ikutobela lulayo lwamu Magwalo luzwa kumusyomima naa kwiinda mukuyeeya cakuzinzibala aanjiisyo zyamu Bbaibbele nzyotuyeezegwaa muuya wa Leza.—Isaya 30:21; Johane 14:26; 1 Johane 2:15-17.
5. Muunzila nzi mobutukwabilila ibusongo buyeeme aa Jwi lya Leza?
5 Aabo ibayandisya Jwi lya Leza balakwabililwa munzila zimbi. Mucikozyanyo, balakweeleba kutyompokelwa kwamumizeezo amalwazi aajanwa akaambo kakubelesya misamu iikola, kufweba tombwe alimwi abwaamu. (1 Ba-Korinto 5:11; 2 Ba-Korinto 7:1) Kwiina nobajatikizigwa mukuzwangana akaambo kakuvwiya naa kubbodola mukwaambaula. (Ba-Efeso 4:31) Alimwi kunyina nobadonaikwa kuti ambweni kuli nobabala makani aabusyaabusongo bwanyika ino aakubeja. (1 Ba-Korinto 3:19) Kwiinda mukuyandisya Jwi lya Leza, balakwabililwa kuzintu zinga zyanyonganya bulongwe bwabo a Leza alimwi abulangizi bwabuumi butamani. Lyoonse bajata bubi kugwasya basimukobonyina kuti basyome zisyomezyo zibotu izili mu Bbaibbele, mbwaanga balizi kuti kwiinda mukucita boobo ‘bayoolifutula beni alimwi abaabo babateelelela.’—1 Timoteo 4:16.
6. Mbuti busongo buyeeme aa Jwi lya Leza mbobunga bwatukwabilila neciba ciindi notuli mubukkale bukatazya?
6 Masimpe, bantu boonse—kubikkilizyaa baabo ibaliyanda Jwi lya Leza balasikilwa “ziindi zyalufu azyamapenzi.” (Mukambausi 9:11) Noziba buti zintu, bamwi akati kesu bayoosikilwa mapenzi aaletwaa zilengwaleza, imalwazi mapati, intenda naa lufwu aciindi citayeeyelwi. Pele nokuli boobo, tulikwabilidwe. Kwiina penzi linga lyamunyonganizizya limwi imuntu uuliyandisya ncobeni Jwi lya Leza. Aboobo tatweelede kuciindizya kulibilika kujatikizya cinga catucitikila kumbele. Itwamanizya buyo kuzibikkila maanu zintu zyoonse ziyandika, cilainda kugwasya kuzisiya mumaanza aa Jehova zyoonse alimwi akutazumizya kutasyomeka kwabuumi kuti kutubuzye luumuno. (Matayo 6:33, 34; Ba-Filipi 4:6, 7) Lyoonse kamuyeeya kuti bulangizi bwabubuke buyoozuzikizigwa ncobeni alimwi akuti kuyooba buumi ibwiinda kubota eelyo Leza ‘nayoolengulula zintu zyoonse, kuti zibe zipya.’—Ciyubunuzyo 21:5; Johane 11:25.
Amube ‘Vwu Bbotu’
7. Ncikozyanyo nzi Jesu ncaakaambila makamu-makamu aabantu ibakaboola kuzoomuswiilila?
7 Mbociyandika ikubaa ciimo ciluzi kujatikizya Jwi lya Leza kwakatondezyegwa mucikozyanyo cimwi ca Jesu. Jesu naakali kwaambilizya makani mabotu mucooko coonse ca Palesitaini, imakamu-makamu aabantu akabungana kuti bamuswiilile. (Luka 8:1, 4) Pele tabali boonse ibakali kuliyandisya ncobeni Jwi lya Leza. Cakutadooneka, ibanji bakaboola kuzoomuswiilila nkaambo bakali kuyanda kubona maleele naa nkaambo bakali kwiikkomanina nzila yakwe yakuyiisya. Aboobo Jesu wakaambila makamu-makamu aabantu icikozyanyo eci: “Musyangi wakazwa kukuminza mbuto zyakwe, eno naakali kuya buminza zimwi zyakawida munzila, zyakalyataulwa matende, abayuni bamujulu bazilya. Zimwi zyakawida mumabwe, nezyakamena buyo zyakapusama nkaambo zyabula musyu. Zimwi zyakawida mumamvwa, nezyakamena antoomwe amamvwa, azifundilizya. Zimwi zyakawida muvu bbotu, zyamena, zyazyala mwaanda.”—Luka 8:5-8.
8. Mucikozyanyo ca Jesu, ino mbuto yiiminina nzi?
8 Cikozyanyo ca Jesu cakatondezya kuti kwakali kuzyooba kwiimpana akati kabantu kujatikizya mbobakali kuzooateelela makani mabotu, ikweelana aciimo camoyo wayooyo uuwamvwa. Imbuto iili mukubyalwa “ninkani ya-Leza.” (Luka 8:11) Naa kweelanaa cibalo cimbi cacikozyanyo mbocaamba kuti, imbuto “[m]makani aa-Bwami.” (Matayo 13:19) Jesu wakali kukonzya kubelesya twaambo toonse tobile nkaambo imutwe wamakani wa Jwi lya Leza, Mbwami bwakujulu ibweendelezyegwaa Jesu Kristo kali Mwami omo Jehova mwayoozyibya bulelo bwakwe akusalazya zina lyakwe. (Matayo 6:9, 10) Aboobo atwaambe kuti, mbuto mmulumbe wamakani mabotu uuli mu Jwi lya Leza, Ibbaibbele. Bakamboni ba Jehova balaukankaizya mulumbe oyu wa Bwami mbobaminzila imbuto nobaiya Sikuminza mutaanzi, Jesu Kristo. Ino bantu babatambula buti?
9. Ncinzi ciimininwaa mbuto iiwida (a) munzila? (b) mumabwe? (c) mumamvwa?
9 Jesu wakati imbuto zimwi ziwida munzila, elyo zilalyataulwa. Eci caamba bantu ibajisi bubi cakuti balakakilwa kwiibikkila maanu imbuto ya Bwami kutegwa imene mumyoyo yabo. Kabatana talika kuliyandisya Jwi lya Leza, “ndilyonya wasika Saatani, wabanyanga makani mumyoyo yabo, kuti batasyomi akufutulwa.” (Luka 8:12) Imbuto zimwi ziwida mumabwe. Eci caamba bantu ibaukkomanina mulumbe wa Bbaibbele pele ibataulekeli kweendelezya myoyo yabo. Nokucitika mapenzi naa nocibayumina ikutobela lulayo lwa Bbaibbele, ‘balalenguka’ nkaambo banyina miyanda. (Luka 8:13) Mpoonya kuli baabo ibamvwa jwi pele ibafwundilizidwe “[a]makataazyo, alubono, amisobano yabuumi.” Mpoonya mbubwenya mbuli tusamu itwapatila mumamvwa, “tabazyali micelo” pe.—Luka 8:14.
10, 11. (a) Mbaani ibaimininwaa vwu bbotu? (b) Ncinzi ncotweelede kucita ikutegwa ‘tujatisye’ Jwi lya Leza mumyoyo yesu?
10 Camamanino, kuli imbuto iziwida muvwu bbotu. Eci caamba bantu ibatambula mulumbe “amoyo mubotu uululeme.” Ee, umwi aumwi wandiswe ulombozya kuba mucibeela cabantu aba. Pele kumamanino, ikulanga kwa Leza kulikke nkokubeleka. (Tusimpi 17:3; 1 Ba-Korinto 4:4, 5) Ijwi lyakwe lyaamba kuti ikuba “amoyo mubotu uululeme” ncintu ncotutondezya kwiinda mumicito yesu lino kusikila kulufwu naa kusikila ciindi Leza nayoonyonyoona bweende bwazintu obu ibubyaabi. Ikuti naa mbotwaumvwida buyo mulumbe wa Bwami twaukkomanina, ncibotu eco. Pele, aabo ibajisi moyo mubotu uululeme balalizumina Jwi lya Leza alimwi ‘balalijatisya, balazyala micelo calunamba.’—Luka 8:15.
11 Inzila ilikke iisyomeka njotunga twajatisya Jwi lya Leza mumoyo wesu nkulibala akuliiya tolikke alimwi acaantoomwe abasyomima. Eci cibikkilizya kucibelesya kabotu cakulya cakumuuya icipegwa kwiinda munzila iibikkidwe ikutegwa zilanganizigwe zintu zyakumuuya zyabasikutobela Jesu beni-beni. (Matayo 24:45-47) Kwiinda munzila zili boobo, aabo ibalijatisya Jwi lya Leza mumyoyo yabo balakulwaizigwaa luyando kuti ‘bazyale micelo calunamba.’
12. Mmicelo nzi njotweelede kuzyala cakuliyumya?
12 Mmicelo nzi iizyalwa muvwu bbotu? Notwaamba makani aazisyango zini, imbuto zilakomena akuba tusamu tuzyala micelo iijisi mbuto zyamusyobo nguwenya zyalo izikonzya kuminzwa alimwi kutegwa zizyale micelo iimbi. Mbubwenya buyo, ibantu abo ibajisi moyo uuyandisya alimwi uululeme, imbuto yajwi ilakomena mulimbabo calo cibapa kuti bayaambele munzila yakumuuya kusikila mane limwi abalo bakonzya kuminza imbuto zyabo mumyoyo yabantu bambi. (Matayo 28:19, 20) Alimwi imulimo wabo wakuminza ujatikizya kuliyumya. Jesu wakatondezya mbokuyandika kuliyumya kumakani aakuminza naakaamba kuti: “Oyo uuliyumya kusikila kumamanino uzoofutuka. Nkabela aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.”—Matayo 24:13, 14.
‘Ikuzyala Micelo Yamilimo Mibotu Yamisyobo Yoonse’
13. Mmupailo nzi Paulo ngwaakaamba iwakaswaanganya micelo kuluzibo lwa Jwi lya Leza?
13 Awalo mwaapostolo Paulo wakaamba makani aajatikizya mbokuyandika kuzyala micelo alimwi oko kuzyala micelo wakakuswaanganyaa Jwi lya Leza. Wakapailila basyominyina kuti “mukazuzigwe luzibo lwakuziba makanze aa [Leza] mbwaabede, akuba abusongo bunji bwakumvwisya makani aamuuya, kuti mweende munzila iielede cakubotezya Mwami muziyanza zyoonse, muzyale micelo yamilimo mibotu yamisyobo yoonse.”—Ba-Kolose 1:9, 10; Ba-Filipi 1:9-11.
14-16. Ikweendelana amupailo wa Paulo, mmicelo nzi iizyalwaa baabo ibayandisya Jwi lya Leza?
14 Aboobo Paulo utondezya kuti ikubaa luzibo lwa Bbaibbele taili njembaakani yamamanino. Muciindi caboobo, ikuyandisya Jwi lya Leza nkokutukulwaizya ‘kweenda munzila iiyelede cakubotezya Jehova’ kwiinda mukuzumanana ‘kuzyala micelo yamilimo mibotu yamisyobo yoonse.’ Mmilimo nzi eyo mibotu? Ikukambauka makani mabotu aa Bwami ngomulimo mupati wa Banakristo mumazubaano aakumamanino. (Marko 13:10) Kunze lyaboobo, aabo ibaliyanda Jwi lya Leza balasolekesya ikusanga mali lyoonse aakugwasilizya mulimo oyu. Balacikkomanina coolwe eci nkaambo balizyi kuti “oyu uupa calumwemwe nguuyandwa kwa-Leza.” (2 Ba-Korinto 9:7) Imali ngobasanga abelesyegwa kubweendelezi bwamaanda aa Beteli aayinda kumwaanda omwe kwalo nkoweendelezyelwa mulimo wakukambauka Bwami alimwi mumitabi imwi nkwaapangilwa ma Bbaibbele alimwi amabbuku aabandika zyamu Bbaibbele. Alimwi imali ngobasanga agwasya kubbadelela miswaangano ya Bunakristo mipati-pati alimwi akutuma balangizi beendeenda, bamishinali alimwi abambi bakambausi baciindi coonse.
15 Imilimo mibotu iimbi ijatikizya kuyaka akulanganya masena aabukombi bwakasimpe. Ikuyandisya Jwi lya Leza kukulwaizya bakombi ba Leza ikubona kwaamba kuti Maanda aacitilwa Miswaangano Mipati-pati alimwi a Ŋanda zya Bwami tazilekelezegwi. (Amweezyanisye Nehemiya 10:39.) Mbwaanga izina lya Leza lililembedwe kumbelaa maanda aya, cilayandika kapati kuti mukati alimwi aanze kaalondokede alimwi kaali mabotu, alimwi akuti ibukkale bwabaabo ibakombela mumaanda ayo kabunyina busampaulike. (2 Ba-Korinto 6:3) Ibanakristo bamwi balakonzya kucita kwiinda waawo. Ikuyandisya Jwi lya Leza kubakulwaizya kweenda misinzo milamfwu ikutegwa bakatole lubazu mukuyaka masena aakukombela muzyooko zyanyika imuyandika lugwasyo nkaambo kabucete naa kubula bantu bahaazibwene.—2 Ba-Korinto 8:14.
16 Alimwi ‘ikuzyala micelo yamilimo mibotu yamisyobo yoonse’ kulabikkilizya akulanganya mikuli yamukwasyi alimwi akubikkila maanu ku Banakristoma. Ikuyandisya Jwi lya Leza kutukulwaizya kuba bantu babikkila maanu kapati kuzintu nzyobayandika aabo “baciinga calusyomo” alimwi ‘akukulemeka basazima.’ (Ba-Galatiya 6:10; 1 Timoteo 5:4, 8) Kujatikizya ceeci, mmulimo mubotu kapati ikuswaya baciswa akuumbulizya balila. Alimwi tauliboteli kaka imulimo uubelekwaa baalu bamumbungano alimwi ama Kkomitii aa Hospital Liaison mukugwasilizya baabo ibajana buyumuyumu kumakani aabusilisi bwabo! (Incito 15:29) Mpoonya kuli ntenda izili mukuvwula—zimwi izicitwaa zilengwaleza azimwi akaambo kakutayeeya kabotu kwabantu. Kwiinda mulugwasyo lwamuuya wa Leza, Bakamboni ba Jehova batembaulwa muzyooko zinji zyanyika akaambo kakufwambaana kugwasya basyominyina ikubikkilizyaa bambi ibajatikizigwa mumanyongwe alimwi antenda. Eezi zyoonse mmicelo mibotu iitondezyegwaa baabo ibayandisya Jwi lya Leza.
Ibulumbu Bwabulemu Ibuli Kumbele
17, 18. (a) Ncinzi cili mukuzuzikizigwa kwiinda mukuminza imbuto zya Bwami? (b) Nzintu nzi iziyandika kapati nzyobayoolibonena kazicitika lino-lino abo ibayandisya Jwi lya Leza?
17 Ikuminza imbuto zya Bwami kwazumanana kuleta mpindu zitalivwulili kubantu. Mumyaka yalino-lino, ibantu bainda ku 300,000 amwaka bauzumizya mulumbe wa Bbaibbele ikubaa miyanda mumyoyo yabo kusikila nkobalyaaba kubelekela Jehova mumaumi aabo akutondezya kulyaaba oku kwiinda mukubbapatizigwa mumeenda. Elo mbwabulemu kaka ibuumi ibubalindila kumbele!
18 Abo ibaliyanda Jwi lya Leza balizyi kuti lino-lino Jehova Leza uyooimikila kutegwa akasumpule zina lyakwe. “Babuloni Mupati,” ibulelo bwanyika yoonse bwabukombi bwakubeja buyoonyonyoonwa. (Ciyubunuzyo 18:2, 8) Mpoonya aabo ibakaka kweendelanya bukkale bwabo azyaamba Jwi lya Leza bayoojaigwa Mwami Jesu Kristo. (Intembauzyo 2:9-11; Daniele 2:44) Kuzwawaawo, Bwami bwa Leza buyooleta kukatalukwa ikutamani kuzwa kumilandu, inkondo alimwi antenda zimbi. Takucikayandiki kuumbulizya bantu akaambo kamacise, malwazi alimwi alufwu.—Ciyubunuzyo 21:3, 4.
19, 20. Mbukkale nzi bwabulemu kumbele ibulangilwaa baabo ibaliyandisya ncobeni Jwi lya Leza?
19 Njabulemu kaka milimo mibotu iiyoobelekwa kuciindi eco abaabo ibayandisya Jwi lya Leza! Imulimo mutaanzi ngobayoocita calukondo basikufwutuka Harmagedoni ngwakusandula nyika ino kuba paradaiso. Bayoobaa coolwe cakulibambila zintu iziyandika kubantu bafwide pele kuli Leza ibali mukulyookezya buyo mucuumbwe alimwi kabajisi bulangizi bwakuyooba akati kabaabo ibayoobuka kubafwu. (Johane 5:28, 29) Kuciindi eco, kunooli bweendelezi bulondokede kubantu boonse bamunyika ibuzwa ku Mwami Mupati Jehova, kwiinda mu Mwanaakwe uusumpwidwe, Jesu Kristo. ‘Mabbuku ayoovwununwa,’ aayootondezya malailile aa Jehova kujatikizya bukkale bwamunyika impya.—Ciyubunuzyo 20:12.
20 Caakusika ciindi Jehova mwini ncabikkide, Banakristo basyomeka ibaciinga cabananike bayoobusigwa kubulumbu bwabo bwakujulu kabali “baswaana bakwe antoomwe a-Kristo.” (Ba-Roma 8:17) Mubweendelezi bwa Kristo bwa Myaka iili Cuulu, ibantu boonse anyika ibayandisya Jwi lya Leza bayoolondolwa mumizeezo amubili. Ibayoosyomeka mukusunkwa kwamamanino bayoopegwa bulumbu bwabuumi butamani alimwi bayookkomana “abulubulo bulemu bwabana ba-Leza.” (Ba-Roma 8:21; Ciyubunuzyo 20:1-3, 7-10) Eco cinooli ciindi cibotu kaka! Masimpe, kunyina makani naa Jehova watupa bulangizi bwakujulu naa bwaanyika, iluyando lukakatila ku Jwi lyakwe alimwi amakanze aakupona kweelana abusongo bwabunaleza kuyootukwabilila lino. Pele kumbele ibusongo obu ‘buyootusumpula nkaambo twakakatila kuli mbubo.’—Tusimpi 4:6, 8.
Sena Inga Mwapandulula?
◻ Mbuti mbokunga kwatukwabilila ikuyandisya Jwi lya Leza?
◻ Ino mbuto yamucikozyanyo ca Jesu yiiminina nzi, alimwi ino iminzwa buti?
◻ Ino mbuti mbotunga twalitondezya kuti tuli ‘vwu bbotu’?
◻ Nimpindu nzi nzyobanga balangila aabo ibayandisya Jwi lya Leza?
[Cifwanikiso icili apeeji 26]
Imbuto yamucikozyanyo ca Jesu yiiminina mulumbe wamakani mabotu uuli mu Jwi lya Leza
[Kulumba]
Garo Nalbandian
[Cifwanikiso icili apeeji 27]
Bakamboni ba Jehova balamwiiya Sikuminza Mupati
[Zifwanikiso izili apeeji 30]
Basikufwutuka Harmagedoni bayooikkomanina micelo yamunyika