Mibuzyo Yabasikubala

Ino kuvwoota bakulanga buti Bakamboni ba Jehova?

Kuli njiisyo zisalede mu Bbaibbele izigwasya babelesi ba Leza ikwaalanga munzila iiluzi makani aya. Pele imakani aakuvwoota kwaagama, kulibonya kuti kunyina njiisyo iikasya kucita boobo iiliko. Mucikozyanyo, ikabunga kabeendelezi keelede kujana mweelwe wabantu ibazumina abatazumini ikutegwa bacikonzye kusala mumakani aajatikizya nkamu yabo yabweendelezi. Imbungano zya Bakamboni ba Jehova kanjikanji zilasala kujatikizya ciindi camiswaangano alimwi ambwaayelede kubelesyegwa mali aambungano kwiinda mukutambika maanza.

Pele ino mbuti kujatikizya kuvwoota kwamucisi? Muzisi zimwi ibantu mobaangulukide kulisalila bweendelezi, imweelwe wiinda ku 50 pasenti iwabantu bamucisi tabaunki kumasena aakuvwootela mubuzuba bwakuvwoota. Bakamboni ba Jehova tabakasyi bantu kuvwoota; alimwi kunyina nobasola kucita obo cakuzangila bubambe bubikkidwe amfwulumende kumakani aakuvwoota. Balabalemeka akubelekelaamwi abaleli abo ibasalwa mukuvwoota kuli boobo. (Ba-Roma 13:1-7) Kumakani aakujatikizigwa mukuvwootela muntu uumwi waima mumavwooti, umwi aumwi wa Bakamboni ba Jehova ulalisalila kweelana amanjezeezya aakwe aayiisidwe aa Bbaibbele alimwi akuteelela mukuli ngwajisi kuli Leza aku Cisi. (Matayo 22:21; 1 Petro 3:16) Mukusala kwaumwi aumwi kuli boobu, kuli zintu zili mbozibede Bakamboni nzyobalanga-langa.

Cakusaanguna, ikujatikizya basikumutobela, Jesu Kristo wakati: “Tabali banyika, mbuli mbwentali wenyika amebo.” (Johane 17:14) Injiisyo eyi balaibikkila maanu kapati Bakamboni ba Jehova. Akaambo kakuti “tabali banyika,” tabatoli lubazu pe mutwaambo twacisi twanyika.—Johane 18:36.

Icabili, imwaapostolo Paulo kalyaamba lwakwe, wakati wakali “ngambela” uuiminina Kristo kubantu bakuciindi cakwe. (Ba-Efeso 6:20; 2 Ba-Korinto 5:20) Bakamboni ba Jehova basyoma kuti Kristo Jesu ono ubikkidwe acuuno cabwami kali Mwami wa Bwami bwa Leza bwakujulu alimwi balo mbubwenya mbuli bangambela beelede kucaambilizya eci kubantu bamasi. (Matayo 24:14; Ciyubunuzyo 11:15) Bangambela bayandika kuti kabanyina nkobayeeme alimwi akutajatikizigwa mutwaambo twazisi oko nkobatumidwe. Bakamboni ba Jehova mbobali baiminizi ba Bwami bwa Leza bwakujulu, abalo balimvwa kuti tabeelede kujatikizigwa mutwaambo twacisi omo mobakkala.

Ikaambo katatu keelede kubikkila maanu nkakuti aabo ibatola lubazu mukusala muntu kwiinda mukumuvwootela kuti akkale acuuno cimwi balakonzya kubaa mulandu akaambo kazintu muntu oyo nzyacita. (Amweezyanisye 1 Timoti 5:22, Ci.) Banakristo beelede kubikkila maanu kulanga-langa naa inga bayanda kubweza mukuli uuli boobo.

Cane, Bakamboni ba Jehova balalulemeka kapati lukamantano lwabo lwa Bunakristo. (Ba-Kolose 3:14) Izikombelo nozijatikizigwa mutwaambo twacisi, icicitika lyoonse nkwaandaana akati kabasizikombelo. Mukwiiya Jesu Kristo, Bakamboni ba Jehova balalikasya kujatikizigwa mutwaambo twacisi elyo mukucita boobo babamba lukamantano lwabo lwa Bunakristo.—Matayo 12:25; Johane 6:15; 18:36, 37.

Casanu alimwi camamanino, ikutajatikizigwa kwabo mutwaambo twacisi kupa kuti Bakamboni ba Jehova kabaangulukide kusikila basimapolitikisi bamisyobo yoonse akubakananina mulumbe uuyandika kapati wa Bwami.—Ba-Hebrayo 10:35.

Akaambo kanjiisyo zyamu Magwalo izyaambwa atalaawa, muzisi zinji Bakamboni ba Jehova balalisalila beni ikutajatikizyigwa mukuvwoota kwacisi alimwi ikwaanguluka kwabo kujatikizya kusala kuli boobo kulilembedwe mumilawo yacisi mobakkala. Pele ino mbuti naa imulawo wacisi wayanda kuti basicisi boonse bavwoote? Nokuli boobo, Kamboni umwi aumwi ujisi mukuli wakusala kweelana amanjezeezya aakwe aayeeme anjiisyo zya Bbaibbele kujatikizya mbwayelede kucita mubukkale obo. Ikuti naa umwi wasala kuunka kubusena buvwootelwa, ooko nkusala kwakwe. Ncacita mubusena obo bwakuvwootela cili akati kanguwe a Mulengi wakwe.

Imagazini ya Ngazi Yamulindizi yamu November 15, 1950 amapeeji 445 a 446, yakati: “Ooko Kaisara nkwasinikizya basicisi boonse kuvwoota . . . [Bakamboni] balakonzya kuunka kubusena bwakuvwootela akunjila mutwaanda twakuvwootela. Mmuukati akaanda aka mobeelede kusaina kapepa naa kulemba zintu nzyobasyoma beni. Basikuvwoota balacita kufwumbwa ncobayanda kujatikizya tupepa twabo twamavwooti. Aboobo lino kubusyu bwa Leza nkobeelede kulisalila cakucita bakamboni bakwe kweelana amilawo yakwe alimwi akweendelana alusyomo lwabo. Tauli mukuli wesu kubalailila ncobeelede kucita kujatikizya kapepa kakuvwootela.”

Pele ino mbuti ikuti naa mulumi uutasyomi wamusungilizya mukaintu wakwe Munakristo kuti akajanike kukuvwoota? Weelede kulibombya kumulumaakwe mbubwenya Banakristo mbobalibombya kumaami aazisi. (Ba-Efeso 5:22; 1 Petro 2:13-17) Ikuti naa wamvwida mulumaakwe elyo waunka kukaanda kakuvwootela, ooko nkusala kwakwe. Kunyina weelede kumutongooka pe.—Amweezyanisye Ba-Roma 14:4.

Ino mbuti kujatikizya cisi kwalo ikuvwoota nkoutali mulawo buya pele ikuli lunya kujatikizya baabo ibataunki kumasena aakuvwootela, atwaambe kuti ambweni kuli mapenzi aakuumwa aalangilwa? Naa mbuti naa bantu bamwi nokuba kuti taakwe mulawo uubasinikizya kuvwoota, balasubulwa kapati munzila imwi nkaambo kakuti tiibakainka kubusena bwakuvwootela? Mubukkale buli boobu alimwi abumbi bukozyenye, Imunakristo weelede kulisalila cakucita mwini. “Umwi aumwi uleelede kunyampula mukuli wakwe mwini.”—Ba-Galatiya 6:5.

Kulakonzya kakuli bantu bamwi ibafwumpulwa nobabona Bakamboni ba Jehova bamwi kabaunka kubusena bwakuvwootela aciindi cakuvwoota mucisi cabo pele bamwi kabataunki. Balakonzya kwaamba kuti, ‘Bakamboni ba Jehova tabakamantene munjiisyo zyabo.’ Pele bantu beelede kuzyiba kuti mumakani mbuli yaaya aajatikizya manjezeezyaa muntu, Munakristo umwi aumwi weelede kulisalila cakucita mwini mumeso aa Jehova Leza.—Ba-Roma 14:12.

Kufwumbwa kusala kugeme umwi aumwi nkobacita Bakamboni ba Jehova mubukkale bwiindene-indene, balabikkila maanu kapati kuti bazumanane aciimo cabo ca Bunakristo cakutajatikizyigwa mutwaambo twacisi alimwi akuba bantu baangulukide kubandika. Muzintu zyoonse balanga kuli Jehova Leza kuti abayumye abape busongo akubagwasya kulikasya kuubya-ubya lusyomo lwabo munzila iili yoonse. Aboobo batondezya lusyomo lwabo mumajwi aasintembauzyo aakuti: “Nduwe mampangala aangu amacijilo aangu. Kondizulwida akundeenzya nkaambo kazina lyako.”—Intembauzyo 31:3.