Bunakristo Bwini-bwini Bwazunda!
“Munzila eeyi Majwi aa Mwami akali kuya bumwaika akubeleka canguzu.”—MILIMO 19:20, Ci.
1. Amupandulule mbobwakamwaika Bunakristo mumwaanda wamyaka wakusaanguna.
KABAKULWAIZIGWAA nguzu zyamuuya uusalala, Banakristo bakusaanguna bakaambilizya jwi lya Leza cabusungu butakonzyi kutyompesegwa. Haazibwene umwi mumakani aakaindi wakalemba kuti: “Bunakristo bwakamwaika cakufwambaana kapati muzisi zyakali kweendelezyegwaa bana Roma. Kuzyikusika mumwaka wa 100, kulangilwa kuti muzyooko zyoonse zyakeengelede lwizi lwa Mediterranean Banakristo bakaliko.”
2. Mbuti Saatani mbwaakasoleka kudyaaminina makani mabotu, alimwi ino eci cakasinsimidwe buti?
2 Saatani Diabolosi kunyina naakali kukonzya kubatyompya Banakristo bakusaanguna. Muciindi caboobo, wakasola kuzunda makani mabotu kwiinda mukubelesya nzila imbi—iluleyo. Mucikozyanyo cakwe camaila ansaku, Jesu wakasinsimide kuti eci cakali kuyoocitika. (Matayo 13:24-30, 36-43) Awalo mwaapostolo Petro wakacenjezyede kuti kwakali kuzyooba bamayi babeji mumbungano, alimwi bakali kuzyooleta njiisyo zinyonyoona. (2 Petro 2:1-3) Mbubwenya buyo, imwaapostolo Paulo cakaanzambwene wakacenjezyede kuti luleyo lwakali kuyoosaanguna kabutanasika buzuba bwa Jehova.—2 Ba-Tesalonika 2:1-3.
3. Ncinzi cakacitika ibaapostolo nobakafwa?
3 Ibaapostolo boonse nobakamana kufwa, imakani mabotu akali kuzundwa anjiisyo zyabantu batamuzi Leza alimwi azyabasyaabusongo. Mbubwenya mbokwakasinsimwa, bamayi bakubeja bakapilinganya akuubya-ubya mulumbe uusalala wakasimpe. Mukuya kwaciindi, Bunakristo bwini-bwini bwakavwumbililwaa bwakubeja butegwa Kristendomu. Kwakaba ciinga cabeendelezi babukombi icakali kukasya bantu buyo ikubaa Bbaibbele. Nokuba kuti bakavwula kapati aabo ibakali kulyaamba kuti Mbanakristo, ibukombi bwabo tiibwakali kusalala pe. Kristendomu yakamwaika muzyooko zinji alimwi cakaba cibelesyo cizwidilila kuleta bukkale Bwacikuwa, nokuba boobo kunyina noyakajisi cilongezyo nouba muuya wa Leza.
4. Nkaambo nzi nzila ya Saatani yakusola kucinca makanze aa Leza ncoyatakazwidilila?
4 Nokuba boobo, inzila zya Saatani zyakusoleka kucinca makanze aa Jehova tiizyakazwidilila pe. Nokuba kuciindi luleyo nolwakaindide, Bunakristo bwini-bwini bwakaciliko akati kabamwi. Ibaalumi bakakkopolola Bbaibbele bakacita cabulondo alimwi bakabikkila maanu kapati. Aboobo, Ibbaibbele lini tiilyakacincwa pe nokuba kuti mulumbe walyo wakasofwaazigwaa bantu banji ibakali kulyaamba kuti bajisi nguzu zyakuyiisya ncolyaamba. Nokwakainda myaanda yamyaka, bahaazibwene mulwiiyo mbuli Jerome alimwi a Tyndale bakasandululula akumwaya Jwi lya Leza cabusicamba. Ituulunzuma twabantu bakalijana Bbaibbele alimwi a Bunakristo nokuba kuti bwakali bwakuupaupa buyo ameso.
5. Ncinzi musinsimi Daniele ncaakasinsima kujatikizya ‘luzibo lwini-lwini’?
5 Mukuya kwaciindi, mbubwenya mbokwakasinsimwa mubbuku lya Daniele, ‘luzibo lwini-lwini lwakayungizigwa.’ Eeci cacitika “kumamanino aaciindi”—ecino ciindi ncotupona. (Daniele 12:4) Muuya uusalala wabasololela bantu bayanda kasimpe nyika yoonse mbwiizulwa kuluzibo lwini-lwini lwa Leza mwini-mwini amakanzaakwe. Nokuba kuti kwainda myaanda yamyaka kakuyiisigwa njiisyo zyabasiluleyo, ijwi lya Leza lyazunda! Sunu, makani mabotu alaambilizyigwa koonse-koonse, kaasololela bantu kubulangizi bwanyika mpya iitaliboteli. (Intembauzyo 37:11) Ono atulange-lange mbolyamwaigwa mazubaano jwi lya Leza.
Ikumwaika kwa Jwi Mazubaano
6. Mmakani nzi aakasimpe Basikwiiya Bbaibbele ngobakateelela kabotu kuzikusika mumwaka wa 1914?
6 Kumamanino kwamwaanda wamyaka wa 19, ikasimpe kamu Bbaibbele kakakulwaizya kabunga ka Basikwiiya Bbaibbele, sunu ibategwa Bakamboni ba Jehova. Kuzikusika mu 1914, Ibbaibbele bakaliteelelesya. Bakakateelela kasimpe kajatikizya makanze aa Leza. Bakakulwaizigwa kapati aluyando lwa Jehova ndwaakatondezya kwiinda mukutuma Mwanaakwe anyika kutegwa ajalule nzila iisololela kubuumi butamani. Alimwi bakalizyiba zina lya Leza ancolyaamba alimwi abube bwakwe. Kunze lyaboobo, bakazyiba kuti “ciindi cabamasi” cakalimanide kale, calo cakali kutondezya kuti iciindi cakuti mfwulumende ya Bwami bwa Leza ilongezye bantu cakali afwaafwi. (Luka 21:24) Taaliboteli kaka makani aayo! Imakani mapati aya aakasimpe akeelede kwaambila bantu boonse nyika yoonse. Ibantu bakali muntenda!
7. Mbuti kasimpe ka Bbaibbele mbokazunda mazubaano?
7 Jehova wakabalongezya Banakristo bananike abo basyoonto. Sunu, aabo ibabutambula Bunakristo bwini-bwini balainda kutuulunzuma tuli cisambomwi. Alimwi ijwi lya Leza lyamwaika muzyooko zinji mbwaanga Bakamboni ba Jehova balajanika muzisi zili 235. Kunze lyaboobo, kasimpe ka Bbaibbele kabaanguzu kapati, kazunda zisinkilizyo zyoonse, zyabukombi azimbi buyo. Imulimo oyu wakukambauka nyika yoonse mbwiizulwa usinizya bumboni butadoonekwi bwakubako kwa Jesu mubweendelezi bwa Bwami.—Matayo 24:3, 14.
8. Ncinzi bantu bamwi ncobaamba kujatikizya kumwaika kwa Bakamboni ba Jehova?
8 Mbubwenya bahaazibwene mumakani aakaindi mbobakaamba kujatikizya kumwaika kwa Bunakristo kugambya mumwaanda wamyaka wakusaanguna, abalo basilwiiyo banji balaamba kujatikizya kumwaika kwabantu ba Jehova mazubaano. Kucisi ca United States, basilwiiyo bobile caantoomwe bakati: “Mumyaka iili 75 yainda, Bakamboni ba Jehova bamwaika cakufwambaana kapati . . . nyika yoonse mbwiizulwa.” Imagazini imwi yaku East Africa yaamba Bakamboni kuti “ncikombelo cili akati kazikombelo zili mukumwaika cakufwambaana kapati munyika alimwi icilemekwaa bantu muzisi zyoonse akaambo kakukakatila kapati kunjiisyo zya Bbaibbele.” Alimwi imagazini imwi yazilengwa zyaba Katolika iimwaigwa ku Europe yakaamba “zyakumwaika naa kuvwula kwa Bakamboni ba Jehova ikugambya kapati.” Ino ncinzi cagwasya kuti kumwaika oku kucitike?
Muuya Uusalala uli Mukubeleka Sunu
9. (a) Nkaambo nzi kapati kapa kuti jwi lya Leza lizunde mazubaano? (b) Mbuti bantu Jehova mbwabakwela kuti bamukombe?
9 Ikaambo kapati jwi lya Leza ncolili mukumwaika kapati mazubaano nkakuti muuya wa Jehova uli mukubeleka canguzu mbubwenya mbowakali kubeleka mumwaanda wamyaka wakusaanguna. Jesu wakati: “Takukwe muntu uukonzya kuza kulindime Taata uwakandituma atamukwela.” (Johane 6:44) Imajwi aaya atondezya kuti Leza ulabakwela kabotu-kabotu aabo ibeelela buumi, ulabakombelezya kwiinda mukubanjila mumyoyo. Kwiinda mumulimo wakukambauka uucitwaa Bakamboni bakwe, Jehova uli mukukwela “zintu ziyandisi zyazisi zyoonse”—nkokuti bantu babombe myoyo anyika, aabo bali mbuli mbelele kuti bamukombe.—Hagai 2:6, 7.
10. Mbantu bali buti ibalitambula jwi lya Leza?
10 Kunze lyakupa nguzu kubantu ba Leza kuti basisye ijwi lyakwe kusikila kumamanino aanyika; muuya uusalala wakulwaizya bantu bamisyobo yoonse ikuteelela makani mabotu. Masimpe, aabo ibatobela jwi lya Leza bazwa “kuzisi zyoonse akumisyobo yoonse akumikowa yoonse akumyaambo yoonse.” (Ciyubunuzyo 5:9; 7:9, 10) Akati kabo kuli bavwubi abacete, bayiide alimwi abatayiide. Ibamwi bakatambula jwi ciindi cankondo akupenzyegwa, pele bamwi mwakali muziindi zyaluumuno akuliiba. Ibaalumi abanakazi baatambula camaanza obile makani mabotu; mumfwulumende ziindene-indene, bukkale bwiindene-indene, munkambi zyacibbalo alimwi amumaandaa bami.
11. Mbuti muuya uusalala mboubeleka mubukkale bwabantu ba Leza, alimwi ino nkwaandaana kuli buti kulibonya?
11 Nokuba kuti bantu ba Leza baliimpene kapati, balakkala caluumuno abeenzinyina. (Intembauzyo 133:1-3) Eeci cisinizya bumboni bwakuti muuya uusalala ulabeleka muli baabo ibabelekela Leza. Imuuya wakwe ulabagwasya kapati babelesi bakwe kutondezya luyando, lukondo, luumuno, buuya alimwi abube bumbi ibubotu kapati. (Ba-Galatiya 5:22, 23) Sunu twacimvwisya cakasinsima musinsimi Malaki kaindi naakati: “Muyoobona lwaandaano akati kabaluleme ababi, aakati kabaabo babelekela Leza abaabo batamubelekeli.”—Malaki 3:18, BT.
Jwi lya Leza Lilabapa Nguzu Babelesi Basungu
12. Mbuti Bakamboni ba Jehova mbobalimvwa kujatikizya mulimo wakukambauka, alimwi mbukkale buli buti mbobalibambilide kuyaanya kujatikizya mulimo wabo wakukambauka?
12 Bakamboni ba Jehova tabali bakombi-kombi buyo pe banyina milimo. Mbankutwe mumulimo wakukambauka. Mbubwenya mbuli Banakristo bakusaanguna, balilisungwide kucita kuyanda kwa Leza, bajisi kugwasya bantu kwiiya zisyomezyo zya Bwami bwa Jehova. Mbabelesinyinaa Leza balo kwiinda mumuuya wakwe uusalala ibaleta bambi kuti bakombe Jehova. Nobacita boobo, batondezya lubomba lwa Jehova aluyando kubantu batasyomi. Balazumanana kucita boobo nobatateelelwi, nobaweelwa naa kupenzegwa. Jesu wakabaambilila limwi basikumutobela kujatikizya nzila ziindene-indene bantu mbobakali kuyootambula makani mabotu. Wakati: “Muzike tali mupati kwiinda simalelaakwe. Kuti bakandipenzya mebo, bayoomupenzya anywebo, kuti nobakabamba ijwi lyangu, nobayoobamba alyanu.”—Johane 15:20.
13. Nzintu nzi zitajaniki mu Kristendomu izivwuzyenye akati ka Bakamboni ba Jehova?
13 Tulikkomene kuti Bakamboni ba Jehova sunu balikozyenye abaabo ibakali mu Bunakristo bwini-bwini mumwaanda wamyaka wakusaanguna. Acimbi cilibonya nkwiimpana ikuliko akati ka Bakamboni ba Jehova alimwi a Kristendomu sunu. Naakazwaa kulemba zyamuuya wabunkutwe mukukambauka ngobakajisi Banakristo bakusaanguna, sikwiiya umwi wakatongooka ulaamba: “Ccita kuti kwaba kucinca kupati mubweende bwazikombelo bwasunu ikutegwa mulimo wakukambauka ube cintu cipati alimwi ku Munakristo woonse uubbapatizidwe alimwi kaweendelezyegwaa bukkale busumpukide kwiinda bwabantu batasyomi, kunyina notukonzya kuzwidilila kuya kumbele pe.” Izintu zitajaniki mu Kristendomu zilivwuzyenye akati ka Bakamboni ba Jehova! Balo bajisi lusyomo lubeleka, lusyomo lwini-lwini alimwi iluyeeme aakasimpe ka Bbaibbele cakuti bakulwaizigwa kwaambila bantu boonse ibateelela kujatikizya ndulo.—1 Timoteo 2:3, 4.
14. Ino Jesu wakali kuubona buti mulimo wakwe, alimwi ino basikwiiya bakwe sunu baubona buti?
14 Jesu wakaubikkila maanu kapati mulimo wakwe, ncecakali cintu citaanzi mubuumi bwakwe. Wakaambila Pilato kuti: “Ncendakazyalilwa, ncendakasikila ansi ano, kuti nkalungulule bwini.” (Johane 18:37) Bantu ba Leza balimvwa bwakali kulimvwa Jesu. Kabazwide kasimpe ka Bbaibbele, balasoleka kujana nzila zyakukaambila bantu boonse bakonzyeka. Inzila zimwi akati kazeezi zitondezya bupambu bugambya.
15. Mbuti bamwi mbobatondezya bupampu mukukambauka makani mabotu?
15 Mucisi cimwi caku South America, Bakamboni bakatobelezya mulonga umwi uutila mu Mulonga mupati wa Amazon ikutegwa basikile bantu ibakkede munsi-munsi akasimpe. Pele nokwakaba manyongwe mucisi eco mu 1995, ibantu buyo bakalesyegwa kwiinda mumulonga ooyo. Kabakanzide kuzumanana kupa mabbuku aapandulula Bbaibbele kubantu bakajisi luyandisisyo, Bakamboni bakatalika kutuma mulumbe oyo mumeenda. Bakalemba magwalo alimwi bakabikka mamagazini aa Ngazi Yamulindizi alimwi a Awake! muzigumbuli. Mpoonya bakawaala zigumbuli ezyo mumulonga. Eeci cakazumanana kwamyaka yone acisela kusikila leelyo bantu buyo nobakazumizyigwa alimwi kwiinda mumulonga ooyo. Boonse ibakali kukkala mumbalaa mulonga bakabalumba Bakamboni nkaambo kamabbuku. Imwanakazi umwi iwakali sikwiiya Bbaibbele wakabakumbata kumwi kazwa misozi mumeso akwaamba kuti: “Ndakali kuyeeya kuti tandikamuboni kabili. Pele neekatalika kutambula mabbuku muzigumbuli, ndakazyiba kuti tiimwakandilubide pe!” Ibambi bakali kukkala mumbalaa mulonga bakaamba kuti bakali kwaabala mamagazini cakwiinduluka-induluka. Imasena aakkala bantu manji akajisi “kwakutambwida mposo”—imasena aawo meendaa mumulonga mpaalinyona akutozya nkwaazyila alimwi zintu ziibauka mpozyakali kunga zyaima-ima kwaciindi cili mbocibede. Aayo ngamasena bantu bajisi luyandisisyo ngobakali kulingula lyoonse kutegwa babone naa kuli “magwalo” aali woonse aazwa kutalaa mulonga.
16. Mbuti ikutola lubazu zimwi ziindi mbokujanya nzila yakugwasya bamwi kuba basikwiiya?
16 Imulimo wakukambauka makani mabotu uleendelezyegwa alimwi akugwasilizyigwaa Jehova Leza abangelo bakwe basinguzu. (Ciyubunuzyo 14:6) Kwiinda mukutola buyo lubazu, zimwi ziindi kujanika zyoolwe zitayeeyelwi zyakugwasya bamwi kuba basikwiiya. Kudolopo lya Nairobi mucisi ca Kenya, banakazi Banakristo bobile ibakali mumulimo wamumuunda bakamanizya mudadaada wamaanda ngobakapedwe kuti babelekele mumo. Imukaintu mwana-mwana umwi waabagama alimwi calukkomano wakati: “Ndali kupaila kuti ndikayaane abantu bali mbuli ndinywe.” Wakakombelezya Bakamboni kuunka kuŋanda yakwe ndilyonya kutegwa bakabandike makani amwi, aboobo ciiyo ca Bbaibbele cakatalisigwa ibuzuba obo mbubona. Nkaambo nzi mukaintu oyo ncaakali kubayandila boobo aabo Banakristo bobile? Insondo zyobile zyakaindide, wakafwidwa mwanaakwe musimbi muvwanda. Aboobo naakabona mwana musankwa umwi kajisi katulakiti kamutwe wakuti, “Ino Bayandwa Bafwide Bajisi Bulangizinzi?” wakakayanda kapati elyo wakalomba musankwa oyo kuti amupe. Wakakaka, pele wakaamba kuti ibakamupa katulakiti ako mbaa Bakamboni. Ndilyonya mwanakazi oyo wakayaambele kapati alimwi wakakonzya kuliyumya mubuumba bwakufwidwa mwanaakwe.
Luyando lwa Leza Luyoozunda
17-19. Nduyando luli buti ndwaatondezya Jehova kubantu kwiinda mucinunuzyo?
17 Ikumwaika kwa jwi lya Leza munyika yoonse kuliswaangene kapati acituuzyo cacinunuzyo ca Kristo Jesu. Mbubwena mbuli cinunuzyo, imulimo wakukambauka ncitondezyo caluyando ndwajisi Jehova kubantu munyika yoonse. Imwaapostolo Johane wakasololelwaa muuya kulemba kuti: “Obuya Leza mbwaakayandisya [bantu], wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.”—Johane 3:16.
18 Amutelaike luyando ndwaakatondezya Jehova naakapa cinunuzyo. Kwamyaka iitabaliki, Leza wakali kuyanzanaa Mwanaakwe simuzyalwaalikke ngwayandisya, “matalikilo aabulenge bwa-Leza.” (Ciyubunuzyo 3:14) Jesu ulamuyanda kapati Wisi, alimwi Jehova wali kumuyanda lyoonse Mwanaakwe mane aleelyo “nyika kiitanaanzwa.” (Johane 14:31; 17:24) Jehova wakazumizya kuti oyu Mwana ngwayandisya afwe kutegwa bantunsi babe aabuumi butamani. Lulakankamanya kaka luyando ndwajisi kubantu!
19 Ibbuku lya Johane 3:17 lyaamba kuti: “Leza taakwe naakatuma Mwanaakwe munyika kuti akiibeteke nyika, pele kuti inyika ikafutulwe nguwe.” Aboobo Jehova wakatuma Mwanaakwe kuzyoocita mulimo waluyando wakufwutula, ikutali wakubeteka naa kusinganya pe. Eeci cileendelanaa majwi aa Petro aakuti: “[Jehova] tayandi kuti bantu bafwidilile, ulayanda kuti boonse bajane ciindi cakweempwa.”—2 Petro 3:9.
20. Muunzila zili buti lufwutuko moluswaangene amulimo wakukambauka makani mabotu?
20 Mbwaanga wakapa ntalisyo yalufwutuko mumulawo kwiinda mukusinyikilwa kapati, Jehova uyanda kuti kufwumbwa baabo bayanda nobavwula buti baibelesye nzila eeyi. Imwaapostolo Paulo wakalemba kuti: “Umwi aumwi uulilila izina lya-Mwami [Jehova] ulafutuka. Pele bamulilile buti ngubatana kusyoma? Alimwi bamusyome buti ngubatana kumvwa? Alimwi, bamvwe buti nikutakwe sikukambauka?”—Ba-Roma 10:13, 14.
21. Ino tweelede kulimvwa buti kujatikizya coolwe ncotujisi cakutola lubazu mumulimo wakukambauka?
21 Taciliboteli kaka coolwe eci cakutola lubazu mumulimo wakukambauka akuyiisya kucitwa nyika yoonse mbwiizulwa! Tauli muuba pe, pele Jehova ulakkomana kapati kaka eelyo nabona bantu bakwe cakusyomeka kabapona kweelanaa kasimpe alimwi akwaambila bambi makani mabotu! Aboobo, kunyina makani naa bukkale bwanu buli buti, imuuya wa Leza alimwi aluyando luli mumyoyo yanu alumukulwaizye kutola lubazu mumulimo oyu. Alimwi kamuyeeya kuti eezyo nzyotubona kazicitika nyika yoonse mbwiizulwa zipa bumboni businizya kuti ino-ino Jehova Leza uyoozuzikizya cisyomezyo cakwe cakuleta “ijulu ipya anyika impya” zyabulemu oomo ‘munookkede bululami.’—2 Petro 3:13.
Sena Mulayeeya?
• Nkaambo nzi luleyo ncolutakonzyi kulesya bakambausi bamakani mabotu?
• Mbuti jwi lya Leza mbolyazunda mazubaano?
• Muunzila nzi muuya wa Leza moubeleka sunu?
• Mbuti cinunuzyo mbociswaangene amulimo wakukambauka makani mabotu?
[Graphic/Picture on page 25]
(Kutegwa mubone bwini mbwaakkede mabala, amubone bbuku lini)
Ikuvwula kwabasikwaambilizya Bwami mumwaanda wamyaka wa 20
Mweelwe Waakati-kati Wabasikumwaya (mutuulunzuma)
6.0
5.5
5.0
4.5
4.0
3.5
3.0
2.5
2.0
1.5
1.0
0.5
1900 1910 1920 1930 1940 1950 1960 1970 1980 1990 2000
Zifwanikiso
JEROME
TYNDALE
GUTENBERG
HUS
[Kulumba]
Gutenberg a Hus: Kuzwa mubbuku litegwa The Story of Liberty, 1878
[Cifwanikiso icili apeeji 24]
Basikwiiya Bbaibbele kabaambilizya makani mabotu mumyaka yakuma 1920
[Zifwanikiso izili apeeji 26, 27]
Bantu bali mukwaateelela makani mabotu nyika yoonse mbwiizulwa
[Cifwanikiso icili apeeji 28]
Mbubwenya mbuli cituuzyo cacinunuzyo ca Jesu Kristo, imulimo wakukambauka usumpula luyando lwa Leza