Mibuzyo Yabasikubala
Mbwaanga Jehova ulilisungwide kulekelela zibi kwiinda mucituuzyo cacinunuzyo, nkaambo nzi ncociyandika kapati ku Banakristo kwaamba zibi zyabo kubaalu bamumbungano?
Ikweelanaa mbokutondezedwe mumulandu wa Davida alimwi a Bateseba, Jehova wakamulekelela Davida kucibi cakwe nokuba kuti cakali cipati akaambo kakuti Davida wakatondezya kweempwa kwini-kwini. Naakamusikila musinsimi Natani, Davida wakazumina caantangalala ulaamba: “Ndabisya kuli-Jehova.”—2 Samuele 12:13.
Nokuba boobo, Jehova tazumini buyo kulilekelela kwini-kwini kwasizibi kwampoonya-mpoonya akumulekelela, pele alimwi ulacita bubambe bwaluyando kutegwa agwasye sikulubizya kusikaa ciimo cibotu munzila yakumuuya. Mumakani aajatikizya Davida, ilugwasyo lwakaboola kwiinda mumusinsimi Natani. Sunu, mumbungano ya Bunakristo, kuli baalumi basimide munzila yakumuuya naa baalu. Sikwiiya Jakobo upandulula kuti: “Sa kuli mulwazi [munzila yakumuuya] akati kanu? Oyu aite baalu bambungano, kuti bamukombele, bamunanike mafuta muzina lya-Mwami. Kukomba kwalusyomo kulamuponya mulwazi oyo, Mwami ulamubusya, nkabela kufumbwa zibi nzyaakacita zilajatilwa.”—Jakobo 5:14, 15.
Baalu basimide balakonzya kugwasya kapati kucesya kucisa kwamoyo nkwalimvwa sikulubizya wuuside kapati. Balasoleka kapati kwiiya Jehova eelyo nobagwasya muntu uulubizizye. Kunyina nobayanda kukalala neliba neelyo nokuyandika kusinsa. Muciindi caboobo, caluyando balalanga-langa muntu nzyayandika aciindaawo. Cakukkazika moyo, balasolekesya kusitikizya kuyeeya kwamuntu uulubizizye kwiinda mukubelesya Jwi lya Leza. (Ba-Galatiya 6:1) Nokuba kuti muntu waalilwa kulyaambilila zibi zyakwe, ulakonzya kukulwaizigwa kweempwa ciindi nobamusikila baalu, mbubwenya buyo mbwaakacita Davida naakamusikila Natani. Aboobo ikukulwaizya kupegwaa baalu kugwasya sikulubizya kweeleba ntenda yakwiinduluka cibi alimwi azintu zibyaabi zikonzya kucitika akaambo kakuyumya moyo mukucita zibi.—Ba-Hebrayo 10:26-31.
Masimpe, tacili cuuba-uba pe kwaambila bantu bambi akuyanda kulekelelwa ikujatikizya micito muntu umwi iimupa kubaa nsoni. Kuyandika busicamba. Nokuba boobo, amulange-lange kwaciindi cisyoonto kulubazu lumbi. Umwi mwaalumi wakaalilwa kwaamba cibi cakwe cipati kubaalu bamu mbungano wakaamba kuti: “Ndakali kumvwa kucisa kwamumoyo kwalo kwatakali kumana. Ndakayungizizya ciindi cakumaninina mumulimo wabukambausi, pele kulimvwa kuusa tiikwakamana pe.” Wakali kuyeeya kuti kulilekelela kuli Leza kwiinda mumupailo nkukwakali kuyandika buyo kwamana, pele mubwini tabuli boobo pe, nkaambo wakatalika kulimvwa mbubwenya mbuli Mwami Davida. (Intembauzyo 51:8, 11) Elo kaka cilainda kubota kutobela lugwasyo lwaluyando Jehova ndwabikkide kwiinda mubaalu!