Mbomukonzya Kusala Njiisyo
SENA muli bantu beendelezyegwa anjiisyo? Ambweni mwaamba kuti eezyo zintu zyakaindi? Masimpe ngakuti, muntu amuntu uleendelezyegwa anjiisyo iimwi yalo njazyi kuti ilayandika kapati. Kweelana abbuku lipandulula mabala, ibbala lyakuti injiisyo lilakonzya kupandululwa kuti “mulawo uukonzya kupa muntu kuti acite cintu ciluzi.” Njiisyo zilakweendelezya kuyeeya kwesu akutupa nzila njotweelede kutobela mubuumi bwesu. Njiisyo zilakonzya kubeleka mbuli cibelesyo cigwasya kuzyiba kuti ooku nkuujwe, nkuumbo, nkuunyika alimwi akumusanza citegwa compass.
Mucikonzyanyo, Jesu wakabalailila basikumutobela bwakwe kuti, kabaubamba Mulawo Wabukkale Bubotu uujanwa kubbuku lya Matayo 7:12 waamba kuti: “Zintu zyoonse zili buti nzimuyanda kuti bantu bamucitile, anywebo amubacitile nzizyonya.” Basikutobela ba Confucius bakazyiccilila njiisyo ziyandika kapati ziitwa ku li alimwi a jen, zyalo izipa kuti muntu abe aluzyalo, kulicesya, bulemu alimwi akusyomeka. Kufwumbwa bantu batakombi, balijisi nzyobabikkide mubusena butaanzi naa busolozi bweendelezya micito yabo.
Ino Ninjiisyo Zili Buti?
Nikuba boobo, tweelede kuzyiba kuti kuli njiisyo zibotu alimwi azyibi. Mucikonzyanyo, kwamyaka iili kkumi yainda naa iinda waawo, mweelwe wabantu uuyaabuvwula babelesya kaambyo kakuti ŋombe ntaanzi njiinywa meenda mabotu. Aboobo, banji inga kabatakazyi kaambyo aaka, ambweni buya akulimvwa kuti takaambi mbabo, kaambyo aaka mmulawo uubelesyegwa mukulilemeka, ibantu banji nkobalundukila nobaleka kuccilila zyeelelo zyakulilemeka zisumpukide. Kufwumbwa naa cilizyibidwe naa pe, kaambyo aaka ncitondezyo cabulyatu, kanjikanji cisangenyi akuyandisya lubono kapati. Mubelesi umwi musankwa waku China mupati wancito wakati acipekupeku: “Tujisi buyo njiisyo zyobilo. Umwi muntu ulaula zintu cakulisungula. Alimwi umwi ujana mali citaambiki.”
Ikubelesya kaambyo aaka, kulakonzya kukonzyanyisyigwa amagineti. Ino mbuti magineti mboyikonzya kunyonganya compass? Iciindi magineti alimwi a compass nozibambana, nyeleti ya compass ilanyonganizyigwa akutondeka kutali nkonkuko. Munzila iili boobo, ikubelesya kaambyo kaŋombe ntaanzi kulakonzya kunyonganya compass yakulilemeka akunyonganya zintu zyoonse kwiinda mukuzyibikka mubusena bwabili zyoonse kulizyeezyo nzyayanda muntu.
Sena kaambyo aaka kaŋombe ntaanzi inga camulamya kuzyiba kuti kakatalika kaindi kubelesyegwa? Ibuumi buli boobu, bwakatalikila mumuunda wa Edeni iciindi bazyali besu bakutaanguna nibakacikaka ceelelo cakulilemeka cakabikkwa a Mulengi wesu. Eeco cakanyonganya compass yabo yakulilemeka. Mbwaanga tuli luzubo lwa Adamu alimwi a Eva, bantu balanyongana mubuumi bwabo acilengwa eeci cibyaabi cakuti “ŋombe ntaanzi njiinywa meenda mabotu.”—Matalikilo 3: 6-8, 12.
Ibukkale oobu bubyaabi bulalibonya koonse-koonse ikapati kuciindi cino cakasinsimwa a Bbaibbele icaambwa kuti, “mazuba aakumamanino” calo citondezya kuti tuli “[mu]ziindi zikataazya.” Bantu banji ‘balaliyanda.’ Tacilamyi pe kuba mubukkale buli boobu bwakuyanda kuba mutaanzi lyoonse muzintu zyoonse.—2 Timoteo 3:1-5.
Ambweni inga mwaazumina makani aaya ngaakalemba mukubusi wazina lya Olaf kumutabi wa Bakamboni ba Jehova wakumanyika aabukuwa naakati: “Cilakatazya kaka kulilemeka lyoonse, ikapati swebo tobana-bana. Amuzumanane kutuyeekezya kutegwa tujatisye anjiisyo zya Bbaibbele.”
Olaf wakacibona mbuli mbociyandika kuzilanga zintu kwiinda mukubelesya bupampu. Injiisyo zya Leza zilakonzya kutugwasya—tobana alimwi abapati kutegwa tuzyiccilile zyeelelo zisumpukide zyakulilemeka. Zilakonzya kutugwasya kutegwa tutabi bantu ibabelesya kaambyo kakuti ŋombe ntaanzi njiinywa meenda mabotu kufwumbwa naa cili boobo naa pe. Ikuti kamuyanda kuyungizya lwiiyo lwanu mukuzyiba njiisyo zyamu Bbaibbele mbozikonzya kumugwasya, mwalombwa kuti mucilange-lange cibalo ciccilila.
[Cifwanikiso icili apeeji 4]
Bantu banji mazuba aano tababikkili maano kuzintu nzyobayanda bantunyina