“Amuswenenene Kuli-Leza”

“Amuswenenene kuli-Leza, elyo alakwe ulamuswenenena.”—JAKOBO 4:8.

1, 2. (a) Ino bantu ncinzi kanjikanji ncobaamba? (b) Ino nkukulwaizya kuli buti Jakobo nkwaakaamba, alimwi ino nkaambo nzi ncokwakali kuyandika?

IMAJWI aakuti “Leza ulaandiswe,” alilembedwe ikutegwa abotezye zibumbwa zyacisi alimwi akuzisani zyabasikalumamba. Mabala aakuti “Tusyoma muli Leza” alilembedwe amali manji aalubulo alimwi aazipepa ikapati mali ngobapanga mazubaano. Koonse-koonse bantu baamba kuti balamvwana kapati a Leza. Nokuba boobo, sena tamuzumini kuti, ikuti kamumvwana kapati mulayandika kucita zintu zimwi kunze lyakwiide kwaamba buyo naa kulemba mabala amwi ikutegwa bantu babone?

² Ibbaibbele litondezya kuti cilakonzyeka ikupangana cilongwe a Leza. Pele kuyandika kusolekesya buya. Nobaba Banakristo bananike bamumwaanda wamyaka wakusaanguna bakali kuyandika kuciyumya cilongwe cabo a Jehova Leza. Mulangizi Munakristo Jakobo wakabacenjezya bamwi kujatikizya kulombozya kwanyama alimwi akutasalala kwabo. Mululayo lwakwe wakabikkilizya akukulwaizya ooku kwakuti: “Amuswenenene kuli-Leza, elyo alakwe ulamuswenenena.” (Jakobo 4:1-12) Ino ncinzi Jakobo ncaakali kwaamba kwiinda mukwaamba kuti “amuswenenene”?

3, 4. (a) Ino kuboneka kuti ncinzi ceelede kuti ibabali ba Jakobo bamumwaanda wamyaka wakusaanguna ncobakayeezyegwa kumajwi aakuti “amuswenenene kuli-Leza”? (b) Ino nkaambo nzi ncotukonzya kuba masimpe kuti kumusikila Leza kulakonzyeka?

³ Jakobo wakabelesya mabala aatondenzya kuti mbaakali kulembela banji bakalaazyi kale makani. Imulawo wa Musa wakalijisi malailile aagaminide aajatikizya mbuli bapaizi mbobakali kukonzya ‘kuswena’ naa kumusikila Jehova iciindi nobakali kwiiminina bantu bakwe. (Kulonga 19:22) Aboobo aabo mbaakali kulembela Jakobo, beelede kuti bakayeezyegwa kuti ikusikila Jehova tacili cintu ceelede kuubya-ubya pe. Jehova ngomuntu wiinda kulemekwa kujulu aansi.

⁴ Kunze lyaboobo, sikwiiya Bbaibbele umwi wakaamba kuti: “Ikukulwaizya ooku [kuli mulugwalo lwa Jakobo 4:8] kuyubununa njiisyo iiyandika kapati.” Jakobo wakalizyi kuti Jehova lyoonse wali kubatamba bantu batalondokede munzila yaluyando kuti baswenene kuli Nguwe. (2 Makani 15:2) Icipaizyo ca Jesu cakabamba nzila mbotu yakusikila Jehova. (Ba-Efeso 3:11, 12) Mazubaano, inzila iitozya kuli Leza ilatuba kutuulunzuma twabantu ituli mbotubede. Aboobo, ino mbuti mbotukonzya kucibelesya kabotu coolwe eeci citaliboteli? Tuyoolanga-langa nzila zyotatwe mbotukonzya kuswenena kuli Jehova Leza.

Amuzumanane ‘Kujana Luzibo’ lwa Leza

5, 6. Ino mbuti cikozyanyo ca Samuele mwana-mwana mbocitondezya zintu izijatikizyidwe ‘mukujana luzibo’ lwa Leza?

⁵ Kweelana abbuku lya Johane 17:3, Jesu wakati: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” Ibusanduluzi bunji mukapango aaka buliindene asyoonto abusanduluzi bujanwa mu New World Translation. Muciindi cakuti baambe kuti ‘bajane luzibo’ lwa Leza, bakabelesya cciti lyakuti “bazibe” Leza naa “kuziba” Leza. Nokuba boobo, bunji bwabasikwiiya bakabona kuti ibbala libelesyedwe aawa mu Cigiliki litondezya kuti kulayandika kucita azimbi zintu, nkokuti ikuzumanana, kwalo ikukonzya kupa kukamantana kabotu-kabotu acintu cimwi.

⁶ Ikuzyiba Leza kabotu-kabotu tiicakali cintu ceenzu mumazuba ngaakali kupona Jesu. Mucikozyanyo, mu Magwalo aa Cihebrayo, tubala kuti ciindi Samuele naakacili mulombe buyo, ‘tanaakaininga muzyiba Jehova.’ (1 Samuele 3:7) Sena eeci cakali kupandulula kuti Samuele wakalimuzyi buyo aasyoonto Leza wakwe? Peepe. Ibazyali bakwe alimwi abapaizi beelede kuti bakamuyiisya kapati kuti amuzyibe. Nokuba boobo, kweelanaa sikwiiya umwi, ibbala lya Cihebrayo libelesyedwe mukapango aaka lilakonzya “kubelesyegwa kupandulula cilongwe ciyumu kapati.” Samuele tanaakaininga muzyiba Jehova kapati, mbuli mbwaakazyoomuzyiba kumbele ciindi naakazyikubeleka kali caambawido ca Jehova. Samuele naakali kuyaabukomena, wakamuzyiba kabotu Jehova, wakabaa cilongwe ciyumu anguwe.—1 Samuele 3:19, 20.

7, 8. (a) Ino nkaambo nzi ncotuteelede kutyompwa kujatikizya makani aali kulamfwu aali mu Bbaibbele? (b) Ino makani nzi aamasimpe aali mu Jwi lya Leza alo ngotweelede kuliyiisya tobeni?

⁷ Sena muli mukujana luzibo lwa Jehova ikutegwa mubambe cilongwe ciyumu anguwe? Ikutegwa mucite oobo, mweelede “kuyandisya” cakulya cakumuuya Leza ncapa. (1 Petro 2:2) Tamweelede kuzulila anjiisyo zyamatalikilo buyo pe. Amusoleke kuyandaula njiisyo zyamu Bbaibbele. (Ba-Hebrayo 5:12-14) Sena njiisyo eezyo zilamutyompya akuzibona kuti zilakatazya kapati? Ikuti naa mboobo, amuyeeye kuti Jehova ngo ‘Mwiiyi Mupati.’ (Isaya 30:20) Uli cibwene mbwapa kasimpe kubantu batalondokede. Aboobo ulakonzya kumulongezya nomusoleka kuti mumvwisye ncali mukumuyiisya.—Intembauzyo 25:4.

⁸ Sena tamukonzyi kulilanga-langa kwiinda mukubelesya ‘makani aali kulamfwu aabulondo bwa-Leza.’ (1 Ba-Korinto 2:10) Aaya taali makani aatakondelezyi mbuli yaayo basikwiiya zyacikombelo alimwi abasikwiiya Bbaibbele ngobakazyanya. Ninjiisyo zigwasya zyalo izikonzya kutugwasya kuzyiba zintu zikondelezya kujatikizya mizeezo alimwi amoyo wa Taateesu siluyando. Mucikozyanyo, icinunuzyo, “busongo busisidwe” alimwi azizuminano zinji Jehova nzyaakabelesya ikutegwa agwasye bantu bakwe alimwi akuzuzikizya makanze aakwe, imakani aaya alimwi aambi buyo ngozikozyenyi limwi alakondelezya kapati akugwasya notuyanda kuti tuvwuntauzye alimwi akuliyiisya tobeni.—1 Ba-Korinto 2:7.

9, 10. (a) Ino nkaambo nzi kulisumpula ncocili cintu cibi, alimwi ino ncinzi iciyootugwasya kutegwa tuleke kulisumpula? (b) Kujatikizya luzibo lwa Jehova, nkaambo nzi ncotweelede kusoleka kulibombya?

⁹ Mbomuyaabujana luzibo mumakani aali kulamfwu aakasimpe, amucenjele ikutegwa mukonzye kutantamuka ntenda iikonzya kuboola akaambo kaluzibo, nkokuti kulisumpula. (1 Ba-Korinto 8:1) Kulisumpula nkubyaabi kapati nkaambo kupa kuti bantu batantamuke kuli Leza. (Tusimpi 16:5; Jakobo 4:6) Amuyeeye kuti kunyina muntu weelede kulisumpula akaambo kaluzibo ndwajisi. Mucikozyanyo, amulange-lange kujatikizya majwi aaya aantalisyo mubbuku lilanga-langa mbuli basayaansi mbobayaambele mumilimo yabo: “Mbotuyaabuzyiba zintu, tulatalika kubona kuti anu nzyotuzi nzisyoonto buyo. . . . Zyoonse nzyotwakaiya tazili zinji kweelana azeezyo nzyotuciyandika kwiiya.” Ikulibombya munzila iili boobu kulakatalusya kapati. Lino caboola kumakani aajatikizya luzibo, iluzibo lwa Jehova Leza, lulakonzya kupa kuti katulibombya kwiinda waawo ciindi coonse. Nkaambo nzi?

¹⁰ Amubone twaambo ituli mu Bbaibbele tujatikizya Jehova. “Miyeeyo yako ilayoosya!” (Intembauzyo 92:5) “Busongo bwa [Jehova] tabubaliki.” (Intembauzyo 147:5) ‘Busongo naa lumvwisyo lwa Jehova taluyandauliki abuniini pe.’ (Isaya 40:28) “Ha! muli bulondo buteeli mubusongo bwa-Leza amuluzibo lwakwe!” (Ba-Roma 11:33) Cilasalala kuti kunyina notuya kukonzya kuzyiba zyoonse zijatikizya Jehova pe. (Mukambausi 3:11) Watuyiisya zintu zibotu alimwi zinji kapati, pele kucili maunda-maunda aamwi aaluzibo ngotuciyandika kwiiya. Sena eezi nzyotucilangila kwiiya zilatukondelezya alimwi akutupa kulibombya? Aboobo mbotuyaabwiiya kujatikizya nguwe, lyoonse atubelesye luzibo lwesu kaluli ndolutupa kuswenenena kuli Jehova alimwi akugwasya bamwi kucita boobo, ikutali kulisumpula kubeenzuma akaambo kaluzibo ndotujisi.—Matayo 23:12; Luka 9:48.

Amutondezye Luyando Ndomujisi Kuli Jehova

11, 12. (a) Ino mbuti iluzibo lwa Jehova ndotujana mbolutujatikizya? (b) Ino ncinzi citondezya ikuti luyando muntu ndwajisi kuli Leza ndwini-lwini?

¹¹ Mwaapostolo Paulo wakaluswaanganya kabotu-kabotu luzibo aluyando. Wakalemba kuti: “Ncenkomba nceeci cakuti luyando lwanu kaluciya buvula, antoomwe aluzibo alumvwisyo.” (Ba-Filipi 1:9) Muciindi cakulisumpula, kufwumbwa kasimpe kayandika kapati nkotwaiya kujatikizya Jehova alimwi amakanze aakwe keelede kuyungizyigwa aluyando ndotujisi kuli Taateesu wakujulu.

¹² Pele, ibanji balyaamba kuti balamuyanda Leza, pele mubwini tabamuyandi pe. Balakonzya kuti kabasinizyide kweelana ambobalimvwa mumoyo wabo. Ikulimvwa munzila iili boobo kuli buyo kabotu alimwi kulalumbaizyigwa ikuti naa kuleendelana aluzibo lwini-lwini. Pele kulimvwa boobo kulikke takuli kumuyanda ncobeni Leza. Nkaambo nzi? Amubone mbuli Jwi lya Leza mbolilupandulula luyando luli boobo, lilati: “Oku nkokuyanda Leza, kuti twabamba milazyo yakwe.” (1 Johane 5:3) Aboobo luyando kuli Jehova lulakonzya kwaambwa kuti ndwini lwini lilikke nolutondezyegwa mumilimo cakulibombya.

13. Ino mbuti kuyoowa Leza mbokuyootugwasya kutondezya luyando ndotujisi kuli Jehova?

¹³ Ikuyoowa kulakonzya kutugwasya kumuswiilila Jehova. Ikumuyoowa alimwi akulemeka Jehova kuli boobu kulakonzya kuboola kwiinda mukumuzyiba kapati, ikwiiya kujatikizya busalali bwakwe butamani, bulemu, nguzu, bululami alimwi aluyando. Ikuyoowa kuli boobo kulayandika kapati mukuswenena kulinguwe. Amubone Intembauzyo 25:14 nceyaamba, ategwa: “Lumvwano lwa-Jehova ndulwabo bamuyoowa.” Aboobo, ikuti naa ikuyoowa kumubisyizya Taateesu wakujulu nkwamasimpe, nkokuti tulakonzya kuswenenena kulinguwe. Ikuyoowa Leza kuyootugwasya kutobela lulayo lujanika kubbuku lya Tusimpi 3:6 lwakuti: “Umuzibye munzila zyako zyoonse, nkabela uyooenzya myeendelo yako.” Ino eeci cipandulula nzi?

14, 15. (a) Ino nkusala kwamusyobo nzi nkotucita mubuumi abuzuba? (b) Ino mbuti mbotukonzya kusala zintu munzila iitondezya kuyoowa Leza?

¹⁴ Abuzuba mulijisi zintu nzyomweelede kusala izipati aziniini. Mucikozyanyo, ino mubandi nzi ngomutiibandike ambomubeleka limwi, mbomwiiya limwi alimwi abasimukobonyoko? (Luka 6:45) Sena mulimo ngomupedwe mulaubeleka cabunkutwe naa muyandaula nzila yakuuleya akubeleka buyo asyoonto? (Ba-Kolose 3:23) Sena muyooswenena kuli baabo ibatondezya luyando asyoonto naa batatondezyeli limwi buya luyando kuli Jehova naa muyoojana nzila yakuyumya cilongwe canu abantu bayeeya zintu zyakumuuya? (Tusimpi 13:20) Ino ncinzi ncomukonzya kucita nociceya ikutegwa mutolaambele makani aa Bwami bwa Leza? (Matayo 6:33) Ikuti naa njiisyo zyamu Magwalo zili mbuli zeezi zitondezyedwe zilamusololela muzintu nzyomusala abuzuba, nkokuti masimpe mulamuzyibya Jehova ‘munzila zyanu zyoonse.’

¹⁵ Kuzwa sunu, kusala kuli koonse nkotuna kucita kweelede kusololelwa akaambo aaka kakuti: ‘Ino Jehova uyanda kuti ndicite nzi? Ino ninzila nzi iikonzya kumukkomanisya?’ (Tusimpi 27:11) Ikuyoowa Leza kwiinda mukucita boobu ninzila mbotu kapati yakutondezya kuti tulamuyanda Jehova. Ikuyoowa Leza kuyootukulwaizya kuti katusalala kumuuya, mumizeezo alimwi aamubili. Kamuyeeya kuti, mukapango nkamunya Jakobo nkaakakulwaizya Banakristo kuti ‘baswenene kuli Leza,’ alimwi wakabakulwaizya kuti: “Amusanzye maanza aanu, anywebo nobasizibi. Amulisalazye kumyoyo, nywebo nobasimyoyo-yobile.”—Jakobo 4:8.

16. Ciindi notupa Jehova, ino ncinzi ncotutakonzyi kuzuzikizya, alimwi ino ncinzi ncotukonzya kucita cakuzwidilila?

¹⁶ Ikutondezya luyando ndotujisi kuli Jehova takuli kutantamuka buyo cintu cibi, pele kulainda aawo. Iluyando lulatukulwaizya kuti katucita zintu zibotu. Mucikozyanyo, ino mbuti mbotucita caboola kumakani aakutondezya buuya bwa Jehova butaambiki? Jakobo wakalemba kuti: “Zipego zibotu zyoonse azyoolwe zyoonse zilondokede zilazwa kujulu, zilaseluka kuzwa kuli-Wisi wamimuni.” (Jakobo 1:17) Imasimpe ngakuti ciindi notupa Jehova zintu zyesu, tatusoli kumuvwubya buya pe. Ilubono loonse ndulwakwe kale. (Intembauzyo 50:12) Ciindi notupa Jehova ciindi alimwi anguzu zyesu, tatuli mukuzulizya waawo mpabulizyide pe. Kufwumbwa naa twakaka kukambauka makani mabotu aa Bwami, ulakonzya kwaambila mabwe kuti awongolole! Pele, ino nkaambo nzi ncotweelede kupa Jehova zintu nzyotujisi, ciindi alimwi anguzu? Ikaambo kapati nkakuti ninzila yakutondezyela luyando kulinguwe amoyo, buumi, mizeezo alimwi anguzu zyesu zyoonse.—Marko 12:29, 30.

17. Ino ncinzi cikonzya kutukulwaizya kupa Jehova calumwemwe?

¹⁷ Ciindi notupa Jehova, tweelede kucita oobo cakukondwa, “nkaambo oyu uupa calumwemwe nguuyandwa kwa-Leza.” (2 Ba-Korinto 9:7) Injiisyo iili kubbuku lya Deuteronomo 16:17 ilakonzya kutugwasya kutegwa katupa calumwemwe: “Umwi aumwi aletelele cipo ncakonzya kupa, mbubonya mbuli Jehova Leza wanu mbwamupa coolwe.” Ciindi notuyeeya mbuli Jehova mbwali sibuuya kulindiswe, tulalombozya kupa cabuuya alimwi acalumwemwe. Ikupa kuli boobo kulaukkomanisya moyo wakwe, mbubwenya mbuli muzyali mbwacikkomanina cintu cisyoonto ncaapegwa amwanaa kwe. Ikutondezya luyando munzila iili boobu kuyootugwasya kuswenenena kuli Jehova.

Amuyumye Cilongwe Canu Kwiinda Mumupailo

18. Ino nkaambo nzi ncotweelede kubikkila maanu kukupaila mipailo iili kabotu?

¹⁸ Ciindi notupaila katuli tolikke nceciindi cibotu ncitukonzya kuyumya cilongwe cesu alimwi akwaamba zintu zyamaseseke kuli Taateesu wakujulu. (Ba-Filipi 4:6) Mbwaanga mupailo ninzila iiyandika kapati mukuswenenena kuli Leza, cilayandika kukkala ansi kuyeeya alimwi akulanga mbuli mbotupaila. Notupaila tatweelede kusala buya mabala mapati-pati, pele tweelede kwaamba kweelana ambotulimvwa. Ino mbuti mbotukonzya kupaila mipailo iili kabotu?

19, 20. Ino nkaambo nzi ncotweelede kusaanguna kuyeeya katutana paila, alimwi ino mitwe nzi yeelela kuyeeyegwa aciindi eeci?

¹⁹ Tweelede kusaanguna kuyeeya katutana talika kupaila. Ikuti naa twasaanguna kuyeeya katutana talika kupaila, tuyakwaamba twaambo twini tuyandika alimwi mupailo wesu unakujisi mpindu, aboobo tuyakucileka kwiinduluka majwi ngotubelesya lyoonse aafwambaana kuboola mumizeezo. (Tusimpi 15:28, 29) Ambweni kuyeeyesya mitwe imwi Jesu njaakaamba mumupailo wacikozyanyo, akubona mbuli mboijatikizya buumi bwesu kulakonzya kugwasya. (Matayo 6:9-13) Mucikozyanyo, tulakonzya kulibuzya kuti, ino ncinzi ncindiyoocita mukuzuzikizya makanze aa Jehova aano anyika? Sena tulakonzya kutondezya kuli Jehova kuti tulombozya kuti katubelesyegwa kusikila waawo mpotukonzya alimwi akulomba kuti atugwasye kucita kufwumbwa mulimo ngwatupede? Sena tuliminidwe akaambo kakuyeeya zintu zyakumubili nzyotuyanda? Ino nzibi nzi nzyotuyanda kulekelelwa, alimwi ino mbaani mbotweelede kulekelela kapati? Ino masunko nzi aatupenzya, alimwi sena tulabona mbuli mbotuyandika kukwabililwa a Jehova cakufwambaana mumakani aaya?

²⁰ Kunze lyaboobo, tulakonzya kuyeeya bantu mbotuzyi ibayandika kapati kuti Jehova abagwasye. (2 Ba-Korinto 1:11) Nokuba boobo, icintu citayandiki kuluba nkumulumba. Ikuti naa twayeeyesya, tulakonzya kubona twaambo ncotweelede kumulumba alimwi akumutembaula Jehova abuzuba akaambo kabubotu bwakwe. (Deuteronomo 8:10; Luka 10:21) Ikucita boobo kulakonzya kugwasya kapati ikubaa bulangizi bubotu bwabuumi.

21. Ino nkuliyiisya zikozyanyo nzi zyamu Magwalo kukonzya kutugwasya ciindi notusikila Jehova mumupailo?

²¹ Ikuliyiisya tobeni akwalo kulakonzya kugwasya mumipailo yesu. Mu Jwi lya Leza kulilembedwe mipailo mibotu yakapailwa abaalumi alimwi abamakaintu basyomeka. Mucikozyanyo, ikuti naa penzi pati lilangilwa kutusikila, eelyo twatalika kulibilika nokuba kuyoowa buya kujatikizya citiikatucitikile naa kucitikila bayandwa besu, tulakonzya kubala mupailo wakapaila Jakobo ciindi naakali kuyanda kuswaangana amunyina Esau uuyandisya kujola cibi. (Matalikilo 32:9-12) Antela mulakonzya kubala mupailo wakapailwa a Mwami Asa ciindi basinkondo bana Etiopiya ibali 1,000,000 nobakakonga bantu ba Leza. (2 Makani 14:11, 12) Ikuti naa lyamukatazya penzi eelyo lyalo ilikonzya kuleta masampu kuzina lya Jehova bbotu, imupailo wa Eliya ngwaakapaila kumbele lyabakombi ba Baala a Mulundu wa Karameli inga wamugwasya, alimwi amupailo wa Nehemiya uujatikizya bukkale buusisya mubakabede bana Jerusalemu. (1 Bami 18:36, 37; Nehemiya 1:4-11) Ikubala akuzinzibala kuyeeya kujatikizya mipailo iili boobo kulakonzya kuyumya lusyomo lwesu alimwi akutugwasya kuzyiba mbuli mbotukonzya kusikila Jehova munzila yeelede amakani aatulemya.

22. Ino lugwalo lwamwaka lwa 2003 luli kubbuku nzi, alimwi ino ncinzi ncotunoolibuzya swebo ciindi aciindi mumwaka woonse mbuuzulwa?

²² Cilasalala kuti kwiina bulemu bwiinda boobu naa busumpukide kwiinda kutobela lulayo lwa Jakobo lujatikizya ‘kuswenena kuli Leza.’ (Jakobo 4:8) Atucite oobo kwiinda mukuyaambele muluzibo lwa Leza notuyandaula mbuli mbotukonzya kutondezya luyando kulinguwe alimwi akuyaambele mukuyumya cilongwe cesu anguwe kwiinda mumipailo yesu. Mumwaka woonse wa 2003, tweelede kunooluyeeya lugwalo lwa Jakobo 4:8 nkaambo ndugwalo lwamwaka alimwi tweelede kuzumanana akubona naa masimpe tuli mukuswenenena kuli Jehova. Ino mbuti cibeela camamanino mukaambo aaka? Ino mbuti Jehova mbwakonzya ‘kuswenenena kulindinywe,’ alimwi nimpindu nzi iikonzya kujanika? Cibalo citobela cilaalanga-langa makani aaya.

Sena Muciyeeyede?

• Ino nkaambo nzi kuswenena kuli Jehova ncecili cintu ciyandika kubikkila maano kapati?

• Ino makanze nzi ngotukonzya kubaangawo ciindi notujana luzibo lwa Jehova?

• Ino mbuti mbotukonzya kutondezya kuti luyando lwesu kuli Jehova ndwini lwini?

• Ino mbuti mbotukonzya kubaa cilongwe cini-cini a Jehova kwiinda mumupailo?

Majwi aakwelelezya sikubala aali apeeji 12]

Lugwalo lwamwaka lwamu 2003 ndwakuti: “Amuswenenene kuli-Leza, elyo alakwe ulamuswenenena.”—Jakobo 4:8.

[Cifwanikiso icili apeeji 8, 9]

Samuele naakakomena wakamuzyiba kabotu Jehova

[Cifwanikiso icili apeeji 12]

Imupailo Eliya ngwaakapaila a Mulundu wa Karameli ncikozyanyo cibotu kulindiswe