“Amuswenenene Kuli Leza, Elyo Alakwe Ulamuswenenena”
Mbwaakabede Musyule Ambwaakaba Kumbele—Wakaba Anguzu Zyakamugwasya Kucinca
SANDRA, imukaintu umwi waku Mexico wakalipandulula kuti wakali muntu uusulaikwa kapati abanamukwasyi. Kukakwa nkwaakakakwa alimwi akutayandwa kwakamupa kutapona kabotu naakacili mukubusi. Waamba kuti: “Nindakali mukubusi, ndakali kuzyingwa kapati ncondakali kuponena alimwi akujatikizya buumi bwini.”
Naakacili kusekondali, Sandra wakatalika kunywa waini wakali wabausyi wakali muŋanda. Mukuya kwaciindi, wakatalika kulyuulila bukoko, aboobo wakaba mudakwi. Ulazumina kuti: “Tiindakali kuyanda kupona anyika.” Sandra wakatalika kubelesya misamu iikola akaambo kakupenga. Waamba kuti: “Calikke cakali kundigwasya kuluba mapenzi aangu nzyizyeezyo nzyindakali kubweza mukabbeeke mbuli: ibukoko, misamu iikola naa lubanje lusyoonto.”
Sandra naakamanizya lwiiyo lwabusilisi, wakaciindilizya kunywa. Wakali kuyanda kulijaya kwiinda mukunywa misamu iikola alimwi akulitenda maanza. Eelyo naakalidubula mucibuno amwida, wakayeeya kuti wacikonzya kulijaya. Pele wakafwutuka.
Sandra wakaunka muzikombelo zinji kuyandaula kugwasyigwa munzila yakumuuya alimwi wakali kuyanda kuti mizeezo yakwe ikkalikane, pele tanaakagwasyigwa pe. Lyoonse wakali kulilila Leza ategwa: “Ino uli kuli? Ino nkaambo nzi ncotandigwasyi?” Ciindi naakatyompwa kapati, nceciindi umwi wa Bakamboni ba Jehova naakakanana anguwe. Eeci cakapa kuti ciiyo ca Bbaibbele citalisyigwe. Sandra wakakulwaizyigwa loko naakaiya kuti “Jehova uli afwaafwi kubawizukide mumoyo.”—Intembauzyo 34:18.
Mucizyi iwakali kwiiya Bbaibbele anguwe wakamugwasya Sandra kuzyiba kuti Jehova Leza ulizi kuti swebo tuli bantu bakompeme akaambo kacibi alimwi akutalondoka nkotwakakona kuli Adamu. Sandra wakazyiba kuti Leza ulizi kuti swebo tatukonzyi kuzitobela kabotu zyeelelo zyabululami. (Intembauzyo 51:5; Ba-Roma 3:23; 5:12, 18) Wakakkomana kwiiya kuti Jehova tabikkili buyo maanu kukukompama kwesu, alimwi talangili kuti tucite zintu nzyotutakonzyi kucita pe. Sintembauzyo wakabuzya wati: “O Jehova, nowakabika moyo wako kuzibi zyesu, ngwani wakali kunoopona, O Mwami?”—Intembauzyo 130:3.
Makani mapati aakasimpe kamu Bbaibbele aakamukkomanisya kapati Sandra ajatikizya cipaizyo cacinunuzyo ca Jesu Kristo. Kwiinda mulincico, Jehova ulabafwida luzyalo bantu bamumvwida nokuba kuti tabalondokede. (1 Johane 2:2; 4:9, 10) Inzya, inga twajana “lulekelelo lwamilandu yesu” alimwi akugwasyigwa kuzunda mizeezo yakuti tunyina mpindu.—Ba-Efeso 1:7.
Sandra wakaiya ziiyo zilaampindu kuzwa kucikozyanyo camwaapostolo Paulo. Wakamulumba kapati Leza akaambo kaluzyalo lwakwe ndwaakamutondezya kwiinda mukumulekelela zibi nzyaakacita alimwi akumupa nguzu zyakumugwasya kulwana tumpenda tubyaabi twakali kumukatazya. (Ba-Roma 7:15-25; 1 Ba-Korinto 15:9, 10) Paulo wakabululamika bukkale bwakwe, ‘wakawuumisya loko mubili wakwe akuucita kuba muzike wakwe’ kutegwa ayende munzila njakkomanina Leza. (1 Ba-Korinto 9:27) Tanaakalekela mizeezo mibi kumucita kuba muzike.
Kukompama kwa Sandra kwakamupenzya, pele wakazumanana kukulwana. Wakapaila camoyo woonse kuli Jehova kutegwa amugwasye kuzunda bubi alimwi akulomba kuti afwidwe luse. (Intembauzyo 55:22; Jakobo 4:8) Naakabona luyandisisyo Leza ndwajisi mulinguwe, Sandra wakacinca buumi bwakwe. Kaamba kuti, “ndilakkomana kuyiisya bantu Bbaibbele ciindi coonse.” Sandra wakabaa coolwe cakuyiisya mupati wakwe musimbi alimwi abausyi ikumuzyiba Jehova. Lino mbwacita “milimo mibotu,” ulalisungula kubelesya luzibo lwakwe lwabusilisi kumiswaangano ya Bakamboni ba Jehova.—Ba-Galatiya 6:10.
Ino mbuti kuzibila kubelesya misamu iikola Sandra nkwaakazibide? Cakusinizya waamba kuti: “Mizeezo yangu ilasalala. Tandicinywi bukoko, tandifwebi naa kubelesya misamu iikola iikasyigwa. Tandiciiyandi pe. Ndakacijana ncendakali kuyandaula.”
Majwi aakwelelezya sikubala aali apeeji 9]
“Ndakacijana ncendakali kuyandaula”
Kabbokesi kali apeeji 9]
Njiisyo zya Bbaibbele Izigwasya
Nzyeezi njiisyo zya Bbaibbele izyabagwasya bantu banji kuleka zilengwa zitasalali:
“Atulisonzole busofwaazi boonse nibuba bwamubili nibuba bwamoyo, atulondole busalazi bwesu cakuyoowa Leza.” (2 Ba-Korinto 7:1) Leza ulongezya buyo baabo balisalazya kubusofwaazi, aabo ibatajatikizyigwi mumicito mibi.
“Kuyoowa Jehova nkokuti kusula bubi.” (Tusimpi 8:13) Kuyoowa Leza kwabulemu kugwasya muntu kuleka kucita zilengwa zibi, kubikkilizya akubelesya misamu iikola. Kunze lyakukkomanisya Jehova, imuntu wacinca ulakwabililwa kumalwazi aayoosya.
“Kabanga kabalibombya akulitesya kumfwulumende akubeendelezi.” (Tito 3:1, NW) Mumasena manji, ikuyobola naa kubelesya misamu imwi iikola nkutyola mulawo. Banakristo beni-beni tabayoboli naa kubelesya misamu iikola iikasyigwa.