Tunakweenda Muzina lya Jehova Kukabe Kutamani!
“Tuleenda muzina lya-Jehova Leza wesu lyoonse mane kukabe kutamani.”—MIKA 4:5.
1. Ino milumbe nzi iijanika mubbuku lya Mika caandaano 3 kusikila ku 5?
KULI ncayanda kwaambila bantu bakwe Jehova alimwi ubelesya Mika kucaamba kali musinsimi wakwe. Cijatikizya makanze aa Leza aakubweza ntaamu yakunyonyoona basizibi. Uyoosubula bana Israyeli akaambo kaluleyo lwabo. Pele cilakkomanisya kuziba kuti Jehova uyoobalongezya aabo ibeenda muzina lyakwe. Imilumbe eeyi ilaambidwe cakusalazya muzyaandaano 3 kusikila ku 5 zyabusinsimi bwa Mika.
2, 3. (a) Ino basololi ba Israyeli beelede kutondezya bube nzi, pele ino ncinzi ncobali mukucita? (b) Ino mbuti mbomukonzya kupandulula mwaambo wakwiiminina uubelesyedwe kubbuku lya Mika 3:2, 3?
2 Musinsimi wa Leza waamba kuti: “Amuswiilile nubasilutwe ba-Jakobo abeendelezi baluzubo lwa-Israyeli. Sa teensi ndinywe numweelede kuziba kubeteka?” Masimpe, ngomulimo ngobeelede kunoocita, pele ino ncinzi ncobali mukucita? Mika wati: “Anukuti ndinywe numusula bubotu akuyandisya bubi. Ndinywe numufunda bantu akukwamuna nyama yakuzifuwa zyabo. Mulalya nyama yabantu bangu, azikanda mulazibbabula kumibili yabo. Mulatyolaula zifuwa zyabo, mulazisabaula mbubonya mbuli zyakujika mucilongo, mbuli nyama iibikidwe mucinabwao.”—Mika 3:1-3.
3 Kayi beendelezi bali mukudyaaminina bantu bacete, ibanyina wakubakwabilila! Imwaambo wakwiiminina iwabelesyegwa aawa ulamvwugwa kabotu kuli baabo ibamuswiilila Mika. Imbelele yajaigwa noiyanda kujikwa, citaanzi kucitwa nkufwunda mpoona akwiisabaula. Zimwi ziindi zifwuwa zilagonkaulwa kutegwa mooma uzwe mukati. Izituli zyanyama amafwuwa zilajikwa antoomwe mucibiya cipati mbuli ceeco ncaamba Mika. (Ezekieli 24:3-6, 10) Elo cileelela kapati kaka cikozyanyo eeci citondezya mbobali mukupenzyegwa bantu bamumazuba aa Mika kubasololi babo babyaabi!
Jehova Ulangila Kuti Katucita Bululami
4. Ino nkwiindana kuli buti kuliko akati ka Jehova alimwi basololi ba Israyeli?
4 Kuli kwiimpana kupati akati ka Mweembeli siluyando Jehova alimwi abeendelezi babana Israyeli. Akaambo kakuti tabaciti cabululami, balakakilwa kuzuzikizya mulimo wabo wakukwabilila butanga. Muciindi caboobo, cakuliyanda bapenzya mbelele zyacikozyanyo, tabababeteki cabululami pe bantu alimwi babalekela kuti bacitikilwe ‘milimo yakutila bulowa,’ mbubwenya mbokwaambwa kuli Mika 3:10. Ino ncinzi ncotunga twaiya kubukkale oobu?
5. Ino ncinzi Jehova ncalangila kuli baabo ibasololela bantu bakwe?
5 Leza uyanda kuti aabo bajisi mikuli akati kabantu bakwe bacite cabululami mukubeendelezya. Eeci tulacibona akati kababelesi ba Jehova sunu. Kunze lyaboobo, eeci cileendelana acaambwa kubbuku lya Isaya 32:1 nkotubala kuti: “Amubone! Kuyooba mwami uuendelezya mubululami abasilutwe babeteka cakululama.” Pele, ino mbukkale buli buti bwakaliko mumazuba aa Mika? Tujana kuti aabo ‘ibasulaika bubotu akuyandisya bubi’ balazumanana kutatobela bululami.
Ino Mipailo Yabani Iingulwa?
6, 7. Ino nkaambo nzi kapati katondezyedwe kubbuku lya Mika 3:4?
6 Sena bantu babi mbakali kupona limwi Mika inga bayandwa a Jehova? Peepe. Ibbuku lya Mika 3:4 lyaamba kuti: “Bayoolilila Jehova, pele takooyoobavwiila pe. Uyoosisa busyu bwakwe kulimbabo ciindi eco, nkaambo kakubija kwancito zyabo.” Makani aaya akankaizya kaambo kapati cini-cini.
7 Jehova takaiswiilili mipailo yesu ikuti katucita zibi. Eeci ncamasimpe ikapati eelyo notupona buumi bwakuupaupa ameso, notusisa zibi nzyotucita, pele katulicengeezya kuti tubelekela Leza cakusyomeka. Kweelanaa Intembauzyo 26:4, Davida wakaimba kuti: “Nsinakede abantu babuyo, nsinakweenda abasikuupaupa ameso.” Elo kaka takaivwiili Jehova imipailo yabaabo ibazisotoka caali izyaamba Jwi lyakwe!
Ibapegwa Nguzu Amuuya wa Leza
8. Ino ncinzi ncobakacenjezyegwa basinsimi babeji bamumazuba aakali kupona Mika?
8 Tailibijili kaka micito iicitwa abasololi banji bana Israyeli! Basinsimi babeji bapa kuti bantu ba Leza baingaile munzila yakumuuya. Basololi balyatu baloongolola ategwa “Luumuno”! pele mubwini balamulwisya muntu oonse uutabapi cakulya. Jehova waamba kuti: “Nkaambo kako mulasikilwa masiku, mutabi acilengaano, akujana mudima, kuti mutasondi. Izuba, liyoobbilila basinsimi banu, abuzuba buyoobasiila mbi. Basizilengano bayoofwa bweeme, abasondi bayoopilinganisigwa. Boonse bayoo[vw]umba mil[o]mo yabo.”—Mika 3:5-7a.
9, 10. Ino ‘kuvwumba mulomo’ cipandulula nzi, alimwi ino nkaambo nzi Mika ncaatakeelede kucita boobo?
9 Ino nkaambo nzi ‘ncobayoovwumba milomo yabo’? Eeci ncecintu bantu babyaabi mbocipona limwi a Mika ncobayoocita cakufwa bweeme. Alimwi aaba baalumi babyaabi ncobeni beelede kufwa bweeme. Kunyina ‘naya kubaingula Leza’ bantu aaba babyaabi kweelana anzyobayeeya. (Mika 3:7b) Jehova kunyina nabikkila maanu kumipailo yabantu bali boonse babyaabi ibalisumpula.
10 Mika kunyina nayandika ‘kuvwumba mulomo.’ Tafwide bweeme pe. Jehova ulayiingula mipailo yakwe. Amubone Mika 3:8, ooko musinsimi uusyomeka nkwaamba kuti: “Pele mebo ncobeni ndizwide inguzu nkaambo ka-Muuya wa-Jehova. Ndizwide lubeteko abukozu.” Elo ulalumba kapati Mika kuti muciindi cakwe cakubeleka mulimo wakwe cakusyomeka kwaciindi cilamfwu, lyoonse buyo ‘walijisi inguzu nkaambo kamuuya wa Jehova’! Eeci camupa bukozu “bwakwaambila Jakobo milandu yakwe akutapatila Israyeli aazibi zyakwe.”
11. Ino mbuti bantu mbobapedwe nguzu zyakwaambilizya milumbe ya Leza?
11 Mika wakali kuyandika nguzu ziinda aali zyeezyo zyabantunsi ikutegwa aambilizye mulumbe wa Leza walunyonyooko lupati. Muuya wa Jehova ulayandika kapati. Ino mbuti swebo? Imulimo wesu wakukambauka ulakonzya kuzuzikizyigwa lilikke eelyo Jehova natuyumya kwiinda munguzu zyamuuya wakwe uusalala. Ikusoleka kwesu kukambauka takukazwidilili abuniini ikuti katucita cibi acaali. Eelyo Leza takayiinguli mipailo yesu yakuti atuyumye kucita mulimo ooyu. Mmasimpe kunyina notunga twaambilizya milumbe yalubeta lwa Taateesu wakujulu ccita kuti kautweendelezya “Muuya wa-Jehova.” Kwiinda mumipailo iimvwugwa alimwi alugwasyo lwamuuya uusalala, tulacikonzya ikwaamba jwi lya Leza cabusicamba mbubwenya bwakacita Mika.
12. Ino nkaambo nzi basikwiiya ba Jesu bakusaanguna ‘ncobakazumanana kwaamba jwi lya Leza cabusicamba’?
12 Ambweni mulaciyeeya cibalo cili ku Incito 4:23-31. Amweezyeezye kuti muli umwi wabasikwiiya ba Jesu bamumwaanda wamyaga wakusaanguna. Basikupenzya basicinguni bayandaula nzila yakulesya kukambauka kwabasikutobela ba Kristo. Pele bantu aaba basyomeka bapaila ku Mwami Mupati, akukombelezya kuti: “Jehova, bona [mbobatukonga], ugwasye bazike bako, baambe makani aako akaanzambwene kanji.” Ino ncinzi cacitika? Nobamana kukomba, cibunganino cabo cazungaanizigwa, eelyo boonse bazuzigwa Muuya Uusalala nkabela baambaula makani aa-Leza akaanzambwene. Aboobo aswebo atukumbile Jehova mumupailo alimwi akusyoma lugwasyo lwakwe kwiinda mumuuya uusalala mbotuyaabucita mulimo wesu.
13. Ino ncinzi ciyoocitikila Jerusalemu alimwi a Samariya, alimwi nkaambo nzi?
13 Amuyeeye alimwi kuciindi ca Mika. Kweelanaa Mika 3:9-12, ibeendelezi bakajisi mulandu wakutila bulowa bakali kubeteka kwiinda mukulya makulo, bapaizi bakali kuyiisya bantu kwiinda mukuvwola mali, alimwi basinsimi babeji bakali kusonda cakupunda mali. Anu Leza ncaakaambilizya kuti imunzi mupati wa Juda, Jerusalemu, “uyooba malwi-malwi” buyo! Mbwaanga alimwi bukombi bwakubeja alimwi akutalilemeka kwakalidumide mu Israyeli, Mika wakasololelwaa muuya wa Leza kucenjezya kuti Leza wakali kuyoocita Samaria kuti ube “mbuli bulimo bwamumuunda.” (Mika 1:6) Mubwini, Mika wakapona akulibonena lunyonyooko lwakasinsimwa kujatikizya Samariya abasikalumamba bana Asuri mu 740 B.C.E. (2 Bami 17:5, 6; 25:1-21) Cilalibonya kuti milumbe eeyi mipati iijatikizya Jerusalemu alimwi a Samariya yakali kukonzya kwaambwa buyo kwiinda munguzu zya Jehova.
14. Ino mbuti businsimi bulembedwe kubbuku lya Mika 3:12 mbobwakazuzikizyigwa, alimwi mbuti eeci mboceelede kutujatikizya?
14 Masimpe Juda kunyina naakali kukonzya kweeleba lubeta lwa Jehova pe. Mukuzuzikizyigwa kwabusinsimi bulembedwe kuli Mika 3:12, Zioni “uyoolimwa mbuli muunda.” Kweelanaa mbotuzizyi zintu sunu, tulizyi kuti zintu eezyi zyakacitika eelyo bana Babuloni nobakanyonyoona Juda a Jerusalemu mu 607 B.C.E. Eezi zyakacitika kakwiindide myaka iili mbwiibede kuzwa ciindi Mika naakazisinsima, pele wakalisinizizye kuti businsimi oobo bwakali kuyoozuzikizyigwa. Masimpe tweelede kusyoma kuti bweende bwazintu oobu bubyaabi buyoomana mu “buzuba bwakusika kwa-Leza” ibwakasinsimwa.—2 Petro 3:11, 12.
Jehova Ulalulamika Makani
15. Ino mbuti mbomukonzya kupandulula businsimi bulembedwe kubbuku lya Mika 4:1-4 mumajwi aanu?
15 Ikuti naa twalanga musyule, tulabona kuti kuzwa waawo Mika wakaambilizya mulumbe wabulangizi bukondelezya kapati. Elo alakulwaizya kapati kaka majwi ngotujana kuli Mika 4:1-4! Akati kamajwi amwi, Mika waamba kuti: “Kumazuba aaciza, cilundu caŋanda ya-Jehova ciyooimikwa atala lyazilundu akusumpulwa kwiinda tulundulundu toonse, nkabela bantu bayookunka kulincico. . . . Uyoobeteka misyobo minji akutapatila mikowa iili anguzu yakule. Nkabela bayoofula mapanga aabo abe maamba aakulimya, amasumo aabo abe zizibyo zyamisamu. Cisi tacikooyoobweza ipanga lyakulwisya cisinyina, nkaambo tabakwe nibayooiiya inkondo limbi pe. Banooyookede umwi aumwi mucisiko camusaansa wakwe amumukuyu wakwe, nkabela takukooyooba muntu naba omwe uubayoosya, nkaambo aya makani azwa kumulomo wa-Jehova wamakamu makamu.”
16, 17. Ino mbuti bbuku lya Mika 4:1-4 mbolili mukuzuzikizyigwa sunu?
16 Ino “misyobo minji” alimwi a “mikowa iili anguzu” yaambwa aawa mbaani? Taili mikowa alimwi amfwulumende zyanyika eeyi pe. Muciindi caboobo, ibusinsimi bwaamba bantu ibazwa kumikowa yoonse ibakamantene mumulimo uusetekene mucilundu ca Jehova cabukombi bwakasimpe.
17 Ikweelanaa businsimi bwa Mika, ibukombi bwa Jehova busalala buyoocitwa cakumaninina ino-ino nyika yoonse. Mazubaano, ibantu “basalidwe buumi butamani” bali mukuyiisyigwa nzila zya Jehova. (Incito 13:48) Jehova uli mukubeteka akululamika makani munzila yakumuuya kubantu basyoma ibabelekela Bwami. Bayoofwutuka “mapenzi ayo mapati” kabali cibeela ca “inkamu impati.” (Ciyubunuzyo 7:9, 14) Mbwaanga bakafwula mapanga aabo kuba maamba aakulimya, neliba sunu bakkede muluumuno a Bakamboninyina ba Jehova alimwi abantu bambi. Elo kaka cilakkomanisya ikuba akati kabo!
Ibakanzide Kweenda mu Zina lya Jehova
18. Ino ncinzi ciimininwa a ‘kukkala munsi amusaansa alimwi amukuyu’ waumwi aumwi?
18 Mazubaano, eelyo bantu banji munyika yoonse nobayoowede, tulikkomene kapati kuti ibanji akati kabo bali mukwiiya nzila zya Jehova. Tulangila ciindi eeco cili afwaafwi kapati, eelyo aabo bayanda Leza nobatanooli buyo bantu batayiide nkondo pe, pele alimwi ibakkede umwi aumwi munsi aamusaansa amukuyu wakwe. Ikanjikanji masamu aamukuyu asimpwa mumyuunda yamasaansa. (Luka 13:6) Ikukkala kwamuntu munsi aamasaansa aakwe amusamu wamukuyu caamba luumuno, kooloka alimwi akubaa bukkale bwakuliiba. Noliba lino icilongwe ncotujisi a Jehova citupa kuliiba mumizeezo alimwi akucingililwa kumuuya. Eelyo zintu zili boobu zyaakucitika mubweendelezi bwa Bwami, tatunakuyoowi pe alimwi tunooliibide kapati.
19. Ino kweenda muzina lya Jehova caamba nzi?
19 Ikutegwa katukkomaninwaa Leza, tweelede kweenda muzina lya Jehova. Eeci cilaambwa munzila iikulwaizya kuli Mika 4:5, ooko musinsimi nkwaamba kuti: “Misyobo yoonse ileenda muzina lyamizimu yayo, aswebo tuleenda muzina lya-Jehova Leza wesu lyoonse mane kukabe kutamani.” Kweenda muzina lya Jehova tacaambi buyo kwiide kwaamba kuti ngu Leza wesu pe. Takuyandiki buyo kutola lubazu mumiswaangano ya Bunakristo alimwi amumulimo wakukambauka Bwami, nokuba kuti milimo iili boobo ilayandika kapati. Ikuti naa tuleenda muzina lya Jehova, tulilyaabide kulinguwe alimwi tulasoleka kumubelekela akaambo kaluyando ndotujisi mubuumi bwesu. (Matayo 22:37) Mbotuli bakombi beni-beni, masimpe tukanzide kunakweenda muzina lya Jehova Leza wesu lyoonse mane kukabe kutamani!
20. Ino ncinzi cakasinsimidwe kubbuku lya Mika 4:6-13?
20 Lino atulange-lange majwi aabusinsimi bwa Mika kuli Mika 4:6-13. “Mwana musimbi wa-Zioni” weelede kuya kubuzike ‘kusikila ku Babuloni.’ Eeco ncecakacitika kubantu bamu Jerusalemu mumwaanda wamyaka waciloba B.C.E. Pele, ibusinsimi bwa Mika butondezya kuti ibasyeede bakali kuyoopiluka ku Juda, alimwi kuciindi cakubukulusyigwa kwa Zioni, Jehova uyoobona kwaamba kuti basinkondonyina boonse banyonyoonwa.
21, 22. Ino mbuti bbuku lya Mika 5:2 mbolyakazuzikizyigwa?
21 Mika caandaano 5 usinsima zintu zimbi zigambya zyakali kuyoocitika. Mucikozyanyo, amubone caambwa kuli Mika 5:2-4. Mika usinsima kuti Mweendelezi uubikkidwe a Leza—ooyo waambwa kuti “kweendeenda kwakwe nkwakalekale”—uyoozwa mu Betelehemu. Uyooyendelezya mbuli mweembeli “munguzu zya-Jehova.” Kunze lyaboobo, ooyu Mweendelezi unooli mupati, ikutali buyo mu Israyeli mulikke, pele “koonse koonse akusikila kumagolelo aanyika.” Ikuzyibigwa kwamweendelezi ooyu kulakonzya kubazyinga bantu bamunyika boonse, pele taali makani aamaseseke pe kulindiswe.
22 Ino nguni muntu mupati kwiinda boonse iwakazyalilwa mu Betelehemu? Alimwi ino nguni ooyo uunooli “mupati koonse koonse akusikila kumagolela aanyika”? Kunyina umbi pe kunze lya Mesiya, Jesu Kristo! Eelyo Heroda Mupati naakabuzya bapaizi bapati abalembi kujatikizya busena bwakali kuyoozyalilwa Mesiya, bakaingula kuti: “Mu-Betelehemu waku-Judaya.” Alimwi bakazubulula majwi aali kuli Mika 5:2. (Matayo 2:3-6) Alimwi abantu buyo bambi bakalaazyi makani aaya, mbwaanga bbuku lya Johane 7:42 libazubulula kuti bakaamba kuti: “Sena Magwalo taambide kuti Kristo ulazwa kumukowa wa-Davida, ulazwa ku-Betelehemu, kumunzi nkwaakali kukede Davida?”
Kukatalukwa Kwabantu Kwini-Kwini
23. Ino ncinzi cili mukucitika sunu mukuzuzikizya bbuku lya Mika 5:7?
23 Mika 5:5-15 yaamba zyakusaala kwaba Asuri ikwakali kuyoozwidilila kwakaindi kasyoonto buyo alimwi waamba kuti Leza uyoobanyonyoona bamasi bataswiilili. Ibbuku lya Mika 5:7 lisyomezya kupilusyigwa kwaba Juda basyeede kunyika yabo, pele majwi aaya alimwi alabeleka akumazuba eesu. Mika wakati: “Inkamu iisyeede ya-Jakobo iyooba akati kamisyobo minji yabantu mbuli lume luzwa kuli-Jehova, ambuli lunywanywa.” Mika wabelesya mwaambo wakwiiminina ooyu mubotu ikusinsima kuti basyeede ba Jakobo wakumuuya naa Israyeli bakali kuyooba cilongezyo cizwa kuli Leza kubantu bakwe. Iba “mbelele zimwi” zya Jesu ibajisi bulangizi bwaanyika balakkomana kubelekela antoomwe abasyeede “ba-Israyeli ba-Leza” ibagwasya kukatalusya bamwi kumuuya. (Johane 10:16; Ba-Galatiya 6:16; Zefaniya 3:9) Mumakani aaya, kuli kaambo kapati nkotweelede kulanga-langa. Mbotuli basikwaambilizya Bwami, toonse tweelede kucikkomanina coolwe cesu cakutolela bantu makani aalukataluko lwini-lwini.
24. Ino ntwaambo nzi tujanika mubbuku lya Mika caandaano 3 kusikila ku 5 twamukkomanisya?
24 Ino ncinzi ncomwaiya muzyaandaano 3 kusikila ku 5 zyabusinsimi bwa Mika? Ambweni mwaiya twaambo mbuli bwatootu: (1) Leza uyanda kuti aabo ibasololela bantu bakwe kabacita cabululami. (2) Jehova takayiinguli mipailo yesu ikuti twazumanana kucita zibi acaali. (3) Imulimo wesu wakukambauka ulakonzya kuzuzikizyigwa lilikke Leza natuyumya kwiinda mumuuya wakwe uusalala. (4) Ikutegwa tukkomaninwe a Leza, tweelede kunooyenda muzina lya Jehova. (5) Mbotuli basikwaambilizya Bwami, tweelede kucikkomanina coolwe cilibedelede ncotujisi cakutola makani aalukatalusyo lwini-lwini kubantu. Twaambo atumbi tulakonzya kuti twamukkomanisya. Ino ncinzi acimbi ncotukonzya kwiiya mubbuku lya Bbaibbele eeli lyabusinsimi? Icibalo citobela ciyootugwasya kujana ziiyo kuzwa kuzyaandaano zyobilo zyamamanino iziyumya lusyomo izya bbuku lya Mika lyabusinsimi.
Ino Inga Mwaingula Buti?
• Ino ncinzi Leza ncayanda kuli baabo ibasololela bantu bakwe?
• Ino nkaambo nzi mupailo alimwi amuuya uusalala ncouyandika kapati mumulimo wesu kuli Jehova?
• Ino bantu beenda buti ‘muzina lya Jehova’?
[Cifwanikiso icili apeeji 12]
Sena mulakonzya kupandulula cikozyanyo ca Mika cijatikizya cilongo cakujikila?
[Zifwanikiso izili apeeji 15]
Mbubwenya mbuli Mika, tulabeleka mulimo wesu cabusungu