Ikulimvwisya Bbaibbele Ino Ncinzi Ciyoomugwasya?
“MAKANI aya wakabasisa basongo abaabo abaziba, waayubulwida bana.” (Luka 10:21) Aaya majwi Jesu ngaakaamba kuli Bausyi bakujulu atondezya kuti, ikutegwa tulimvwisye Bbaibbele, tweelede kuba amiyeeyo mibotu. Busongo bwa Jehova bulalibonya mukuti wapa bantu ibbuku ilikonzya buyo kuteelelwa abaabo balibombya, ibazumina kuyiisyigwa.
Kulibombya tacili cintu cuuba kubunji bwandiswe. Toonse tujisi ciyanza cakuyanda kulisumpula. Alimwi, tupona “kumazuba aakumamanino,” akati kabantu “basikuliyanda, . . . basikainya, basikulisumpula.” (2 Timoteo 3:1-4) Eezi nzyeziyanza izitupa kutamvwisya Jwi lya Leza. Mukubula coolwe, munzila imwi toonse tulajatikizyigwa amuuya wakulisumpula ngobajisi bantu mbotukkala limwi. Pele, ino mbuti mbomukonzya kuba amiyeeyo mibotu iiyandika kutegwa mulimvwisye Bbaibbele?
Kulibambila Mumoyo Amumizeezo
Ezara, musololeli wansiku wabantu ba Leza “wakapangika moyo wakwe kukuyandaula mulao wa-Jehova.” (Ezara 7:10) Sena kuli mbotunga twalibambila mumoyo wesu? Inzya. Tulakonzya kutalika kwiinda mukwiiya kwaalanga munzila yeelede Magwalo. Ku Banakristonyina, mwaapostolo Paulo wakalemba kuti: “Ciindi ncimwakatambula makani aa-Leza ngomwakamvwa kulindiswe, tamukwe mwakaatambula mbuli makani aabantu, mwakaatambula mbuli mbwaabede ncobeni, nkukuti mbuli makani aa-Leza.” (1 Ba-Tesalonika 2:13) Nokuba kuti mbantu bakabelesyegwa kulemba Magwalo, nzyobakalemba zyakazwa kuli Jehova. Kuzyiba kaambo kapati aaka, kuyootupa kuti cituubile kuzumina eezyo nzyotubala.—2 Timoteo 3:16.
Nzila aimwi motukonzya kulibambila mumoyo nkwiinda mukupaila. Mbokunga Bbaibbele lyakasololelwa amuuya uusalala, tuyakuumvwisya mulumbe uuli mumo kwiinda mulugwasyo lwa muuya ngomunya ooyu. Tweelede kupaila kulomba lugwasyo oolu. Amubone eeci mbocakali cintu ciyandika kuli sintembauzyo iwakalemba kuti: “Undipe busongo bwakubamba mulao wako akuujatisya camoyo woonse.” (Intembauzyo 119:34) Tatweelede kupailila buyo kukonzya kumvwa zilembedwe, pele amiyeeyo iyootupa kuzumina izyaambwa mu Bbaibbele. Kutegwa tukonzye kulimvwisya Bbaibbele, tweelede kuzumina izintu kuti kazili zyamasimpe.
Nomuyeeya mbomukonzya kuba amizeezo mibotu, amulange-lange kwiiya Bbaibbele mbokukonzya kumugwasya. Tulijisi twaambo tunji ncotweelede kubala Jwi lya Leza, pele kapati nkakuti litugwasya kuba acilongwe a Leza. (Jakobo 4:8) Tulazyiba Jehova mbwabede notubala kujatikizya mbwalanganya bukkale bwiindene-indene, mbwabikkila maano aabo bamuyanda, ambwayendelezya aabo bazwa kuli nguwe. Ikaambo kapati nkotubalila Bbaibbele keelede kuba kakuyanda kumuzyiba kabotu Leza, calo ciyakupa kuti cilongwe cesu anguwe ciyume.
Izikonzya Kupa Kutaba Amiyeeyo Mibotu
Ncinzi cikonzya kutusinkila kumvwisya Jwi lya Leza? Cisinkilizyo comwe ncakukakatila kuli zyeezyo nzyobasyoma aabo mbotusyoma kapati. Mucikozyanyo, mulakonzya kukakatila kuzintu nzyobasyoma amizeezo yabamwi balemekwa kapati. Pele, ino kuti aaba bantu kabatatobeli kasimpe kamu Jwi lya Leza? Mubukkale buli boobu, kumvwisya cinicini Bbaibbele ncoliyiisya kulakonzya kuba cintu ciyumu. Aboobo, Ibbaibbele litukulwaizya kulingaula kabotu-kabotu zintu nzyotwayiisyigwa.—1 Ba-Tesalonika 5:21.
Banyina Jesu, ba Mariya, bakajana buyumuyumu buli boobu. Bakakomezyegwa muzilengwa zyaba Juda. Bakali kuccilila Mulawo wa Musa woonse alimwi bakali kwiinka kucikombelo. Pele mukuya kwamazuba, bakabona kuti nzila yabukombi njobakayiisyigwa abazyali babo tiiyakacili kutambulika kuli Leza. Aboobo ba Mariya bakatobela njiisyo ya Jesu alimwi bakazikuba umwi wabasimbungano ya Bunakristo bataanzi. (Incito 1:13, 14) Ooku tiikwali kunyansya bazyali naa ziyanza zyabo; pele, kwakali kutondezya luyando ndobakajisi kuli Leza. Kutegwa tugwasyigwe a Bbaibbele, mbuli ba Mariya tweelede kusyomeka kapati kuli Leza kwiinda kusyomeka kumuntu uuli woonse.
Mukubula coolwe, bantu banji tabakabikkili maano kasimpe kamu Bbaibbele. Bamwi balakkutila ikutobela ziyanza zyabukombi zyakubeja. Bamwi batondezya kutakabikkila maano kasimpe muŋambawido amubukkale bwabo. Aboobo, kuzumina kasimpe kuyanda kulyaaba: Kulakonzya kumupa kutamvwana abeenzinyoko, basimukobonyoko, mbomubeleka limwi alimwi nokuba banamukwasyi banu. (Johane 17:14) Nokuba boobo, mwaalumi musongo wakalemba kuti: “Koula lusinizyo, utaluulisyi pe.” (Tusimpi 23:23) Ikuti kamukayandisya kasimpe, Jehova uyakumugwasya kulimvwisya Bbaibbele.
Acimwi cisinkilizyo kukumvwisya makani aamu Bbaibbele, nkutayanda kucita nzyolyaamba. Jesu wakaambila basikwiiya bakwe kuti: “Inywe mwapegwa kuziba aasisidwe aa-Bwami bwakujulu, balo tabapegwi pe. Nkaambo myoyo yabantu aba yanenesya, nkabela matwi aabo taamvwisyi.” (Matayo 13:11, 15) Bunji bwabantu Jesu mbaakakambaukila tibakauzumina mulumbe, alimwi tibakali kuyanda kucinca. Bakali impene amusambazi Jesu ngwakaamba mucikozyanyo. Mbwaakajana buyo ngale njandisi, musambazi cakufwambaana wakaulisya zintu zyoonse nzyaakajisi kutegwa ayuule. Kumvwisya kasimpe kamu Bbaibbele mbubwenya kweelede kuba cintu ciyandisi kulindiswe.—Matayo 13:45, 46.
Cisinkilizyo Cakutayanda Kuba Muntu Uyiisyigwa
Cisinkilizyo cipati kukumvwisya Bbaibbele, ncakutayanda kuyiisyigwa. Muntu ulakonzya kujana buyumuyumu kuzumina mizeezo mipya njaambilwa amuntu ulibonya kuba waansi. Pele, baapostolo ba Jesu Kristo bakali bantu “buyo abatakaiya.” (Incito 4:13) Kapandulula ikaambo baapostolo ba Jesu Kristo ncobatakayiide, Paulo wakalemba kuti: “Amubone, bakwesu, mbwiibede inkamu yabaite iili kulindinywe nubeni. Akati kanu taakwe bantu banji beelezegwa kuti mbasongo kumeso aabantu, alimwi tabali banji basibwami, alimwi tabali banji bana babaami. Pe, Leza ulisalide zintu zifubafuba zyanyika kuti ausye insoni basongo.” (1 Ba-Korinto 1:26, 27) Ikuti naa cilamuyumina kulibombya nomuyiisyigwa amuntu waansi, kamuyeeya kuti ooyu muntu ninzila buyo Leza njabelesya kumuyiisya. Ncoolwe nzi cikonzya kwiinda ceeco cakuyiisyigwa a Jehova, “Mwiyi” wesu Mupati?—Isaya 30:20; 54:13.
Naamani, silutwe wampi yabana Aramu wakali muntu iwakajana buyumuyumu kutobela malailile aazwa kumuntu waansi. Kayandaula busilisi bwacinsenda ncaakajisi, wakainka kuyakubona musinsimi wa Jehova, Elisha. Pele malailile aa Leza aabusilisi akapegwa kuli Naamani kwiinda mumubelesi umwi. Malailile alimwi anzila mbwaakapegwa zyakapa kuti cimuyumine Naamani kwaatambula cakulibombya, cakuti wakasoka wakaka kutobela jwi lya musinsimi wa Leza. Pele Naamani wakacinca muzeezo wakwe mpoonya wakaponesyegwa. (2 Bami 5:9-14) Tulajana buyumuyumu buli boobu ciindi notwiiya Bbaibbele. Tulakonzya kwiiya kuti ikutegwa tuponesyegwe kumuuya alimwi kuti katulilemeka kabotu, tweelede kutobela nzila yabukkale impya. Sena tuyakulibombya kutegwa umwi akatuyiisye nzyotweelede kucita? Balikke aabo bazumina kuyiisyigwa mbabakonzya kulimvwisya Bbaibbele.
Imweendelezi wamu mfwulumende ya Candace, namalelo wabana Etiopiya wakatondezya mizeezo mibotu. Wakali munkalaki kapiluka ku Afulika ciindi sikwiiya Filipo naakazuzaana kuya kulinguwe. Filipo wakamubuzya mwaalumi ooyu naa wakali kumvwisya nzyaakali kubala. Imweendelezi cakulicesya wakavwuwa kuti: “Ino ndilakonzya buti, aatakwe muntu uunditondezya?” Naakamvwisya Jwi lya Leza, mwaalumi ooyu wakabbapatizyigwa. Kuzwa ciindi eeco, ‘wakatola nzila yakwe uya bubotelwa.’—Incito 8:27-39.
Bunji bwa Bakamboni ba Jehova mbantu buyo. Amvwiki baleendelezya ziiyo zya Bbaibbele mumaanda aabantu bainda kutuulunzuma tuli cisambomwi. Mbokunga Ibbaibbele liisya nzila mbotu yabuumi, lipandulula bulangizi bulikke mbobajisi bantu alimwi litondezya mbotukonzya kumuzyiba Leza, tuulunzuma twabantu twabona kuti ikwiiya Bbaibbele akumvwisya nzyolyaamba ncintu cikondelezya kapati. Ncintu cikondelezya ncomukonzya kujana.
[Cifwanikiso icili apeeji 7]
Naamani cakamuyumina kutambula malailile kuzwa kumubelesi waansi
[Cifwanikiso icili apeeji 7]
Kumvwisya Bbaibbele kutupa kukkomana