Amube Acilongwe a Leza
Mweembezi Uulanganya
‘SENA Leza ulandilanganya?’ Ikuti naa kuli nomwakalibuzyide mubuzyo ooyo, tamuli molikke pe. Tobanji tulasikilwa mapenzi alimwi ziindi zinji tulalibuzya naa Mulengi wanyika yoonse ulatulanganya. Tweelede kulibuzya kuti, Sena Jehova Leza ulatulanganya? Jesu iwakamuzyi kabotu Jehova, naakali anyika wakapa cikozyanyo citondezya bwiinguzi bukkazyika moyo.
Jesu naakali kukozyanisya Jehova kumweembezi uulanganya mbelele, wakati: “Kuti muntu kajisi imbelele zili mwaanda, nkabela imwi akati kazyo yapambuka, sa tasii zili makumi aali musanu aane aali amusanu azine kuti aye azilundu, ayandaule eyo iipambukide. Nkabela aijana, ndamwaambila ncobeni kuti ulakondelwa njiyo kwiinda ezyo zili makumi aali musanu aane aali amusanu azine izyatakapambuka. Mbuboobo Usowanu uuli kujulu tayandi kuti afwidilile naba umwi akati kabaniini aba.” (Matayo 18:12-14) Atubone Jesu mbwamupandulula Jehova mbwabikkila maano kubakombi bakwe umwi aumwi.
Wakali mulimo wamweembezi kulanganya mbelele imwi aimwi. Ikuti naa mbelele yazimina wakali kuzyiba iitako. Wakalaazyi mazyina aambelele zyoonse. (Johane 10:3) Mweembezi uulanganya tanaakali kuleka kwiilangaula kusikila waijana akwiibikka antoomwe azyeezyinyina. Naakali kuunka kwaakulangaula yazimina, tacaambi kuti wakali kuzyibikka muntenda eezyi zyimwi zyili 99.a Beembezi beembelela aantoomwe kutegwa mbelele kazicelela aantoomwe azyalo. Aboobo ikuti naa mweembezi waunka kwaakuyandaula yeeyo yazimina, beembezi bacaala balakonzya kuzyilanganya eezyo zyacaala. Ikuti naa wainjana mbelele yaziminide, ulakkomana. Ulaibikka agwezyo mbelele iiyowede akwiipilusya kubutanga kuli kabotu nkwiikonzya kukwabililwa.—Luka 15:5, 6.
Kapandulula cikonzyanyo eeci Jesu wakamba kuti, Leza tayandi kuti “afwidilile naba umwi akati kabaniini aba.” Kaindi, Jesu wakali bacenjezyede kale basikwiiya bakwe kuti tabeelede kulebya “naba omwe akati kabaniini aba basyoma [nguwe].” (Matayo 18:6) Aboobo, ino ncinzi ncotwiiya kucikozyanyo ca Jesu kujatikizya Jehova? Twiiya kuti, Jehova Mweembezi uulanganya mbelele aimwi kubikkilizya ‘abaniini,’ aabo balibonya kuti tabayandiki kapati kweelana abantu bamunyika mbobayeeya. Masimpe, mukombi umwi aumwi ulayandika kapati kuli Leza.
Kuti kamuyanda kuzyiba kuti mulayandwa kuli Leza, ino mulekela nzi kwiiya zyinji kujatikizya Mweembezi Mupati, Jehova Leza, akwiiya mbomukonzya kuba acilongwe anguwe? Ikuti mwacita boobo muyakuba alusyomo mbuli ndwaakajisi mwaapostolo Petro, iwakamumvwa Jesu kaamba cikonzyanyo eeci cambelele yakazimina. Kumane Petro wakalemba kuti: “Makataazyo aanu oonse amwaasowele kumaanza aakwe, nkaambo nguumucebuka lyoonse.”—1 Petro 5:7.
Bupanduluzi buyungizidwe
a Kwaandanya butanga tiicakali kukatazya, mbwanga aimwi mbelele yakalilizyi ijwi lyamweembezi.—Johane 10:4.