Sena Bukombi Bwangu Ndakalisalila Buya naa Nditobela Buyo Bazyali?

KUCISI ca Poland bantu banji baambila Bakamboni ba Jehova kuti: “Ndakazyalilwa mucikombelo cangu, alimwi ndiya kufwida mumo.” Eeci caamba kuti cikombelo ncamukwasyi. Sena oobu mbobaamba bantu nkomukkala? Ino ncinzi cicitika kanji-kanji akaambo kakuyeeya kuli boobu? Bukombi bulaba buyo kwiinzya mulawo naa cilengwa camumukwasyi. Sena eeci inga cacitika kuli Bakamboni ba Jehova aabo ibakayiisyigwa abazyali Bakamboni?

Tiicakacitika kuli Timoteo, iwakayiisyigwa abanyina alimwi abakaapanyina kutegwa abe alusyomo akumuyanda Leza. Timoteo wakaazyiba malembe aasalala “kuzwa kuciindi n[a]akacili mwana.” Pele amubone kuti ‘wakazizumina nzyobakamuyiisya.’ (2 Tim. 1:5; 3:14, 15) Mukuya kwaciindi, Timoteo wakasyoma kuti Banakristo bakali kuyiisya kasimpe. Wakabona kuti luzyibo lwamu Bbaibbele ndwaakayiisyigwa abanyina abakaapanyina lwakali kuyandika kapati, alimwi wakalubelesya mubuumi bwakwe. Aboobo, nokuba kuti bazyali Banakristo mazuba aano balasoleka kugwasya bana babo kuba babelesi ba Jehova, ibana abalo beelede kuliyandila kubelekela Jehova.—Mk. 8:34.

Ikuti abelekele Jehova akaambo kaluyando alimwi akuzumanana kusyomeka, aumwi muntu weelede kuzimvwisya nzyaiya akuzisyoma. Mpoonya lusyomo lwakwe luya kuyuma.—Ef. 3:17; Kol. 2:6, 7.

Ncayelede Kucita Mwana

Ba Albert,a ibakakomezyegwa mumukwasyi wa Bakamboni baamba kuti: “Lyoonse ndakali kulimvwa kuti Bakamboni ba Jehova mbabakomba kasimpe, pele cakali kundikatazya kuzitobela nzyondakali kwiiya.” Ikuti kamuli bakubusi, mulakonzya kuyeeya mbubwenya andinywe. Ikuti naa mboobo, inga cabota kuzyiba ziyandika kuti kamupona kweelana ambwayanda Leza alimwi akujana lukkomano mukucita kuyanda kwakwe. (Int. 40:8) Ba Albert baamba kuti: “Ndakatalika kupaila. Kumatalikilo cakali kukatazya. Ndakali kulisinikizya buya kucita oobu. Pele mukuya kwaciindi, ndakalimvwa kuti ndilakonzya kuyandwa a Leza ikuti kandicita zyintu ziluzi. Eeci cakandipa kucinca bukkale bwangu.” Kwiinda mukuba acilongwe a Jehova, mulakonzya kuba aluyando lwakucita nzyayanda kuti katucita.—Int. 25:14; Jak. 4:8.

Amuyeeye cisobano ncomuyandisya kusobana, mbuli bbola. Ikuti kamutaazyi kabotu malailile naa mboisobanwa, ambweni inga kamutaikkomanini. Pele, ikuti mwaazyiba malailile alimwi akucizyiba kusobana kabotu, cakutadooneka mulakonzya kutalika kwiikkomanina kapati. Oobu mbozibede caboola kumilimo ya Bunakristo. Aboobo kamulibambila miswaangano. Mweelede kutola lubazu mumilimo iili yoonse ya Bunakristo. Nokuba kuti mucili bana basyoonto, mulakonzya kubakulwaizya bamwi nobabona cikozyanyo canu cibotu.—Heb. 10:24, 25.

Ncimwi buyo akwaambila bamwi nzyomusyoma. Mweelede kucita oobo cakuliyandila kutali kusungilizyigwa buya. Amulibuzye kuti: ‘Ino nkaambo nzi ncondiyandila kwaambila bamwi kujatikizya Jehova? Ino ntwaambo nzi tundipa kumuyanda Jehova?’ Mweelede kumuzyiba Jehova kuti ngu Taata siluyando. Kwiinda muli Jeremiya, wakaamba kuti: “Muyoondiyandaula nkabela muyoondijana, nkokuti na mwandiyandaula camoyo woonse.” (Jer. 29:13, 14) Ino ncinzi ncomuyandika kucita? Imukwesu umwi wazyina lya Jakub waamba kuti: “Ndakacinca mbondakali kuyeeya. Kuzwa kubwana ndakali kuunka kumiswaangano amumulimo wamumuunda, nokuba boobo eezyi ndakali kuzicita buyo kwiinzya mulawo. Pele nindakamuzyiba kabotu Jehova akuba acilongwe anguwe, ndendilyo nindakatalika kubikkila maano kukasimpe.”

Ibalongwe babotu balakonzya kupa kuti kamuukkomanina mulimo wamumuunda. Kasimpi kamu Bbaibbele kaamba kuti: “Uuenda abasongo ulasongwaala.” (Tus. 13:20) Aboobo amube abalongwe bajisi mbaakani zyakumuuya alimwi ibaukkomanina mulimo wa Jehova. Imucizi umwi wazyina lya Jola waamba kuti: “Ikuba abalongwe banji babikkila maano kuzyintu zyakumuuya kwakandiyumya-yumya kapati. Ndakatalika kuunka lyoonse mubukambausi alimwi akuukkomanina mulimo ooyu.”

Ncobeelede Kucita Bazyali

Jola waamba kuti: “Ndilabalumba bazyali bangu akaambo kakundiyiisya makani aa Jehova.” Inzya, ibazyali balakonzya kubagwasya bana babo kusala kabotu zyintu. Imwaapostolo Paulo wakalemba kuti: “Anywebo numawisi, . . . Amubalele [bana banu] mulwiiyo lwa-Mwami amumilazyo yakwe.” (Ef. 6:4) Oolu lulayo ilwakasololelwa amuuya lulatondezya kuti mukuli ngobajisi bazyali ngwakuyiisya bana babo milawo ya Jehova, kutali yabo beni. Muciindi cakuyanda buyo kuti bana banu kabacita zyintu kweelana ambomuyanda, inga cainda kugwasya kaka ikuti mwabagwasya kuti balibikkile mbaakani yakupona kweelana amakanze aa Jehova!

Mulakonzya kubayiisya majwi aa Jehova bana banu “akwaambaula ngawo lyoonse, ciindi cakukala muŋanda aciindi cakweenda munzila, ciindi cakoona aciindi cakubuka.” (Dt. 6:6, 7) Ba Ryszard aba Ewa, ibazyali bali abana basankwa botatwe, baamba kuti: “Lyoonse twakali kubandika abana besu kujatikizya mbazu zisiyene-siyene zyamulimo waciindi coonse.” Ino ncinzi cakacitika? Baamba kuti: “Ibana bakayanda kulilembya mu Cikolo Camulimo Weendelezyegwa a Leza kabacili baniini, bakaba basikumwaya, mpoonya bakalyaaba beni akubbapatizyigwa. Kumbele bakatalika mulimo waciindi coonse.”

Ibazyali beelede kupa cikozyanyo cibotu kubana. Ba Ryszard baamba kuti: “Tiitwakali kuyanda kupona buumi bwakuupaupa ameso, ikuba abukkale bumbi notuli kuŋanda alimwi abumbi notuli kumbungano.” Aboobo, amulibuzye kuti: ‘Ino ncinzi bana bangu ncobaiya nobabona mbondipona? Sena balizyi kuti ndilamuyanda kapati Jehova? Sena balacibona eeci kwiinda mukubona mbondipaila akubala Bbaibbele lyoonse? Sena balazyiba kwiinda mukubona mbonduubona mulimo wamumuunda, mbondikubona kulikondelezya, zyintu zyakumubili alimwi anzyondaamba kujatikizya bamwi mumbungano?’ (Lk. 6:40) Ibana balabona mbomupona lyoonse alimwi balakonzya kuzyiba ikuti nzyomwaamba anzyomucita kaziteendelani.

Kulaya bana kulayandika kutegwa bakomene kabotu. Nokuba boobo, Ijwi lya Leza lyakasololelwa amuuya lyaamba kuti: “Iyisya mwana aende munzila iielede.” (Tus. 22:6) Ba Ryszard aba Ewa baamba kuti: “Twakali kuba aciindi cakuyiisya bana Bbaibbele, aumwi alike.” Cili kubazyali kusala kubayiisya antoomwe bana naa aumwi alike. Pele beelede kumubikkila maano mwana aumwi. Eeci caamba kuti bazyali beelede kubabikkila maano bana alimwi akucinca nzila yakuyiisya kweelana ambobayandika. Mucikozyanyo, muciindi cakwaambila buyo bana kuti inyimbo zyamunyika nzibi, mweelede kubayiisya kutegwa bacizyibe kusala kabotu alimwi akubona njiisyo zyamu Bbaibbele mbozyaamba kumakani aaya.

Ibana banu balakonzya kuzyiba nzyomuyanda kuti bacite alimwi balakonzya kulibonya mbuli kuti balacita oobo. Pele mweelede kubasika amoyo. Kamuyeeya kuti: “Makanze aamumoyo wamuntu ali mbuli maanzi malamfu, pele muntu uucenjede ulaayubununa.” (Tus. 20:5) Kamubikkila maano kutegwa muzyibe penzi ndyajisi mwana aumwi akufwambaana kubweza ntaamu. Kakunyina kubapa mulandu, amubatondezye kuti mulababikkila maano akubabuzya mibuzyo yeelede. Nokuba boobo, tamweelede kubabuzya mibuzyo minji. Ikubabikkila maano kuya kupa kuti mubasike amoyo akubagwasya.

Ncoyeelede Kucita Mbungano

Sena tamukonzyi kubagwasya bakubusi ibali mumbungano kuti kabazibikkila maano zyintu nzyobakaiya? Nokuba kuti bazyali mbobajisi mukuli wakuyiisya bana babo, ibambi mumbungano, ikapati baalu, balakonzya kugwasya. Cilayandika kapati kubagwasya aabo bazwa mumikwasyi oomo muzyali omwe mwatali umwi wa Bakamboni ba Jehova.

Ino ncinzi baalu ncobakonzya kucita kugwasya bana kuti kabamuyanda Jehova akuti kabalimvwa kuti balayandwa? Ba Mariusz, ibaalu mumbungano imwi yakucisi ca Poland baamba kuti: “Baalu beelede kubandika abana lyoonse. Tabeelede buyo kucita boobo ciindi nokuli penzi, pele amuziindi zimbi—mumulimo wamumuunda, yamana miswaangano naa nobaizya.” Balakonzya kubabuzya mbobalimvwa kujatikizya mbungano. Kubandika kuli boobo inga kwapa kuti bana kabaanguluka kuyanzana ambungano.

Ikuti kamuli baalu, sena mulibazyi kabotu bakubusi ibali mumbungano yanu? Ba Albert, ibaambwa kumatalikilo aacibalo eeci nokuba kuti lino mbaalu, nibakacili bakubusi bakajisi mapenzi. Bakati: “Nindakacili mukubusi, ndakali kuyandika kuswaigwa abaalu.” Aboobo baalu bayandika kubabikkila maano bakubusi kwiinda mukubapailila kutegwa bazumanane kumubelekela Leza akuba balongwe bakwe.—2 Tim. 1:3.

Cilayandika kuti abalo bana kabatola lubazu mumilimo yambungano. Ikuti tiibabikkilizyigwa balakonzya kubikkila maano kuzyintu zyanyika. Sena inga mwabeleka ambabo mumulimo wamumuunda akubacita kuti babe balongwe banu? Ikuti kamwiizya abana balakonzya kwaanguluka akumwaambila nzyobayeeya. Jola wakati: “Imucizyi mupainiya wakali kundiyanda kapati. Kuzwa nindakatalika kuunka anguwe kukukambauka, ndakatalika kuuyanda mulimo wamumuunda.”

Mweelede Kulisalila

Nobana amulibuzye kuti: Ino ndijisi mbaakaani nzi? Ikuti naa tandina kubbapatizyigwa, sena ndilakanza kucita oobo? Imuzeezo wakubbapatizyigwa weelede kuzwa kunsi amoyo akaambo kakumuyanda Jehova, ikutali kutobela buyo akaambo kakuti boonse mumukwasyi mbubacita.

Ee, Jehova uyandika kuba Mweenzinyoko wini-wini, akasimpe muyandika kukabona kuti ndubono lwanu. Kwiinda mumusinsimi Isaya, Jehova wakati: “Utakankami, nkaambo ndime Leza wako.” Jehova unooli andinywe ikuti mwazumanana kuba balongwe bakwe. Uya kumuyumya ‘akumutabilila ajanza lyakwe lyakululyo lyabululami bwakwe.’—Is. 41:10.

Bupanduluzi buyungizidwe

[Cifwanikiso icili apeeji 4]

Kamusoleka kubona ncayeeya mwanaanu

[Cifwanikiso icili apeeji 6]

Imuzeezo wakubbapatizyigwa weelede kuzwa kunsi amoyo akaambo kakumuyanda Jehova