Basikubala Balabuzya

Sena Basankwa Botatwe Basikulingula Nyenyezi Bakamuswaya Ncobeni Jesu Naakazyalwa?

Ciindi ca Kilisimasi bantu bakkala kumasi aali ku South America, Kujwe kwa Europe aku Asia batondezya Jesu naakazyalwa abami botatwe kabajisi zipego zyamwana muvwanda Jesu. Sena makani aaya ngamasimpe? Atubone.

Makani Mabotu aa Mateyo a Luka aamba kuzyalwa kwa Jesu. Zibalo eezyi zitondezya kuti beembezi ibakali afwaafwi mbibakaboola kumubona Jesu naakazyalwa. Aboobo, aaba bantu baambwa kuti mbami mubwini bakali basikulingula nyenyezi alimwi Ibbaibbele talyaambi kuti naa bakali bongaye. Basikulingula nyenyezi tiibakaunka nkwaakabede mwana muvwanda pele nibakasika bakajana kuti Jesu wakomena-komena kale alimwi wakali kale kuŋanda. Basankwa aaba nibakasika bakapa kuti buumi bwa Jesu bube muntenda.

Amulange cibalo caamba kuzyalwa kwa Jesu cakalembwa a Luka: “Kwakali basikweembela bakali musokwe, beembela butanga bwabo masiku. Elyo angelo wa-Jehova wakaima kulimbabo, . . . Wakati kulimbabo: . . . ‘muyoojana muvwanda uuzambaidwe masila, ulilede mucilido caŋombe’ . . . Bakafwambaana basika, bajana Mariya a-Josefa, amuvwanda ulilede mucilido caŋombe.”—Luka 2:8-16.

Ba Josefa, Mariya abeembezi mbabakaliko a Jesu. Kunyina uumbi waambwa mucibalo ncaakalemba Luka.

Lino atulange-lange cibalo cili ku Matayo 2:1-11 mu Bbaibbele lya Bible in Tonga, lyaamba kuti: “Jesu naakazyalwa mumunzi wa Betelehemu mu Judiya mwami Helodi nguwakali kulela. Kuzwa waawo baalumi basongo bazwa kujwe bakasika ku Jelusalemu . . . Nibakanjila muŋanda bakabona mwana a Maliya banyina.”

Amubone kuti cibalo caamba buyo “baalumi basongo” ikutali “baalumi botatwe basongo” akuti bakazwa kujwe bakali kuunka ku Jerusalemu ikutali mudolopo mwakazyalilwa Jesu ku Betelehemu. Nibakasika ku Betelehemu, Jesu wakali wakomena–komena kale alimwi tanaakali mucilido caŋombe pele wakali muŋanda.

Ibbaibbele lya The Bible in Tonga libelesya mabala aakuti baalumi basongo ikwaamba beenzu aaba, kakuli ma Bbaibbele aamwi aabelesya bbala lyakuti “basikulingula nyenyezi.” Kweelana abbuku lyakuti A Handbook on the Gospel of Matthew lyaamba kuti mabala aakuti: “Baalumi basongo mu Cigiliki aamba bapaizi baku Peresia ibakali cibwene mubweende bwanyenyezi.” Alimwi bbuku lyakuti The Expanded Vine’s Expository Dictionary of New Testament Words lipandulula mabala aaya kuti “mulozi, mucape, uucita masalamuzi, uukwabilila bantu kubalozi.”

Nokuba kuti basikulingula nyenyezi abalozi nkobacili, Ibbaibbele lyaamba kuti tabeelede kuzicita zyintu eezyi. (Isaya 47:13-15) Eeyi njemicito imwi Jehova Leza njatayandi. (Deuteronomo 18:10-12) Nkakaambo kaako kunyina mungelo wa Leza wakaambilizya kuzyalwa kwa Jesu kuli basikulingula nyenyezi. Nokuba boobo, Leza wakabacenjezya kwiinda muciloto kuti batajokeli kuli Mwami Heroda iwakali kuyanda kumujaya Jesu. Aboobo, “bakabweeda kulimbabo anzila imbi.”—Matayo 2:11-16.

Sena banakristo inga bayanda kwiisya makani aatali aamasimpe kujatikizya kuzyalwa kwa Jesu? Bwiinguzi mbwakuti peepe.