Bweendelezi Bwa Saatani Buya Kwaalilwa
“Sizibi takooyooba kabotu.”—MUK. 8:13.
1. Ino nkaambo nzi ikubetekwa kwabasizibi ncaali makani aakkomanisya?
INO-INO basizibi bayakubetekwa. Baya kulivwiilila milandu yabo. (Tus. 5:22; Muk. 8:12, 13) Aaya makani alakkomanisya, ikapati kuli baabo ibayanda bululami alimwi ibadyaamininwa akupezyegwa abantu babi. Imupati akati kabasizibi ibaya kubetekwa ngu Saatani Diabolosi walo uuli nguusyi wabasizibi.—Joh. 8:44.
2. Ino nkaambo nzi ncocakali kuyandikila ciindi cakuti kaambo kabambwe ikakatalisyigwa mu Edeni?
2 Kaindi mu Edeni, akaambo kakulisumpula kwa Saatani kwakapa kuti bantu babukake bweendelezi bwa Jehova. Akaambo kaceeci, bazyali besu bakusaanguna bakamusangana Saatani mukukazya bweendelezi bwa Jehova, eeci cakabapa kuti babe basizibi. (Rom. 5:12-14) Masimpe ngakuti, Jehova wakalizyi icakali kukonzya kucitika akaambo kakuzanga kwabo. Nokuba boobo, icakabacitikila cakazyibwa kuzilenge zyoonse. Aboobo, ciindi cakali kuyandika cakuti kaambo aaka kabambwe akutondezya kuti basikuzanga tiibakaluzi.
3. Ino mbuti mbotweelede kuzilemeka mfwulumende zyabantu?
3 Akaambo kakuti bantu bakakaka kweendelezyegwa a Jehova, bakalisalila mbubakali kuyanda kuti mfwulumende zyabo zibe. Imwaapostolo Paulo naakali kulembela basyominyina ku Roma wakazyaamba mfwulumende eezyi zyabantu kuti zyakali “maami aacisi.” Naakali kupona Paulo, maami aacisi yakali mumfwulumende ya Roma iyakali kweendelezyegwa a Mwami Nero iwakalela kuzwa mu 54 C.E. kusika mu 68 C.E. Paulo wakaamba kuti maami aacisi aali boobu “alibikidwe kwa-Leza.” (Amubale Ba-Roma 13:1, 2.) Sena eeci caamba kuti Paulo wakali kwaamba kuti bweendelezi bwabantu mbubotu kapati kwiinda bweendelezi bwa Leza? Peepe. Muciindi caboobo, wakali kwaamba kuti kufwumbwa Jehova naawazumizya bweendelezi bwabantu kuti kabuliko, Banakristo beelede kulemeka “cintu cibikwa kwa-Leza” akuzumina beendelezi bali boobu.
Nzila Iitola Kulufwu
4. Amupandulule ikaambo kapa kuti bweendelezi bwabantu bwaalilwe.
4 Nokuba boobo, bweendelezi bwabantu ibusololelwa a Saatani buya kwaalilwa. Nkaambo nzi? Nkaambo kakuti tabweendelezyegwi a Leza. Alikke Jehova nguujisi busongo bwini-bwini. Aboobo, alikke nguukonzya kweendelezya kabotu. (Jer. 8:9; Rom. 16:27) Kwiindana abantu ibacita zyintu nzibatazyi kabotu, Jehova walo ulizyizyi kabotu zyintu zigwasya. Imfwulumende zitatobeli malailile aakwe zilalangilwa kwaalilwa. Akaambo kaceeci, ibweendelezi bwa Saatani kwiinda mukubelesya mfwulumende zyabantu bwakali kulangilwa kwaalilwa kuzwa kumatalikilo.
5, 6. Ino ncinzi cakapa kuti Saatani amuzangile Jehova?
5 Muntu uuli amaano takonzyi kutalika kucita cintu ncazyi kuti tacikonzyi kubeleka. Ikuti naa wazumanana kucita cintu eeco, ulakonzya kuzyiba kuti tacikonzyi kubeleka. Izyintu zibacitikila bantu zilatondezya kuti tacigwasyi kucita zyintu ziteendelani amalailile aa Mulengi singuzuzyoonse. (Amubale Tusimpi 21:30.) Pele akaambo kakuliyanda akulisumpula, Saatani wakamuzangila Jehova. Aboobo, Diabolosi wakalisalila kufwa.
6 Ikulisumpula kwa Saatani kwakalibonya ciindi mweendelezi wa Babuloni naakaamba cakulisumpula kuti: “Nkatante kujulu. Nkaimike cuuno cangu cabwami kujulu lyanyenyeezi zya-Leza. Nkakale atala lyacilundu cambunganino kumabazu aakumusanza. Nkatante kujulu loko kwiinda mayoba. Nkakozyane a-Leza Mupati.” (Is. 14:13-15) Akaambo kakutayeeya kabotu, zyoonse nzyaakali kucita zyakaba zyabuyo, alimwi bwami bwa Babuloni bwakamana. Mbubwenya buyo, Saatani uyakunyonyoonwa anyika yakwe ino-ino.
Ino Nkaambo nzi Leza Ncazumizya Kuti Bantu Balyeendelezye?
7, 8. Ino mbubotu nzi buliko akaambo kakuti Jehova wakakuzumizya cibi kuti cizumanane kwaciindi cili mbocibede?
7 Bantu bamwi tabakazyi kaambo Jehova ncaatakabalesyela bantu kutobela Saatani alimwi akutobela bweendelezi bwakwe ibwakali kulangilwa kuti buya kwaalilwa. Mbwali Leza Singuzuzyoonse, wakali kukonzya kubalesya. (Kul. 6:3) Nokuba boobo, tanaakabakasya. Akaambo kakuti musongo, wakazyiba kuti cilakonzya kugwasya ikuti wabazumizya kuti balyeendelezye. Jehova wakalizyi kuti mukuya kwaciindi, uyakuzyibwa kuti Mweendelezi mubotu, alimwi akuti bantu basyomeka balakonzya kugwasyigwa azyintu nzyasala Leza.
8 Eelyo kaka bantu nibatali kupenga ikuti nibatakayungwa a Saatani alimwi akukaka kuti balyeendelezye! Nokuba boobo, kusala nkwaakacita Jehova ikubazumizya bantu kuti balyeendelezye nkwaciindi buyo cisyoonto. Eeci capa kuti bantu babombe myoyo babone mbocigwasya ikumumvwida Leza akumusyoma. Kuzwa kaindi bantu bali kusoleka kubelesya mfwulumende ziindene-indene, pele kunyina yazwidilila. Eeci cabagwasya bakombi ba Leza kubona kuti mfwulumende ya Jehova ilikke njiikonzya kuzwidilila. Masimpe ngakuti, akaambo kakuti Jehova wakamuzumizya Saatani kuti ayendelezye, capa kuti bantu boonse babe mumapenzi kubikkilizya abakombi ba Leza basyomeka. Nokuba boobo, akaambo kakuzumizya cibi eeci kwaciindi cili mbocibede cabagwasya bakombi basyomeka.
Ikuzanga Kwapa Kuti Jehova Atembaulwe
9, 10. Amupandulule bweendelezi bwa Saatani mbubwapa kuti Jehova atembaulwe.
9 Ikuzumizya bantu kuti bayungwe a Saatani alimwi akuti balyeendelezye tacaambi kuti bweendelezi bwa Jehova bwaalilwa. Kunyina nobwaalilwa pe. Zyintu zibacitikila bantu kuzwa kaindi zitondezya kuti ncaakaamba Jeremiya kwiinda mukusololelwa amuuya uusalala ikuti bantu tabakonzyi kulyeendelezya, ncamasimpe. (Amubale Jeremiya 10:23.) Kuyungizya waawo, kuzanga kwa Saatani kwapa kuti Jehova atondezye kuti mubotu. Muunzila nzi?
10 Akaambo kakuti twabubona mbobutagwasyi bweendelezi bwa Saatani, ibube bubotu bwa Jehova bwalibonya kabotu kwiinda mbobwakeelede kulibonya nikwatali buzangi. Eeci capa kuti bantu ibamuyanda bamulemeke. Inzya, ibweendelezi bwa Saatani bwapa kuti Leza atembaulwe. Eeci capa kuti Jehova azyibwe kuti mupati kwiinda boonse akaambo kakubona mbwaakeenzya kaambo kakatalisyigwa abaabo bakazangila bweendelezi bwakwe. Kutegwa tutondezye mbokali kamasimpe kaambo aaka, atubone mubufwaafwi zintu zimwi zyaacita Jehova akubona bweendelezi bwa Saatani mbubwamupa kuti Jehova acite zyintu azimbi.
11. Ino mbuti Jehova mbwaatondezya kuti ulabayanda bantu?
11 Luyando. Magwalo atwaambila kuti “Leza nduluyando.” (1 Joh. 4:8) Leza naakalenga bantu cakali kutondezya kuti ulabayanda. Kuyungizya waawo, akaambo kakuti twakalengwa munzila mbotu, eeci ncitondezyo cakuti Leza ulatuyanda. Alimwi Jehova wakababambila munzi mubotu bantu bakwe iwakajisi zyintu zyoonse zyakali kukonzya kubakkomanisya. (Matl. 1:29-31; 2:8, 9; Int. 139:14-16) Pele bantu nibakabisya, Jehova wakatondezya kuti ulabayanda munzila iimbi. Ino nzila nzi njaakabelesya? Mwaapostolo Johane wakalemba majwi aa Jesu aakuti: “Nkaambo obuya Leza mbwaakayandisya nyika, wakapa Mwanaakwe simuzyalwa alikke, kuti umwi umwi uumusyoma atafwidilili, pele abe abuumi ubutamani.” (Johane 3:16.) Taaku nzila iimbi Leza njaakali kukonzya kubelesya kwiinda yakutuma Mwanaakwe simuzyalwaalikke anyika kutegwa afwutule basizibi. (Joh. 15:13) Eeci cakali kutondezya kuti Leza ulabayanda kapati bantu alimwi cakabapa kuti kabamuyanda Leza mubuumi bwabo boonse mbuli mbwaakacita Jesu iwakalisungula kufwida bamwi.—Joh. 17:25, 26.
12. Ino munzila nzi Jehova mwatondezya kuti ulaanguzu?
12 Inguzu. Alikke “Leza, singuzuzyoonse,” nguujisi nguzu zyakupa buumi. (Ciy. 11:17; Int. 36:9) Imuntu naazyalwa cili mbuli kuti ndipepa litalembedwe cintu cili coonse. Pele afwa, cili mbuli kuti pepa eeli lyalembwa zyintu nzyaakasalide, nzyaakali kucita alimwi azyakamucitikila mubuumi. Jehova ulazyiyeeya zyoonse eezyi. Mukuya kwaciindi, Jehova ulakonzya kumubusya muntu ooyu kuti abe mbubwenya mbwakabede. (Joh. 5:28, 29) Aboobo, nokuba kuti tiibwakali bubambe bwa Leza kuti bantu kabafwa, eeci capa kuti Jehova atondezye kuti ulaanguzu zyakubusya bantu bafwide. Masimpe Jehova ngu “Leza singuzuzyoonse.”
13. Ino kulyaaba kwa Jesu kwakatondezya buti kuti Jehova uliluleme muzyintu zyoonse?
13 Bululami. Jehova tabeji; alimwi taciti zyintu zitaluleme. (Dt. 32:4; Tit. 1:2) Lyoonse uyanda kuti zyintu kazicitwa munzila iili kabotu nokuba kuti zimwi ziindi eeci inga caboneka mbuli kuti tacimugwasyi. (Rom. 8:32) Eelo kaka Jehova cakamucima kubona Mwanaakwe simuzyalwaalikke kafwa acisamu cakupenzezya mbuli kuti ngusikasankusanku! Nokuba boobo, akaambo kakubayanda bantu batalondokede, Jehova wakalilibambide kusungula mwanaakwe kuti apenzyegwe kutegwa atondezye kuti wakali londokede. (Amubale Ba-Roma 5:18-21.) Inyika iizwide bantu bataluleme yakapa kuti Jehova atondezye kuti uliluleme.
14, 15. Ino muunzila nzi Jehova mwaatondezya kuti musongo alimwi ulakkazyika moyo?
14 Busongo. Ba Adamu a Eva mbubakabisyila buyo, Jehova wakaamba nzila njayakubelesya kubambulula zyintu zyoonse zyakacitika akaambo kakuzanga kwabo. (Matl. 3:15) Ooku kufwaambana kubweza ntaamu akwaambila babelesi bakwe, cakapa kuti zyintu zyaya kucita Jehova zizyibwe kufwambaana. (Rom. 11:33) Taaku cikonzya kumulesya Leza kuzilulamika zyintu munzila iili kabotu. Munyika muzwide bumambi, nkondo, bufwubafwuba, kutatobela milawo, kubula lubomba, kusalana akuupa-upa ameso, Jehova ulijisi ciindi cakutondezya zilenge zyakwe busongo bwini-bwini. Sikwiiya Jakobo wakaamba kuti: “Busongo buzwa kujulu, lutaanzi bulasalala, alimwi mbwaluumuno, bulatontola, bulibombede, bulizwide lweetelelo amicelo mibotu, tabujisi lwaanzaano lwamoyo niluba luupaupo ameso.”—Jak. 3:17.
15 Kukkazyika Moyo Akuliyumya.
Ikukkazyika moyo kwa Jehova kwakalibonya naakatalika kubeleka abantu batalondokede, basizibi alimwi ibalubizya. Akaambo kakuti Jehova wali kucita oobo kwamyaka minji, eeci citondezya kuti ulibujisi bube oobu bubotu alimwi swebo tweelede kumulumba kapati. Mwaapostolo Petro wakaamba kuti tweelede kubona kuti “kukazika moyo kwa-Mwami nkokuleta lufutuko.”—2 Pet. 3:9, 15.
16. Ino nkaambo nzi ncocitukkomanisya notubona kuti Jehova ulilibambide kutulekelela?
16 Ulilibambide Kulekelela. Toonse tuli basizibi alimwi tulalubizya ziindi zinji. (Jak. 3:2; 1 Joh. 1:8, 9) Aboobo, tweelede kumulumba Jehova akaambo kakuti ‘nguuinda kutulekelela.’ (Is. 55:7) Alimwi amuyeeye kaambo aaka: Mbwaanga twakazyalwa katutalondokede, swebo tulakonzya kukkomana kapati akaambo kakuti tuli acoolwe cakubona mbwatulekelela Leza kuzibi zyesu. (Int. 51:5, 9, 17) Notubona mbwatulekelela Jehova citupa kuti katumuyanda kapati akugwasya bantu.—Amubale Ba-Kolose 3:13.
Ino Nkaambo nzi Nyika Ncoiciswa?
17, 18. Ino mbuti Saatani mbwaalilwa kulela?
17 Saatani waalilwa kweendelezya nyika eeyi kwamyaka minji. Mu 1991 muteende wa The European wakati: “Sena nyika ilaciswa? Inzya, pele takuli kuyanda kwa Leza—ibulwazi bwanyika bwakatalisyigwa abantu.” Aaya makani ngamasimpe! Akaambo kakuyungwa a Saatani, ibazyali besu bakusaanguna bakasala kulilela muciindi cakusololelwa a Jehova. Bakatalika kulilela pele bakaalilwa. Ikuciswa akupenga kucitika munyika yoonse citondezya kuti bantu baalilwa kulilela.
18 Ikulela kwa Saatani nkwakuliyanda. Nokuba boobo, ikuliyanda takukonzyi kwiinda aluyando oolo ndwatondezya Jehova neendelezya. Saatani waalilwa kulela akaambo kakuti kunyina luumuno, lukkomano naa lukwabililo. Jehova ulicizyi kulela. Alimwi ulela kabotu. Sena mazuba aano tulijisi bumboni butondezya kuti aaka kaambo nkamasimpe? Inzya, tulabona mucibalo citobela.
Ino Ncinzi Ncotwaiya Kujatikizya Bweendelezi Nitwali Kubala . . .
[Zifwanikiso izili apeeji 25]
Ikulela kwa Saatani kunyina nokwabagwasya bantu
[Kulumba]
Yakafwotolwa Abasilikani baku U.S.
Yakafwotolwa aba P. Almasy baku WHO
[Cifwanikiso icili apeeji 26]
Jehova ulaanguzu zyakubusya bantu bafwide
[Cifwanikiso icili apeeji 27]
Jehova wakatondezya luyando abululami naakaaba Mwanaakwe