Nzyaakayiisya Jesu Kujatikizya Bwami bwa Leza

“Jesu wakanjilauka muminzi amutunzi, wakali kuya bukambauka . . . Makani Mabotu aa-Bwami bwa-Leza.”—LUKA 8:1.

TULAYANDA kubandika kujatikizya zyintu nzyotuyandisya kapati, nkokuti eezyo zili kumoyo wesu. Jesu lwakwe mwini wakaamba kuti, “nkaambo mulomo ulagwisya aata mumoyo.” (Matayo 12:34) Kuti naa twalanga-langa zyintu nzyaakaamba Jesu naakali kukambauka, tulakonzya kubona kuti Bwami bwa Leza bwakali kuyandika kapati kuli nguwe.

Ino Bwami bwa Leza ninzi? Bwami nimfwulumende yeendelezyegwa amwami. Aboobo, Bwami bwa Leza nimfwulumende yakabikkwa a Leza. Jesu wakaamba makani manji kujatikizya Bwami bwa Leza, aboobo Bwami bwa Leza nguwakali mutwe wamulumbe wakwe. Mabbuku one aamu Bbaibbele aa Makani Mabotu alaamba kujatikizya Bwami oobu ziindi ziinda ku 110. Jesu tanaakayiisya kwiinda mumajwi buyo. Pele wakatondezya Bwami bwa Leza ncobuya kucita kwiinda muzyintu nzyaakali kucita.

Ino Mwami nguni? Mwami wa Bwami bwa Leza tasalwi buya abantu kuti abe Mwami. Muciindi caboobo, ooyu Muleli ulasalwa a Leza lwakwe mwini. Jesu naakali kuyiisya wakayubununa kuti ngonguwe wakasalidwe a Leza kuti abe Mwami.

Jesu wakalizyi kuti businsimi bwamu Bbaibbele bwakaamba kuti Mesiya uusyomezyedwe uya kweendelezya mu Bwami butamani. (2 Samuele 7:12-14; Daniele 7:13, 14; Matayo 26:63, 64) Amuyeeye kuti Jesu wakaamba caantangalala kuti nguwakali Mesiya wakasyomezyedwe. Aboobo Jesu wakasinizya kuti nguwakali Mwami wakabikkwa a Leza. (Johane 4:25, 26) Nkakaambo kaako, bunji bwaziindi Jesu wakabelesya majwi aakuti “bwami bwangu.”—Johane 18:36.

Alimwi Jesu wakayiisya kuti kuya kuba abamwi baya kweendelezya anguwe mu Bwami. (Luka 22:28-30) Aaba wakabaamba kuti “[n]katanga kaniini,” akaambo kakuti mbasyoonto. Kujatikizya mbabo wakati: “Nkaambo Usowanu ulakondwa kumupa bwami bwakwe.” (Luka 12:32) Ibbuku lyamamanino lyamu Bbaibbele litondezya kuti ibaya kweendelezya antoomwe a Kristo banooli 144,000.—Ciyubunuzyo 5:9, 10; 14:1.

Ino Bwami buli kuli? Jesu wakaambila mweendelezi muna Roma Ponto Pilato, kuti: “Bwami bwangu tabuli bwaansi ano.” (Johane 18:36) Mu Bwami bwa Leza, Kristo takeendelezyi kwiinda mumfwulumende zyabantu. Cakwiinduluka-induluka, Jesu wakaamba Bwami bwa Leza kuti “[M]bwami bwakujulu.”a (Matayo 4:17; 5:3, 10, 19, 20) Aboobo Bwami bwa Leza, nimfwulumende yakujulu.

Jesu wakalizyi kuti uya kupiluka kujulu aakumanizya mulimo wakwe waanyika. Wakaamba kuti, “ndiya kukumubambila busena,” ikujalula nzila yakuti basikulelanyina bakabe aanguwe kujulu.—Johane 14:2, 3.

Ino ncinzi ncobucita Bwami mazuba aano? Jesu wakayiisya baswiilizi bakwe kupaila kuli Leza kuti: “Abuze Bwami bwako, alucitwe luyando lwako, ansi ano mbubonya mbuli kujulu.” (Matayo 6:9, 10) Luyando lwa Leza lulacitwa kujulu. Makanze aa Leza kujatikizya nyika alacitwa kwiinda mu Bwami oobu. Kwiinda mu Bwami oobu Leza uya kupa kuti zyintu zinji zicince anyika.

Ino ncinzi ncobuya kucita Bwami oobu anyika? Jesu wakayiisya kuti Bwami bwa Leza buya kugusya zyintu zibi kwiinda mukugusya baabo bazumanana kucita zibi. (Matayo 25:31-34, 46) Aayo ngaaya kuba mamanino aazibi zyoonse. Jesu wakayiisya kuti, eeyi nyika, iya kuzula abantu “balibombya,” balulami, basilweetelelo, “basalala mumyoyo” abasiluumuno.—Matayo 5:5-9.

Sena aaba bantu basyomeka bana kukkala munyika iisofweede? Peepe! Jesu wakasyomezya kuti mubweendelezi bwa Bwami bwa Leza nyika eeyi iya kubambululwa. Imwaalumi wakajaigwa antoomwe a Jesu, wakati, “Ukandiyeeye, waakunjila mubwami bwako.” Jesu wakamwiingula kuti: “Ncobeni ndakwaambila sunu kuti, tunooli ayebo mu Paradaiso.” (Luka 23:42, 43, NW.) Inzya, Bwami bwa Leza buya kusandula nyika eeyi yoonse kuba paradaiso kutegwa ikabe mbubonya mbuli mboyakabede mumuunda wa Edeni.

Ino ncinzi cimbi Bwami ncobuya kubacitila bantu? Jesu tanaakasyomezya buyo ncobuya kucita Bwami bwa Leza. Pele wakatondezya ncobuya kucita. Jesu wakaponya bantu banji munzila yamaleele, ikutondezya milimo mipati njaya kubacitila bantu aakutalika kulela mu Bwami. Ikujatikizya Jesu, ibbuku lya Makani Mabotu lyakasololelwa amuuya lyaamba kuti: “Lino Jesu wakali kuya bweendeenda moonse mu-Galilaya, kaya bwiisya muzikombelo zyabo akukambauka makani mabotu aa-Bwami akuponya malwazi oonse amalengwa oonse akati kabantu.”—Matayo 4:23.

Jesu wakaponya bantu baciswa malwazi manji aaindene-indene. Jesu “waka[jalula] meso aamuntu uwakazyalwa moofu.” (Johane 9:1-7, 32, 33) Kwiinda mukumwaampa, Jesu wakaponya mwaalumi wakacisidwe bulwazi busesemya bwacinsenda. (Marko 1:40-42) Bantu nobakamuletela muntu “umwi musinkematwi sikubebesya,” Jesu wakatondezya kuti “basinkematwi ulabasinkula, abalo basyataambi ulabaambya.”—Marko 7:31-37.

Niluba lufwu kulugama wakaluzunda Mwami wakabikkwa a Leza. Kwaziindi zyotatwe kulembedwe kuti Jesu wakabusya bafwide. Wakabusya mwaalumi wakazyedwe alikke kuli mukamufwu, musimbi wamyaka iili 12 a Lazaro mweenzyinyina.—Luka 7:11-15; 8:41-55; Johane 11:38-44.

Kapandulula bubotu buli kumbele mbobalangila ibaya kulelwa mu Bwami bwa Leza, Jesu wakasinsima kwiinda muli mwaapostolo Johane kuti: “Amubone, bukalo bwa-Leza mpobuli akati kabantu, uzookala akati kabo. Bazooba bantu bakwe, alakwe Leza mwini uzookala kulimbabo, azoobe Leza wabo. Nkabela uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.” (Ciyubunuzyo 1:1; 21:3, 4) Amweezyeezye buyo—nyika iitakwe mause, iitakwe macise alimwi iitakwe lufwu! Mpoonya mupailo wakuti luyando lwa Leza lucitwe anyika mbubonya mbuli mbolucitwa kujulu uya kuzuzikizyigwa cakumaninina.

Ino Bwami bwa Leza buya kuboola lili? Jesu wakayiisya kuti matalikilo aabweendelezi bwabwami bwakwe aya kutalikila antoomwe aciindi cilibedelede calo ncaakaita kuti “kubako” kwakwe. Jesu wakaamba kuti kuya kuba zyintu ziindene-indene ziya kucitika ziya kutondezya kuti kubako kwakwe kwatalika. Eeci cakali kuya kuba ciindi camakatazyo aajatikizya nyika yoonse, kubikkilizya ankondo, nzala, mizuzumo yanyika, malwazi akuvwula kwamilandu. (Matayo 24:3, 7-12, NW; Luka 21:10, 11) Eezyi zyintu kubikkilizya azimwi zinji nzyaakaamba Jesu zilalibonya kutalikila mumwaka wa 1914 noyakabuka Nkondo Yanyika Yakusaanguna. Aboobo, Jesu lino ngo Mwami weendelezya. Lino-lino ciindi cilasika cakuti Bwami buboole akupa kuti luyando lwa Leza lucitwe anyika.b

Ino kuboola kwa Bwami bwa Leza kuya kumugwasya buti nywebo kumugama? Eeco ciyeeme buyo ambomukonzya kuutambula mulumbe wa Jesu.

Bupanduluzi buyungizidwe