Ino “Muleelede Kuba Bantu Bali Buti?”
“Lino zintu ezi mbuziti kamaninine obo, nywebo muleelede kuba bantu bali buti kukweenda munzila iisalala amukulemeka Leza?”—2 PET. 3:11.
1. Ino nkaambo nzi lugwalo lwabili lwa Petro ncolwakabakulwaizya Banakristo mbaakali kupona limwi?
MWAAPOSTOLO Petro naakalemba lugwalo lwabili, kwakajanika kuti bantu mumbungano ya Bunakristo bakaliyumya kale kumapenzi manji, pele eeci tiicakabatyompya mumulimo wabo naa kupa kuti mbungano itakomeni. Aboobo, Diabolosi wakabelesya nzila imbi yalo yakali kuzwidilila ziindi zinji. Kweelana ambwaakaamba Petro, Saatani wakali kubeena bantu ba Leza kwiinda mukubelesya bamayi bakubeja bakajisi ‘meso aazwide bumambi’ alimwi bakajisi ‘myoyo yakazyibila’ kulikumbuzya. (2 Pet. 2:1-3, 14; Jud. 4) Nkakaambo kaako, lugwalo lwabili lwa Petro lutukulwaizya kuzumanana kusyomeka kuli Leza.
2. Ino lugwalo lwa 2 Petro caandaano 3 lwaamba nzi, alimwi mibuzyo nzi njotweelede kulibuzya?
2 Petro wakalemba kuti: “Ndayeeya kuti ncibotu kumuyeezya obo nencili mucilao ecino, nkaambo ndizi kuti, kaba kaindi buyo, eci cilao cangu cileelede kumwaigwa . . . Alimwi ndasungwaalila kuti nendazwa, kamucinooya buyeeya makani aya lyoonse.” (2 Pet. 1:13-15) Inzya, Petro wakalizyi kuti ulaafwaafwi kufwa, pele wakali kuyanda kuti nzyaakabayeekezya bazumanane kuziyeeya. Masimpe, majwi aaya akaba cibeela ca Bbaibbele alimwi toonse tulakonzya kwaabala asunu. Caandaano 3 mulugwalo lwabili lwa Petro cilayandika kapati kuli ndiswe nkaambo caamba “mazuba aakumamanino” aabweende oobu bwazyintu alimwi akunyonyoonwa kwajulu anyika yacikozyanyo. (2 Pet. 3:3, 7, 10) Ino Petro utupa lulayo nzi? Ino kubelesya lulayo oolu inga kwatugwasya buti kutegwa Jehova atutambule?
3, 4. (a) Ino ndulayo nzi ndwaakaamba Petro, alimwi wakacenjezya nzi? (b) Ino ntwaambo nzi totatwe ntotutiilange-lange?
3 Naakamana kwaamba kunyonyoonwa kwanyika ya Saatani, Petro wakaamba kuti: “Muleelede kuba bantu bali buti kukweenda munzila iisalala amukulemeka Leza?” (2 Pet. 3:11, 12) Kwiinda mumajwi aaya, Petro wakacisalazya kuti balikke aabo bacita kuyanda kwa Jehova mbabaya kufwutuka “[mu]buzuba bwakuliya inkoto.” (Is. 61:2) Aboobo, mwaapostolo wakayungizya kuti: “Pele nywebo nomuyandwa, mbomweezi kale aya, amukalicenjezye kuti mutalengwawidwi kulweeno lwabataka akujatuluzigwa kukujatila kwanu.”—2 Pet. 3:17.
4 Akaambo kakuti wakali umwi wabantu bakajisi luzyibo, Petro wakalizyi kuti kumazuba aakumamanino Banakristo bakeelede kucenjela kapati kutegwa bazumanane kusyomeka. Kumbele, mwaapostolo Johane wakakapandulula kabotu kaambo aaka. Wakabona Saatani mbwaya kutandwa kuzwa kujulu “abukali [bwakwe] bupati” kuli baabo “babamba milazyo ya-Leza akujata bumboni bwa-Jesu.” (Ciy. 12:9, 12, 17) Babelesi basyomeka ba Leza bananike antoomwe ‘abambelele zimwi’ basyomeka baya kuzunda. (Joh. 10:16) Pele ino mbuti swebo kutugama? Sena tuya kuzumanana kusyomeka? Tuya kugwasyigwa kucita oobo ikuti naa twasoleka canguzu (1) kuba abube bwa Leza, (2) kuzumanana kusalala mukulilemeka akumuuya alimwi a (3) kwaalanga kabotu masukusyo. Atutulange-lange twaambo ootu.
Amube Abube bwa Leza
5, 6. Ino mbube nzi mbotweelede kuba aambubo, alimwi ino nkaambo nzi ncokuyandika ‘kusungwaala’?
5 Kumatalikilo aalugwalo lwakwe lwabili, Petro wakalemba kuti: “Amusungwaale camoyo woonse, kuti kulusyomo lwanu muyungizizye bubotu, akububotu bwanu luzibo, akuluzibo lwanu lulyeendelezyo, akululyeendelezyo lwanu lukakatilo, akulukakatilo lwanu kulemeka Leza, akukulemeka Leza luyandano lwabunyina, akuluyandano lwabunyina moyo waluzyalo. Nkaambo kakuti makani aya anoomukalilide akuvula alamukasya kuba batolo nanka kubula micelo mukuzibisya Mwami wesu Jesu Kristo.”—2 Pet. 1:5-8.
6 Masimpe, tuyandika ‘kusungwaala’ notucita milimo iikonzya kutugwasya kuba abube bwa Leza. Mucikozyanyo, kuyandika kubeleka canguzu kutegwa kamujanika kumiswaangano yoonse ya Bunakristo, kamubala Bbaibbele abuzuba alimwi akuzumanana kucita ciiyo cenu nobeni. Alimwi kuyandika kubeleka canguzu akulibambila kabotu kutegwa Kukomba Mumukwasyi kakucitwa lyoonse, kakukkomanisya alimwi kakugwasya. Pele kuti naa twabikkila maano kububambe oobu, cilakonzya kuuba-uba—ikapati kuti naa kuli bubotu mbutwakabona.
7, 8. (a) Ino ncinzi bamwi ncobaamba kujatikizya Kukomba Mumukwasyi? (b) Ino mbubotu nzi mbumwajana kukukomba mumukwasyi?
7 Kujatikizya bubambe bwa kukomba mumukwasyi, mucizyi umwi wakalemba kuti: “Cilatugwasya kwiiya zyintu zinji.” Aumwi wakati: “Kwaamba masimpe, tiindakali kuyanda kuti ciiyo cabbuku cimane. Ngomuswaangano ngundakali kuyanda kapati. Pele lino, akaambo kakuti tujisi bubambe bwa Kukomba Mumukwasyi, ndabona kuti Jehova ulicizyi ncotuyanda anociyandika.” Mutwe wamukwasyi umwi wakaamba kuti: “Kukomba mumukwasyi kulatugwasya kapati. Ikuba amuswaangano motubandika zyintu nzyotuyandika kapati tobanabukwetene. Toonse tulimvwa kuti tucita kabotu mukubelesya micelo yamuuya uusalala alimwi tulakkomana kapati mumulimo wamumuunda kwiinda mbutwakali kucita kaindi.” Aumwi mutwe wamukwasyi wakati: “Ibana balavwuntauzya beni nzyotuyanda kwiiya alimwi baiya zinji alimwi balacikkomanina. Ibubambe oobu butupa kusyoma kuti Jehova ulizizyi zyintu nzyotuyandika alimwi ulaingula mipailo yesu.” Sena andinywe mbomulimvwa oobu kujatikizya bubambe bwakumuuya oobu bubotu?
8 Mutalekeli tuntu tusyoonto-syoonto kuti tumulesye kukomba mumukwasyi. Banabukwetene bamwi bakaamba kuti, “Kwansondo zyone lyoonse muli Bwane, kwali kucitika zyintu zyali kukonzya kutunyonganya kuti tutabi aaciiyo cesu pele penzi eeli twakalimana.” Nokuba boobo, zimwi ziindi mulakonzya kucinca ciindi eeci. Nomucita boobo, tamweelede kulekela limwi Kukomba Mumukwasyi noiba nsondo yomwe pe.
9. Ino mbuti Jehova mbwaakamugwasya Jeremiya, alimwi ncinzi ncotukonzya kwiiya kucikozyanyo cakwe?
9 Imusinsimi Jeremiya wakatusiila cikozyanyo cibotu. Wakapegwa cakulya cakumuuya a Jehova alimwi wakacikkomanina kapati. Eeci cakulya cakamupa kuti aliyumye naakali kukambaukila bantu batakali kubikkila maano. Wakati: “Nkaambo ijwi lya-Jehova lyandibeda . . . anga mulilo uuyakisya uujalilidwe mukati kazifuwa zyangu.” (Jer. 20:8, 9) Eeci acalo cakamugwasya kuliyumya ciindi Jerusalem niyakanyonyoonwa. Aano mazuba tulijisi Bbaibbele. Ciindi notulibala camoyo woonse akubona zyintu mbuli mbwazibona Leza, tulakonzya kuliyumya katukkomene mumulimo wakukambauka mbuli mbwaakacita Jeremiya, kuzumanana kusyomeka notuli mumasukusyo, akuzumanana kusalala mukulilemeka akumuuya.—Jak. 5:10.
Katuzumanana ‘Kutaba Akabala Alimwi Akampenda’
10, 11. Ino nkaambo nzi ncotweelede kuzumanana ‘kubula kabala akampenda,’ alimwi ino ncinzi ncotweelede kucita?
10 Mbotuli Banakristo, tulizyi kuti tupona kumazuba aamamanino. Aboobo, tatugambwi kuti bantu munyika bacita zyintu nzyatayandi Jehova, mbuli bulyato, koonana kutali kwamumulawo alimwi alunya. Nzila njabelesya Saatani kusunka bantu ilakonzya kwaambwa boobu: ‘Kuti babelesi ba Leza kabatakonzyi kukongwa, ndiza balakonzya kweenwa.’ (Ciy. 2:13, 14) Aboobo, tweelede kulubikkila maano lulayo lwa Petro lwakuti: “Amusungwaale kujanwa mulikede muluumuno, mutakwe kabala, mutakwe kampenda mumeso aa-Leza.”—2 Pet. 3:14.
11 Petro wakainduluka kwaamba jwi lyakuti “amusungwaale.” Masimpe, Jehova—iwakasololela Petro kwaamba majwi aaya—ulizyi kuti tuyandika kusungwaala kutegwa tuzumanane ‘kubula kabala akampenda,’ kutasofwaazyigwa anyika ya Saatani. Kusungwaala kubikkilizya kukwabilila moyo wesu kuti tuteenwi azyintu zitali kabotu. (Amubale Tusimpi 4:23; Jakobo 1:14, 15.) Alimwi kulabikkilizya akuliyumya kuzyintu nzyobaamba aabo bagambwa akaambo kabukkale bwesu bwa Bunakristo ‘akutuvwiya.’—1 Pet. 4:4.
12. Ino ncisyomezyo nzi ncotujana ku Luka 11:13?
12 Akaambo kakutalondoka cilatukatazya kucita ciluleme. (Rom. 7:21-25) Tulakonzya buyo kuzwidilila ikuti twasyoma muli Jehova, uupa cabwaabi muuya uusalala kuli baabo balomba amoyo woonse. (Lk. 11:13) Muuya ooyu upa kuti tube abube mbwakkomanina Leza alimwi eeci cilatugwasya kuzwidilila kutali buyo mumasunko aamubuumi pele amumasukusyo aalangilwa kuvwula buzuba bwa Jehova nobuyaabuswena afwaafwi.
Aamuyumye Masukusyo
13. Ino ncinzi cikonzya kutugwasya kuti tuliyumye notuli mumasukusyo?
13 Notupona mubweende bwazyintu oobu bwakaindi, tunakuli amasukusyo aaindene-indene lyoonse. Pele muciindi cakutyompwa, amubone kuti masukusyo aayo amupa coolwe cakutondezya kuti mulamuyanda kapati Leza alimwi akuyumya lusyomo lwenu muli nguwe amu Jwi lwakwe. Sikwiiya Jakobo wakalemba kuti: “Bakwesu, amuyeeye kuti ncoolwe cipati na mwasikilwa masukusyo aamisyobo misyobo, nkaambo mulizi kuti kusukusigwa kwalusyomo lwanu nkokuleta lukakatilo.” (Jak. 1:2-4) Alimwi amuzyibe kuti “Jehova ulizi kuvuna bamukomba kumasukusyo.”—2 Pet. 2:9.
14. Ino mbuti cikozyanyo ca Josefa mbocimukulwaizya?
14 Amubone cikozyanyo ca Josefa mwana wa Jakobo, walo ngubakasambala mubuzike bana bakwabo. (Matl. 37:23-28; 42:21) Sena Josefa wakaleka kusyomeka akaambo kalunya ndubakamucitila? Sena wakamunyemena Leza akaambo kakuti wakazumizya cibi eeci kuti cimucitikile? Jwi lya Leza lyaamba kuti tanaakacita oobo. Alimwi aaya tanaakali ngamamanino aamasukusyo aa Josefa. Kumbele, wakatamikizyigwa kujata mukamuntu amane wakaangwa. Nokuba boobo, tanaakaleka kusyomeka kuli Leza. (Matl. 39:9-21) Muciindi caboobo, masukusyo akamuyumya, alimwi wakalongezyegwa kapati.
15. Ino ncinzi ncotukonzya kwiiya kucikozyanyo ca Naomi?
15 Masimpe, masukusyo alakonzya kumutyompya. Ndiza Josefa mbwaakali kulimvwa oobu zimwi ziindi. Babelesi ba Leza basyomeka bamwi abalo mbubakali kulimvwa oobo. Amubone cikozyanyo ca Naomi wakafwidwa mulumi abana bobilo basankwa. Wakati: “Mutandaambi limbi kuti Naomi pe, amundaambe kuti Mara [caamba “kulula”], nkaambo Syakeemba wandicitila makani aalula luu!” (Rut. 1:20, 21) Cilamvwika kuti Naomi wakalimvwa boobo. Pele mbubwenya mbuli Josefa, tanaakatyompwa naa kuleka kusyomeka. Mpoonya Jehova wakamulongezya mukaintu ooyu. (Rut. 4:13-17, 22) Kuyungizya waawo, mu Paradaiso, Jehova uyakwaamanizya mapenzi oonse aaletwa a Saatani anyika yakwe. “Ezyo zyakusaanguna tazikooyooibalukwa limbi nikuba kuyeeyegwa.”—Is. 65:17.
16. Ino mupailo tuulanga buti, alimwi nkaambo nzi?
16 Kufwumbwa naa masukusyo nzi aatucitikila, luyando lwa Leza lulatuyumya. (Amubale Ba-Roma 8:35-39.) Nokuba kuti Saatani takaleki kututyompya, uyakwaalilwa ikuti naa twazumanana ‘kulibatamika’ “akulisitikizya kukukomba.” (1 Pet. 4:7) Jesu wakaamba kuti: “Amulinde lyoonse, mukombe, kuti mukakonzye kuyokoka kuzintu zyoonse ezi iziyoocitika, akwiima kumbele lya-Mwana a-Muntu.” (Lk. 21:36) Kwiinda mukutwaambila kuti katukomba, Jesu wakali kukankaizya kuti tacili ciindi cakuleka kumubelekela walo a Bausyi. Balikke aabo bacita kabotu kumuuya mbabalangilwa kufwutulwa mubuzuba bwa Jehova.
Kamuzumanana Kumubelekela Jehova
17. Ikuti busena mbomukambaukila kabukatazya, ino mbuti mbomukonzya kugwasyigwa kucikozyanyo cabasinsimi bakaindi?
17 Kutola lubazu mumilimo yakumuuya cilatukatalusya. Eeci cituyeezya ncaakaamba Petro naakati: “Nywebo muleelede kuba bantu bali buti kukweenda munzila iisalala amukulemeka Leza?” (2 Pet. 3:11) Akati kazyintu nzyotucita notumulemeka Leza, ikukambauka makani mabotu ncecipati. (Mt. 24:14) Masimpe, mumasena amwi kukambauka kulakatazya akaambo kakukazyigwa naa akaambo kakuti bantu bajisi bubi amilimo yabo yaabuzuba. Abalo babelesi ba Jehova bakaindi cakabacitikila eeco. Nokuba boobo, tiibakatyompwa pele bakazumanana kupilukila amulumbe wakazwa kuli Leza. (Amubale 2 Makani 36:15, 16; Jer. 7:24-26) Ino ncinzi cakabagwasya kuliyumya? Mulimo bakali kuubona mbubwenya mbwaubona Jehova kutali mbobaubona bantu. Alimwi bakali kucibona kuti ncoolwe cipati kwiitwa azyina lya Leza.—Jer. 15:16.
18. Ino mulimo wakukambauka Bwami uyakugwasya buti mukuzyibya zyina lya Leza?
18 Andiswe tulaacoolwe cakwaambilizya zyina lya Jehova amakanze aakwe. Amukayeeye kaambo aaka: Akaambo kakuti bakakambaukilwa, basinkondonyina a Leza tabakaambi kuti tiibakamvwa kujatikizya Leza amakanze aakwe baakubetekwa. Masimpe, mbubwenya mbuli Farao wansiku, bayakuzyiba kuti Jehova nguubalwana. (Kul. 8:1, 20; 14:25) Aciindi ncimunya eeco, Jehova uyakubaleleka babelesi bakwe basyomeka kwiinda mukucitondezya caantangalala kuti mbabamwiinina.—Amubale Ezekieli 2:5; 33:33.
19. Ino mbuti mbotukonzya kutondezya kuti tulayanda kuzumanana kucita kabotu Jehova nacitukkazyikila moyo?
19 Kumamanino aalugwalo lwakwe lwabili, Petro wakabalembela basyominyina kuti: “Amuyeeye kuti kukazika moyo kwa-Mwami nkokuleta lufutuko.” (2 Pet. 3:15) Inzya, tweelede kuzumanana kucita kabotu Jehova nacitukkazyikila moyo. Munzila nzi? Kwiinda mukuba abube bumukkomanisya, kuzumanana ‘kutaba akabala alimwi akampenda,’ kwaalanga bweelede masukusyo alimwi akuba basungu mumulimo wa Bwami. Notucita boobu, tulaba akati kabantu bayakuba azilongezyo zitamani zijatikizya “ijulu ipya anyika impya.”—2 Pet. 3:13.
Sena Muciyeeyede?
• Ino mbuti mbotukonzya kuba abube bwa Leza?
• Ino mbuti mbotukonzya kuzumanana ‘kutaba akabala alimwi akampenda’?
• Ino ncinzi ncotukonzya kwiiya kuli Josefa a Naomi?
• Ino nkaambo nzi kutola lubazu mumulimo wakukambauka ncocili coolwe cipati?
[Cifwanikiso icili apeeji 9]
Ino ncinzi ciyakumugwasya nobalumi kuti mube abube bwa Leza nywebo amukwasyi wenu?
[Zifwanikiso izili apeeji 10]
Ino ncinzi ncotukonzya kwiiya kukuliyumya kwa Josefa mumasukusyo?