Amwiiye Ncolyaamba Jwi Lya Leza

Ino Leza Nguni?

Cibalo eeci cili amibuzyo imwi njomwakalibuzyide alimwi cilatondezya nkomukonzya kubujana bwiinguzi mu Bbaibbele lyanu. Bakamboni ba Jehova bayookkomana kubandika andinywe bwiinguzi kumibuzyo eeyi.

1. Ino Leza nguni?

Leza wakasimpe ngo Mulengi wazyintu zyoonse. Ibbaibbele limwiita kuti “Mwami waciindi coonse,” caamba kuti tajisi matalikilo alimwi unooliko lyoonse. (Ciyubunuzyo 15:3) Akaambo kakuti Leza nkakasensa kabuumi, tweelede kukomba nguwe buyo alikke.—Amubale Ciyubunuzyo 4:11.

2. Ino Leza ulibonya buti?

Kunyina wakamubona kale Leza nkaambo Muuya, eeci caamba kuti buumi bwakwe bulisumpukide kwiinda zilenge zili anyika. (Johane 1:18; 4:24) Bube bwa Leza bulalibonya muzyintu nzyaakalenga. Mucikozyanyo, twayeeya zyintu nzyaakalenga, micelo isiyene-siyene alimwi amaluba amisyobo-misyobo, tubona luyando lwa Leza alimwi abusongo bwakwe. Bupati bwabubumbo butwaambila nguzu zya Leza.—Amubale Baloma 1:20.

Tulakonzya kwiiya zinji kujatikizya bube bwa Leza kuzwa mu Bbaibbele. Mucikozyanyo, lilatwaambila nzyayanda Leza anzyatayandi, mbwababona bantu alimwi ambwalimvwa kuzyintu zisiyene-siyene zicitika.—Amubale Intembauzyo 103:7-10.

3. Sena Leza ulijisi zyina?

Jesu wakaamba kuti: “Taateesu ooli kujulu, alisalazyigwe zyina lyako.” (Matayo 6:9) Nokuba kuti Leza ujisi mazyina manji aabulemu, ujisi buyo zyina lyomwe. Mumwaambo uli oonse liliindene mbolyaambwa. Mu Chitonga lyaambwa kuti “Jehova.”—Amubale Intembauzyo 83:18.

Muma Bbaibbele manji zyina lya Leza liligusidwe akubikkilwa mazyina aabulemu aakuti Mwami naa Leza. Pesi ciindi Bbaibbele nolyakalembwa izyina lya Leza lyakali kujanika ziindi zisika ku 7,000. Jesu wakalizyibya zyina lya Leza kubantu kwiinda mukulibelesya ciindi naakali kubapandulwida Jwi lya Leza. Wakabagwasya bantu kuzyiba Leza.—Amubale Johane 17:26.

4. Sena Leza ulatulanganya?

Jehova ulatondezya kuti ulatuyanda kwiinda mukuswiilila mipailo yesu. (Intembauzyo 65:2) Sena kumvwula kwamapenzi caamba kuti Leza tatulanganyi? Bantu bamwi baamba kuti Leza nguupa kuti katupenga kutegwa atusunke, pele aaya taali masimpe. Ibbaibbele lyaamba kuti: “Kacili kule a-Leza kuti acite bubi.”—Jobu 34:10; amubale Jakobo 1:13.

Leza wakatulemeka kwiinda mukutupa coolwe cakulisalila. Tweelede kulumba kucoolwe eeci ncotwakapegwa cakusala kubelekela Leza. (Joshua 24:15) Mapenzi amvwula akaambo kakuti banji basala kucita zyintu zibi kubantunyina. Cilamucima Jehova kubona mapenzi aaya.—Amubale Matalikilo 6:5, 6.

Ino-ino, Jehova uyoobelesya Jesu kugusya mapenzi abaabo baaleta. Pele, kuli kaambo kabotu Jehova ncalekelede mapenzi aciindi cino. Cibalo ciyootobela ciyoopandulula kaambo Leza ncalekelede kupenga.—Amubale Isaya 11:4.

5. Ino ncinzi Leza ncayanda kuti tucite?

Jehova wakatulenga munzila iikonzya kutupa kumuzyiba akumuyanda. Uyanda kuti twiiye njiisyo zyakasimpe kajatikizya nguwe. (1 Timoteyo 2:4) Ikuti katubala Bbaibbele, tulakonzya kumuzyiba Leza mbuli Mulongwe wesu.—Amubale Tusimpi 2:4, 5.

Akaambo kakuti Jehova wakatupa buumi, tweelede kumuyanda kwiinda mbotuyanda muntu umbi. Inga twatondezya kuti tulamuyanda Leza kwiinda mukwaambaula anguwe mumupailo alimwi akucita nzyatwaambila. (Tusimpi 15:8) Jehova uyanda kuti katubayanda bantu.—Amubale Maako 12:29, 30; 1 Johane 5:3.

Kutegwa muzyibe zinji, amubone cibalo 1 mubbuku eeli, lyakamwaigwa a Bakamboni ba Jehova. Ino NcinzI Cini Bbaibbele Ncoliyiisya?

[Cifwanikiso icili apeeji 17]

Sena kuli kaambo kabotu ncalekelede mapenzi kwaciindi cisyoonto?