Mbomukonzya Kuyiisya Bana Kujatikizya Leza—Ino Ninzila Nzi Zyakuyiisya Izibeleka Kabotu?

“Aya majwi ngendamulailila buzuba obuno abe amyoyo yanu. Muleelede kwaaiyisya bana banu, akwaambaula ngawo lyoonse, ciindi cakukala muŋanda aciindi cakweenda munzila, ciindi cakoona aciindi cakubuka.” —DEUTERONOMO 6:6, 7.

ZIMWI ziindi bazyali balakonzya kukopana amukuli wakuyiisya bana babo. Aboobo, ciindi nobalomba lugwasyo balakonzya kunyongana azyintu zinji zisiyene-siyene nzyobakonzya kwaambilwa naa kubala. Basimukowa alimwi abeenzinyina kanji-kanji balafwambaana kupa mizeezo. Bazyali balajana lulayo lukazyanya zimwi ziindi mumabbuku, muzibalo zyamumagazini, alimwi aa Intaneti.

Kulubazu lumwi, Bbaibbele lipa bazyali ikutali buyo lulayo lugwasya kujatikizya nzyobeelede kuyiisya bana babo, pele alimwi ambobeelede kubayiisya. Mbuli tupango twamu Bbaibbele tuli atala aawa mbotutondezya, bazyali beelede kuyandaula nzila buzuba abuzuba yakwaambaula abana babo kujatikizya Leza. Ansi aawa, kuli nzila zyone zyamu Bbaibbele zyagwasya bazyali banji kuyiisya bana babo kujatikizya Leza.

1. Amubayiisye Bana Banu Kujatikizya Nzyobakonzya Kwiiya Kuzilenge. Mwaapostolo Paulo wakalemba kuti: “Bube [bwa Leza] butalibonyi bulalibonya caantangalala kuzwa ciindi naakalenga nyika kuya kumbele, nkaambo bulabonwa muzyintu nzyalengede, noziba nguzu zyakwe zitamani akuti ngu Leza ncobeni.” (Baloma 1:20) Bazyali balakonzya kubeleka canguzu kugwasya bana babo kubona Leza kuti Muntu mwini-mwini kwiinda mukubagwasya kumvwisya akuyanda zyintu nzyaakalenga Leza, mpoonya akubagwasya kubona bube bwa Leza buli muzyintu nzyaakalenga.

Jesu wakabelesya nzila eeyi naakali kuyiisya basikwiiya bakwe. Mucikozyanyo, wakaamba kuti: “Amulangisye bayuni bauluka mujulu; tabasyangi mbuto naa kutebula nokuba kuyobola mumatala. Nokuba boobo, Uso wakujulu ulabasanina. Sena tamuyandiki kwiinda mbabo?” (Matayo 6:26) Aawa Jesu wakali kwaamba bube bwa Jehova bwa luyando alweetelelo. Pele kuli zinji nzyaakacita. Wakabagwasya basikwiiya bakwe kubona Leza mbwaakatondezya bube oobo kubana bakwe.

Mwami Solomoni wakaamba kujatikizya busongo Leza mbwaakapa tuuka, alimwi wakabelesya tuuka ootu kukankaizya ciiyo ciyandika kapati. Wakalemba kuti: “Koya kulumoma, O mutolo; Bona inzila zyalo, uliiye busongo. Talujisi mwami, Talujisi silutwe nanka mweendelezi, Nekubaboobo lulabamba zilyo zyalo ciindi cacilimo, Akucela bulilu bwalo kuciindi cakutebula.” (Tusimpi 6:6-8) Eelo kaka eeyi ninzila mbotu kapati yakuyiisya mbociyandika kulibikkila mbaakani alimwi akubelesya nguzu nzyotupedwe a Leza kutegwa tuzizuzikizye!

Bazyali balakonzya kwiiya nzila zyakuyiisya nzyaakabelesya Jesu alimwi a Solomoni kwiinda mukucita zyintu eezyi: (1) Kubuzya bana babo zisyango alimwi azinyama nzyobayandisya kapati. (2) Kwiiya zinji kujatikizya zisyango eezyo alimwi azinyama. (3) Amwiiye ziiyo kujatikizya Leza kuzilenge eezyi.

2. Amwiiye Jesu Mbwaakali Kubabona Bantu Mbaakali Kuyiisya. Kubantu boonse bakaponede, Jesu nguwakajisi zyakwaamba ziyandika kapati. Pele ciindi cinji wakali kubuzya mibuzyo. Wakali kuyandisya kuzyiba nzyobayeeya ambobalimvwa bantu mbaakali kuyiisya. (Matayo 17:24, 25; Maako 8:27-29) Mbubwenya buyo, bazyali bajisi zyintu ziyandika kapati zyakuyiisya bana babo. Pele kutegwa bazwidilile, beelede kwiiya Jesu akukulwaizya bana babo kwaamba mbobalimvwa cakulikwaya.

Mbuti kuti batondezya mizeezo iitali kabotu naa balamuka kumvwa ncobayiisyigwa? Amubone Jesu mbwaakayiisya baapostolo bakwe. Zimwi ziindi bakali kunyemezyanya alimwi bakamuka kwiiya bubotu bwakulicesya. Nokuba boobo, Jesu wakazumanana kukkazyika moyo alimwi cakwiinduluka-induluka wakabaambila mbociyandika kulicesya. (Maako 9:33, 34; Luka 9:46-48; 22:24, 25) Bazyali ibayiya Jesu balabalaya bana babo cakukkazyika moyo, alimwi ikuti kakuyandika, balainduluka-induluka ciiyo nciconya mane kusikila bana bakamvwisya kaambo.a

3. Amubayiisye kwiinda mukuba cikozyanyo. Bazyali inga bacita kabotu kuswiilila lulayo lwa mwaapostolo Paulo ndwaakapa Banakristo baku Roma. Wakabalembela kuti: “Pele sena yebo ooyiisya umbi, toliyiisyi omwini? Yebo ookambauka kuti “Utabbi,” sena yebo ulabba?”—Baloma 2:21.

Lulayo oolu lulayandika kapati nkaambo bana balakkomana kubona nzyobacita bazyali babo kwiinda nzyobaamba. Mubwini, bazyali ibacita nzyobaambila bana babo kucita, balalangilwa kuba abana bamvwa nzyobayiisyigwa.

4. Amutalike kumuyiisya mwana nacili musyoonto. Timoteo iwakali kubeleka antoomwe amwaapostolo Paulo mumulimo wabumisyinali wakajisi mpuwo mbotu mucilawo mwaakali kukkala. (Milimo 16:1, 2) Kaambo komwe nkakuti “kuzwa kubuvwanda” wakayiisyigwa “malembe aasalala.” Banyina Timoteo alimwi abakaapanyina tiibakali kumubalila buyo Magwalo pele bakamugwasya kubona kasimpe kakali mumalembe aayo.—2 Timoteyo 1:5; 3:14, 15.

Nkomukonzya Kujana Lugwasyo

Bakamboni ba Jehova balamwaya mabbuku manji aakalembelwa kugwasya bazyali kuyiisya bana babo kasimpe kujatikizya Leza. Amwi alembelwa kugwasya bana baniini. Amwi alakonzya kugwasya bazyali abana babo bakubusi kubandika lyoonse cakulikwaya.b

Bazyali nobatanayiisya bana babo kujatikizya Leza, beelede kuzyiba bwiinguzi kumibuzyo miyumu njobakonzya kubuzya bana babo. Mucikozyanyo, inga mwaingula buti mibuzyo mbuli bwayeeyi: Nkaambo nzi Leza ncalekelede kupenga? Makanze nzi ngajisi Leza kujatikizya nyika? Ino bafwide bali kuli? Bakamboni ba Jehova bayookkomana kumugwasya kuzyiba bwiinguzi kumibuzyo eeyo alimwi aimbi kutegwa nywebo amukwasyi wanu mube acilongwe a Leza.—Jakobo 4:8.

[Bupanduluzi buyungizidwe]