Amusyome Jehova, “Leza Siluumbulizyo Loonse”
“Aatembaulwe Leza alimwi Usyi wa Mwami wesu Jesu Kilisito, Taata siluse a Leza siluumbulizyo loonse.”—2 KO. 1:3.
1. Ino ncinzi bantu bapati abana ncobayandika?
KUZWA ciindi cakuzyalwa tuyandika kuumbulizyigwa. Muvwanda ulalila kutegwa tuzyibe kuti uyanda kuumbulizyigwa. Ambweni uyanda kulelwa naa kunyonka. Niliba leelyo nitwakomena, kanji-kanji tuyanda kuumbulizyigwa, kwaambisya nituli mubukkale bukatazya.
2. Ncisyomezyo nzi Jehova ncapa citondezya kuti uyoobaumbulizya aabo bamusyoma?
2 Banamukwasyi abalongwe besu balakonzya kutuumbulizya. Nokuba boobo, zimwi ziindi bukkale bulakonzya kutupa kuyanda luumbulizyo lwiinda lwabantunsi. Leza alikke nguukonzya kutupa luumbulizyo lukonzya kutugwasya kufwumbwa mubukkale motubede. Ijwi lyakwe litusyomezya kuti: “Jehova uli kufwaafwi kuliboonse bamwiita, . . . ulabacitila mbobayanda.” (Int. 145:18, 19) Inzya, “Meso aa-Jehova alalangisya baluleme, amatwi aakwe alaswiilila kukwiila kwabo.” (Int. 34:15) Pele kutegwa Leza atugwasye akutukwabilila, tweelede kumusyoma cakumaninina. Sintembauzyo Davida wakakasalazya kaambo aaka ciindi naakaimba kuti: “Jehova ngemayubilo aabapenzegwa, mayubilo kuziindi zyamapenzi. Boonse bazi izina lyako balakusyoma, nkaambo webo, O Jehova, tobalekelezyi abo bakuyandaula.”—Int. 9:9, 10.
3. Ncikozyanyo nzi Jesu ncaakaamba citondezya luyando ndwajisi Leza kubantu bakwe?
3 Jehova ulabayanda bakombi bakwe. Jesu wakakasalazya kaambo aaka naakati: “Sena tutiiti tosanwe tatusambalwi makkobili obilo aajisi mpindu nsyoonto? Nokuba boobo, kunyina nokaba komwe kalubidwe kuli Leza. Pele naaba masusu aakumitwe yanu alibalidwe oonse. Mutayoowi pe; nywebo mulayandika kwiinda tutiiti tunji.” (Lk. 12:6, 7) Kwiinda mumusinsimi Jeremiya, Jehova wakaambila bantu bakwe bansiku kuti: “Ndakuyandisya aluyando lutamani, aboobo nsina kuleka kukufwida luzyalo.”—Jer. 31:3.
4. Nkaambo nzi ncotweelede kuzisyoma zisyomezyo zya Jehova?
4 Kusyoma Jehova alimwi akuzuzikizyigwa kwazisyomezyo zyakwe kuletela luumbulizyo ciindi camapenzi. Tweelede kumusyoma Jehova mbubwenya mbwaakacita Joshua iwakaamba kuti: “Taakwe cintu niciba comwe icakawida ansi akati kazintu zibotu zyoonse Jehova Leza wanu nzyakaamba aandinywe. Zyoonse buyo zyakacitika, taakwe niciba comwe icakawida ansi.” (Jos. 23:14) Kuyungizya waawo, tuli masimpe kuti nokuba kuti tulakonzya kujana mapenzi aatukatazya kapati, “Leza ulasyomeka” alimwi kunyina nayoobalekelezya babelesi bakwe basyomeka.—Amubale 1 Bakolinto 10:13.
5. Nkaambo nzi ncocikonzyeka kuumbulizya bamwi?
5 Mwaapostolo Paulo wakaamba Jehova kuti ngu “Leza siluumbulizyo loonse.” “Kuumbulizya” caamba kuleta luumuno naa lugwasyo kumuntu uupengede. Eeci cilacitwa kwiinda mukucesya mapenzi naa buumba. Cakutadooneka Jehova ulacita oobo. (Amubale 2 Bakolinto 1:3, 4.) Taateesu wakujulu kunyina nakonzya kwaalilwa naa kunyina uukonzya kumukazya, aboobo ulijisi zyoonse ziyandika kubelesya kutegwa ape luumbulizyo kubantu bamuyanda. Kulubazu lumwi, andiswe tulacikonzya kuumbulizya bakombima “ibali mumapenzi aali oonse.” Tulakonzya kucita oobo “aluumbulizyo ndotujana kuli Leza.” Kunyina uukonzya kutuumbulizya kwiinda Jehova.
Kuliyumya Kuzyintu Ziletela Mapenzi
6. Amwaambe zyintu zikonzya kutupa kuusa.
6 Tuyandika luumbulizyo muzyintu zinji mubuumi bwesu. Cintu comwe citupa kuusa kapati nkufwidwa muyandwa wesu, kwaambisya ngotukwetene limwi naa mwana. Luumbulizyo alimwi lulakonzya kuyandika ciindi muntu natabikkilwi maano abantu bamwi naa akaambo kalusalululo. Kunze lyaboobo, kuciswa-ciswa, kucembaala, bucete, mapenzi aamucikwati, naa kuyuma kwabukkale bwamunyika kulapa kuti katuyanda luumbulizyo.
7. (a) Mubukkale bukatazya kapati, nduumbulizyo luli buti ndotuyandika? (b) Ncinzi Jehova ncakonzya kucita kutegwa aponye ‘bapengede akuusa’ mumoyo?
7 Ciindi nituuside, tulakonzya kuyanda luumbulizyo lukonzya kutukkazyika moyo, mizeezo, mbotulimvwa, alimwi abuumi bwesu bwakumuuya naa kumubili. Mucikozyanyo, amuyeeye kujatikizya moyo. Jwi lya Leza litwaambila kuti moyo wesu ulakonzya ‘kupenga akuusa.’ (Int. 51:17) Cakutadooneka Jehova ulakonzya kutugwasya mubukkale buli boobu nkaambo “ulaponya batyokedemyoyo, ulaanga zilonda zyabo.” (Int. 147:3) Nimuba mubukkale bukatazya kapati, Leza ulakonzya kubakatalusya mumoyo batyompedwe ikuti bapaila kulinguwe kabajisi lusyomo alimwi kababamba milawo yakwe.—Amubale 1 Johane 3:19-22; 5:14, 15.
8. Mbuti Jehova mbwakonzya kutugwasya nitujisi mizeezo iikatazya?
8 Akaambo kamapenzi aindene-indene ngotujana, mizeezo yesu kanji-kanji iyandika luumbulizyo. Munguzu zyesu inga tatucikonzyi kuliyumya kuzyintu eezyi zisunka lusyomo lwesu. Nokuba boobo, sintembauzyo wakaimba kuti: “Miyeeyo minji iikataazya na yaata mumoyo wangu, kuumbulizya kwako nkokundikondezya.” (Int. 94:19) Kuyungizya waawo, Paulo wakalemba kuti: “Mutalibiliki acintu niciba comwe, pele muzyintu zyoonse, kwiinda mumupailo akukombelezya antoomwe akulumba, amumuzyibye Leza nzyomukumbila; eelyo luumuno lwa Leza oolo lwiinda kumvwisya koonse luyookwabilila myoyo yanu amizeezo yanu kwiinda muli Kilisito Jesu.” (Flp.4:6, 7) Kubala alimwi akuzinzibala kuyeeya Magwalo kulakonzya kutugwasya kapati kuliyumya nitujisi mizeezo iikatazya.—2 Ti. 3:15-17.
9. Mbuti mbotukonzya kuliyumya ikuti twatyompwa ambotulimvwa?
9 Zimwi ziindi tulakonzya kutyompwa kapati cakuti tulakonzya kunyongana ambotulimvwa. Ambweni tulakonzya kulimvwa kuti tatukonzyi kulanganya mukuli umwi wamu Magwalo. Mubukkale buli boobo, Jehova ulakonzya kutuumbulizya akutugwasya. Mucikozyanyo: Joshua naakalaililwa kuti asololele bana Israyeli kulwana zisi zyakajisi nguzu, Musa wakaambila bantu kuti: “Amuyume, mube bakozu. Mutabayoowi nikuba kukankama kubusyu bwabo, nkaambo Jehova Leza wanu nguumuli awe. Taakwe nayoomusia nanka kumulekelezya.” (Dt. 31:6) Kwiinda mukugwasyigwa a Jehova, Joshua wakabasololela bantu ba Leza Munyika Yakasyomezyegwa alimwi akuzunda basinkondonyina boonse. Ciindi nibakali kuzabuka Lwizi Lusalala, Musa awalo wakagwasyigwa a Leza mbubwenya.—Kul. 14:13, 14, 29-31.
10. Kuti buumi bwesu bwakumubili bwajatikizyigwa akaambo kamapenzi, ino ndugwasyo nzi ndotukonzya kujana?
10 Bukkale bukatazya bulakonzya kunyonganya buumi bwesu bwakumubili. Cakutadooneka, kulya zyakulya ziyaka mubili, kulyookezya kwaciindi ceelede akucita zisobano ziyumya mubili alimwi akusalala kumubili kulakonzya kutupa buumi bubotu. Kuzilanga kabotu zyintu zyakumuuya kweelana ambotwiiya mu Bbaibbele kulakonzya kutupa buumi bubotu. Aboobo, ciindi nituli mumapenzi cilagwasya kuyeeya cakamucitikila Paulo alimwi amajwi aakwe aakulwaizya aakuti: “Tulasyanikizyigwa munzila iili yoonse, pele tatumanikidwe cakutakonzya kuputauka pe; tulizyingidwe, pele kutali cakubulila limwi aakupolela pe; tulapenzyegwa, pele tatulekelezyegwi pe; tuumputilwa ansi, pele tatunyonyooki pe.”—2 Ko. 4:8, 9.
11. Mbuti mbotukonzya kubulwana bulwazi bwakumuuya?
11 Masunko amwi alakonzya kubunyonganya buumi bwesu bwakumuuya. Nomuba mumapenzi aali boobo, Jehova ulakonzya kutugwasya. Jwi lyakwe litusyomezya kuti: “Jehova ulatabilila boonse bawa, ulabusya boonse bawizuka.” (Int. 145:14) Kutegwa tubulwane bulwazi oobu bwakumuuya tweelede kulomba lugwasyo kubaalu Banakristo. (Jak. 5:14, 15) Alimwi lyoonse kuyeeya bulangizi bwamu Magwalo bwabuumi butamani kulakonzya kutugwasya kuliyumya ciindi lusyomo lwesu nolusunkwa.—Joh. 17:3.
Zikozyanyo Zitondezya Luumbulizyo lwa Leza
12. Amupandulule Jehova mbwaakamuumbulizya Abrahamu.
12 Sintembauzyo iwakasololelwa amuuya wakaamba kuti: “Ingasila ijwi ndowakaambila mulanda wako, ndendilyo ndowakandisyomya. Nceeci cinduumbulizya mumapenzi aangu: Ijwi lyako lyandibusya.” (Int. 119:49, 50) Mazuba aano tulijisi Ijwi lya Jehova lijisi zikozyanyo zinji zitondezya Leza mbwali siluumbulizyo. Mucikozyanyo, kweelede kuti Abrahamu wakausa kapati naakazyiba kuti Jehova wakali kuyoonyonyoona minzi ya Sodoma a Gomora. Sinsiku ooyu uusyomeka wakabuzya Leza kuti: “Sa ncobeni uyoomanisya baluleme antoomwe abasizibi?” Jehova wakamuumbulizya Abrahamu kwiinda mukumusyomezya kuti, ikuti naa kwajanika bantu bali 50 baluleme, kunyina naakali kuyoounyonyoona munzi wa Sodoma. Abrahamu wakabuzya alimwi ziindi zyosanwe kuti: Mbuti kuti kakuli buyo bantu baluleme bali 45? 40? 30? 20? 10? Ciindi naakali kwiingula mibuzyo eeyi, Jehova cakukkazika moyo alimwi calubomba wakasyomezya Abrahamu kuti taakwe naakali kuyoounyonyoona munzi wa Sodoma. Nokuba kuti taakwe nibakajanika bantu baluleme bali kkumi, Jehova wakafwutula Loti abana bakwe basimbi.—Matl. 18:22-32; 19:15, 16, 26.
13. Ino mbuti Hana mbwaakatondezya kuti wakali kusyoma Jehova?
13 Hana mukaintu wa Elikana wakali kuyandisisya kuba amwana. Pele tanaakali kuzyala, aboobo eeci cakamupa kuusa. Wakakapailila kaambo aaka kuli Jehova, kumane Mupaizi Mupati Eli wakamwaambila kuti: “Leza wa-Israyeli akupe cikumbilo cako.” Eeci cakamuumbulizya Hana alimwi ‘tanaakacuuside pe.’ (1 Sam. 1:8, 17, 18) Hana wakasyoma Jehova akusiya makani mumaanza aakwe. Nokuba kuti, tanaakazyi cakali kuyoocitika, Hana wakaliiba mumizeezo. Mukuya kwaciindi, Jehova wakaingula mupailo wakwe. Wakamita akuzyala mwana musankwa, wakamuulika zyina lyakuti Samueli.—1 Sam. 1:20.
14. Nkaambo nzi Davida ncaakali kuyandika luumbulizyo, alimwi nkuuli ni nkwaakalomba lugwasyo?
14 Cikozyanyo cimbi camuntu wakaumbulizyigwa a Leza, Mwami Davida wa Israyeli yansiku. Akaambo kakuti Jehova “ulabona moyo,” ciindi naakasala Davida kuti abe mwami wa Israyeli wakumbele, wakalizyi kuti Davida wakalilyaabide kubukombi bwakasimpe. (1 Sam. 16:7; 2 Sam. 5:10) Nokuba boobo, mukuya kwaciindi Davida wakacita bumambe a Bateseba akusola kuvwumba cibi eeco kwiinda mukujaya mulumi wakwe. Davida naakazyiba kuti cibi eeci cakali cipati, wakapaila kuli Jehova kuti: “Muluse lwako lupati ziminganya milandu yangu. Undisanzisye kumilandu yangu, Akundisalazya kuzibi zyangu. Nkaambo ndaziba milandu yangu, Azibi zyangu zili kumeso aangu lyoonse.” (Int. 51:1-3) Davida wakeempwa ncobeni alimwi Jehova wakamulekelela. Nokuba boobo, wakeelede kupenga akaambo kacibi cakwe. (2 Sam. 12:9-12) Pele luzyalo lwa Jehova lwakamuumbulizya mubelesi wakwe ooyu iwakali kulicesya.
15. Ino ndugwasyo nzi Jehova ndwaakapa Jesu naakali afwaafwi kufwa?
15 Ciindi Jesu naakali anyika wakajana masunko manji. Leza wakazumizya masunko aaya alimwi Jesu wakazumanana kusyomeka kali muntu uulondokede iwakali kusyoma Jehova akusumpula bulelo bwakwe. Ciindi naakali afwaafwi kwaabwa akujaigwa, Jesu wakapaila kuli Jehova kuti: “Kutacitiki kuyanda kwangu, pele akucitike kuyanda kwako.” Kumane mungelo wakalibonya kuli Jesu akumuyumya-yumya. (Lk. 22:42, 43) Leza wakapa Jesu luumbulizyo, nguzu alimwi alugwasyo ndwaakali kuyandika aciindi eeco.
16. Ncinzi Leza ncakonzya kucita ciindi buumi bwesu nibuli muntenda akaambo kakusyomeka?
16 Nokuba kuti buumi bulakonzya kuba muntenda akaambo kakutazungaana katuli Banakristo, Jehova ulakonzya alimwi uyootugwasya kuzumanana kusyomeka kulinguwe. Kuyungizya waawo, tulaumbulizyigwa abulangizi bwabubuke. Eelo kaka tulabulangila buzuba oobo ciindi sinkondo wamamanino lufwu, ‘noluyonyonyoonwa’! (1 Ko. 15:26) Babelesi ba Leza basyomeka ibakafwa alimwi abamwi bayeyeegwa a Jehova uyoobabusya. (Joh. 5:28, 29; Mil. 24:15) Kusyoma cisyomezyo ca Jehova cabubuke kulatuumbulizya alimwi lusyomo lwesu lulayumizyigwa ciindi nitupenzyegwa.
17. Mbuti Jehova mbwakonzya kutuumbulizya ciindi nitufwidwa muyandwa wesu?
17 Eelo kaka cilaumbulizya kuzyiba kuti bayandwa besu balede muzyuumbwe bayoobuka akuba abuumi munyika mpya mbotu iitakwe mapenzi aaliko mazuba aano aatupa kuusa! Alimwi ncoolwe cipati kaka ncobayooba ancico ba “nkamu mpati” yababelesi ba Jehova ibayoofwutuka mamanino abweende obuno bwazyintu ikutambula akuyiisya baabo bayoobusyigwa kubuumi anyika!—Ciy. 7:9, 10.
Maanza aa Leza Aakwabilila
18, 19. Muunzila nzi babelesi ba Leza mobaumbulizyigwa ciindi nibali mukupenzyegwa?
18 Musa wakalemba lwiimbo lujisi majwi aaumbulizya alimwi aakkazyika moyo, wakasyomezya bana Israyeli kuti: “Leza uuteeli ngemakalilo aako, amaboko aakwe aatamani alakutabilila.” (Dt. 33:27) Mukuya kwaciindi musinsimi Samuele wakaambila bana Israyeli kuti: “Mutalei kutobela Jehova, pele amumanine Jehova milimo camoyo woonse. . . . Nkaambo Jehova takonzyi kuleka bantu bakwe, nkaambo kazina lyakwe ipati.” (1 Sam. 12:20-22) Kufwumbwa kuti twazumanana kukomba Jehova mukasimpe, taakwe nayootulekelezya pe. Lyoonse unooli aandiswe kutegwa atupe lugwasyo ndotuyanda.
19 Leza taakwe naalilwa kupa lugwasyo aluumbulizyo ndobayanda babelesi bakwe aano mazuba aakumamanino. Kwamyaka iinda kumwaanda, zyuulu zyabasyomima nyika yoonse mbwiizulwa balapenzyegwa alimwi akwaangwa akaambo kakubelekela Jehova cakusyomeka. Zyakabacitikila zitondezya kuti muciindi camapenzi, Jehova ncobeni ulabaumbulizya babelesi bakwe. Mucikozyanyo, mukwesu umwi wakaangwa akaambo kalusyomo lwakwe kwamyaka iili 23 ciindi mfwulumende ya Soviet Union niyakali kulela. Nokuba boobo, nzila yakajanika yakumutolela cakulya cakumuuya kutegwa ayumizyigwe kumuuya akuumbulizyigwa. Wakaamba kuti: “Kwamyaka yoonse eeyi, ndakaiya kusyoma Jehova alimwi ndakatambula lugwasyo kuzwa kulinguwe.”—Amubale 1 Petulo 5:6, 7.
20. Nkaambo nzi ncotuli masimpe kuti Jehova kunyina nayootulekelezya?
20 Kufwumbwa mapenzi ngotujisi, tatweelede kwaaluba majwi aaumbulizya aasintembauzyo aakuti: “Jehova takooyoosowa bantu bakwe.” (Int. 94:14) Nokuba kuti tulayanda kuumbulizyigwa, tulijisi coolwe citaliboteli cakuumbulizya bamwi. Mbubwenya mbotutiibone mucibalo citobela, tulakonzya kutola lubazu mukuumbulizya baabo balila munyika ino iizwide mapenzi.
Ino Inga Mwaingula Buti?
• Nzyintu nzi zikonzya kutupa kuusa?
• Mbuti Jehova mbwaumbulizya babelesi bakwe?
• Ikuti buumi bwesu kabuli muntenda, ino ncinzi cikonzya kutuumbulizya?
[Kabbokesi/Cifwanikiso apeeji 25]
MBOTUKONZYA KULIYUMYA KUZYINTU ZIKONZYA KUJATIKIZYA . . .
▪ moyo Int. 147:3; 1 Jo. 3:19-22; 5:14, 15
▪ mizeezo Int. 94:19; Flp. 4:6, 7
▪ mbotulimvwa Kul. 14:13, 14; Dt. 31:6
▪ buumi bwakumubili 2 Ko. 4:8, 9
▪ buumi bwakumuuya Int. 145:14; Jak. 5:14, 15