Amubayiisye Bana Banu

Bakali Kwiitwa Kuti “Bana ba Muzumo”

CIINDI camainza, mulakonzya kumvwa kuzuma kwamvwula. Sena kuli nikwakakuyoosyede?—a Jesu wiita basikutobela bakwe bobilo kuti “Bana ba Muzumo.” Atubone kaambo ncabaitila boobo.

Basikutobela Jesu aaba bobilo mbaa Jakobo a Johane. Mbana ba Zebedayo amukaintu wakwe uutegwa Salome. Kulangilwa kuti Salome mwanookwabo a Mariya, banyina Jesu. Aboobo, kuboneka kuti Jakobo a Johane bakali babbululu ba Jesu alimwi bakali kumvwana kapati nobakali kukomena.

Zebedayo, Jakobo alimwi a Johane boonse mbazubi banswi. Jakobo a Johane bali akati kabaabo Jesu mbaasaanguna kusala kuba basikumutobela. Ciindi naabatamba, mpoonya-mpoonya bacileka makwebo aabo aakuzuba nswi mpoonya bamutobela. Kumane Jesu wasala basikumutobela bali 12 kuba baapostolo bakwe. Jakobo a Johane bali akati kabaaba.

Kakusyeede myezi misyoonto kuti Jesu ajaigwe, walo abaapostolo bakwe bali mucilawo camalundu mu Samariya. Kuyaabusiya, alimwi boonse balikatede kapati. Pele bana Samariya baamba kuti tabayandi kuti Jesu abaapostolo bakwe boone mumunzi wabo. Sena ulizyi kaambo ncobatayandili?— Atubone.

Jesu abaapostolo bakwe mba Juda, alimwi ba Juda banji balaalunya kubana Samariya. Pele Jesu tali boobo pe. Jesu ulabeendelezya calubomba, aboobo Jakobo a Johane beelede kucita mbubwenya. Pele basikwiiya aaba bobilo babanyemena bana Samariya batabatambula, akubuzya Jesu kuti: ‘Sena ulayanda kuti twaambile mulilo uboole kutegwa ubanyonyoone?’ Ino uyeeya kuti Jesu wabaambila kuti nzi?— Jesu wabaambila kuti balubizya kwaamba cintu cibi boobu! Jakobo a Johane beelede kwiiya zinji kujatikizya luse.

Ipenzi lipati alimbi ndyobajisi ba Jakobo a Johane ndyakuti bayanda kuba bataanzi naa kulibona kuyandika kapati kwiinda bamwi. Kakusyeede buyo ciindi cisyoonto kuti Jesu afwe, bakatuma banyina kuti bamwaambile kuti: “Kosyomezya kuti bana bangu aaba bobilo bakakkale umwi kujanza lyako lyalulyo aumwi kujanza lyako lyalumwensyi mu Bwami bwako.” Ciindi baapostolo bamwi bali kkumi nibamvwa Jakobo a Johane ncobacita, banyema. Sena anduwe inga wanyema?—

Andiza inga wanyema. Tacitukkomanisyi kuti bamwi kabayanda kuba bataanzi alimwi akulibona kuyandika kapati kwiinda bamwi. Mukuya kwaciindi, Jakobo a Johane bazyiba kuti ncobacita cililubide alimwi tacitondezyi kuti balijisi luse, aboobo bacinca. Baba baapostolo bajisi luse alimwi aluyando. Ncinzi ncotukonzya kwiiya kuli ceeci?—

Ciiyo ncotwiiya kuli Jesu ncakuti andiswe tweelede kuba aluse kuli umwi aumwi kumweenzinyina. Jesu wakali kubeendelezya kabotu bantu, kubikkilizya abamaalumi, bamakaintu alimwi abana. Sena anduwe unoosolekesya kuciyeeya cikozyanyo cakwe akucitobela?—

Kobala mu Bbaibbele lyako

Maako 3:17

Matayo 27:55, 56; Maako 15:40, 41

Matayo 4:18-22

Johane 4:4-15, 21-26; Luka 9:51-55

Matayo 20:20-24; Maako 10:35-37, 41

[Bupanduluzi buyungizidwe]