Lipooti ya Muswaangano Wamwaka
Muswaangano Iwakazyibwa Akaambo Kalukamantano Amakanze Aakkomanisya
LYOONSE miswaangano yamwaka amwaka ya Watch Tower Bible and Tract Society of Pennsylvania ilakkomanisya kapati. Oobo mbucakabede kumuswaangano wamwaka iwanamba 127, iwakacitika mu Mujibelo, October 1, 2011. Bantu ibakatambwa bakali kuzwida kuzisi zisiyene-siyene nyika yoonse, bakabungana ku Ŋanda Yakucitila Miswaangano Mipati ya Bakamboni ba Jehova ku Jersey City, New Jersey mu U.S.A.
Ba Gerrit Lösch ibali mu Kabunga Keendelezya bakaitambula nkamu yabantu iikkomene iyakajanika. Bakaambila basimuswaangano ibakali kuzwa muzisi zibalilwa ku 85 kuti bajisi lukamantano lulibedelede lwanyika yoonse. Lukamantano luli boobo lupa bumboni bubotu alimwi bulamulemeka Jehova. Mubwini, lukamantano ngowakali mutwe wamakani aakali kwaambwa mumuswaangano ooyu.
LIPOOTI MBOTU KUZWA KU MEXICO
Cibeela cakusaanguna mupulogilamu cakaamba cikozyanyo cibotu calukamantano lwabantu ba Jehova. Ba Baltasar Perla bakabuzya-buzya bakwesu bamukwasyi wa Bbeteli waku Mexico botatwe kujatikizya maofesi aamitabi aali cisambomwe aaku Central America alo aakajalwa akuba cibeela ca mutabi waku Mexico. Akaambo kaceeci, mukwasyi wa Bbeteli waku Mexico lino kujanika bantu bajisi zilengwa zisiyene-siyene alimwi bazwa muzisi zisiyene-siyene. Kuvwula kwabantu bazwa muzisi zisiyene-siyene cakapa kuti kube kukulwaizyanya. Cili mbuli kuti Leza wakabelesya cintu cimwi kumwaya tumpenda toonse itupa kusalana mubala.
Buyumuyumu bumwi ibwakaliko mbwakugwasya basikumwaya kuti balimvwe kuti tiibaandanizyigwa kumbunga ya Jehova nikuba kuti maofesi aamitabi taacibeleki muzisi mobazwa. Akaambo kaceeci, mbungano imwi aimwi ilabelesya nzila imwi yaa Intaneti kutegwa nibaba baabo bali kumasena aakulamfwu kabakonzya kubandika abakuofesi yamutabi.
LIPOOTI IMPYA KUZWA KU JAPAN
Ba James Linton ibakazwa kumutabi waku Japan bakapandulula bakwesu mbobakajatikizyigwa amuzuzumo alimwi akupaya kwamaanzi ikwakacitika mucisi mu March 2011. Bakamboni banji bakasweekelwa bayandwa babo alimwi azyintu zyabo. Bakamboni kuzwa kumasena aambi bakaaba maanda aainda ku 3,100 alimwi amyootoka minji. Basikulisungula kwiinda mukubekela antoomwe a Kkomiti Yakuyaka Yacooko bakabeleka canguzu kubambulula maanda aabakwesu. Basikulisungula bainda ku 1,700 bakalisungula kubeleka kufwumbwa kwakali kuyandika lugwasyo. Kuzwa mukabunga kabasikulisungula ibakazwa ku United States, bali 575 bakabeleka kugwasyilizya kubambulula Maanda aa Bwami.
Cintu cipati icabikkilwa maano ndugwasyo lwakumuuya alimwi amumizeezo kulibaabo bakajatikizyigwa. Baalu bainda ku 400 babeleka mulimo wabweembezi kumasena kuyandika lugwasyo. Kubikkila maano kwa Kabunga Keendelezya kwakalibonya ciindi balangizi balanganya mitabi bobilo nibakaswaya kuzwa kumaofesi mapati kutegwa bakulwaizye bakwesu mubusena mwakacitika ntenda. Majwi aatondezya kubikkila maano kuzwa kuli Bakamboni nyika yoonse apa luumbulizyo kapati.
KUZUNDA MUNKUTA
Baswiilizi bakabikkila maano kapati ciindi ba Stephen Hardy ibakazwa kumutabi waku Britain nibakatalika kubandika makani aajatikizya kuzunda munkuta kwali kucitika. Mucikozyanyo, mfwulumende yaku France yakali kuyanda mali aasika ku $82 miliyoni (U.S.) aamitelo kuzwa kumbunga yesu yaku France. Makani akabambwa ciindi nkuta ya European Court of Human Rights (ECHR) niyakakosola kuti tatujisi mulandu akwaamba kuti mfwulumende ya France yakasotoka mulawo uuli mu Article 9 ya European Convention walo uukwabilila lwaanguluko lwabukombi. Kusala ikwakacitwa kutondezya kuti kaambo aaka takajatikizyi mali pe, nkaambo kaamba kuti: “Kwaalilwa kuzumina mbunga yabukombi akwaamba kuti ijalwe, kwaamba majwi aakufwubaazya kujatikizya mbunga yabukombi, zyoonse nzitondezyo zyakunyonganya lwaanguluko lupedwe amulawo uuli mu Article 9 ya Convention.”
Nkuta ya ECHR alimwi yakakosola kuti tatujisi mulandu mukaambo kajatikizya cisi ca Armenia. Kuzwa mu 1965 nkuta ya ECHR yakajana kuti European Convention tiiyakali kukwabilila bantu umwi aumwi kumugama kumulawo wakutola lubazu mumulimo wabusikalumamba. Grand Chamber—cibeela cipati ca European Court—cakaamba kuti “kukaka mulimo wabusikalumamba kuti kakuli kaambo kapati,” kweelede kuzumizyigwa a European Convention. Kusala ooku kuzumizya cisi ca Armenia alimwi azisi mbuli Azerbaijan a Turkey kuba alwaanguluko luli boobo.
MILIMO YAMAYAKE
Baambi bakatobela mba Guy Pierce ibali mu Kabunga Keendelezya balo bakaamba kuti bantu boonse ibakajanika bakali kuyandisisya kumvwa mulimo wamayake eesu mu New York State. Bakatondezya vidiyo iitondezya kuyaambele kwamulimo uucitika ku Wallkill, Patterson alimwi amasena mapya aakajanwa ku Warwick aku Tuxedo, New York. Busena bwakoona bupya ibulangilwa kumana kuyakwa mu 2014 ku Wallkill, bunoojisi maluumu aambi ainda ku 300.
Kuli bubambe bwakuyaka abusena busika kumaeka aali 248 ku Warwick. Mukwesu Pierce, wakaamba kuti: “Nikuba kuti tatuzyi makanze aa Jehova kujatikizya Warwick, tulazumanana kuyaka kubusena oobu katujisi makanze aakutola maofesi mapati aa Bakamboni ba Jehova kubusena oobu.” Alimwi kuli bubambe bwakuyoobelesya nyika iisika kumaeka aali 50 iili kunyika kwa Warwick makkilomita aali 10 kutegwa mincini alimwi azibelesyo zyamayake kazisikila nkuko. Mukwesu Pierce wakaamba kuti: “Mayake mbwaayakuzumizyigwa buyo, tulangila kumanizya mulimo woonse mumyaka yone. Mpoonya busena buli ku Brooklyn buyoosambalwa.”
Mukwesu Pierce wakabuzya kuti: “Sena Kabunga Keendelezya kacinca mizeezo kujatikizya kuswena kwamapenzi mapati?” Wakaingula kuti: “Peepe! Ikuti mapenzi mapati anyonganya makanze eesu, eeco inga cabota, inga cabota ncobeni!”
AMUMUCENJELELE SYUUMBWA UUVWULUMA
Mukwesu Stephen Lett, umwi wabaabo ibali mu Kabunga Keendelezya, ngonguwe wakatobela walo iwakabandika lugwalo lwa 1 Petulo 5:8, ilwaamba kuti: “Amulibatamike, amupakamane. Sinkondonyoko, Diabolosi, uyaabweendeenda mbuli syuumbwa uuvwuluma, uyandaula muntu ngwatiimene buumbulu.” Mukwesu Lett wakaamba kuti micito njatondezya syuumbwa ilatugwasya kumvwisya cikozyanyo ca Petro cipandulula Diabolosi.
Mbwaanga basyuumbwa balijisi nguzu alimwi balabalika kwiinda bantu, tatweelede kusola kumulwana naa kumutija Saatani munguzu zyesu tobeni. Tuyandika lugwasyo lwa Jehova. (Is. 40:31) Syuumbwa ulayubilila nayanda kujata munyama, aboobo tweelede kutantamuka masena aali mumudima kumuuya mwalo Saatani mwayubide kutegwa atujate. Mbubwenya syuumbwa mbwajaya lweengu naa mwana wa cibize uulede, Saatani takwe luse pe alimwi uliyandide kutujaya. Ikuti syuumbwa wajaya munyama akumulya kusika mpakkuta, munyama wajaigwa tamukonzyi kumuzyiba, mbubwenya buyo ikuti Saatani wajaya muntu kumuuya ‘bukkale bwakwe bwamamanino bulaindila kubija kwiinda bwakusaanguna.’ (2 Pe. 2:20) Aboobo, tweelede kumukazya Saatani akuzumanana kukakatila kunjiisyo zyamu Bbaibbele nzyotwakaiya.—1 Pe. 5:9.
AMULUKKOMANINE LUBAZU LWANU MUŊANDA YA JEHOVA
Mwaambi iwakatobela, mukwesu Samuel Herd umwi wabaabo ibali mu Kabunga Keendelezya, wakaamba kuti: “Toonse tulijisi lubazu muŋanda ya Jehova.” Banakristo boonse balijisi lubazu muŋanda ya Leza—tempele lyakwe lyakumuuya—bubambe bwakumukomba kwiinda mucituuzyo cacinunuzyo ca Jesu. Mbusena buyandika mbotweelede kubona kuti bulilibedelede. Mbubwenya mbuli Davida, tulombozya ‘kukkala muŋanda ya Jehova mazuba oonse aabuumi bwesu.’—Int. 27:4.
Mukwesu Herd wakaamba kujatikizya Intembauzyo 92:12-14 akubuzya kuti: “Mbuti Jehova mbwatugwasya kuti tuzumanane?” Wakaingula kuti: “Muparadaiso yakumuuya, Leza ulatubamba kabotu, ulatukwabilila, alimwi ulatupa maanzi aakasimpe aakatalusya.” Kumane Mukwesu Herd wakakulwaizya baswiilizi kuti: “Atumulumbe akaambo kazyintu eezyi. Atukkutile acoolwe cakukkala muŋanda ya Jehova—kutali buyo kwakaindi kasyoonto pe, pele kukabe kutamani.”
BANAKRISTO BALALILEMEKA JWI LYA LEZA
Mukwesu David Splane awalo uuli mu Kabunga Keendelezya, mumakani aakwe aakatobela wakapandulula kuti Banakristo bakasimpe lyoonse balikulilemeka Jwi lya Leza. Mumwaanda wamyaka wakusaanguna, bakalibelesya kutegwa babambe kaambo kajatikizya kupalulwa. (Mil. 15:16, 17) Pele bantu bamwi ibakali kupona mumwaanda wamyaka wabili ibakali kulyaamba kuti Mbaanakristo ibakayiisyidwe lwiiyo lwabana Giliki, bakacileka kubikkila maano ku Magwalo akusumpula mizeezo yabo. Mukuyakwaciindi, bamwi akati kabaabo ibakali kwaambwa kuti Bafwala Bacikombelo alimwi abaleli bana Roma bakatalika kucinca njiisyo zyamu Bbaibbele akubikka mizeezo yabo akusumpula njiisyo zyakubeja.
Mukwesu Splane wakaamba kuti kwiinda mucikozyanyo, Jesu wakatondezya kuti lyoonse kunooli Banakristo bakasimpe bananike ibaiminina kasimpe aanyika. (Mt. 13:24-30) Pele tatukonzyi kusinizya kuti mbaani. Nikuba boobo, kwamyaanda yamyaka, banji baileka micito alimwi anjiisyo zyakubeja. Bamwi akati kabo kwakali ba Bbishopo Bapati ba Agobard baku Lyons bamu mwaanda wamyaka wa 9, ba Peter baku Bruys, ba Henry baku Lausanne, alimwi aba Valdès (naa Waldo) bamumwaanda wamyaka wa 12, ba John Wycliffe bamumwaanda wamyaka wa 14, ba William Tyndale bamumwaanda wamyaka wa 16, ba Henry Grew alimwi aba George Storrs bamumwaanda wamyaka wa 19. Bakamboni ba Jehova aano mazuba bazumanana kutobela zyeelelo zyamu Magwalo alimwi akubona Bbaibbele kuti njentalisyo yakasimpe. Nkakaambo kaako Kabunga Keendelezya kakasala lugwalo lwa Johane 17:17 lwaamba kuti: “Ijwi lyako nkasimpe” kuba lugwalo lwamwaka wa 2012.
KUCINCA KUKKOMANISYA KUJATIKIZYA KUYIISYA AMILIMO IIMWI
Mukwesu Anthony Morris uuli mu Kabunga Keendelezya wakaambilizya kucinca kujatikizya bamisyinali alimwi abapainiya baalubazu. Kutalikila mu September 2012, makkilasi aa Cikolo Cakwiiya Bbaibbele ca Banakristo Banabukwetene ayootalika muzisi zisalidwe. Makanze aa Cikolo ca Gileadi akacinca. Kutalikila mu October, aabo boonse banjila mucikolo ca Gileadi banooli kale mumulimo waciindi coonse—bamisyinali pele batananjila cikolo ca Gileadi, bapainiya baalubazu, balangizi beendeenda naa aabo ibabelekela ku Bbeteli. Aabo bamanizya cikolo eeci bayoobelesyegwa kuyumya bantu ba Leza kumaofesi aamitabi, mumulimo wakweendeenda, naa mumasena mujanika bantu banji kwalo nkobakonzya kukulwaizya mbungano mumulimo wakukambauka.
Bapainiya baalubazu bamwi bayootumwa kuyoobelekela kumasena aali kulamfwu. Kutalikila mu January 1, 2012, bamwi ibali kumanizya Cikolo Cakwiiya Bbaibbele ca Bakwesu Batakwete alimwi a Cikolo Cakwiiya Bbaibbele ca Banakristo Banabukwetene bali kutumwa kumasena aali kulamfwu mumulimo wabupainiya bwaalubazu bwaciindi cisyoonto kuyootalisya alimwi akutola aambele mulimo wakukambuka. Aabo ibakapegwa mulimo ooyu wabupaniya bwaalubazu, banoobeleka buyo mwaka omwe aciindi comwe kusikila bakakkwanye myaka yotatwe. Aabo ibayoozwidilila mumulimo ooyu balakonzya kusalwa akuba bapainiya baalubazu baciindi coonse.
Muswaangano wamwaka wa 2011 wakali kukkomanisya. Tulangila kuli Jehova kuti alongezye bubambe bupya kutegwa mulimo wakukambauka uyaambele alimwi akukamantanya bunyina—kutegwa alemekwe akutembaulwa.
[Kabbokesi/Cifwanikiso icili apeeji 18, 19]
KUZYIBANA KABOTU
Pulogilamu eeyi alimwi yakabikkilizya acibeela cakubuzya-buzya bacizyi ibakakwetwe kubakwesu ibakali mu Kabunga Keendelezya. Bacizyi aabo boonse ibakafwidwa antoomwe bali fwuka, pele bosanwe buyo mbabakatola lubazu mucibeela eeci. Bacizyi aaba, mba Marina Sydlik, ba Edith Suiter, ba Melita Jaracz, ba Melba Barry, alimwi aba Sydney Barber, boonse bakaamba mbobakaiya kasimpe alimwi ambobakatalika mulimo waciindi coonse. Umwi aumwi wabo wakaamba zyintu zibotu zyakabacitikila, zyintu zijatikizya balumi babo, alimwi azilongezyo nzyobakajana nibakacili antoomwe. Cibeela eeci cakubuzya-buzya nicakasika kumamanino, baswiilizi bakaimba lwiimbo namba 86, lujisi mutwe wakuti “Bamakaintu Basyomeka, Bacizyi Banakilisito.”
[Cifwanikiso]
(Atala) Ba Daniel aba Marina Sydlik; ba Grant aba Edith Suiter; ba Theodore aba Melita Jaracz
(Ansi) Ba Lloyd aba Melba Barry; ba Carey aba Sydney Barber
[Maapu iili apeeji 16]
(Kutegwa mubone bwini mbwaakkede mabala, amubone bbuku lini)
Mitabi iili cisambomwe yakajalwa akutalika kweendelezyegwa amutabi waku Mexico
MEXICO
GUATEMALA
HONDURAS
EL SALVADOR
NICARAGUA
COSTA RICA
PANAMA
[Cifwanikiso icili apeeji 17]
Mbwaayakulibonya maofesi mapati aa Bakamboni ba Jehova aayooyakwa ku Warwick, New York