MAKANI AAYEEME AMUTWE UULI ACIVWUMBYO: NCOTWIIYA KULI MUSA

Ino Musa Wakali Ni?

Ncinzi ciboola mumizeezo mwamvwa zyina lyakuti Musa? Sena muyeeya . . .

◼ mwana muvwanda ngobakasisa banyina mucisuwo mu Mulonga wa Nile?

◼ mwana musankwa iwakakomezyegwa amwana musimbi wa Farao kajisi zyintu zyoonse zyakulikondelezya—pele watakaluba kuti wakali muna Israyeli?

◼ mwaalumi iwakali mweembezi ku Midiyani kwamyaka iili 40?

◼ mwaalumi iwakabandika a Jehovaa kumbele lyacitewo ciyaka mulilo?

◼ mwaalumi iwakaambila mwami waku Egepita cabusicamba kuti abaangulule mubuzike bana Israyeli?

◼ mwaalumi iwakaambilwa a Leza kuti aambilizye Zipenzyo Zili Kkumi kubana Egepita ciindi mwami naakakaka kumvwida Leza wakasimpe?

◼ mwaalumi iwakasololela bana Israyeli kuzwa mu Egepita?

◼ mwaalumi iwakabelesyegwa kwaandaanya Lwizi Lusalala?

◼ mwaalumi iwakapa bana Israyeli Milawo Iili Kkumi kuzwa kuli Leza?

MUSA nguwakacita zyintu zyoonse eezyi alimwi azimwi buyo. Nkakaambo kaako Banakristo, ba Juda, alimwi aba Mozilemu ncobamupeda bulemu kapati mwaalumi ooyu uusyomeka!

Cakutadooneka, Musa wakali musinsimi wakacita “milimo mipati iigambya.” (Deuteronomo 34:10-12) Wakazumina kubelesyegwa a Leza munzila zinji. Nokuba boobo, Musa wakali muntu buyo mbubwenya mbuli musinsimi Eliya—walo iwakalibonya mucilengaano antoomwe a Musa ciindi Jesu naakali anyika—Musa wakali muntu uulya maila ooyo “iwakali kulimvwa mbubonya mbotulimvwa aswebo.” (Jakobo 5:17; Matayo 17:1-9) Musa wakasikilwa mapenzi manji aakozyenye angotusikilwa sunu, pele wakacikonzya kwaazunda.

Sena inga mwayanda kuzyiba mbwaakaazunda? Amulange-lange bube botatwe bubotu akati kabube mbwaakatondezya Musa alimwi ancotukonzya kwiiya kucikozyanyo cakwe.

[Bupanduluzi buyungizidwe]