Jesu Ulatondezya Nzila Yakupona Buumi Bukkomanisya
‘Amweende mbubonya mbwaakeenda Jesu.’—1 Johane 2:6.
MBUBWENYA mbuli mbotwabandika mucibalo cainda, Jesu wakapona buumi bukkomanisya. Aboobo kuti katuyanda kupona buumi bukkomanisya, tweelede kwiiya cikozyanyo cakwe alimwi akutobela lulayo lwakwe.
Jehova utukulwaizya kucita mbubwenya oobu, kweelana ambolutondezya lugwalo luli atala aawa. Kweenda mbubonya mbwaakeenda Jesu caamba kutobela cikozyanyo cakwe alimwi anjiisyo zyakwe mubuumi bwesu boonse. Kucita boobo kuyakutugwasya kukkomaninwa a Leza alimwi akupona buumi bukkomanisya.
Jesu wakayiisya njiisyo zikonzya kutugwasya kweenda mbubwenya mbwaakeenda. Injiisyo eezyi zimwi wakazyaamba mu Mulumbe wakwe waa Cilundu. Atulange-lange njiisyo zimwi zisyoonto buyo alimwi ambotukonzya kuzibelesya mubuumi bwesu.
NJIISYO: “Balikkomene aabo bazyi kuti bayandika zyintu zyakumuuya.”—Matayo 5:3.
NJIISYO EEYI MBOIGWASYA KUPONA BUUMI BUKKOMANISYA: Jesu wakatondezya kuti bantu balazyalwa kabajisi luyandisisyo lwakuzyiba Leza. Tulayandisya kuzyiba bwiinguzi kumibuzyo mbuli yakuti: Nkaambo nzi ncotuliko aano anyika? Nkaambo nzi ncokuli mapenzi manji boobu munyika? Sena Leza ulatubikkila maano? Sena muntu afwa ulakonzya kupona alimwi? Tuyandika kuzyiba bwiinguzi kumibuzyo iili boobu kutegwa tupone buumi bukkomanisya. Jesu wakalizyi kuti kuli buyo bbuku lyomwe ndyotukonzya kusyoma likonzya kupa bwiinguzi kumibuzyo eeyi—Ijwi lya Leza. Naakali kupaila kuli Bausyi, Jesu wakaamba kuti: “Ijwi lyako nkasimpe.” (Johane 17:17) Sena mubwini Jwi lya Leza inga lyatugwasya kumuzyiba Leza alimwi akuba alukkomano?
CIKOZYANYO ICAKACITIKA NCOBENI: Mbwaanga ba Esa bakali baimbi bacibwene bamubbaandi yakali aampuwo kapati, bakali kulangilwa kuba baimbi bali aampuwo banyimbo zya rock. Nokuba boobo, ba Esa tiibakakkomene cakumaninina. Bakaamba kuti: “Nokuba kuti ndakalikkomene kuba mubbaandi yabaimbi, ndakali kuyandisisya kupona buumi bukkomanisya.” Pele mukuya kwaciindi, ba Esa bakaswaanya umwi wa Bakamboni ba Jehova. Ba Esa bakaamba kuti: “Ndakamubuzya mibuzyo minji. Pele kwiingula kwakwe kwiinda mukubelesya Magwalo kwakandipa kuyanda kuzyiba zinji, aboobo ndakazumina kwiiya Bbaibbele anguwe.” Nzyobakaiya ba Esa kwiinda muciiyo cabo ca Bbaibbele zyakabasika amoyo alimwi eeci cakabapa kwaaba buumi bwabo kuli Jehova. Bakaamba kuti: “Kaindi, lyoonse ndakali kulijana mumapenzi aasiyene-siyene. Lino ndijisi buumi bukkomanisya ncobeni.”a
NJIISYO: “Balikkomene aabo bali aaluse.”—Matayo 5:7.
NJIISYO EEYI MBOIGWASYA KUPONA BUUMI BUKKOMANISYA: Luse lubikkilizya kubafwida lubomba bantu, kuba aaluzyalo alimwi akubabikkila maano bamwi. Jesu wakatondezya luse kubantu bakali kuyandika lugwasyo. Akaambo kalubomba, wakabweza ntaamu yakugwasya bantu bakali kupenga. (Matayo 14:14; 20:30-34) Ciindi notwiiya Jesu mukuba aluse, buumi bwesu bulaba ampindu nkaambo aabo batondezya luse kuli bamwi balajana lukkomano. (Milimo 20:35) Tulakonzya kutondezya luse kuli bamwi kwiinda mumajwi alimwi amumilimo yesu yalubomba, kubagwasya aabo bayandika kuti tubagwasye. Sena ncobeni kutondezya luse inga kwayungizya lukkomano lwesu mubuumi?
CIKOZYANYO CAKACITIKA NCOBENI: Ba Maria abalumi babo ba Carlos, ncitondezyo cibotu cakuba basiluse. Bausyi baba Maria bakafwidwa, mpoonya mumyaka misyoonto yainda baba basibukili bulo. Ba Maria alimwi aba Carlos bakababweza kutegwa kabakkala ambabo akubagwasyilizya nzyobayandika. Bunji bwaziindi tiibakali koona alimwi zimwi ziindi bakali kubatola kucibbadela cakufwambaana ciindi nobwabuka bulwazi bwabo bwasyuga. Baamba kuti zimwi ziindi balakatala kapati. Pele balikkomene akaambo kalugwasyo ndobapa bausyi baba Maria, mbubwenya mbuli Jesu mbwaakaamba.
NJIISYO: “Balikkomene aabo baleta luumuno.”—Matayo 5:9.
NJIISYO EEYI MBOIGWASYA KUPONA BUUMI BUKKOMANISYA: Ibbala lya Chigiliki lyakuba “siluumuno” lyaamba muntu uubamba “luumuno.” Mbuti kuba siluumuno mbokugwasya kupona buumi bukkomanisya? Kuti katuli basiluumuno, tulaba azilongwe zibotu abantu mbotukkala limwi. Inga twacita kabotu kutobela lulayo lwamu Bbaibbele lwakuti: “Kamusolekesya kusikila mpomugolela kukkala muluumuno abantu boonse.” (Baloma 12:18) “Bantu boonse” balabikkilizya abanamukwasyi alimwi abantu mbotutakombi limwi. Sena mubwini kukkala muluumuno “abantu boonse” inga kwatupa kupona buumi bukkomanisya?
CIKOZYANYO CAKACITIKA NCOBENI: Amubone cakacitikila mukaintu umwi uutegwa Nair. Kwamyaka minji, bali kujana buyumuyumu bwalo bwakapa kuti cibakatazye kubamba luumuno, kwaambisya abamukwasyi wabo. Kuzwa ciindi balumi babo nibakabatija myaka iitandila ku 15 yainda, bali kukomezya bana babo balikke. Umwi mwanaabo musankwa wakalizibizya kubelesya misamu iikola alimwi wakali kukatazya kapati akubakonga kubacisa banyina alimwi amusyoonto wakwe musimbi. Ba Nair basyoma kuti nzyobaiya mu Bbaibbele zyabapa kuba aluumuno nomuba mubukkale bukatazya. Balasoleka kutakazyanya naa kuzwangana. Balasolekesya kuba alubomba, lweetelelo, alimwi akubamvwisya bantu. (Baefeso 4:31, 32) Balisinizyide kuti kwiiya kuba aluumuno kwabapa kuti kabamvwana kapati abanamukwasyi alimwi abantu.
KUBIKKILA MAANO KUZYINTU ZYAKUMBELE
Ikuti twatobela lulayo lwa Jesu lwabusongo, tuyakujana lukkomano alimwi akukkutila mubuumi. Nokuba boobo, kutegwa tupone buumi bukkomanisya ncobeni, tuyandika kuzyiba zyintu zili kumbele. Kayi buumi tabukonzyi kuba ampindu kuti katuzyi buyo kuti mukuya kwaciindi tuyakucembaala, kuciswa, mpoonya akufwa. Pele eezyi nzezyintu zicitika ncobeni mubuumi bwamunyika ino.
Nokuba boobo, kuli makani mabotu kaka! Jehova uyakubapa zilongezyo zinji aabo basolekesya “kweenda mbubonya mbwaakeenda [Jesu].” Jehova usyomezya kuti ino-ino uyakuleta nyika mpya iiluleme mwalo bantu basyomeka mobayoopona buumi bulondokede mane kukabe kutamani kweelana amakanze aa Jehova. Ijwi lyakwe lyaamba kuti: “Amubone! Tente lya Leza lili aabantu, alimwi uyookkala ambabo, eelyo bayooba bantu bakwe. Alimwi Leza lwakwe uyooba ambabo. Eelyo uyoosindula misozi yoonse kumeso aabo, alimwi lufwu talukooyoobako limbi, akwalo koomoka, kulila nokuba kucisa takukooyoobako limbi. Zyintu zyakaindi zyamana.”—Ciyubunuzyo 21:3, 4.
Ba Maria, ibajisi myaka yakuzyalwa iili 84, ibaambwa mucibalo cakusaanguna muzibalo eezyi zitobelana, balakondwa abulangizi bwakuyoolibonena kuzuzikizyigwa kwamajwi aayo. Ino mbuti kujatikizya ndinywe? Sena inga mwayanda kuzyiba zinji kujatikizya “buumi bwini-bwini”—bunooliko mubweendelezi bwa Bwami bwa Leza? (1 Timoteyo 6:19) Kuti kacili boobo, mulakonzya kubalomba Bakamboni ba Jehova ibali kubusena nkomukkala naa kulembela basikumwaya magazini eeyi.b
[Bupanduluzi buyungizidwe]
a Mulakonzya kubala makani oonse aaba Esa apeeji 8-9 mumagazini eeyi.
b Ibbuku lyakuti Ino Ncinzi cini Bbaibbele Ncoliyiisya?, ilyakamwaigwa a Bakamboni ba Jehova, lyabagwasya bantu banji kwiiya nzyaamba Magwalo kujatikizya makani aaindene-indene.
[Cifwanikiso icili apeeji 7]
Ba Maria aba Carlos
[Cifwanikiso icili apeeji 7]
Ba Nair