AMUBE ACILONGWE A LEZA
“Amuzumanane Kulomba, Eelyo Muyoopegwa Nzyomulomba”
“Mwami kotuyiisya mbotweelede kupaila.” (Luka 11:1) Oobu mbwaakalomba sikwiiya wa Jesu umwi. Mukwiingula kwakwe, Jesu wakaamba zikozyanyo zyobilo zituyiisya mbotweelede kupaila kutegwa Leza atumvwe. Ikuti kuli nomwakalibuzyide naa Leza ulaimvwa mipailo yanu, mulabukkomanina bwiinguzi Jesu mbwaakapa.—Amubale Luka 11:5-13.
Cikozyanyo cakusaanguna caamba kapati kujatikizya muntu uupaila. (Luka 11:5-8) Mucikozyanyo eeci, muntu umwi watambula mweenzu akati kamasiku alimwi tajisi cakulya cakumupa. Kuli mukamwini ŋanda, kaambo aaka keelede kulanganizyigwa cakufwambaana. Nokuba kuti masiku, waunka kuŋanda yamweenzinyina kutegwa akalombe cinkwa. Kumatalikilo, mweenzinyina wawayawaya kubuka nkaambo walo abamukwasyi wakwe boonse boona kale. Pele akaambo kakuzumanana kukombelezya kakunyina kufwa nsoni, mweenzinyina wabuka akumupa nzyalomba.a
Ino cikozyanyo eeci cituyiisya nzi kujatikizya mupailo? Jesu utwaambila kuti tweelede kuzumanana—kuzumanana kulomba, kuyandaula, alimwi akukonkomona. (Luka 11:9, 10) Nkaambo nzi? Sena Jesu waamba kuti Leza ulawayawaya kuswiilila mipailo yesu? Peepe. Aawa Jesu waamba kuti mukwiimpana amweenzinyina uulya uuwayawaya, Leza ulilibambilide kubapa nzyobalomba aabo bapaila kulinguwe mulusyomo. Tulatondezya lusyomo lwesu kwiinda mukuzumanana kulomba. Kwiinda mukulomba cakwiinduluka-induluka, tutondezya kuti tulaciyanda ncobeni ncotulomba akuti tulaalusyomo lwakuti Leza inga watupa—kuti kaceendelana akuyanda kwakwe.—Maako 11:24; 1 Johane 5:14.
Cikozyanyo cabili caamba kapati kujatikizya ‘Sikuswiilila zikombyo,’ Jehova. (Intembauzyo 65:2) Jesu ubuzya kuti: “Sena nkwali usyi akati kanu uunga ikuti mwanaakwe wamulomba nswi, ulamupa nzoka muciindi canswi? Naa ikuti walomba ji, sena ulamupa kabanze?” Bwiinguzi butadoonekwi mbwakuti, kunyina usyi uubikkila maano uukonzya kupa bana bakwe zyintu zijaya. Mpoonya Jesu wacipandulula cikozyanyo: Ikuti bamausyi batalondokede kabakonzya kupa bana babo “zipego zibotu,” “nkokuti Taata uuli kujulu uyooinda kupa muuya uusalala”—cipego ciinda zyoonse—kubana bakwe bamulomba!b—Luka 11:11-13; Matayo 7:11.
Ino cikozyanyo eeci cituyiisya nzi kujatikizya Jehova, ‘Sikuswiilila zikombyo’? Jesu utukulwaizya kuti Jehova katumubona kuti ngu Taata uutubikkila maano alimwi uulibambilide kugwasya bana bakwe. Aboobo, bakombi ba Jehova balaangulukide kumulomba zyintu nzyobayanda kapati. Alimwi kuzyiba kuti uyanda kubagwasya, balilibambilide kutambula lugwasyo lwakwe nokuba kuti taluli ndolugwasyo ndobalikuyeeyela.c
Magwalo aamu Bbaibbele aasalidwe kubalwa mu April
[Bupanduluzi buyungizidwe]
a Cikozyanyo ca Jesu citondezya zilengwa nzyobatobela bantu. Ba Juda bakali kubona kusamausya beenzu kuti wakali mukuli uusetekene. Banamukwasyi bakali kujika buyo cinkwa cikkwana buzuba bomwe, aboobo, bakalizibide kulomba ikuti naa camana. Alimwi kuti kabali bacete, banamukwasyi boonse bakali koona ansi muluumu yomwe.
b Kanji-kanji Jesu wakali kupandulula zyintu kwiinda mukubelesya bbala lyakuti “uyooinda”—kukankaizya Leza mbwali mubotu kwiinda bantu.
c Kutegwa muzyibe zinji kujatikizya mbomweelede kupaila kutegwa Leza aiswiilile mipailo yanu, amubone cibalo 17 cabbuku lyakuti Ino Ncinzi Cini Bbaibbele Ncoliyiisya? ilyakamwaigwa a Bakamboni ba Jehova.
[Majwi aakwelelezya sikubala aali apeeji 11]
Leza ulilibambilide kubapa nzyobalomba aabo bapaila kulinguwe mulusyomo