MAKANI AAYEEME AMUTWE UULI ACIVWUMBYO: SENA LEZA NGUSILUNYA?
Nkaambo Nzi Bantu Ncobaamba Kuti Leza Ngusilunya?
SENA mubuzyo uuli acivwumbyo camagazini eeyi ulamugambya? Bamwi ulabagambya, pele bunji bwabantu mazuba aano balalibuzya naa Leza ngusilunya—bayeeya kuti masimpe ngusilunya. Nkaambo nzi?
Bamwi ibafwutuka kuntenda zilicitikila balabuzya kuti: “Nkaambo nzi Leza ncazumizya zyintu eezyi kucitika? Sena ulababikkila maano bantu? Naa ngusilunya?”
Abamwi balakatazyigwa mbubwenya buyo ciindi nobabala Bbaibbele. Nobabala zibalo mbuli cibalo cijatikizya Nowa alimwi a Zambangulwe, balalibuzya kuti, ‘Nkaambo nzi Leza siluyando ncaakabajayila bantu banji boobu? Sena ngusilunya?’
Sena zimwi ziindi mulalibuzya mibuzyo iili boobu? Sena mulaalilwa kwiingula bantu babuzya naa Leza ngusilunya? Kufwumbwa mbocibede, amulange-lange mubuzyo uumbi uukonzya kugwasya.
NKAAMBO NZI NCOTUTALUYANDILI LUNYA?
Mubufwaafwi, tatuluyandi lunya akaambo kakuti twakalengwa munzila iipa kuti katuzyiba ciluzi acitaluzi. Tuliindene kapati abanyama munzila eeyi. Mulengi wesu wakatulenga “mucinkozya cakwe.” (Matalikilo 1:27) Ino eeci caamba nzi? Caamba kuti wakatupa nguzu zyakutondezya bube bwakwe alimwi azyeelelo zyakwe zyakulilemeka, nkokuti nguzu zyakwe zyakuzyiba ciluzi acitaluzi. Amuciyeeyele buyo eeci: Ikuti Leza wakatulenga munzila iipa kuti katuzyiba ciluzi acitaluzi alimwi akuti katutaluyandi lunya, sena eeci inga tiicaamba kuti awalo Leza taluyandi?
Ibbaibbele lisinizya kuti kuyeeya kuli boobo kuliluzi, nkaambo Leza waamba kuti: “Inzila zyangu zilisumpwidwe kwiinda inzila zyanu amiyeeyo yangu kwiinda miyeeyo yanu.” (Isaya 55:9) Aboobo, ikuti twaamba kuti Leza ngusilunya, sena inga tiikwaba kukazya ncolyaamba Bbaibbele—nkokuti kwaamba kuti nzila zyesu zilisumpukide kwiinda zyakwe? Mubwini, inga caba camaano kuvwuntauzya kutegwa tuzyibe masimpe katutanaamba boobu. Ambweni tweelede kubuzya kaambo micito yakwe imwi ncoilibonya mbuli kuti njalunya, ikutali kubuzya naa Leza ngusilunya. Kutegwa tumvwisye, atulange-lange cini ncolwaamba “lunya.”
Kuti twaamba kuti muntu ngusilunya, nkokuti twaamba kuti ulaamakanze mabi. Muntu silunya muntu uukkomana kubona bamwi kabapenga naa uutabikkili maano kumapenzi aabo. Aboobo, usyi bana uusubula mwanaakwe akaambo kakuti ulakkomana kumunyemya, ngusilunya. Pele usyi bana uusubula mwanaakwe kutegwa amulaye naa kumukwabilila, uli kabotu. Akaambo kakuti talili lyoonse notuzyiba kaambo bamwi ncobacitila zyintu munzila eeyo, cilakatazya kuzyiba makanze aabo.
Atulange-lange twaambo tumwi tobilo itupa kuti bamwi kabayeeya kuti Leza ngusilunya—ntenda zilicitikila nzyotubona mazuba aano alimwi azibalo zyamu Bbaibbele zijatikizya Leza mbwaakabasubula bantu. Sena bumboni butondezya kuti Leza ngusilunya ncobeni?
[Cifwanikiso icili apeeji 3]
Twakalengwa munzila iipa kuti katutondezya lubomba akusula lunya