MIBUZYO YAMU BBAIBBELE YAINGULWA
Sena zikombelo zyoonse zilamulemeka Leza?
Ikuti naa mulaswiilila zintu zicitika munyika kwiinda mukweebelela cipekupeku, ndiza mwakabona kuti zintu zibyaabi zimwi ziindi zilacitika muzina lyabukombi. Tabuli bukombi boonse mbwakkomanina Leza mwini-mwini. (Matayo 7:15) Masimpe, bantu banji bayungwa.—Amubale 1 Johane 5:19.
Nokuba boobo, Leza ulababikkila maano bantu bayanda bubotu alimwi akasimpe. (Johane 4:23) Leza ulabatamba bantu bali boobu kwiiya kasimpe kuzwa mujwi lyakwe, Bbaibbele.—Amubale 1 Timoteyo 2:3-5.
Mbuti mbomukonzya kubuzyiba bukombi bwakasimpe?
Jehova Leza uli mukukamantanya bantu kuzwa mubukombi bwiindene-indene kwiinda mukubayiisya kasimpe alimwi akubayiisya kuyandana umwi amweenzinyina. (Mika 4:2, 3) Aboobo mulakonzya kubazyiba aabo bakomba munzila yakasimpe kwiinda mukubona mbobabikkilana maano.—Amubale Johane 13:35.
Jehova uli mukukamantanya bantu boonse kwiinda mubukombi bwakasimpe.—Intembauzyo 133:1
Lusyomo alimwi abukkale bwabakombi bakasimpe ziyeeme aa Bbaibbele. (2 Timoteyo 3:16) Kuyungizya waawo, balalilemeka zina lya Leza. (Intembauzyo 83:18) Alimwi balaambilizya Bwami bwa Leza kuti mbobulangizi bulikke bwabanamaleya. (Daniele 2:44) Balamwiiya Jesu kwiinda mukuzumizya kuti “umunike mumuni” wabo akubacitila zibotu basimukobonyina. (Matayo 5:16) Aboobo Banakristo bakasimpe balakonzya kuzyibwa kwiinda mukuunka mumaanda aabantu kuyookambauka makani mabotu aa Bwami bwa Leza.—Amubale Matayo 24:14; Milimo 5:42; 20:20.