MAKANI AAYEEME AMUTWE UULI ACIVWUMBYO | SENA SAATANI MUNTU MWINI-MWINI?
Sena Saatani Nkwali Ncobeni?
Cibumbwa kudolopo lya Madrid, ku Spain, citondezya Saatani kuba mbuli mungelo mumpelenge, wanyangwa bulemu
“Ndakakomenena ku El salvador. Ikuti ndatalika kuputa, bamaama bakali kundaambila kuti, ‘Ulaboola Diabolosi akutole!’ Mpoonya ndakali kubaingula kuti, ‘Kaboola buyo!’ Mebo ndisyoma muli Leza, kutali muli Saatani.”—ROGELIO.
Sena mulacizumina ncaakaamba Rogelio? Akati katwaambo ootu tutobela, ino nkaakali nkomubona kuti nkamasimpe?
Saatani tali muntu mwini-mwini, mbube buyo bubi ibuli mumuntu.
Saatani nkwali, pele taakwe nababikkila maano bantu.
Saatani ncilenge camuuya cilaanguzu zinji zyakweendelezya bantu.
Twaambo toonse ootu tulijisi bantu batusyoma, ndiza mamiliyoni aabantu buya. Pele sena kuli mbocibede naa nkaakali kaambo kamasimpe? Ikuti naa Saatani tako, nkokuti aabo ibasyoma kuti nkwali balisweekede. Ikuti naa Saatani nkwali pele taakwe nababikkila maano bantu, nkokuti bantu banji bayoowa citako. Nokuba boobo, ikuti Saatani ngusilweeno mucenjezu uuyendelezya micito yabantu mibi, nkokuti mubyaabi kapati kwiinda mbobayeeya bantu banji.
Atulange-lange Magwalo Aasalala mbwaayingula mibuzyo eeyi: Ino Saatani nguni naa ino Saatani ncinzi—sena mbube buyo bubi naa muntu wamuuya? Ikuti Saatani kali muntu, sena ulakonzya kumuletela ntenda? Ikuti naa mboobo, mbuti mbomukonzya kulikwabilila?