MAKANI AAYEEME AMUTWE UULI ACIVWUMBYO MULAKONZYA | KUBA MULONGWE WA LEZA
Sena Mulimvwa Kuba Acilongwe a Leza?
“Kuba acilongwe ciyumu a Leza kupa kuti mulimvwe kukwabililwa alimwi akuliiba. Kupa kulimvwa kuti lyoonse Leza ulabikkila maano kuzintu nzyomucita.”—CHRISTOPHER, MUKUBUSI WAKU GHANA.
“Leza ulaabona mapenzi aanu oonse, ulamuyanda kapati alimwi ulapa kufwumbwa lugwasyo ndomwamulomba.” —HANNAH ULAAMYAKA YAKUZYALWA IILI 13 WAKU ALASKA, U.S.A.
“Ncintu cilibedelede alimwi icikkazyika moyo kuzyiba kuti ujisi cilongwe ciyumu a Leza!”—GINA, MUKAINTU WAKU JAMAICA, UUJISI MYAKA YAKUMA 45.
Christopher, Hannah alimwi aba Gina tabali balikke ibalimvwa boobo. Bantu banji munyika yoonse balisinizyide kuti Leza ubabona kuti mbalongwe bakwe. Ino nywebo mulimvwa buti? Sena mulimvwa kuti muli balongwe ba Leza? Sena inga mwayanda kuba acilongwe ciyumu a Leza? Ndiza inga mwalibuzya kuti, ‘Sena masimpe cilakonzyeka kuti muntu buyo abe acilongwe ciyumu a Leza Singuzuzyoonse? Ikuti naa cilakonzyeka, ino inga cakonzyeka buti?
CILAKONZYEKA KUBA ACILONGWE A LEZA
Kweelana ancolyaamba Bbaibbele, cilakonzyeka kuba acilongwe ciyumu a Leza nywebo kumugama. Bbaibbele lyaamba kuti Leza wakaita syaanene muna Hebrayo, Abrahamu kuti “mulongwe wangu.” (Isaya 41:8) Kuyungizya waawo, amubone kutamba kujanika mulugwalo lwa Jakobo 4:8, lwaamba kuti: “Amuswene kuli Leza, eelyo awalo ulaswena kulindinywe.” Aboobo cilasalala kuti cilakonzyeka kuba acilongwe, nkokuti cilongwe ciyumu a Leza. Pele mbwaanga Leza talibonyi, mbuti mbomukonzya ‘kuswena’ kuli Leza alimwi akukkomana kuba acilongwe cibotu anguwe?
Kutegwa twiingule mubuzyo ooyu, amubone cicitika muzilongwe zyabantu. Cakusaanguna, cilongwe cilatalika abantu bobilo kwiinda mukuzyibana mazina. Mpoonya mbobayaabuzumanana kubandika lyoonse, kwaambilana zili kumoyo alimwi ambobalimvwa, cilongwe cabo cilayuma. Alimwi ikuti kabalisungwide kucitilana zintu, cilongwe cabo cilayuma. Mbubonya buyo andiswe tulakonzya kutalika kumvwana a Leza munzila iili boobu. Atubone mbocikonzyeka kucita oobo.