MIBUZYO YAMU BBAIBBELE YAINGULWA
Ino mbuti bana mbobakonzya kwiiya kuyanda Leza?
Amubelesye ziiyo kuzwa kuzilenge kutegwa mumugwasye mwanaanu kumuzyiba alimwi akumuyanda Leza
Bana banu balakonzya kwiiya kuyanda Leza lilikke kuti kabasyoma kuti Leza nkwali alimwi akuti ulabayanda. Kutegwa bamuyande Leza, beelede kumuzyiba. (1 Johane 4:8) Mucikozyanyo, beelede kuzyiba kuti: Ino makanze nzi ngaakajisi Leza ciindi naakalenga muntu? Nkaambo nzi Leza ncalekelede kupenga? Ino ncinzi Leza ncayoobacitila bantu kumbele?—Amubale Bafilipi 1:9.
Kutegwa mubagwasye bana banu kuyanda Leza, nywebo kumugama mweelede kubatondezya kuti mulamuyanda. Ikuti bamubona kamucita oobo, cakutadooneka bayootobela cikozyanyo canu.—Amubale Deuteronomo 6:5-7; Tusimpi 22:6.
Mbuti mbomukonzya kubasika aamoyo bana banu?
Ijwi lya Leza lilaanguzu. (Bahebrayo 4:12) Aboobo amubagwasye bana banu kwiiya njiisyo zyantalisyo. Kutegwa Jesu abasike amoyo bantu, wakali kubuzya mibuzyo, wakali kuswiilila alimwi wakali kwaapandulula magwalo. Kutegwa mubasike amoyo bana banu, mweelede kwiiya Jesu mbwaakali kuyiisya.—Amubale Luka 24:15-19, 27, 32.
Kuyungizya waawo, zibalo zyamu Bbaibbele izitondezya mbuli Leza mbwaakali kubeendelezya bantu zilakonzya kubagwasya bana kumuzyiba alimwi akumuyanda Leza. Mabbuku aakabambilwa kugwasya bana munzila eeyi alajanika awebbusaiti ya www.jw.org.—Amubale 2 Timoteyo 3:16.