MIBUZYO YAMU BBAIBBELE YAINGULWA

Ino ncinzi cipa kuti bantu banji kabasyoma kuti kuli Mulengi?

Myaka iinda ku 3,000, sikweema wakalemba kuti: “Ndilengedwe munzila iigambya, mbotu kapati.” (Intembauzyo 139:14) Mwayeeya mwana mbwapangwa kuzwa kukaseelo komwe kasyoonto, sena eeci tacimugambyi? Bantu banji balazumina kuti zintu zyuumi zyakalengwa buya.—Amubale Intembauzyo 139:13-17; Bahebrayo 3:4.

Ooyo iwakalenga bubumbo boonse alimwi anyika kuti kaikkalwa abantu, nguwakalenga abuumi. (Intembauzyo 36:9) Wakali kubandika abantu alimwi watwaambila makani aajatikizya nguwe.—Amubale Isaya 45:18.

Sena twakazwa kubanyama?

Munzila zinji, mibili yesu ilikozyenye amibili yabanyama. Cili boobo akaambo kakuti bantu alimwi abanyama bakalengwa amulengi kutegwa kabakkala anyika. Wakalenga muntu wakusaanguna kuzwa kubulongo ikutali kubanyama.—Amubale Matalikilo 1:24; 2:7.

Bantu baliindene abanyama munzila zyobilo zipati. Nzila yakusaanguna, bantu balijisi luyandisisyo lwakuzyiba zintu, kuba aluyando, alimwi akulemeka mulengi. Nzila yabili, banyama tiibakalengelwa kuti kabapona buumi butamani mbuli bantu. Pele lino, bantu boonse bakakona lufwu nkaambo muntu wakusaanguna wakakaka kweendelezyegwa a Mulengi.—Amubale Matalikilo 1:27; 2:15-17.