Amumulumbe Jehova Kutegwa Mulongezyegwe
“Amumulumbe Jehova, nkaambo mubotu.”—INT. 106:1.
1. Nkaambo nzi Jehova nceelela kuti tumulumbe?
JEHOVA, Sikupa “cipego cibotu cili coonse alimwi acipego cilondokede cili coonse,” uleelela ncobeni kulumbwa. (Jak. 1:17) Mbwali Mweembezi siluyando, ulatulanganya caluyando kuzintu zyoonse nzyotuyandika kumubili alimwi akumuuya. (Int. 23:1-3) Watondezya kuti “mayubilo eesu alimwi ninguzu zyesu”—kwaambisya muziindi zikatazya! (Int. 46:1) Masimpe, tulijisi twaambo tunji tulimvwisya twakuzumina amoyo woonse majwi aasintembauzyo aakuti: “Amumulumbe Jehova, nkaambo mubotu; luyando lwakwe lutamani nkoluli lyoonse mane kukabe kutamani.”—Int. 106:1.
Lugwalo lwamwaka wa 2015: “Amumulumbe Jehova, nkaambo mubotu.”—Intembauzyo 106:1
2, 3. (a) Nintenda nzi ziliko ikuti katutazibikkili maano zilongezyo nzyotujisi? (b) Mibuzyo nzi njotutiilange-lange mucibalo eeci?
2 Nkaambo nzi ncociyandika kuti twaalange-lange makani aaya aajatikizya kulumba? Mbubwenya mbokwakasinsimwa, bantu mumazuba aano aamamanino bayaabwiindila kutalumba. (2 Tim. 3:2) Bantu banji tabazibikkili maano zilongezyo nzyobajisi. Akaambo kakuyungwa abasimakwebo alimwi amakwebo aabo ngobaambilizya, mamiliyoni aabantu basoleka kujana zintu zinji muciindi cakukkutila anzyobajisi. Andiswe tulakonzya kujatikizyigwa amuuya ooyu wakutalumba. Mbubwenya mbuli bana Israyeli bansiku, tulakonzya kuba bantu batalumbi alimwi akuleka kucikkomanina cilongwe cesu cibotu a Jehova azilongezyo nzyotwakatambula kuzwa kulinguwe.—Int. 106:7, 11-13.
3 Amubone alimwi cikonzya kucitika notuli mumasunko aakatazya. Muziindi izili boobu, tulakonzya kukatazyigwa kapati alimwi akuleka kuzibikkila maano zilongezyo nzyotujisi. (Int. 116:3) Aboobo, mbuti mbotukonzya kuba amoyo uulumba alimwi akuzumanana kuba aamoyo uuli boobo? Ncinzi ciyootugwasya kuzumanana kuzilanga kabotu zintu noliba leelyo notuli mumasunko mapati? Atubone mbotukonzya kucita boobo.
“NZINJI KAPATI ZINTU NZYOOCITA, O JEHOVA”
4. Mbuti mbotukonzya kuzumanana kuba aamoyo uulumba?
4 Ikuti katuyanda kuba aamoyo uulumba alimwi akuzumanana kuba aamoyo uuli boobo, tweelede kuzizyiba zilongezyo zyesu kuzwa kuli Jehova akuzinzibala kuyeeya kapati alimwi akulanga-langa milimo yakwe yaluyando cakulomya. Ciindi sintembauzyo naakacita oobu, wakayoowa naakazyiba zintu zibotu zinji Jehova nzyaakacita.—Amubale Intembauzyo 40:5; 107:43.
5. Ncinzi ncotukonzya kwiiya kumwaapostolo Paulo kujatikizya kulumba?
5 Tulakonzya kwiiya zinji kumwaapostolo Paulo kujatikizya kulumba. Kuboneka kuti wakali kuzinzibala kuyeeya zilongezyo zyakwe nkaambo kakuti kanji-kanji wakali kulumba kuzwa ansi aamoyo. Paulo wakalizyi kabotu kuti musyule wakali “sikusampaula Leza asikupenzya bantu bakwe alimwi asikasampusampu.” Aboobo, wakalumba nokuba kuti musyule wakali sizibi, Leza alimwi a Kristo bakamufwida luse alimwi akumupa mulimo. (Amubale 1 Timoteyo 1:12-14.) Paulo alimwi wakali kubalumba Banakristonyina alimwi kanji-kanji wakali kumulumba Jehova akaambo kabube bwabo bubotu akusyomeka kwabo mumulimo. (Flp. 1:3-5, 7; 1 Tes. 1:2, 3) Alimwi ciindi naakali mumasunko, wakali kufwambaana kulumba Jehova akaambo kakugwasyigwa a Banakristonyina. (Mil. 28:15; 2 Kor. 7:5-7) Aboobo, tacigambyi kubona kuti magwalo aa Paulo akulwaizya Banakristo kuti: “Amutondezye kuti mulalumba . . . , akukulwaizyanya antembauzyo, nyimbo zyakulumba Leza, nyimbo zyakumuuya ziimbwa cakulumba.”—Kol. 3:15-17.
KUZINZIBALA KUYEEYA AMUPAILO—ZILAYANDIKA KUTEGWA TUZUMANANE KULUMBA
6. Nzintu nzi izimupa kuti mumulumbe Jehova?
6 Mbuti mbotukonzya kwiiya cikozyanyo cibotu ca Paulo cakulumba? Mbubwenya mbuli Paulo, tuyandika kuzinzibala kuyeeya zintu Jehova nzyaatucitila lwesu kutugama. (Int. 116:12) Ino inga mwaingula buti ikuti mwabuzyigwa kuti: ‘Nzilongezyo nzi nzyomwakatambula kuzwa kuli Jehova izipa kuti mumulumbe?’ Sena inga mwabikkilizya acilongwe canu a Jehova citaliboteli? Naa kulekelelwa zibi akaambo kalusyomo lwanu mucituuzyo cacinunuzyo ca Kristo? Sena mulakonzya kwaamba mazina aabakwesu abacizyi ibakamugwasya nomwakali mumasunko? Masimpe, tamukonzyi kuleka kwaamba bana banu alimwi angomukwetene limwi. Kujana ciindi cakuzinzibala kuyeeya zilongezyo zibotu mbuli zyeezyi kuzwa kuli Taatesu siluyando, Jehova, kuyoopa moyo wanu kukkomana calo ciyoomupa kuti kamulumba buzuba abuzuba.—Amubale Intembauzyo 92:1, 2.
7. (a) Nkaambo nzi ncotweelede kupa mipailo yakulumba? (b) Ino muyoogwasyigwa buti ikuti mwatondezya kulumba mumipailo yanu?
7 Ciindi notuyeeya zilongezyo zyesu mumizeezo alimwi amumyoyo yesu, ciyootugwasya kuti katulibambilide kupaila kuli Jehova akumulumba. (Int. 95:2; 100:4, 5) Bantu banji mupailo baubona buyo kuba nzila yakulombela zintu kuli Leza. Nokuba boobo, swebo tulizyi kuti Jehova ulakkomana ciindi notumulumba kuzintu nzyotujisi. Bbaibbele lilijisi mipailo iizwa ansi aamoyo yakulumba, kubikkilizya ayeeyo iyakapailwa a Hana alimwi a Hezekiya. (1 Sam. 2:1-10; Is. 38:9-20) Aboobo, amwiiye babelesi aabo ibakali kusyomeka balo ibakatondezya muuya wakulumba. Inzya, amumulumbe Jehova mumupailo kuzilongezyo nzyomujisi. (1 Tes. 5:17, 18) Kuli bulumbu bunji bujanika mukucita boobo. Muyookulwaizyigwa, luyando lwanu kuli Jehova luyookomena, alimwi muyooba aacilongwe ciyumu kapati anguwe kwiinda lyoonse.—Jak. 4:8.
Nzilongezyo nzi izimupa kuti mumulumbe Jehova? (Amubone mincali 6, 7)
8. Ncinzi cikonzya kupa kuti tuleke kumulumba Jehova kuzintu zyoonse nzyaatucitila?
8 Nkaambo nzi ncotweelede kukucenjelela kucileka kulumba bubotu bwa Jehova? Tweelede kucenjela akaambo kakuti twakakona kampenda kakutalumba. Amulange-lange bukkale oobu: Bazyali besu bakusaanguna ba Adamu a Eva, bakabikkwa mumuunda mubotu waparadaiso. Bakalijisi zyoonse nzyobakali kuyandika alimwi bakalijisi coolwe cakupona kukabe kutamani muluumuno. (Matl. 1:28) Pele tiibakalumba zilongezyo nzyobakajisi. Cabulyato, bakalombozya kuba aazintu zinji. Cakatobela ncakuti, bakasweekelwa zintu zyoonse. (Matl. 3:6, 7, 17-19) Mbwaanga tuzingulukidwe abantu batalumbi munyika, andiswe tulakonzya asyoonto-syoonto kutalika kuluba zintu Jehova nzyaatucitila. Tulakonzya kucileka kubikkila maano kucilongwe cesu anguwe. Tulakonzya kucileka kulumba coolwe ncotujisi cakuba cibeela cabunyina bwanyika yoonse. Tulakonzya kutalika kubikkila kapati maano kuzintu zyamunyika yalo iili afwaafwi kumana. (1 Joh. 2:15-17) Kutegwa tweelebe nzila eeyi mbyaabi, tuyandika kuzinzibala kuyeeya zilongezyo zyesu alimwi akuzumanana kumulumba Jehova kucoolwe ncotujisi cakuba bantu bakwe.—Amubale Intembauzyo 27:4.
CIINDI NOTULWANA MASUNKO
9. Nkaambo nzi ncotweelede kuzinzibala kuyeeya zilongezyo nzyotujisi ciindi notuli mumasunko aakatazya kapati?
9 Ikuba aamoyo uulumba kulakonzya kutugwasya kulwana masunko aakatazya kapati. Tulakonzya kukatazyigwa kapati ikuti cakutayeeyela twajanika mubukkale ibukonzya kucinca buumi bwesu, bukkale mbuli kutasyomeka kwaumwi mucikwati, kuciswa bulwazi bupati, lufwu lwamuntu ngotwali kuyanda, naa ntenda zilicitikila. Aziindi zyamusyobo ooyu, tulakonzya kuumbulizyigwa akuyumizyigwa kwiinda mukuyeeya zilongezyo nzyotujisi. Amubone izyakabacitikila bamwi mubuumi.
10. Ino ba Irina bakagwasyigwa buti kwiinda mukuyeeya zilongezyo nzyobajisi?
10 Ba Irinaa, ibapainiya baciindi coonse baku United States, bakalikwetwe kumwaalu walo mukuya kwaciindi iwatakasyomeka akubasiya balo abana babo. Ncinzi cakabagwasya ba Irina kuzumanana kubelekela Jehova cakusyomeka? Bakaamba kuti: “Ndilamulumba Jehova akaambo kakundilanganya lwangu kundigama. Kwiinda mukuyeeya zilongezyo nzyondijisi buzuba abuzuba, ndabona kuti ncoolwe cipati kapati kuzyibwa alimwi akuyandwa a Taateesu wakujulu sikukwabilila. Ndilizyi kuti kunyina nayoondilekelezya pe.” Nokuba kuti ba Irina bainda mubukkale bukatazya kapati mubuumi bwabo, lukkomano lwabo lwazumanana kubagwasya alimwi bamwi balakulwaizyigwa acikozyanyo cabo.
11. Ncinzi cakabagwasya ba Kyung-sook kulwana penzi lyakuciswa bulwazi bupati?
11 Ba Kyung-sook, ibakkala ku Asia, bakabeleka mulimo wabupainiya abalumi babo myaka yiinda ku 20. Cakutayeeyela, bakajanika kuti bakali kuciswa bulwazi bwakkansa yakumapunga alimwi bakaambilwa kuti bakali kuyoofwa kwainda myezi iili cisambomwe. Nokuba kuti balo abalumi babo bakayaanya masunko manji, mapati alimwi amasyoonto-syoonto, lyoonse balijisi lusyomo kujatikizya buponi bwabo. Bakaamba kuti: “Kaambo aaka kajatikizya buponi bwangu kakandipenzya kapati. Ndakali kulimvwa mbuli kuti ndasweekelwa zintu zyoonse, alimwi ndakali kulibilika kapati.” Ncinzi cabagwasya ba Kyung-sook kulwana penzi eeli? Bakaamba kuti: “Buzuba bumwi abumwi masiku kanditanoona, ndilakkwela atala aaciluli caŋanda yesu akupaila cakupozya akaambo kazintu zyosanwe nzyondilumba kuzwa buzuba oobo. Mpoonya ndilayumizyigwa, alimwi cindipa kuti nditondezye luyando lwangu kuli Jehova.” Ino ba Kyung-sook bagwasyigwa buti amipailo yabo yamasiku? Bakaamba kuti: “Ndazyiba kuti Jehova ulatugwasya kuliyumya mubukkale bukatazya alimwi akuti kuli zilongezyo zinji kapati kwiinda masunko ngotukonzya kuyaanya.”
Antoomwe amwanookwabo, John ngwaakafwutuka limwi (Amubone muncali 13)
12. Mbuti ba Jason mbobakaumbulizyigwa kuzwa ciindi nobakafwidwa bakaintu babo?
12 Ba Jason, balo ibabelekela amutabi umwi mu Africa, bali kubeleka mulimo waciindi coonse myaka yiinda ku 30. Bakaamba kuti: “Myaka iili ciloba yainda, bakaintu bangu mbondakali kuyanda kapati, bakafwa, alimwi eeci cakandityompya kapati. Ikuti ndatalika kuyeeya mbobakapenga ciindi nobakali kuciswa bulwazi bwakkansa, cilakonzya kuba cintu cityompya kapati.” Ncinzi cakabagwasya ba Jason kulwana sunko eeli? Bakaamba kuti: “Aciindi cimwi, ndakali kuyeeya ciindi cikkomanisya ncotwakajisi abakaintu bantu alimwi aciindi ncotwakakkala antoomwe, alimwi akumulumba Jehova mumupailo kujatikizya kuziindi eezyo. Ndakakatalusyigwa alimwi akutalika kumulumba Jehova lyoonse kuziindi zyamusyobo ooyu izyakali kukkomanisya. Kulumba kwapa kuti kube kucinca kapati mbondali kuzilanga zintu. Ndicuuside akaambo kakusweekelwa, pele kulumba Jehova akaambo kakuti ndakajisi cikwati cibotu alimwi akuba aacoolwe cakumubelekela amuntu ngondakali kuyanda kapati kwapa kuti kandizilanga kabotu zintu.”
“Ndilamulumba Jehova akaambo kakuti ngo Leza wangu.”—Sheryl
13. Ncinzi cakamugwasya Sheryl kuliyumya ciindi naakasweekelwa bamukwasyi wakwe banji?
13 Ciindi nokwakali mvwula mpati yaguwo litegwa Super Typhoon Haiyan mucisi ca Philippines kumamanino aamwaka wa 2013, Sheryl, walo aciindi eeco iwakajisi buyo myaka yakuzyalwa iili 13, wakasweekelwa zintu zyoonse. Wakaamba kuti: “Ndakasweekelwa aakukkala, alimwi ndakafwidwa bamukwasyi wangu banji.” Bausyi, banyina, abanabokwabo botatwe, bakafwa mumvwula njiyonya eeyi. Ncinzi camugwasya Sheryl kuliyumya mupenzi eeli kakunyina kutyompwa? Ulijisi moyo uulumba alimwi akuzyiba zilongezyo nzyacijisi. Wakaamba kuti: “Ndakabona nzyobakali kucita bakwesu abacizyi kutegwa bagwasye alimwi akuyumya-yumya baabo ibakali kuyandika lugwasyo. Ndakalizyi kuti bakwesu nyika yoonse bakali kundipailila.” Wakayungizya kuti: “Ndilamulumba kapati Jehova akaambo kakuti ngo Leza wangu. Lyoonse ulatupa zintu nzyotuyandika.” Inzya, kuzyiba zilongezyo nzyotujisi ngomusamu wakumana buumba. Ikuba aamoyo uulumba kulatugwasya kuzumanana nokuba kuti inga katuli mubukkale bukatazya kapati.—Ef. 5:20; amubale Bafilipi 4:6, 7.
“MEBO NDINOOSEKELELA MULI JEHOVA”
14. Mbulangizi nzi bukkomanisya mbotulindila? (Amubone cifwanikiso icili kumatalikilo aacibalo.)
14 Kuzwa kaindi, bantu ba Jehova bali kuzikkomanina zilongezyo zyabo. Mucikozyanyo, nobakafwutulwa kuzwa kuli Farao ampi zyakwe ku Lwizi Lusalala, bana Israyeli bakatondezya kukkomana kwiinda mukwiimba ntembauzyo alimwi akulumba. (Kul. 15:1-21) Mazuba aano, akati kazilongezyo nzyotuyandisya kapati kuli bulangizi mbotujisi bwakufwutulwa kuzintu zyoonse zitukatazya. (Int. 37:9-11; Is. 25:8; 33:24) Amuyeeyele buyo mbotuyakulimvwa ciindi Jehova aakunyonyoona basikondonyina boonse alimwi akutunjizya munyika mpya yaluumuno alimwi yabululami. Eelo kaka oobo buyakuba buzuba bwakulumba!—Ciy. 20:1-3; 21:3, 4.
15. Ino mukanzide kucita nzi mumwaka woonse wa 2015?
15 Tulangila kutambula zilongezyo zitabaliki zyakumuuya kuzwa kuli Jehova mumwaka ooyu wa 2015. Masimpe, tulakonzya kuyaanya masunko amwi. Tacikwe makani kufwumbwa cikonzya kutusikila, tulizyi kuti Jehova kunyina nayootulekelezya pe. (Dt. 31:8; Int. 9:9, 10) Uyakuzumanana kutupa nzyotuyandika kutegwa tumubelekele cakusyomeka. Aboobo, atube aamakanze aakuzumanana kuba aamuuya ngwaakajisi musinsimi Habakuku iwakalemba kuti: “Lino nokuba kuti mukuyu taufwululi, amwalo mumisaansa tamujaniki micelo; nokuba kuti cisyango camaolifa tacizyali micelo, amwalo mumyuunda tamujanwi zyakulya; nokuba kuti matanga aambelele aloba mucaanda, aalo matanga aaŋombe amana muluba; mebo ndinoosekelela muli Jehova; ndinookkomana muli Leza walufwutuko lwangu.” (Hab. 3:17, 18) Inzya, mumwaka woonse ooyu, atuyeeye zilongezyo nzyotujisi cakukkomana alimwi akukulwaizyigwa kutobela kukulwaizya kwalugwalo lwamwaka wa 2015 lwakuti: “Amumulumbe Jehova, nkaambo mubotu.”—Int. 106:1.
a Mazina amwi mucibalo eeci acincwa