MIBUZYO YAMU BBAIBBELE YAINGULWA
Sena kuli notuyooba amfwulumende yomwe yeendelezya nyika yoonse?
Ino mbuti mfwulumende yanyika yoonse mboikonzya kukamantanya bantu bamuzisi zyoonse? Isaya 32:1, 17; 54:13
Amweezyeezye mfwulumende yanyika yoonse mboikonzya kubagwasya bantu. Mazuba aano bantu balapenga akaambo kakuti mbacete kakuli bamwi mbavwubi kapati. Pele mfwulumende iibikkila maano iyooba masimpe kuti bantu boonse balijisi nzyobayandika. Sena muyeeya kuti bantu kuli nobayooba amfwulumende iili boobo?—Amubale Jeremiya 10:23.
Kwamyaka minji, mfwulumende zyaalilwa mumbazu zinji kugwasya balelwa banzizyo, ikapati bantu bacete. Mfwulumende zimwi zilaalunya. (Mukambausi 4:1; 8:9) Pele Leza Singuzuzyoonse wasyomezya kuleta mfwulumende iiyoonjila mubusena bwamfwulumende zyoonse ziliko. Mwami wanjiyo uyoobalanganya ncobeni bantu.—Amubale Isaya 11:4; Daniele 2:44.
Ino Bwami bwa Leza buyoozuzikizya nzi?
Jehova wasala Mweendelezi wanyika weelela, nkokuti mwanaakwe, Jesu. (Luka 1:31-33) Ciindi Jesu naakali aanyika, wakali kuyandisya kapati kugwasya bantu. Mbwali Mwami, uyookamantanya bantu ibazwa muzisi zyoonse akulemununa bantu kumapenzi aabo oonse.—Amubale Intembauzyo 72:8, 12-14.
Sena bantu boonse balamuzumina Jesu kuti Mweendelezi? Peepe. Nokuba boobo, Jehova ulakkazika moyo. (2 Petro 3:9) Wapa bantu coolwe cakuti bamuzumine Jesu kuti Mweendelezi. Ino-ino Jesu uyoogwisya bantu babi, mpoonya uyooleta luumuno akuliiba munyika.—Amubale Mika 4:3, 4.