MAKANI AAYEEME AMUTWE UULI ACIVWUMBYO | SENA MULAYANDA KWIIYA BBAIBBELE?

Bubambe Bwakwiiya Bbaibbele Bwabantu Boonse

Bakamboni ba Jehova balizyibidwe kapati akaambo kamulimo wabo wakukambauka. Pele sena mulizyi kuti tulijisi abubambe bwakusololela ziiyo zya Bbaibbele nyika yoonse?

Mwaalumi wiiya Bbaibbele kubusena nkwabelekela

Mu 2014, Bakamboni bainda ku 8,000,000 mumasi aali 240 bakasololela ziiyo zya Bbaibbele zitandila ku 9,500,000 mwezi amwezi.a Mubwini, mweelwe wabantu mbotwiiya limwi Bbaibbele ulainda amweelwe wabantu bamuzisi zibalilwa ku 140!

Kutegwa mulimo ooyu wakuyiisya ucitwe, Bakamboni ba Jehova bamwaya ma Bbaibbele aatandila ku 1 bbiliyoni acisela, mabbuku, mamagazini, alimwi amabbuku aambi aabelesyegwa kwiiya Bbaibbele mwezi amwezi—mumyaambo iibalilwa ku 700! Kusolekesya ooku kwakumwaya mabbuku mumyaambo minji kwapa kuti bantu baiye Bbaibbele mumwaambo ngobayanda.

“Nondakacili kucikolo, tiindakali kuyanda kwiiya pe, pele ciiyo eeci cakandikkomanisya kapati. Nzyondakaiya zyakali kuumbulizya kapati.”—Ba Katlego, baku South Africa.

“Lwiiyo oolu lwakayiingula mibuzyo yangu yoonse alimwi aimbi minji.”—Ba Bertha, baku Mexico.

“Ciiyo cakali kucitilwa aŋanda yangu alimwi aciindi ncondakali kuyanda. Taakwe ciinda waawa kubota!”—Ba Eziquiel, baku Brazil.

“Zimwi ziindi ciiyo cakali kutola maminiti aali 15 naa 30—zimwi ziindi cakali kwiinda aawo—ciya buyo mbondakali kuyanda.”—Ba Viniana, baku Australia.

““Ciiyo tiicakali kubadelelwa—eeco cilagambya kapati!”—Ba Aimé, baku Benin.

“Aabo ibakali kundiyiisya Bbaibbele bakali kundikkazikila moyo alimwi bakali alubomba kapati. Twakatalika kumvwana kapati.”—Ba Karen, baku Northern Ireland.

“Bantu banji balaiya Bbaibbele, kakunyina kuba Bakamboni.”—Ba Denton, baku England.

BWIINGUZI KUMIBUZYO IIVWULA KUBUZYIGWA KUJATIKIZYA BUBAMBE BWESU BWACIIYO CA BBAIBBELE

Ino ciiyo ca Bbaibbele cicitwa buti?

Tulalanga-langa makani aamu Bbaibbele aasiyene-siyene akulanga tupango twamu Bbaibbele tweendelana amakani aayo. Mucikozyanyo, Ibbaibbele lilaingula mibuzyo mbuli yakuti: Ino Leza nguni? Ino ulibonya buti? Sena ulijisi zina? Ino ukkala kuli? Sena tulakonzya kuba acilongwe anguwe? Icibakatazya bantu banji nkuzyiba mpobeelede kulanga mu Bbaibbele kutegwa bajane bwiinguzi.

Kutegwa tubagwasye bantu kujana bwiinguzi, kanji-kanji tubelesya bbuku lyakuti Ino Ncinzi Cini Bbaibbele Ncoliyiisya?b Bbuku eeli lyakapangilwa kugwasya bantu kumvwisya njiisyo zyamu Bbaibbele zyantalisyo. Lilabikkilizya aziiyo zijatikizya Leza, Jesu Kristo, kupenga kwabantu, bubuke, mupailo, alimwi amakani aamwi aataambwa aawa.

Ino ndilili alimwi nkuuli ciiyo nkoceelede kucitilwa?

Ciiyo cilakonzya kucitwa kubusena mbomuyanda alimwi aciindi ncomuyanda.

Ino ciiyo eeci citola ciindi cilamfwu buti?

Bantu banji balaiya Bbaibbele kwawoola lyomwe naa kwiinda aawo nsondo ansondo. Pele bulamfwu bwaciiyo bulakonzya kucincwa. Tulacinca kweelana ambomuyanda. Bamwi baiya buyo maminiti aali 10 naa 15 nsondo ansondo.

Ino mali nzi ngomweelede kubbadela kutegwa mube aciiyo eeci?

Ciiyo alimwi amabbuku aakubelesya kwiiya tazibbadelelwi pe. Eeci cileendelana amalailile Jesu ngaakapa basikwiiya bakwe aakuti: “Mwakapegwa kakunyina kubbadelesyegwa, amupe kakunyina kubbadelesya.”—Matayo 10:8.

Ino bubambe bwakwiiya oobu butola ciindi cilamfwu buti?

Ciya buyo mbomuyanda. Ibbuku lyakuti Ino Ncinzi Cini Bbaibbele Ncoliyiisya? lijisi zibalo zili 19. Mulakonzya kusala zibalo nzyomuyanda kwiiya naa kwiiya zyoonse.

Sena ndeelede kuti mane ndaba umwi wa Bakamboni ba Jehova?

Peepe. Tulizyi kuti muntu umwi aumwi ulijisi lwaanguluko lwakulisalila ncayanda kusyoma. Nokuba boobo, bantu aabo ibaba aluzyibo lwamu Bbaibbele balakonzya kusala kabotu.

Ino nkuuli nkondikonzya kujana makani aambi?

Webbusaiti ya jw.org ilijisi makani aaluzi kujatikizya nzyobasyoma Bakamboni ba Jehova alimwi amilimo yabo.

Ino inga ndacilomba buti ciiyo ca Bbaibbele?

Amutume kulomba kwanu a Intaneti kubelesya webbusaiti ya www.jw.org.
Amulembele kukkeyala iili afwaafwi ankomukkala iili apeeji 2.
Amubabuzye Bakamboni ba Jehova ibali afwaafwi ankomukkala. Mulakonzya kubelesya manamba aamafooni aakubusena nkomukkala.

a Kanji-kanji ziiyo zya Bbaibbele zilasololelwa kumuntu omwe naa kutubunga twabantu basyoonto.

b Lyakamwaigwa a Bakamboni ba Jehova. Makkopi aabbuku eeli aainda ku 230 miliyoni asimbwa mumyaambo iinda ku 260.

MBOYAGWASYIGWA MIKWASYI

“Bakaintu bangu nobakatalika kwiiya Bbaibbele, ndakabona kucinca kupati mulimbabo. Buumi bwesu mumukwasyi bwakabota. Akaambo kakuyandisisya kubona ncobakali kwiiya, andime ndakatalika kwiiya. Nzyondakaiya zyakandipa kuba muntu uuli kabotu. Kwiiya Bbaibbele kwatukamantanya mbuli mukwasyi.”—Ba Eziquiel.

“Nondakatalika kwiiya Bbaibbele, ndakacileka cilengwa cakubelesya misamu iikola, kukolwa, alimwi ndakaiya kulijata kuti ndanyema. Ŋanda yangu lino ilasalala alimwi njabulondo. Mukwasyi wangu ndilauyanda kapati alimwi ndilakkomana kubacitila zintu zikonzya kubakkomanisya. Ndilikkomene kapati.”—Ba Karen.

“Bantu bamwi bakali kundifwubaazya akaambo kakwiiya Bbaibbele. Pele balumi bangu bakali kundikulwaizya kwiiya, bakali kwaamba kuti: ‘Nsikwe makani anzyobaamba bantu. Ikubona kuti bukkale bwako bwacinca—eeco ncecindibotela. Zumanana kwiiya.’ Mukwasyi wesu tiiwakali boobu pe!”—Ba Viniana.