Sena Cisamu Cigonkedwe Inga Casyuuka Alimwi?

IKUTI mwayeeya kujatikizya cisamu cipati cakedari caku Lebano, cakaindi kapati alimwi ciyumide muzibeela zimwi, mulakonzya kubona mbuli kuti tacikonzyi kusyuuka alimwi. Pele cisamu camaolifa cilagambya nkaambo nciyumu kuzintu zikonzya kupa kuti cisamu ciyume. Zisamu zimwi zyamaolifa ziyeeyelwa kuti zyakkala myaka iili 1,000. Cisamu camaolifa cilijisi miyanda iikonzya kupa kuti cisyuuke alimwi nokuba kuti cagonkwa akunyonyoonwa. Kufwumbwa buyo kuti miyanda kaitayumide, cilakonzya kusyuuka alimwi.

Sikale Jobu wakalijisi lusyomo lwakuti wakali kukonzya kupona alimwi nokuba kuti wafwa. (Job. 14:13-15) Wakabelesya cikozyanyo cacisamu—ambweni cisamu camaolifa—kutondezya lusyomo lwakuti Leza ulakonzya kumubusya. Jobu wakaamba kuti: “Nkaambo nociba cisamu cilijisi bulangizi. Ikuti naa cagonkwa, cilasyuuka alimwi.” Mboyawida buyo mvwula, cisiko ciyumu camaolifa cilasyuuka alimwi, miyanda ilamena zisyuukila mpoonya ‘ziba mitabi mbuli ntebbwaani.’—Job. 14:7-9.

Mbubwenya mbuli mulimi wamaolifa mbwakonzya kukkomana kubona cisiko cacisamu camaolifa cakayumide kacisyuuka alimwi, Jehova Leza ulayandisisya kuyoobusya babelesi bakwe abantu bambi ibakafwa. (Mt. 22:31, 32; Joh. 5:28, 29; Mil. 24:15) Eelo kaka ciyooba cintu cikkomanisya kutambula bantu bayoobusyigwa akupona alimwi, kupona buumi bubotu!