Sena Kuli Mbocibede Ikuti Kakunyina Muntu Uubona Mulimo Wanu?
BEZALELI alimwi a Oholiabu bakaluuzyi mulimo wakuyaka. Nobakali bazike mu Egepita, kuboneka kuti bakapanga zitina zinji cakuti tiibakali kukonzya kuuyeeya mweelwe wazitina nzyobakapanga. Pele myaka eeyo yakaliindide. Lino bakali kuyooba basyaazibwene ciindi nobakapegwa mulimo wakusololela mukupanga zintu zyamutente lyakukombela. (Kul. 31:1-11) Nokuba boobo, mbasyoonto buyo ibakali kuyoobona zintu zigambya nzyobakali kuyoopanga. Sena bakali kuyootyompwa akaambo kakuti bantu tiibakali kuyoobalumbaizya? Sena kuli mbocakali kuyooba ikuti naa taakwe muntu iwakali kuyoobona mulimo wabo? Sena kuli mbocibede ikuti kakunyina uubona mulimo wanu?
MILIMO MIBOTU IYAKABONWA BUYO ABANTU BASYOONTO
Zintu zimwi zyamutente lyakukombela zyakali zibotu kapati. Mucikozyanyo, amuyeeye buyo kujatikizya bakerubi ibangolida ibakali atala aabbokesi lyacizuminano. Mwaapostolo Paulo wakabaamba kuti bakajisi “bulemu.” (Heb. 9:5) Amweezyeezye buyo mbobakali kuboneka kabotu bangelo aabo ibakapangidwe kubelesya ngolinda iifwulidwe ansando!—Kul. 37:7-9.
Ikuti zintu nzyobakapanga ba Bezaleli alimwi a Oholiabu nozyaliko mazuba aano, nokwali kunga nzyezintu ziinda kweebelwa abantu banji mumamiziyamu. Pele ciindi nozyakapangwa, ino mubwini bali bongaye ibakabona kubota kwanzizyo? Bakerubi bakali mu Busena Busalalisya, aboobo bakali kubonwa buyo amupaizi mupati ciindi naakali kunjila mubusena oobu ciindi comwe amwaka, mu Buzuba Bwakumanya Milandu. (Heb. 9:6, 7) Aboobo, mbantu basyoonto buyo ibakababona bakerubi aaba.
KUKKUTILA KAKUNYINA KUZYIBWA KAPATI ABANTU
Ikuti nomwakali ndinywe Bezaleli naa Oholiabu ibakabeleka canguzu kupanga zintu zibotu kapati zili boobu, ino nomwakalimvwa buti kuzyiba kuti mbasyoonto buyo bantu ibakabona nzyomwakapanga? Mazuba aano, bantu balimvwa kuti bazwidilila ciindi nobalumbaizyigwa alimwi akukkomaninwa abantu. Bayeeya kuti eeyi nenzila mbobakonzya kuzyiba mbouyandika mulimo wabo. Pele babelesi ba Jehova tabayeeyi boobo. Mbubwenya mbuli Bezaleli alimwi a Oholiabu, tulakkutila mukucita kuyanda kwa Jehova alimwi akukkomaninwa anguwe.
Ciindi Jesu naakali anyika, cakalidumide kubasololi bazikombelo kupaila kutegwa bakkomanisye bantu. Nokuba boobo, Jesu wakakulwaizya kupaila munzila eeyi: Amupaile kuzwa ansi aamoyo kakunyina kuyanda kulumbaizyigwa abantu. Ino mbubotu nzi bujanika? “Uso uutalibonyi uyoomupa bulumbu.” (Mt. 6:5, 6) Aboobo, cilisalede kuti cintu ciyandika tacili cintu bantu ncobayeeya kujatikizya mipailo yesu, pele cintu Jehova ncayeeya. Mizeezo yakwe njiipa kuti mipailo yesu kaikkomaninwa kapati anguwe. Ncimwi buyo azintu zyoonse nzyotucita mumulimo wesu uusetekene. Tatulimvwi kuti mulimo wesu ulayandika ciindi notwalumbaizyigwa abantu; pele ciindi noukkomanisya Jehova, walo “uutalibonyi.”
Ciindi tempele nolyakamana, kkumbi “lyakatalika kuvwumba tente lyakuswaanganina alimwi bulemu bwa Jehova bwakazuzya tente lyakukombela.” (Kul. 40:34) Eelo kaka eeci cakatondezya kukkomaninwa a Jehova! Ino muyeeya kuti Bezaleli alimwi a Oholiabu bakalimvwa buti aciindi eeco? Nokuba kuti mazina aabo kunyina naakalembwa azintu nzyobakapanga, kweelede kuti bakalimvwa kukkutila mukuzyiba kuti Leza wakabalongezya mumulimo uuli woonse ngobakabeleka. (Tus. 10:22) Mumyaka yakatobela, masimpe bakalikkomene mumyoyo mukubona kuti zintu nzyobakapanga zyakali kubelesyegwa mumulimo wa Jehova. Baakubusyigwa munyika mpya, cakutadooneka Bezaleli alimwi a Oholiabu bayookkomana kuzyiba kuti tente lyakukombela lyakabelesyegwa mubukombi bwakasimpe myaka iibalilwa ku 500!
Nokuba kuti kunyina muntu uubona mulimo ngomubeleka cakulicesya alimwi acakulyaaba, Jehova ulaubona!
Mumbunga ya Jehova mazuba aano, bantu ibabeleka mulimo wakupanga mavidiyo, nyimbo, kuzekaula, kukkopa zifwoto, kusandulula, alimwi akulemba, boonse tabazyibidwe. Munzila imwi inga twaamba kuti kunyina “uubona” nzyobacita. Ncimwi buyo amilimo iibelekwa mumbungano ziinda ku 110,000 nyika yoonse mbwiizulwa. Ino nguni uumubona mubelesi uulanganya maakkaunti aambungano kalemba pepa lyamaakkaunti kumamanino aamwezi? Ino nguni uumubona mulembi kabamba lipooti yambungano yamulimo wakukambauka? Ino nguni uumubona mukwesu naa mucizyi iwabeleka mulimo umwi uuyandika mukubambulula Ŋanda ya Bwami?
Kumamanino aabuumi bwabo, Bezaleli alimwi a Oholiabu kunyina nobakalumbulwa kwiinda mukupegwa nkapu naa mendulo kutondezya mulimo ngobakabeleka. Pele bakajana cintu cimwi ciyandika kapati—kukkomaninwa a Jehova. Tulisinizyide kuti Jehova wakaibona milimo yabo. Atutobele cikozyanyo cabo cakulicesya alimwi acakulyaaba mumulimo.