MAKANI AAYEEME AMUTWEUULI ACIVWUMBYO | INO BAKAMBONI BA JEHOVA MBAANI?
Ino Nkaambo Nzi Ncotukambaukila?
Mulimo wakukambauka nguutupa kwiindana kapati abantu bamwi nkaambo tulakambauka—kuŋanda aŋanda, mubuleya, alimwi akuli koonse ooko bantu nkobakonzya kujanika. Nkaambo nzi ncotucitila boobo?
Bakamboni ba Jehova balakambauka kutegwa balemeke Leza alimwi akuzyibya bantu zina lyakwe. (Bahebrayo 13:15) Alimwi tuyanda kutobela malailile aa Kristo Jesu aakuti: “Aboobo kamuya mukayiisye bantu bazisi zyoonse, . . . mukabayiisye kutobela zintu zyoonse nzyondakamulailila.”—Matayo 28:19, 20.
Kunze lyaboobo, tulabayanda basimukoboma. (Matayo 22:39) Masimpe, tulizyi kuti bantu banji balijisi njiisyo zyabukombi nzyobasyoma alimwi akuti tabali boonse baukkomanina mulumbe wesu. Nokuba boobo, tulimvwa kuti njiisyo zyamu Bbaibbele zifwutula maumi aabantu. Nkakaambo kaako ncotuzumanana “cakutaleka kuyiisya akwaambilizya makani mabotu aajatikizya Kristo Jesu” mbuli mbobakacita Banakristo bamumwaanda wamyaka wakusaanguna.—Milimo 5:41, 42.
Basyaazibwene mubukkale bwabantu ba Antonio Cova Maduro bakalemba kujatikizya “buyumuyumu mbobajana Bakamboni ba Jehova alimwi ambobabeleka canguzu . . . , kutegwa magwalo aasalala abasikile bantu boonse kufwumbwa nkobabede.”—Muteende uutegwa El Universal waku Venezuela
Bunji bwabantu ibabala mabbuku eesu tabali Bakamboni ba Jehova. Alimwi mamiliyoni aabantu mbotwiiya limwi Bbaibbele bazulilwa muzikombelo zimbi. Pele balakkomana ciindi nobaswaigwa a Bakamboni ba Jehova.
Ambweni inga kamujisi mibuzyo aimwi kujatikizya Bakamboni ba Jehova. Twamulomba kuti mujane bwiinguzi kwiinda
Mukubuzya umwi wa Bakamboni ba Jehova.
Mukulanga a webbusaiti yesu ya www.jw.org..
Mukujanika kumiswaangano, yesu iitabbadelelwi alimwi bantu boonse balitambidwe.