Kweezyanisya Ikugwasya Kapati Nkomukonzya Kucita

SENA mulyaamba kuti muli Banakristo? Ikuti kacili boobo, muli akati kabantu bainda kuti 2 bbiliyoni munyika ibalyaamba kuti mbaasikutobela Kristo, nkokuti muntu omwe akati kabantu botatwe. Mazuba aano, kuli zikombelo zinji kapati iziitwa kuti zya Bunakristo, pele ziliindene munjiisyo alimwi ambozizilanga zintu. Aboobo nzyomusyoma ambweni inga kaziindene kapati azyabamwi ibalyaamba kuti Mbanakristo. Sena cilaamakani kujatikizya zintu nzyomusyoma? Inzya, cilaamakani—ikuti kamuyanda kutobela Bunakristo buyiisyigwa mu Bbaibbele.

Basikutobela Jesu Kristo bakusaanguna bakazikuzyibwa kuti ‘Mbanakristo.’ (Milimo 11:26) Kunyina mazina aambi aakali kuyandika kutegwa bazyibwe nkaambo kwakali buyo cikombelo comwe ca Bunakristo. Banakristo aaba, calukamantano bakazitobela njiisyo alimwi amalailile aa Sikutalisya Bunakristo, Jesu Kristo. Ino mbuti kujatikizya cikombelo canu? Sena mulasyoma kuti ciyiisya zintu Kristo nzyaakali kuyiisya alimwi anzyobakali kusyoma basikutobela Kristo bakusaanguna? Ino inga mwazyiba buti? Kuli buyo nzila yomwe iikonzya kumugwasya—ikubelesya Bbaibbele kutegwa muzyibe.

Amulange-lange kaambo aaka: Jesu Kristo wakali kwaalemeka kapati Magwalo nkaambo Ndijwi lya Leza. Kunyina naakali kubakkomanina aabo ibatakali kuzilemeka njiisyo zyamu Bbaibbele kwiinda mukubikkila kapati maano kutunsiyansiya twabantu. (Marko 7:9-13) Aboobo tulakonzya kwaamba cakusinizya kuti, nzyobasyoma basikutobela Jesu bakasimpe zyeelede kuzwa mu Bbaibbele. Aboobo, Munakristo umwi aumwi inga wacita kabotu kulibuzya kuti, ‘Sena njiisyo zyacikombelo cangu zileendelana ancolyaamba Bbaibbele?’ Kutegwa mwiingule mubuzyo ooyu, mbuti kuti mweezyanisya zintu nzyociyiisya cikombelo canu alimwi ancolyaamba Bbaibbele?

Jesu wakaamba kuti bukombi bwesu kuli Leza bweelede kuba bwakasimpe—ikasimpe kajanika mu Bbaibbele. (Johane 4:24; 17:17) Alimwi mwaapostolo Paulo wakaamba kuti lufwutuko lwesu luyeeme “akuba aluzyibo lwini-lwini lwakasimpe.” (1 Timoteyo 2:4) Aboobo cilayandika kapati kuti nzyotusyoma kaziyeeme akasimpe kamu Bbaibbele. Nkaambo lufwutuko lwesu lulijatikizyidwe.

MBOTUKONZYA KWEEZYANISYA NZYOTUSYOMA ANCOLYAAMBA BBAIBBELE

Twamulomba kuti mubale mibuzyo eeyi iili cisambomwe akubona bwiinguzi bwamu Bbaibbele kumibuzyo eeyi. Amwaabale magwalo aamu Bbaibbele abikkidwe akuzinzibala kuyeeya bwiinguzi. Mpoonya amulibuzye kuti, ‘Sena njiisyo zyakucikombelo cangu zileendelana ancolyaamba Bbaibbele?’

Kulanga-langa mibuzyo eeyi kulakonzya kumugwasya kubona kweezyanisya kugwasya kapati nkomukonzya kucita. Sena mulayanda kweezyanisya njiisyo zimwi zyakucikombelo canu ancolyaamba Bbaibbele? Bakamboni ba Jehova bayookkomana kumugwasya kulanga-langa kasimpe kamu Bbaibbele ikalimvwisya. Mulakonzya kulomba umwi Kamboni kuti kamuyiisya ciiyo ca Bbaibbele citabbadelelwi. Naa kuswaya webbusaiti yesu ya jw.org/toi.

1 MUBUZYO: Ino Leza nguni?

BWIINGUZI: Jehova, Bausyi Jesu, ngu Leza uupona lyoonse alimwi Mulengi singuzuzyoonse iwakalenga zintu zyoonse.

NCOLYAAMBA BBAIBBELE:

“Tulamulumba lyoonse Leza Usyi wa Mwami wesu Jesu Kristo notumupailila.”—Bakolose 1:3.

“Uleelela, Jehova, O Leza wesu, ikutambula bulemu alulemeko alimwi anguzu, nkaambo nduwe wakalenga zintu zyoonse.”—Ciyubunuzyo 4:11.

Alimwi amubone Baroma 10:13; 1 Timoteyo 1:17.

2 MUBUZYO: Ino Jesu Kristo nguni?

BWIINGUZI: Jesu Mwana wa Leza mutaanzi kuzyalwa. Jesu wakalengwa buya, aboobo ulijisi matalikilo. Jesu ulalibombya kuli Leza alimwi ulatobela kuyanda kwakwe.

NCOLYAAMBA BBAIBBELE:

“Taata mupati kwiinda ndime.”—Johane 14:28.

“[Jesu] ngonguwe cinkozya ca Leza uutalibonyi, imutaanzi kuzyalwa kuzilenge zyoonse.”—Bakolose 1:15.

Alimwi amubone Matayo 26:39; 1 Bakorinto 15:28.

3 MUBUZYO: Ino muuya uusalala ninzi?

BWIINGUZI: Muuya uusalala ninguzu zyabelesya Leza kuzuzikizya kuyanda kwakwe. Tali muntu pe. Bantu balakonzya kuzula muuya uusalala alimwi akuyumizyigwa anguwo.

NCOLYAAMBA BBAIBBELE:

“Eelyo Elizabeta amvwe buyo kwaanzya kwa Mariya, mwana mwida lyakwe wakaputauka, mpoonya Elizabeta wakazula muuya uusalala.”—Luka 1:41.

“Muyootambula nguzu muuya uusalala waakusika alindinywe.”—Milimo 1:8.

Alimwi amubone Matalikilo 1:2; Milimo 2:1-4; 10:38.

4 MUBUZYO: Ino Bwami bwa Leza ninzi?

BWIINGUZI: Bwami bwa Leza nimfwulumende yakujulu. Jesu ngo Mwami wa Bwami bwa Leza. Ino-ino Bwami oobu buyoocita kuyanda kwa Leza anyika yoonse mbwiizulwa.

NCOLYAAMBA BBAIBBELE:

“Imungelo waciloba wakalizya mweembo wakwe. Mpoonya kujulu kwakamvwugwa majwi mapati aamba kuti: ‘Ibwami bwanyika bwaba Bwami bwa Mwami wesu abwa Kristo wakwe, eelyo unoolela kali mwami lyoonse mane kukabe kutamani.’”—Ciyubunuzyo 11:15.

Alimwi amubone Daniele 2:44; Matayo 6:9, 10.

5 MUBUZYO: Sena bantu boonse bacita zibotu bayakujulu?

BWIINGUZI: Peepe. Kakamu kasyoonto kabantu ikaitwa kuti ‘katanga kaniini,’ mbabasalwa a Leza kuunka kujulu. Bayoolela antoomwe a Jesu kabali bami.

NCOLYAAMBA BBAIBBELE:

“Mutayoowi, nokatanga kaniini, nkaambo Uso wasala kumupa Bwami.”—Luka 12:32.

“Bayooba bapaizi ba Leza aba Kristo, alimwi bayoolela kabali bami antoomwe anguwe.”—Ciyubunuzyo 20:6.

Alimwi amubone Ciyubunuzyo 14:1, 3.

6 MUBUZYO: Ino makanze nzi ngajisi Leza kujatikizya nyika abantu?

BWIINGUZI: Ansi aabweendelezi bwa Bwami bwa Leza, nyika iyooba paradaiso alimwi bantu basyomeka bayookkomana abuumi bulondokede, luumuno lutamani, alimwi abuumi butamani.

NCOLYAAMBA BBAIBBELE:

“Babombe myoyo bayookona nyika, eelyo bayoobotelwa kapati muluumuno lunji.”—Intembauzyo 37:10, 11.

“Uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.”—Ciyubunuzyo 21:3, 4.

Alimwi amubone Intembauzyo 37:29; 2 Petro 3:13.