MAKANI AAYEEME AMUTWE UULI ACIVWUMBYO | MBOMUKONZYA KUGWASYIGWA KAPATI KWIINDA MUKUBALA BBAIBBELE
Ino Ncinzi Cikonzya Kupa Kuti Kakukkomanisya?
Ino kubala Bbaibbele kwanu kunooli buti? Sena kunookkomanisya naa takunookkomanisyi? Ciyeeme buyo anzila nzyomubelesya mukubala kwanu. Atulange-lange nzyomukonzya kucita kutegwa muyungizye luyandisisyo lwanu lwakubala alimwi akuti kakumukkomanisya kapati.
Amusale busanduluzi bwa Bbaibbele busyomeka, bwamwaambo wamazuba aano. Ikuti mubala cibalo cijisi mabala manji aakatazya naa aatacibelesyegwi alo ngomutazyi, nkokuti tamukakukkomanini kubala cibalo eeco. Aboobo amuyandaule Bbaibbele ilibelesya mwaambo uutakatazyi kumvwa walo uyoomusika amoyo. Pele kulubazu lumwi, lyeelede kuti kalisanduludwe munzila iiluzi alimwi cakulomya.a
Amubelesye mincini yamazuba aano. Mazuba aano Bbaibbele lilajanika kalili bbuku lisimbidwe mpoonya alimwi kalili bbuku likonzya kubalwa aamincini. Ma Bbaibbele amwi alakonzya kubalwa a Intaneti naa kwaakkopa kutegwa kamulibalila amakkompyuta, amatabbuleti naa amafooni. Busanduluzi bumwi bulabikkilizya azibelesyo zimwi izikonzya kumugwasya kujana tupango tumwi cakufwambaana kutegwa mubale muma Bbaibbele aambi makani ngamunya naa ambweni kweezyanisya abusanduluzi bwiindene-indene. Kuti kamuyanda kuswiilila muciindi cakubala, Bbaibbele ilyakalekkoodwa alyalo lilajanika mumyaambo imwi. Bantu banji balakkomana kuswiilila ciindi nobali mulweendo, nobawasya, naa nobacita milimo imwi iizumizya kuswiilila. Sena inga tiimwasola kubelesya nzila iikonzya kumugwasya kweelana abukkale bwanu?
Amubelesye zibelesyo izigwasya kwiiya Bbaibbele. Zibelesyo izigwasya kwiiya Bbaibbele zilakonzya kumugwasya kujana mpindu kapati mukubala kwanu. Kuli mamaapu aatondezya masena aambidwe mu Bbaibbele, alo akonzya kumugwasya kujana masena aali mucibalo ncomubala alimwi akumugwasya kweezeezya zintu mbozyakali kucitika. Zibalo mbuli zyeezyi izili mumagazini eeyi naa izili mucibeela cakuti “Njiisyo Zyamu Bbaibbele” icijanika awebbusaiti ya jw.org, zilakonzya kumugwasya kumvwisya zibeela zinji zyamu Bbaibbele.
Amubelesye nzila ziindene-indene. Ikuti kubala Bbaibbele kuzwa kumatalikilo kusikila kumamanino kulamuyoosya, sena tamukonzyi kuyungizya luyandisisyo lwakubala kwiinda mukutalika acibalo icimukkomanisya kapati? Ikuti kamuyanda kuzyiba bantu baambidwe mu Bbaibbele ibadumide kapati, mulakonzya kutalika kwiinda mukubala zibalo zyaamba mbabo. Nzila izikonzya kumugwasya zyabikkilizyigwa mukabbokesi kakuti “Amulimvwisye Bbaibbele Kwiinda Mukuzyiba Bantu Baambidwe Mulindilyo.” Naa ambweni muyanda kubala Bbaibbele kweelana acibalo naa kweelana ambozyakali kucitika zintu. Sena inga tiimwasola nzila yomwe akati kanzila eezyi?
a Bantu banji bajana kuti Bbaibbele Lya Busanduluzi Bwanyika Mpya lililuzi, lilasyomeka alimwi talikatazyi kubala. Bbaibbele eeli, ilyakamwaigwa a Bakamboni ba Jehova, lilajanika mumyaambo iinda ku 130. Mulakonzya kulikkopa awebbusaiti ya jw.org naa kukkopa JW Library app. Ikuti kamuyanda, Bakamboni ba Jehova balakonzya kumuletela kkopi kuŋanda yanu.