Cinunuzyo​—“Cipego Cilondokede” Kuzwa Kuli Taata

1. Nzilongezyo nzi ziboola akaambo kabubambe bwacinunuzyo?

KULI zilongezyo zinji ziboola akaambo kacituuzyo cacinunuzyo ca Jesu Kristo. Bubambe bwacinunuzyo bupa coolwe kubana ba Adamu boonse aabo ibayanda bululami kuti mukuya kwaciindi bakabe cibeela camukwasyi wa Leza. Cinunuzyo alimwi cipa kuti andiswe tube acoolwe cakupona mulukkomano kukabe kutamani. Nokuba boobo, kunze buyo akuyoopona buumi bwakumbele bubotu, kuli zilongezyo azimbi ziboola akaambo kacinunuzyo ca Kristo kubantu bamvwida. Kulisungula kwa Jesu kwakufwa kumwi kasyomeka kubululami bwa Jehova, kulijatikizyidwe mumakani aayandika kapati aajatikizya bubumbo boonse.—Heb. 1:8, 9.

2. (a) Ino ntwaambo nzi tuyandika kapati tujanika mumupailo wa Jesu? (Amubone cifwanikiso icili kumatalikilo aacibalo.) (b) Ino tulalanga-langa nzi mucibalo eeci?

² Kwamyaka yobilo Jesu katafwa akupa cipaizyo cacinunuzyo, wakayiisya basikwiiya bakwe kupaila kuti: “Taateesu ooli kujulu, alisalazyigwe zina lyako. Abuboole Bwami bwako. Akucitwe kuyanda kwako ansi aano mbubonya mbuli kujulu.” (Mt. 6:9, 10) Kutegwa tutondezye kulumba kapati akaambo kacinunuzyo, atulange-lange cinunuzyo mbociswaangene akusalazyigwa kwazina lya Leza, bulelo bwa Bwami bwa Leza, alimwi akuzuzikizyigwa kwamakanze aa Leza.

“ALISALAZYIGWE ZINA LYAKO”

3. Ino zina lya Jehova lyaamba nzi, alimwi mbuti Saatani mbwaakaamba zyakubeja kujatikizya zina eelyo lisalala?

³ Cintu ncaakasaanguna kwaamba Jesu mumupailo wakwe wacikozyanyo, kwakali kusalazyigwa kwazina lya Leza. Zina lya Jehova lipandulula bwini mbwabede, nguzu zyakwe alimwi abusalali bwakwe. Mumupailo aumbi, Jesu wakaamba Jehova kuti: “Taata Oosalala.” (Joh. 17:11) Mbwaanga Jehova ulasalala, njiisyo zyoonse alimwi amilawo yakwe ilasalala. Nokuba boobo, mumuunda wa Edeni, Saatani wakadooneka nguzu zya Leza zyakubikkila bantu milawo. Kwiinda mukwaamba zyakubeja kujatikizya Jehova, Saatani wakabejekezya zina lya Leza lisalala.—Matl. 3:1-5.

4. Mbuti Jesu mbwaakagwasilizya kusalazya zina lya Leza?

⁴ Kulubazu lumbi, Jesu wakali kuliyanda ncobeni zina lya Jehova. (Joh. 17:25, 26) Jesu wakagwasilizya mukusalazya zina lya Leza. (Amubale Intembauzyo 40:8-10.) Kweelana ambwaakapona buumi bulondokede anyika, Jesu wakatondezya kuti cileelela alimwi cililuleme kuli Jehova kubikkila zilenge zyakwe zicenjede milawo. Nokuba kuti Saatani wakapa kuti Jesu afwe lufwu lucisa kapati, Jesu wakazumanana kusyomeka cakumaninina kuli Bausyi bakujulu. Kwiinda mukusyomeka, Jesu wakatondezya kuti muntu uulondokede ulakonzya kuzumanana kumvwida milawo ya Leza iiluleme cakumaninina.

5. Mbuti mbotukonzya kutola lubazu mukusalazya zina lya Leza?

⁵ Ino mbuti mbotukonzya kutondezya kuti tulaliyanda zina lya Jehova? Nkwiinda mubukkale bwesu. Jehova uyanda kuti katusalala. (Amubale 1 Petro 1:15, 16.) Eeci caamba kuti tweelede kukomba buyo Jehova alimwi akuti katumumvwida amoyo wesu woonse. Noliba leelyo notupenzyegwa, tulacita kufwumbwa ncotukonzya kupona kweelana anjiisyo zyakwe ziluleme alimwi amilawo. Kwiinda mukucita milimo iiluleme, tumunika mumuni wesu, aboobo tuleta bulemu kuzina lya Jehova. (Mt. 5:14-16) Mbotuli bantu basalala, tulatondezya kwiinda muzintu nzyotucita mubuumi bwesu kuti milawo ya Jehova mibotu alimwi akuti nzyaakaamba Saatani zyakubeja. Ikuti twalubizya akaambo kakuti toonse tatulondokede, tuleempwa kuzwa ansi aamoyo alimwi akuleka micito iipa kuti Jehova atalemekwi.—Int. 79:9.

6. Ino nkaambo nzi Jehova ncakonzya kutubona kuti tuliluleme, nokuba kuti tatulondokede?

⁶ Akaambo kacituuzyo ca Kristo, Jehova ulalekelela zibi zyabaabo ibatondezya lusyomo. Ulabatambula kabali bakombi bakwe aabo ibalyaaba kulinguwe. Jehova waamba Banakristo bananike kuti baliluleme kabali bana bakwe mpoonya ‘bambelele zimbi’ kuti baliluleme kabali balongwe bakwe. (Joh. 10:16; Rom. 5:1, 2; Jak. 2:21-25) Aboobo noliba lino, cinunuzyo cilatuzumizya kuba acilongwe cibotu a Taateesu alimwi akutola lubazu mukusalazya zina lyakwe.

“ABUBOOLE BWAMI BWAKO”

7. Ino nzilongezyo nzi ziyakuboola mubweendelezi bwa Bwami akaambo kacinunuzyo?

⁷ Cintu cabili Jesu ncaakalomba Leza mumupailo wacikozyanyo ncakuti: “Abuboole Bwami bwako.” Mbuti cinunuzyo mbociswaangene a Bwami bwa Leza? Cinunuzyo cipa kuti kubunganizyigwa kwaba 144,000 kukonzyeke ibayoolela kabali bami abapaizi a Kristo kujulu. (Ciy. 5:9, 10; 14:1) Jesu alimwi abasikulelanyina, aabo antoomwe ibapanga Bwami bwa Leza, bayoopa zilongezyo ziboola akaambo kacinunuzyo kubantu basyomeka kwamyaka ili 1000. Nyika iyakucincwa kuba paradaiso, alimwi bantu boonse basyomeka bayakulondoka, kuswaanganya cakumaninina cibeela cakujulu alimwi acibeela caanyika camukwasyi wa Leza. (Ciy. 5:13; 20:6) Jesu uyakuupwayaula mutwe wanzoka alimwi akugwisya mapenzi oonse aaboola akaambo kabuzangi bwa Saatani.—Matl. 3:15.

8. (a) Mbuti Jesu mbwaakabagwasya basikwiiya bakwe ikubona kaambo Bwami bwa Leza ncobuyandika kapati? (b) Mbuti mbotutondezya kuti tulabugwasyilizya Bwami mazuba aano?

⁸ Naakali aanyika, Jesu wakagwasya basikwiiya bakwe ikubona kaambo ncobuyandika kapati Bwami bwa Leza. Mbwaakamanina buyo kubbapatizyigwa, Jesu wakaambilizya “makani mabotu aa Bwami bwa Leza” kumasena aakali kulamfwu naa nyika yoonse. (Lk. 4:43) Mumajwi aakwe aamamanino kuli basikwiiya bakwe katanaunka kujulu, Jesu wakabaambila kuti bakabe bakamboni bakwe “kusikila kumasena aakulamfwu kapati aanyika.” (Mil. 1:6-8) Kwiinda mumulimo wakukambauka Bwami, bantu munyika yoonse balijisi coolwe cakwiiya kujatikizya cinunuzyo alimwi akuba balelwa ba Bwami bwa Leza. Mazuba aano, tulatondezya kuti tuli kulubazu lwa Bwami kwiinda mukugwasya banabokwabo Kristo kukambauka makani mabotu aa Bwami nyika yoonse.—Mt. 24:14; 25:40.

“AKUCITWE KUYANDA KWAKO”

9. Ino nkaambo nzi ncotukonzya kusinizya kuti Jehova uyakwaazuzikizya makanze aakwe kujatikizya bantu?

⁹ Ino ncinzi ncaakali kupandulula Jesu ciindi naakaamba kuti: “Akucitwe kuyanda kwako”? Jehova ngo Mulengi. Ikuti waamba kuti cintu cimwi ciyoocitika, ciyoocitika ncobeni. (Is. 55:11) Leza takazumizyi Saatani kusinkila makanze aakwe kujatikizya bantu. Kuzwa kumatalikilo, kwakali kuyanda kwa Jehova kuti nyika izule bana ba Adamu a Eva balondokede. (Matl. 1:28) Ikuti ba Adamu a Eva nobakafwa kabatajisi bana, makanze aa Leza aakuzuzya nyika abana babo naatakazuzikizyigwa. Aboobo, ciindi ba Adamu a Eva nobakabisya, Jehova wakabazumizya kuti bazyale bana. Kwiinda mucinunuzyo, Leza wapa coolwe kubantu boonse ibatondezya lusyomo kuti bakalondoke akupona kukabe kutamani. Jehova ulabayanda bantu, alimwi nkuyanda kwakwe kuti bantu bamvwida kabapona kweelana ambwaakali kuyanda.

10. Mbuti cinununzyo mbocibagwasya bantu aabo ibakafwa?

¹⁰ Ino mbuti kujatikizya bantu banji ibakafwa kakunyina kuba acoolwe cakumuzyiba alimwi akumubelekela Jehova? Cinunuzyo cipa kuti kukabe bubuke. Taateesu siluyando wakujulu uyakubabusya bafwide alimwi akubapa coolwe cakwiiya kujatikizya makanze aakwe alimwi akupona kukabe kutamani. (Mil. 24:15) Jehova uyanda kuti bantu kabapona, ikutali kufwa. Mbwali Kasensa kabuumi, uyooba Usyi wabantu boonse ibayakubusyigwa. (Int. 36:9) Aboobo cileelela kuti Jesu wakatuyiisya kupaila kuti: “Taateesu ooli kujulu.” (Mt. 6:9) Jehova wapa Jesu lubazu luyandika kapati mukubusya bafwide. (Joh. 6:40, 44) Mu Paradaiso, Jesu uyakuzuzikizya mulimo wakwe wakuba “bubuke abuumi.”—Joh. 11:25.

11. Ino makanze nzi ngajisi Leza kujatikizya “nkamu mpati”?

¹¹ Jehova ulabatamba bantu boonse kuti babe cibeela camukwasyi wakwe, nkaambo Jesu wakaamba kuti: “Kufwumbwa uucita kuyanda kwa Leza, ooyo ngomukwesu, ngomucizyi wangu alimwi mbabaama.” (Mk 3:35) Nkuyanda kwa Leza kuti “nkamu mpati” iitabaliki yabantu bazwa mumasi oonse, mumyaambo yoonse alimwi amumilaka yoonse babe bakombi bakwe. Aabo batondezya lusyomo mucinunuzyo ca Kristo alimwi akucita kuyanda kwa Leza bayakuba akati kabaabo boongolola kuti: “Lufwutuko lwesu luzwa kuli Leza wesu, ooyo uukkede acuuno cabwami alimwi aku Mwanaambelele.”—Ciy. 7:9, 10.

12. Ino makanze aa Jehova atondezyedwe buti mumupailo wacikozyanyo?

¹² Makanze ngajisi Jehova kujatikizya bantu bamvwida alitondezyedwe mumupailo wacikozyanyo wa Jesu. Kweelana amupailo ooyu, tuyanda kucita kufwumbwa ncotukonzya kutegwa tulisalazye, alimwi akulilemeka zina lya Jehova. (Is. 8:13) Izina lya Jesu lyaamba kuti “Jehova Ndufwutuko,” alimwi lufwutuko lwesu kwiinda mucinunuzyo luleta bulemu kuzina lya Jehova. Bwami bwa Leza buyoobelesyegwa kuleta zilongezyo zyacinunuzyo kubantu bamvwida. Masimpe, mupailo wacikozyanyo usinizya kuti kunyina cikonzya kulesya kuyanda kwa Leza kucitika.—Int. 135:6; Is. 46:9, 10.

AMUTONDEZYE KULUMBA AKAAMBO KACINUNUZYO

13. Ncinzi ncotutondezya kwiinda mukubbapatizyigwa?

¹³ Nzila yomwe mbotukonzya kutondezya kulumba akaambo kacinunuzyo nkwiinda mukulyaaba kuli Jehova akaambo kalusyomo lwesu mucinunuzyo alimwi akubbapatizyigwa. Lubbapatizyo lwesu lutondezya kuti, “tuli bantu ba Jehova.” (Rom. 14:8) Lwiiminina kulomba kwesu kuli Leza kutegwa tube amanjezyeezya aali kabotu. (1Pet. 3:21) Jehova ulakuvwiila kulomba ooko kwiinda mukutusalazya abulowa bwa Kristo bwacituuzyo. Tulisinizyide cakumaninina kuti uyootupa zyoonse zintu nzyaasyomezya.—Rom. 8:32.

14. Ino nkaambo nzi ncotulaililwa kuyanda basimukoboma?

¹⁴ Ino ninzila nzi imwi njotutondezya kulumba akaambo kacinununzyo? Mbwaanga zintu nzyacita Jehova zyoonse zikulwaizyigwa aaluyando, nkuyanda kwakwe kuti boonse bakombi bakwe kabatondezya luyando abalo. (1Joh. 4:8-11) Tulatondezya kuti tulayanda kuba ‘bana ba Taateesu uuli kujulu’ kwiinda mukuyanda basimukoboma. (Mt. 5:43-48) Mulawo wakuyanda basimukoboma ulayandika kapati cakuti ngomulawo wabili kuzwa buyo amulawo wakuyanda Jehova. (Mt. 22:37-40) Nzila yomwe mbotutondezya luyando oolo kuli basimukoboma nkwiinda mukumvwida mulawo wakukambauka makani mabotu aa Bwami bwa Leza. Mbotuzumanana kutondezya luyando kubantuma, tutondezya bulemu bwa Leza. Mubwini, luyando lwa Leza “lulalondolwa mulindiswe” ciindi notutobela mulawo wakuyanda bamwi, kwaambisya bakwesu.—1Joh. 4:12, 20.

CINUNUZYO CILETA “ZIINDI ZYAKUKATALUKWA” KUZWA KULI JEHOVA

15. (a) Nzilongezyo nzi nzyotutambula lino kuli Jehova? (b) Nzilongezyo nzi nzyotulindila?

¹⁵ Kutegwa tulekelelwe cakumaninina tweelede kutondezya lusyomo mucinunuzyo. Jwi lya Leza litusyomezya kuti zibi zyesu zilakonzya ‘kumwaigwa.’ (Amubale Milimo 3:19-21.) Mbubwenya mbotwabandika kale, akaambo kacinunuzyo, Jehova wapa kuti babelesi bakwe bananikidwe amuuya babe bana bakwe. (Rom. 8:15-17) Caboola kulindiswe ‘tobambelele zimbi,’ cili mbuli kuti Jehova wabweza pepa ilijisi zina lyesu alindilyo ilitondezya kuti twaba bana bakwe. Twaakulondoka alimwi akuzwidilila mumusunko wamamanino, Jehova uyookkomana kulisaina pepa eelyo lyacikozyanyo, akupa kuti tube bana bakwe bayandwa baanyika. (Rom. 8:20, 21; Ciy. 20:7-9) Luyando lwa Jehova kubana bakwe bayandwa talumani. Zilongezyo zyacinunuzyo tazimani. (Heb. 9:12) Cipego eeci tacikajujuki pe. Kunyina muntu uukonzya kutunyanga.

16. Ino mbuti cinunuzyo mbocitupa kuti twaanguluke ncobeni?

¹⁶ Kunyina ncakonzya kucita Diabolosi kutegwa alesye baabo beempwa kuti bakabe cibeela camukwasyi wa Jehova. Jesu wakaboola anyika alimwi akufwa “ciindi comwe buyo kukabe kutamani.” Aboobo cinunuzyo cakabbadelwa kukabe kutamani. (Heb. 9:24-26) Cakacimwaya cakumaninina cibi ncotwakakona kuzwa kuli Adamu. Tulalumba kapati akaambo kacinunuzyo ca Kristo, twakaangululwa kuzwa kubuzike bwabweende bwazintu bwa Saatani, alimwi tulapona kakunyina kuyoowa cibi.—Heb. 2:14, 15.

17. Ino mugwasyigwa buti aluyando lwa Jehova?

¹⁷ Zisyomezyo zya Leza zilasyomeka. Mbubwenya mbuli milawo yakwe yeendelezya zilenge mboitaalilwi kuzyeendelezya, Jehova takatulekelezyi. Tacinci pe. (Mal. 3:6) Jehova ulatupa cintu ciinda acipego buyo cabuumi. Ulatupa luyando lwakwe. “Swebo lino twaluzyiba alimwi twalusyoma luyando ndwajisi Leza kulindiswe. Leza nduyando.” (1Joh. 4:16) Nyika yoonse iyakupangwa kuba paradaiso imunooli lukkomano, alimwi bantu boonse anyika bayakutondezya luyando lwa Leza. Atuzisangane zilenge zyakujulu zya Leza mukwaamba kuti: “Ntembauzyo, bulemu, busongo, kulumba, lulemeko, bweendelezi alimwi anguzu azibe kuli Leza wesu lyoonse mane kukabe kutamani. Ameni.”—Ciy. 7:12.