Ino Nguni Weelede Kupegwa Mulandu?

Ikuti naa tali Leza uupa kuti kakuli kupenga, ino nguni uupa kuti kakuli mapenzi boobu mbuli nzala iitaambiki, bucete butamani, nkondo, malwazi aatasilikiki alimwi antenda zilicitikila? Ijwi lya Leza Bbaibbele, lilatondezya zintu zyotatwe zipa kuti bantu kabapenga:

1. Kuliyanda, Busyaacivwulemwangu Alimwi a Lusulo. ‘Muntu weendelezya muntunyina munzila iimuletela mapenzi.’ (Mukambausi 8:9) Kanji-kanji bantu balapenga akaambo kakweendelezyegwa abantu batalondokede, ibaliyanda naa basilunya.

2. Ziindi Zyamapenzi Akucitikilwa Zintu Zitalangilwi. Kanji-kanji bantu balapenga nkaambo “boonse buyo balasikilwa ziindi zyamapenzi akucitikilwa zintu zitalangilwi.” (Mukambausi 9:11) Eeci inga cacitika akaambo kakuti bantu balijana abusena buteelede aciindi citeelede, ntenda zilacitika naa kuti bantu mbayamba alimwi balalubizya.

3. Mweendelezi Wanyika Mubyaabi. Bbaibbele lilatondezya caantangalala kaambo kapati kapa kuti bantu kabapenga. Lyaamba kuti: “Nyika yoonse ili mumaanza aamubi.” (1 Johane 5:19) “Mubi” ooyo ngu Saatani Diabolosi, cilenge camuuya cijisi nguzu kapati. Kumatalikilo wakali mungelo wa Leza pele “kunyina naakakakatila mukasimpe.” (Johane 8:44) Bangelo bamwi bakamusangana Saatani mukuzangila Leza kutegwa bazuzikizye nzyobakali kuyanda, aboobo bakaba madaimona. (Matalikilo 6:1-5) Kuzwa ciindi nobakazanga, Saatani amadaimona aakwe baluujisi kubeleka canguzu kweendelezya zintu zicitika munyika munzila yalunya. Eeci ncecicitika kwaambisya mazuba aano. Lino, Diabolosi ulinyemede kapati alimwi “weena nyika yoonse,” calo capa kuti kube mapenzi aataambiki munyika. (Ciyubunuzyo 12:9, 12) Masimpe, Saatani mweendelezi silunya. Cilamukkomanisya kubona bantu kabapenga. Saatani nguupa kuti bantu kabapenga kutali Leza pe.

AMULANGE-LANGE KAAMBO AAKA: Alikke muntu mubyaabi alimwi muyumu moyo, nguukonzya kupa kuti bantu batajisi mulandu kabapenga. Mukwiimpana, Bbaibbele lyaamba kuti: “Leza nduyando.” (1 Johane 4:8) Kweelana abube bwakwe oobu bwaluyando, “Leza mwini-mwini takonzyi kucita bubi nokuceya, alimwi Singuzuzyoonse takonzyi kubisya pe!”—Jobu 34:10.

Nokuba boobo, mulakonzya kulibuzya kuti, ‘Ino Leza Singuzuzyoonse ulamuzumizya kwaciindi cilamfwu buti Saatani kuzumanana abweendelezi bwakwe bwalunya?’ Mbubonya mbotwabona kale, Leza ulibusulide bubi alimwi ciindi notupenga ulausa kapati. Kuyungizya waawo, Ijwi lyakwe lyaamba kuti: “Kamuwaala makatazyo aanu oonse kulinguwe, nkaambo ulamubikkila maano.” (1 Petro 5:7) Leza ulatuyanda alimwi ulijisi nguzu zyakumana kupenga koonse alimwi akutalulama, mbubonya mbotutiibone mucibalo citobela.a