Nobazyali, Sena Muli Mukumugwasya Mwanaanu Kuyaambele Kutegwa Abbapatizyigwe?

1. Ino ncinzi bazyali Banakristo ncobayanda kuba masimpe kabatanabbapatizyigwa bana babo?

“KWAMYEZI iili mbwiibede ndakali kubaambila bataata abamaama kuti ndakali kuyanda kubbapatizyigwa, alimwi kanji-kanji bakali kundaambila kujatikizya makani aaya. Bakali kuyanda kuba masimpe kuti ndizyibe mbokwakali kupati kusala kwangu. Mu December 31, 1934, buzuba bwakasika bwacintu eeci cikkomanisya kapati mubuumi bwangu.” Oobo, mbobakapandulula ba Blossom Brandt kujatikizya zyakajatikizyidwe mukusala kwabo kuti babbapatizyigwe. Mazuba aano, bazyali Banakristo balijisi luyandisisyo lukozyenye mukugwasya bana babo kusala cabusongo. Kusumpya lubbapatizyo naa kuwayawaya kakunyina kaambo kulakonzya kuletela mapenzi aakumuuya. (Jak. 4:17) Aboobo, cabusongo bazyali bayanda kuba masimpe kuti kabatanabbapatizyigwa bana babo, balilibambilide kunyamuna mukuli wakuba sikwiiya Munakristo.

2. (a) Ino nkaambo nzi balangizi bamabazu bamwi ncobakatondezya kulibilika? (b) Ino ncinzi ncotutiilange-lange mucibalo eeci?

² Balangizi bamabazu bamwi bakatondezya kulibilika nkaambo bajana bakubusi ibajisi myaka yakuzyalwa iitandila ku 20 alimwi akwiinda-inda waawo ibakakomenena mumikwasyi ya Bunakristo pele ibatanabbapatizyigwa. Kanji-kanji, bakubusi aaba balajanika kumiswaangano yambungano alimwi akutola lubazu mumulimo wamumuunda. Balibona kuba Bakamboni ba Jehova. Pele, akaambo katwaambo tumwi, balawayawaya kwaaba maumi aabo kuli Jehova alimwi akubbapatizyigwa. Ino ncinzi cilangilwa kuti ncecipa boobo? Zimwi ziindi, bazyali inga babakulwaizya kusumpya lubbapatizyo. Mucibalo eeci, tulabandika zintu zyone nzyobakonzya kulibilika bazyali Banakristo bamwi kuti bagwasye bana babo kuyaambele akubbapatizyigwa.

SENA MWANAANGU ULEELELA?

3. Ino bazyali baba Blossom bakali kulibilika nzi?

³ Bazyali baba Blossom, ibaambwa mumuncali wakusaanguna, cilalimvwisya kuti bakali kulibilika kuti naa mwanaabo musimbi wakali kweelela kumvwisya ncoluyandika lubbapatizyo alimwi ancoluli makani mapati. Ino mbuti bazyali mbobakonzya kuzyiba kuti mwana uleelela kulyaaba?

4. Ino mbuti mulawo Jesu ngwaakapa uujanika ku Matayo 28:19, 20 mboukonzya kubagwasya bazyali nobayiisya bana babo?

⁴ Amubale Matayo 28:19, 20. Kweelana ambokwakabandikwa mucibalo cainda, Bbaibbele talyaambi myaka yakuzyalwa iigaminide muntu njayelede kuba anjiyo kutegwa abbapatizyigwe. Nokuba boobo, bazyali balakonzya kugwasyigwa ciindi nobalanga-langa ncocaamba kugwasya muntu kuba sikwiiya. Ibbala lya Chigiriki ilyakasandululwa kuti ‘kuba basikwiiya’ kulugwalo lwa Matayo 28:19 lipa muzeezo wakuyiisya kamujisi makanze aakuti babe basikutobela ba Kristo. Sikwiiya nguyooyo iwiiya alimwi akumvwisya njiisyo zya Jesu alimwi uukanzide kuzitobela. Aboobo makanze aabazyali Banakristo boonse ayelede kuba aakuyiisya bana babo kuzwa kubuvwanda kabajisi makanze aakubagwasya kuti babe basikwiiya ba Kristo ibabbapatizyidwe. Mubwini, muvwanda takonzyi kweelela kubbapatizyigwa pe. Pele Bbaibbele litondezya kuti nobaba bana ibacili baniini balakonzya kukamvwisya alimwi akukabikkila maano kasimpe kamu Bbaibbele.

5, 6. (a) Ino bupanduluzi bwamu Bbaibbele kujatikizya Timoteyo butupa kwaamba nzi kujatikizya lubbapatizyo lwakwe? (b) Ino mbuti bazyali bamvwisya mbobakonzya kugwasya bana babo cabusungu?

⁵ Timoteyo wakali sikwiiya walo iwakasala kutobela kasimpe mwini akukajatisya kacili muniini. Mwaapostolo Paulo wakaamba kuti Timoteyo wakaiya kasimpe kamu Magwalo kuzwa kubuvwanda. Nokuba kuti Timoteyo wakakomenena mumukwasyi mobakaindene bukombi, banyina alimwi abakaapanyina iba Juda bakamugwasya kusyoma Magwalo, mbubwenya ba Juda mbobakali kwaamvwisya. Aboobo, lusyomo lwakwe tiilwakali kuzungaana. (2Tim. 1:5; 3:14, 15) Kuzikusika ciindi naakakkwanya myaka iitandila ku 20 naa iinda-inda aawo, Timoteyo wakali sikwiiya Munakristo walo iwakali kukonzya kulangwa-langwa kutegwa apegwe mikuli yaalubazu mumbungano.—Mil. 16:1-3.

⁶ Mubwini, mwana umwi aumwi ulilibedelede; bana boonse tabakomeneni aciindi comwe naa aciimo comwe mubuumi. Bamwi balasima mumizeezo kabacili baniini akutondezya makanze aabo aakuyanda kubbapatizyigwa. Bambi balakonzya kuti kabatalibambilide kubbapatizyigwa kusikila mane limwi bakomena. Aboobo, bazyali ibamvwisya tababasungilizyi bana babo kuti babbapatizyigwe. Muciindi caboobo, balamugwasyilizya mwana umwi aumwi kuti ayaambele kumuuya kweelana ambwakomena alimwi akuyaambele nkwacita. Bazyali balakonzya kukkomana ciindi mwana naabikkila maano kapati majwi aali ku Tusimpi 27:11. (Amubale.) Nokuba boobo, tabeelede kuluba mbaakani yabo—kugwasya bana babo kuba basikwiiya Banakristo. Kwiinda mukubikkila maano kukaambo aaka, bazyali inga bayanda kulanga-langa mubuzyo wakuti, ‘Sena mwanaangu ulijisi luzyibo luyandika kutegwa alyaabe kuli Leza akubbapatizyigwa?’

SENA MWANAANGU ULIJISI LUZYIBO LUYANDIKA?

7. Sena muntu uuyanda kuti abbapatizyigwe uyandika kuba aluzyibo lunji kapati lwamu Bbaibbele? Amupandulule.

⁷ Cileelela kuti mbobali bamayi mumukwasyi, bazyali bayanda kuti bana babo babe antalisyo mbotu yaluzyibo, alo kulyaaba mpokweelede kuyaama. Nokuba boobo, takuyandiki luzyibo lunji kutegwa muntu alyaabe kuli Leza alimwi akubbapatizyigwa. Lwainda lubbapatizyo, basikwiiya boonse beelede kuzumanana kukomena muluzyibo lwini-lwini. (Amubale Bakolose 1:9, 10.) Aboobo ino nduzyibo lunji buti luyandika kumatalikilo?

8, 9. Ino nziiyo nzi nzyotukonzya kwiiya kucibalo cijatikizya Paulo amulindizi wantolongo?

⁸ Icakacitika kumukwasyi umwi mumwaanda wamyaka wakusaanguna cilakonzya kubagwasya bazyali kumvwisya. (Mil. 16:25-33) Naakali mulweendo lwakwe lwabili lwabumisyinali, kuma 50 C.E., Paulo wakaswaya ku Filipi. Nobakali kooko, walo amweenzinyina ngwaakali limwi Sila bakatamikizyigwa twaambo twakubeja aboobo bakajatwa akuwaalwa muntolongo. Masiku, muzuzumo wakazungaanya ntalisyo zyantolongo mpoonya milyango yoonse yakajaluka. Kayeeya kuti baange batija, mulindizi wantolongo wakali kuyanda kulijaya ciindi Paulo naakoongolola ajwi pati kumwiita. Paulo a Sila bakacikonzya kumukambaukila mulindizi wantolongo antoomwe amukwasyi wakwe. Ino kulumba kwabo akaambo kakasimpe nkobakali kwiiya kujatikizya Jesu kwakabapa kubweza ntaamu nzi? Bakabbapatizyigwa kakunyina kuwayawaya. Ino ncinzi ncotukonzya kwiiya kucibalo eeci?

⁹ Kweelana acilengwa, mulindizi wantolongo ambweni wakali sikalumamba iwakaleka mulimo. Tanaakalaazyi Magwalo. Aboobo kutegwa abe antalisyo njumu yaluzyibo lwamu Magwalo, wakeelede kwiiya njiisyo zyantalisyo zyamu Bbaibbele, kumvwisya ncocaamba kuba umwi wababelesi ba Leza, alimwi akuba amakanze aakumvwida njiisyo zya Jesu. Muciindi cisyoonto buyo, luzyibo lwakwe lwamu Magwalo lwanjiisyo zyantalisyo alimwi akulumba akaambo kanzizyo kwakamupa kubbapatizyigwa. Cakutadooneka, wakazumanana kuyungizya luzyibo lwakwe kuzwa naakabbapatizyigwa. Kamuciyeeyede cikozyanyo eeci, ino ncinzi ncomukonzya kucita ciindi mwanaanu natondezya kulumba kuzwa ansi amoyo njiisyo zyantalisyo zyamu Magwalo, kubikkilizya ancocaamba kulyaaba akubbapatizyigwa alimwi ancoziiminina? Nywebo nobazyali Banakristo mulakonzya kuzumina kuti inga wabazyibya baalu bambungano kutegwa babone naa ulazizuzikizya zyeelelo zyakubbapatizyigwa.a Mbubwenya mbuli basikwiiya boonse ibabbapatizyidwe, uyoozumanana kuyungizya luzyibo lwamakanze aa Jehova mubuumi bwakwe boonse, mane kukabe kutamani.—Rom. 11:33, 34.

SENA MWANAANGU ULI MUKUYIISYIGWA LWIIYO LUYOOMUPA KUTI AKAZWIDILILE?

10, 11. (a) Ino ncinzi bazyali bamwi ncobayeeya? (b) Ino ncinzi bazyali ncobeelede kusaanguna kubikkila maano?

¹⁰ Bazyali bamwi bayeeya kuti cilakonzya kuba kabotu kumwanaabo musankwa naa musimbi kuwayawaya kubbapatizyigwa kutegwa asaangune kujana lwiiyo lwaatala mpoonya akujana mulimo uuli kabotu. Kuyeeya kuli boobo kulakonzya kakujisi makanze mabotu, pele sena eeco ciyoomugwasya mwanaabo kuba akuzwidilila kwini-kwini? Kwiinda zyoonse, sena kuleendelana a Magwalo? Ino Jwi lya Jehova likulwaizya kucita nzi?—Amubale Mukambausi 12:1.

¹¹ Cilayandika kuyeeya kuti inyika eeyi azintu zyoonse zili mumo tazyeendelani akuyanda kwa Jehova akuyeeya kwakwe. (Jak. 4:7, 8; 1Joh. 2:15-17; 5:19) Kuba acilongwe ciyumu a Jehova ncilikwabilizyo ciinda kubota kumwana kuzwa kuli Saatani, nyika yakwe, akuyeeya kwanjiyo kutali kwabunaleza. Kuti muzyali wabikka mulimo wakumubili mubusena bwakusaanguna, cilakonzya kunyonganya mwana azintu nzyayandisya kapati. Sena bazyali Banakristo ibajisi luyando inga masimpe bayanda kuti nyika eeyi yeendelezye mbobakubona kuzwidilila bana babo? Masimpe ngakuti, tulajana lukkomano lwini-lwini akuzwidilila lelikke ciindi notubikka Jehova mubusena bwakusaanguna mubuumi bwesu.—Amubale Intembauzyo 1:2, 3.

INO MBUTI KUTI MWANAANGU AKACITE CIBI CIPATI?

12. Ino nkaambo nzi bamwi bazyali ncobakulwaizya bana babo kusumpya lubbapatizyo?

¹² Muzyali Munakristo umwi naakali kupandulula twaambo ncaatakali kumukulwaizya mwanaakwe musimbi kuti atabbapatizyigwi wakaamba kuti, “Ndilaansoni kwaamba kuti kaambo kapati kakali kujatikizya bubambe bwakugusyigwa mumbungano.” Mbubwenya mbuli mucizyi ooyu, bazyali bamwi bayeeya kuti cili kabotu kumwanaabo kusumpya lubbapatizyo kusikila limwi wasima akuleka tumpenda twabufwubafwuba twakubwana. (Matl. 8:21; Tus. 22:15) Balakonzya kwaamba kuti, ‘Kufwumbwa buyo kuti mwanaangu katabbapatizyidwe, takonzyi kugusyigwa mumbungano.’ Ino nkaambo nzi kuyeeya kuli boobu ncokuli kulyeena?—Jak. 1:22.

13. Sena kuwayawaya kubbapatizyigwa kupa kuti umwi atalyaambilili kuli Jehova? Amupandulule.

¹³ Masimpe, bazyali Banakristo inga tiibayanda kuti mwanaabo abbapatizyigwe katanasima cakuti inga walyaaba cakumaninina. Nokuba boobo, inga kwaba kulubizya kwaamba kuti kwiinda mukutabbapatizyigwa, mwana takonzyi kulyaambilila kuli Jehova. Ino nkaambo nzi ncocili boobo? Kulyaambilila kuli Jehova takuyeeme akubbapatizyigwa. Muciindi caboobo, mwana ulalyaambilila kuli Leza ikuti kazyi cintu ciluzi alimwi acitaluzi mumeso aa Jehova. (Amubale Jakobo 4:17.) Aboobo, muciindi cakumutyompya mwana kuti atabbapatizyigwi, bazyali basongo balabeleka canguzu kutegwa batondezye cikozyanyo cibotu. Bayanda kuti mwanaabo kuzwa kubuvwanda katondezya kulumba amoyo woonse kuzyeelelo zya Jehova zisumpukide. (Lk. 6:40) Kutondezya kulumba kuli boobu ncilikwabilizyo ciinda kubota, nkaambo mwanaanu uyookulwaizyigwa kukakatila kunzila zya Jehova ziluleme.—Is. 35:8.

BAMWI BALAKONZYA KUGWASYA

14. Ino mbuti baalu mbobakonzya kukankaizya kusolekesya nkobacita bazyali aabo ibali mukugwasya bana babo kuti bayaambele akubbapatizyigwa?

¹⁴ Mbobali beembezi bakumuuya, baalu mumbungano balakonzya kukankaizya kusolekesya nkobacita bazyali kwiinda mukwaamba bubotu bujanika mukuba ambaakani zyakumuuya. Mucizyi umwi iwakabeleka kali mupainiya kwamyaka iinda ku 70 wakaamba mbwaakakulwaizyigwa kapati amubandi ngwaakaba anguwo a Mukwesu Charles T. Russell ciindi naakajisi buyo myaka yakuzyalwa iili cisambomwe. Mucizyi ooyu wakaamba kuti, “Wakabandika andime kwamaminiti aali 15 kujatikizya mbaakani zyangu zyakumuuya.” Inzya, majwi mabotu alimwi akukulwaizya zilakonzya kumugwasya muntu kwamyaka minji kumbele. (Tus. 25:11) Alimwi baalu balakonzya kubabikkilizya bazyali abana babo mumilimo iijatikizya Ŋanda ya Bwami, kupa bakubusi mikuli yeendelana aciimo cabo alimwi anguzu zyabo.

15. Ino ninzila nzi zimwi bamwi mumbungano mbobakonzya kukulwaizya bana?

¹⁵ Basimbungano balakonzya kugwasyilizya kwiinda mukutondezya kubikkila maano kweelede kubana. Eeci cilakonzya kubikkilizya akupakamana kubona zitondezyo izitondezya kuyaambele kumuuya. Sena mukubusi wapa bwiinguzi buzwa ansi aamoyo ibwalibambilwa kabotu naa wajisi cibeela mumuswaangano uucitwa mukati kansondo? Sena mukubusi kuli naakazwidilila kuliyumya ciindi kusyomeka kwakwe nokwakasunkwa naa kuli naakacibelesya coolwe cakupa bumboni kucikolo? Mweelede kufwambaana kumulumbaizya kuzwa ansi aamoyo. Sena tamukonzyi kulibikkila mbaakani—muswaangano kautanatalika naa nowamana—kubandika amukubusi, kutondezya kuti mumubikkila maano ncobeni? Munzila eezyi alimwi azimwi, bana balakonzya kugwasyigwa kulimvwa kuti bazulilwa “mumbungano mpati.”—Int. 35:18.

AMUMUGWASYE MWANAANU KUYAAMBELE KUTEGWA ABBAPATIZYIGWE

16, 17. (a) Ino mbuti lubbapatizyo mboluswaangene abulangizi mbwajisi muntu bwabuumi bwakumbele? (b) Ino ndukkomano nzi oolo bazyali Banakristo boonse ndobalwanina? (Amubone cifwanikiso icili kumatalikilo aacibalo.)

¹⁶ Kukomezya bana “mululayo alwiiyo lwa Jehova” ncoolwe cimwi cipati muzyali Munakristo ncakonzya kuba aancico. (Ef. 6:4; Int. 127:3) Mukwiimpana abana bamuciindi ca Israyeli yansiku, bana babazyali Banakristo tabazyalwi kabali cibeela cabantu balyaabide kuli Jehova. Kuyungizya waawo, luyando lwa Leza alwakasimpe talukonwi pe. Kuzwa buzuba naazyalwa mwana, bazyali beelede kuba amakanze aakuti akabe sikwiiya, beelede kumugwasya mwanaabo kulyaaba, akuba mubelesi wa Jehova uubbapatizyidwe. Ino ncinzi cinga cayandika kapati? Kayi, nkulyaaba kwaumwi aumwi kumugama, kubbapatizyigwa, alimwi akubelekela Leza cakusyomeka kuyoomupa kuti ayeelele kufwutuka muciindi camapenzi mapati aboola.—Mt. 24:13.

¹⁷ Ciindi ba Blossom Brandt nobakasala kuti babbapatizyigwe, bazyali babo ibayoowa Leza bakali kuyanda kuba masimpe kuti bakalilibambilide kubweza ntaamu iiyandika kapati mubuumi bwabo. Nobakaba masimpe kuti balilibambilide, bakakugwasyilizya kusala kwabo. Masiku aakuti juunza balabbapatizyigwa, bausyi bakacita cintu cibotu kapati. Ba Blossom bakaamba kuti: “Bakalailila kuti toonse tufwugame, mpoonya bakatalika kupaila. Bakamwaambila Jehova kuti bakalikkomene kapati kujatikizya kusala kwamwanaabo musimbi musyoonto kwakulyaaba kulinguwe.” Nokwakainda myaka iinda ku 60, ba Blossom bakaamba kuti: “Bwini mbwakuti, mumyaka yoonse iiboola kumbele, tandikabulubi busiku obuya!” Nobazyali amube alukkomano alimwi akukkutila ikuboola ciindi nomubona bana banu kabalyaaba, akuba babelesi ba Jehova babbapatizyidwe.