Amunyonyoone Mizeezo Iili Yoonse Iikazyanya Aluzyibo lwa Leza!

1. Ino nkucenjezya nzi mwaapostolo Paulo nkwaakalembela Banakristo bananike?

MWAAPOSTOLO PAULO wakacenjezya kuti, “Amuleke”! Kuleka nzi? ‘Kuleka kutobela ziyanza zyabweende bwazintu obuno.’ (Rom. 12:2) Paulo wakalemba majwi aaya ku Banakristo bamumwaanda wamyaka wakusaanguna. Nkaambo nzi ncaakabacenjezya cacigaminina baalumi abamakaintu ibakalyaabide kuli Leza alimwi ibakananikidwe amuuya uusalala?—Rom. 1:7.

2-3. Mbuti Saatani mbwasola kutuzandula kuli Jehova, pele ino mbuti mbotukonzya kugusya zintu “ziyumu nta” mumizeezo yesu?

² Paulo wakalibilika akaambo kakuti Banakristo bamwi bakali kweendelezyegwa amizeezo iitaluzi alimwi abusongo bwamunyika ibusumpulwa anyika ya Saatani. (Ef. 4:17-19) Eeci cilakonzya kucitika akulindiswe. Saatani ngomweendelezi wabweende bwazintu oobu, aboobo ulakonzya kubelesya nzila ziindene-indene kutegwa atuyunge. Mucikozyanyo, ikuti katuyanda kubonwa kuti tulayandika kapati kwiinda bamwi naa kuyanda kuba ampuwo, Saatani uyoobelesya zintu eezyi kusola kutuzandula kuli Jehova. Kuyungizya waawo, ulakonzya kubelesya zintu nzyotwakaiya kuŋanda, kucikolo alimwi anzyotwiiya kubantu batuzungulukide ikutupa kuyeeya mbuli mbwayeeya.

³ Sena inga twacikonzya kugusya zintu “zyoonse ziyumu nta” mumizeezo yesu? (2Kor. 10:4) Amubone Paulo mbwaingula: “Tulanyonyoona mizeezo iilubide yoonse acintu cili coonse cisumpulwa kuti cikazyanye aluzyibo lwa Leza, alimwi tulazunda mizeezo yoonse akwiipa kuti imvwide Kristo.” (2Kor. 10:5) Aboobo, kwiinda mulugwasyo lwa Jehova tulakonzya kwiigusya mizeezo iilubide. Mbubwenya musamu mboukonzya kuponya bulwazi, Ijwi lya Leza lilakonzya kutugwasya kugusya zintu zibyaabi iziletwa anyika ya Saatani.

‘AMUCINCE MIZEEZO YANU’

4. Ino nkucinca kuli buti tobanji nkotwakacita notwakatambula kasimpe ciindi cakusaanguna?

⁴ Amuyeeye kujatikizya kucinca nkomwakeelede kucita nomwakatambula kasimpe kamu Jwi lya Leza ciindi cakusaanguna alimwi anomwakasala kubelekela Jehova. Bunji bwesu, kucinca ooku kwakali kujatikizya kuleka zintu zibyaabi. (1Kor. 6:9-11) Eelo kaka tulalumba kapati akaambo kakugwasyigwa a Jehova kuzunda micito mibyaabi iili boobu!

5. Nzintu nzi zyobilo nzyotweelede kucita izyaambidwe kulugwalo lwa Baroma 12:2?

⁵ Nokuba boobo, tatweelede kuyeeya kuti tatuciyandiki kucinca kuli koonse. Nokuba kuti twakacileka kucita zibi zipati nzyotwakali kucita katutanabbapatizyigwa, tuciyandika kubeleka canguzu kutegwa tutantamuke cintu cili coonse cikonzya kutupa kujokela kumicito yakaindi. Ino mbuti mbotukonzya kucita oobo? Paulo wiingula kuti: “Amuleke kutobela ziyanza zyabweende bwazintu obuno, pele amusandulwe kwiinda mukucinca mizeezo yanu.” (Rom. 12:2) Aboobo kuli zintu zyobilo nzyotweelede kucita. Cakusaanguna, tweelede ‘kuleka kutobela ziyanza zyabweende bwazintu obuno’ naa kuleka kweendelezyegwa anyika eeyi. Cabili, tweelede ‘kusandulwa’ kwiinda mukucinca mizeezo yesu.

6. Ncinzi ncotwiiya kumajwi aa Jesu aalembedwe kulugwalo lwa Matayo 12:43-45?

⁶ Kucinca nkwaakali kwaamba Paulo kubikkilizya zinji ikutali buyo kucinca mbotulibonya. Kujatikizya bukkale bwesu boonse. (Amubone kabbokesi kakuti “Sena Twakasanduka Ncobeni Naa Tulicengeezya Buyo?”) Tweelede kucinca cakumaninina, nkokuti mbotulimvwa mumoyo alimwi azintu nzyotubikkila maano. Aboobo toonse tweelede kulibuzya kuti, ‘Sena kucinca nkondili mukucita kutegwa ndibe Munakristo nkwaatala-tala buyo naa kuzwa ansi aamoyo?’ Lwiindano lweelede kulibonya. Mumajwi aakwe aali kulugwalo lwa Matayo 12:43-45, Jesu wakatondezya ncotweelede kucita. (Amubale.) Majwi aayo atuyiisya ciiyo eeci iciyandika kapati: Tacizulide kugusya buyo mizeezo mibyaabi; mubusena bwanjiyo tweelede kubikka mizeezo iitambulika kuli Leza.

‘AMUBUKULUSYE MIZEEZO IIMWEENDELEZYA LYOONSE’

7. Mbuti mbotukonzya kucinca buntu bwesu bwamukati?

⁷ Sena cilakonzyeka kucinca mizeezo iitweendelezya? Ijwi lya Leza liingula kuti: “Mweelede kuzumanana kubukulusya mizeezo iimweendelezya lyoonse, akusama buntu bupya ibwakalengwa kweelana akuyanda kwa Leza mubululami bwini-bwini alimwi amukusyomeka.” (Ef. 4:23, 24) Aboobo cilakonzyeka kucinca buntu bwesu bwamukati, pele tacili cuubauba kucita boobo. Tweelede kucita zinji kunze buyo lyakukaka kulombozya kubyaabi alimwi akuleka kucita zintu zibi. Tweelede kucinca ‘mizeezo yesu iitweendelezya.’ Eeci cilabikkilizya akucinca nzyotulombozya, mbotulilemeka alimwi atwaambo itutupa kucita zintu zimwi. Kucita boobu, kuyandika kuzumanana kubeleka canguzu.

8-9. Mbuti icakamucitikila mukwesu umwi mbocitondezya kaambo ncociyandika kucinca buntu bwesu bwamukati?

⁸ Atubone cikozyanyo camukwesu umwi iwakali sinkondo kaindi. Wakali cakolwa alimwi wakali kuuma bantu, pele wakacileka, mpoonya nokwakainda ciindi wakabbapatizyigwa. Eeci cakapa kuti bantu bamucilawo mwaakali kukkala bamutembaule Jehova. Pele mangolezya aamwi, kakutanainda ciindi cilamfwu kuzwa naakabbapatizyigwa, wakasunkwa munzila njaatakali kuyeeyela. Kwakasika mwaalumi uukoledwe aŋanda akuyanda kumulwana mukwesu. Kumatalikilo, mukwesu tanaakali kuyanda kulwana. Pele ciindi mwaalumi ooyo naakasampaula zina lya Jehova, mukwesu wakanyema kapati cakuti wakaalilwa kuzumanana kulijata. Wakamuuma mwaalumi ooyo. Ncinzi ncaakacitila boobo? Nokuba kuti kwiiya Bbaibbele kwakamugwasya kulijata kulwana, tanaakalinacinca mizeezo iimweendelezya. Munzila iimwi, kunyina naakabucinca buntu bwakwe bwamukati.

⁹ Nokuba boobo, Mukwesu ooyu tanaakatyompwa. (Tus. 24:16) Kwiinda mukugwasyigwa abaalu, wakazumanana kuyaambele. Mukuya kwaciindi, wakeelela kuba mwaalu. Mangolezya aamwi, kabali anze aa Ŋanda ya Bwami, mukwesu ooyu wakasikilwa sunko likozyenye alyakamusikilide musyule. Kwakasika mwaalumi uukoledwe iwakali kuyanda kuuma mwaalu umwi ngobakali limwi. Ino ncinzi ncaakacita mukwesu ooyu? Cakukkazika moyo alimwi acakulicesya mukwesu wakabandika amwaalumi ooyo iwakakoledwe, alimwi mane wakamusindikila kuŋanda. Ncinzi cakapa kuti mukwesu acite cintu ciimpene aciindi eeci? Wakacinca mizeezo iimweendelezya. Wakaba muntu siluumuno alimwi uulicesya ncobeni. Eeci cakaleta bulemu kuzina lya Jehova!

10. Ncinzi ncotweelede kucita kutegwa tucince buntu bwesu bwamukati?

¹⁰ Kucinca kuli boobu takukonzyi kucitika mukulaba kwaliso; alimwi takulicitikili pe. Tuyandika ‘kusungwaala kapati’ kwamyaka minji. (2Pet. 1:5) Kucinca ooku takukonzyi kucitika akaambo buyo kakuti twali kumubelekela Jehova kwaciindi cilamfwu. Tweelede kusolekesya kapati kucinca buntu bwesu bwamukati. Kuli zintu zinji iziyandika kapati nzyotweelede kucita kutegwa tucince. Atulange-lange zintu zimwi akati kazintu eezyi.

MBOTUKONZYA KUCINCA MIZEEZO YESU IITWEENDELEZYA LYOONSE

11. Mbuti mupailo mboutugwasya kucinca mizeezo yesu iitweendelezya?

¹¹ Cakusaanguna iciyandika kapati nkupaila. Tweelede kupaila mbubwenya mbwaakacita sintembauzyo. Wakapaila kuti: “Kondipa kuba amoyo uusalala, O Leza, alimwi kobikka muuya mupya, uukkalikene mulindime.” (Int. 51:10) Tweelede kuzumina kuti tuyandika kucinca mizeezo iitweendelezya alimwi akulomba Jehova kuti atugwasye. Ino inga twasinizya buti kuti Jehova uyootugwasya kucinca? Tulakonzya kucita oobo kwiinda mukukulwaizyigwa acisyomezyo Jehova ncaakasyomezya bana Israyeli ibakali bayumu myoyo mumazuba aa Ezekieli cakuti: “Ndiyoobapa moyo omwe, akubikka muuya mupya mulimbabo. . . akubapa moyo muteteete wanyama, [nkokuti, ooyo uubikkila maano kutobela busolozi bwa Leza].” (Ezk. 11:19; bupanduluzi buyungizyidwe) Jehova wakali kuyanda kubagwasya bana Israyeli aabo kucinca, andiswe ulayanda kutugwasya kucinca.

12-13. (a) Kweelana alugwalo lwa Intembauzyo 119:59, ino tweelede kuzinzibala kuyeeya nzi? (b) Mibuzyo nzi njotweelede kulibuzya?

¹² Cabili iciyandika, nkuzinzibala kuyeeya. Ciindi notulibala cakusitikila Jwi lya Leza buzuba abuzuba, tweelede kuzinzibala kuyeeya, naa kuyeeyesya kapati kujatikizya nzyotubala, kutegwa tuzyibe motweelede kucinca. (Amubale Intembauzyo 119:59; Heb. 4:12; Jak. 1:25) Tweelede kwiizyiba mizeezo iili yoonse njotukonzya kuba aanjiyo iijatikizya busongo bwabantu. Kuyungizya waawo, tweelede kuzumina kuti tulalezya alimwi akubeleka canguzu kukulwana.

¹³ Mucikozyanyo, amulibuzye kuti: ‘Sena kuli muuya wamunyono uuli woonse ngondijisi mumoyo wangu?’ (1Pet. 2:1) ‘Sena ndilimvwa kuti ndilabainda bamwi akaambo kabusena nkondizwa, lwiiyo, naa akaambo kamali ngondijisi?’ (Tus. 16:5) ‘Sena ndiyeeya kuti bantu ibatajisi zintu mbuli nzyondijisi naa aabo mbotwiindene mubala, mbaansi kapati kulindime?’ (Jak. 2:2-4) ‘Sena ndilazikkomanina zintu izili munyika eeyi ya Saatani?’ (1Joh. 2:15-17) ‘Sena ndilazikkomanina zyakulikondelezya zitondezya kutalilemeka alimwi ankondo?’ (Int. 97:10; 101:3; Am. 5:15) Bwiinguzi kumibuzyo eeyi bulakonzya kumutondezya momweelede kucinca. Kwiinda mukwiizunda mizeezo iilibonya kuti ‘miyumu nta’ iili mumyoyo yesu, tuyoomukkomanisya Taateesu wakujulu.—Int. 19:14.

14. Nkaambo nzi ncociyandika kapati kusala balongwe ibali kabotu?

¹⁴ Catatu iciyandika, nkusala balongwe ibali kabotu. Kufwumbwa naa tulizyi naa tatuzyi, tulajatikizyigwa kapati abalongwe besu. (Tus. 13:20) Kumulimo naa kucikolo, tulizingulukidwe abantu ibatakonzyi kutugwasya kuyeeya mbuli mbwayeeya Leza. Nokuba boobo, tulakonzya kujana balongwe ibali kabotu kumiswaangano yesu ya Bunakristo. Kumiswaangano eeyi tulakonzya kukulwaizyigwa naa kuyumizyigwa “kutondezya luyando akucita milimo mibotu.”—Heb. 10:24, 25, bupanduluzi buyungizyidwe.

‘AMUKKALIKILE MULUSYOMO LWANU’

15-16. Mbuti Saatani mbwasola kucinca mizeezo yesu?

¹⁵ Pele amuyeeye kuti, Saatani ulikanzide kapati kucinca mizeezo yesu. Ubelesya njiisyo ziindene-indene kutegwa anyonganye mizeezo mibotu njotujisi akaambo kakasimpe kazwa mu Jwi lya Leza.

¹⁶ Saatani ucizumanana kubuzya mubuzyo nguwenya ngwaakabuzya Eva mumuunda wa Edeni wakuti: “Sena ncobeni Leza wakaamba kuti. . . ?” (Matl. 3:1) Munyika eeyi iyeendelezyegwa a Saatani, kanji-kanji tulamvwa mibuzyo iikonzya kutupa kudooneka nzyotusyoma, mbuli yakuti: ‘Sena ncobeni Leza tazumizyi kukwatana kwabantu bakozyenye zizo? Sena ncobeni Leza tayandi kuti kamusekelela Kkilisimasi alimwi amazuba aakuzyalwa? Sena ncobeni Leza wanu uyanda kuti kamukaka kubikkwa bulowa? Sena ncobeni kuti Leza siluyando uyanda kuti kamutayanzani abayandwa banu ibagwisyidwe mumbungano?’

17. Ncinzi ncotweelede kucita ciindi notubuzyigwa mibuzyo iipa kudooneka nzyotusyoma? Kweelana alugwalo lwa Bakolose 2:6, 7, ncinzi cikonzya kucitika ikuti twacita oobo?

¹⁷ Tweelede kuzisyoma njiisyo zyesu. Ikuti katutajani bwiinguzi kumibuzyo iiyandika kapati kujatikizya nzyotusyoma, tulakonzya kutalika kuzidooneka. Mukuya kwaciindi, kudooneka ooko kulakonzya kunyonganya mizeezo yesu alimwi alusyomo lwesu. Aboobo, ino ncinzi ncotweelede kucita? Ijwi lya Leza litwaambila kuti tweelede kucinca mizeezo yesu kutegwa tuzyibe “kuyanda kwa Leza, ikubotu, kutambulika alimwi kulondokede.” (Rom. 12:2) Kuti katubala cakusitikila, tulakonzya kusinizya kuti nzyotwakaiya kuzwa mu Bbaibbele nzyamasimpe. Alimwi tuyoosinizya kuti zyeelelo zya Jehova zililuzi. Mpoonya, mbubwenya mbuli cisamu cijisi miyanda miyumu, tuyoosimpa miyanda, ‘akukkalikila mulusyomo lwesu.’—Amubale Bakolose 2:6, 7.

18. Ino ncinzi ciyootugwasya kulikwabilila kuzintu zibyaabi izili munyika ya Saatani?

¹⁸ Kunyina muntu uumbi uukonzya kupa kuti lusyomo lwanu luyume. Aboobo amuzumanane kubukulusya mizeezo iimweendelezya lyoonse. Amupaile cakutaleka alimwi akulomba lugwasyo lwamuuya wa Jehova. Amuzinzibale kuyeeya akuzumanana kulingula mizeezo yanu alimwi anzyomulombozya. Amusale balongwe ibali kabotu ibayoomugwasya kucinca mizeezo yanu. Kwiinda mukucita boobo, muyoolikwabilila kuzintu zibyaabi izili munyika ya Saatani alimwi akucikonzya “kunyonyoona mizeezo iilubide yoonse acintu cili coonse cisumpulwa kuti cikazyanye aluzyibo lwa Leza.”—2Kor. 10:5.