“Kamuya Mukayiisye Bantu . . . Kuti Babe Basikwiiya”

1-2. (a) Kweelana amalailile aa Jesu aali kulugwalo lwa Matayo 28:18-20, mulimo nzi mupati ngoijisi mbungano ya Bunakristo? (b) Mibuzyo nzi njotutiibandike mucibalo eeci?

NAAKABUSYIGWA, Jesu wakaambila basikwiiya bakwe kuti baswaangane anguwe acilundu ku Galilaya. Kweelede kuti baapostolo bakalikkomene kapati ciindi nobakakkede antoomwe abusena oobo. (Mt. 28:16) Ambweni nceciindi ‘naakalibonya kubakwesu ibainda ku 500 aciindi comwe.’ (1Kor. 15:6) Nkaambo nzi Jesu ncaakaambila basikwiiya bakwe kuti baswaangane anguwe abusena oobo? Wakali kuyanda kubapa mulimo uukkomanisya. Wakabaambila kuti: “Kamuya mukayiisye bantu bazisi zyoonse kuti babe basikwiiya.”—Amubale Matayo 28:18-20.

² Basikwiiya ibakamvwa majwi aa Jesu, kumbele bakaba cibeela cambungano ya Bunakristo yamumwaanda wamyaka wakusaanguna. Mulimo mupati wambungano eeyo wakali wakugwasya bantu banji kuba basikwiiya ba Kristo.b Mazuba aano, kuli mbungano zinji zya Banakristo bakasimpe munyika yoonse alimwi zijisi mulimo uukozyenye angoyakajisi mbungano yamumwaanda wamyaka wakusaanguna. Mucibalo eeci, tulabandika mibuzyo yone eeyi: Nkaambo nzi ncociyandika kapati kugwasya bantu kuba basikwiiya? Ino kucita boobo kubikkilizya nzi? Sena Banakristo boonse balijisi lubazu mukugwasya bantu kuba basikwiiya? Alimwi nkaambo nzi ncotuyandika kukkazika moyo ciindi notucita mulimo ooyu?

NKAAMBO NZI MULIMO WAKUGWASYA BANTU KUBA BASIKWIIYA NCOUYANDIKA KAPATI?

3. Kweelana alugwalo lwa Johane 14:6 alimwi a 17:3, nkaambo nzi mulimo wakugwasya bantu kuba basikwiiya ncouyandika kapati?

³ Nkaambo nzi mulimo wakugwasya bantu kuba basikwiiya ncouyandika kapati? Nkaambo kakuti balikke basikwiiya ba Kristo mbobakonzya kuba balongwe ba Leza. Kuyungizya waawo, aabo ibatobela Kristo bapona buumi buli kabotu lino alimwi balijisi bulangizi bwakuyoopona buumi butamani kumbele. (Amubale Johane 14:6; 17:3.) Mubwini, Jesu wakatupa mulimo uuyandika kapati, pele mulimo ooyu tatuuciti tolikke. Kujatikizya nguwe alimwi abalongwe bakwe bamwi, mwaapostolo Paulo wakalemba kuti: “Tuli basimilimonyina a Leza.” (1Kor. 3:9) Eelo kaka ncoolwe cipati Jehova alimwi a Kristo ncobakapa bantu batalondokede!

4. Ncinzi ncotukonzya kwiiya kucakuluula caba Ivan aba Matilde?

⁴ Mulimo wakugwasya bantu kuba basikwiiya ulakonzya kutuletela lukkomano lunji. Amubone cikozyanyo caba Ivan abakaintu babo ba Matilde, ibakkala kucisi ca Colombia. Bakakambaukila mwaalumi umwi uucili mwana-mwana wazina lya Davier. Mwaalumi ooyu wakabaambila kuti: “Ndilayanda kucinca bukkale bwangu, pele tandicikonzyi.” Ba Davier bakali basikulwana mfwaindi ibakali kubelesya misamu iikola, bakali bacakolwa alimwi bakali kukkala amukaintu ngobatakakwetene limwi wazina lya Erika. Ba Ivan bakati: “Twakatalika kubaswaya kumunzi iwakali kulamfwu kapati nkobakali kukkala. Eeci cakali kwaamba kuccovwa macinga kwamawoola manji mumugwagwa uujisi mankandya. Ba Erika nobakabona mbobwakali kuyaabucinca bukkale bwaba Davier, abalo bakatalika kujanika aciiyo ca Bbaibbele.” Mukuya kwaciindi, ba Davier bakaleka kubelesya misamu iikola, kunywa bukoko alimwi akulwana mfwaindi. Kuyungizya waawo, bakakwatana mumulawo aba Erika. Ba Matilde bakati: “Ciindi ba Davier aba Erika nobakabbapatizyigwa mu 2016, twakaayeeya majwi ngobakali kwaamba ba Davier aakuti, ‘Ndilayanda kucinca bukkale bwangu, pele tandicikonzyi.’ Twakakkomana kapati cakuti misozi yakeenda.” Cakutadooneka, tulakkomana kapati ciindi notugwasya bantu kuba basikwiiya ba Kristo.

INO KUGWASYA BANTU KUBA BASIKWIIYA KUBIKKILIZYA NZI?

5. Nintaamu nzi yakusaanguna iiyandika mukugwasya bantu kuba basikwiiya?

⁵ Tulabweza ntaamu yakusaanguna mukugwasya bantu kuba basikwiiya ciindi ‘notuyandaula’ bantu ibeelela. (Mt. 10:11) Tulatondezya kuti tuli Bakamboni ba Jehova bakasimpe kwiinda mukubakambaukila bantu boonse mbotujana mumulimo wesu. Ciindi notwaatobela malailile aa Kristo aajatikizya kukambauka, tulatondezya kuti tuli Banakristo beni-beni.

6. Ncinzi cikonzya kutugwasya kutegwa tuzwidilile mumulimo wakukambauka?

⁶ Bantu bamwi balayanda kwiiya kasimpe kamu Bbaibbele, pele banji mbotujana mumulimo wesu inga kabalibonya kutabikkila maano kumatalikilo. Ambweni inga twayandika kubakulwaizya kutegwa babe aluyandisisyo lwakwiiya. Kutegwa tuzwidilile mumulimo ooyu, tweelede kulibambila kabotu. Tweelede kusala makani aakonzya kubakkomanisya bantu mbotujana mumulimo. Twamana kucita boobo, atubone nzila mbotukonzya kwaatalisya makani aayo.

7. Mbuti mbomukonzya kutalisya mubandi kumuntu alimwi ino muyeeya kuti nkaambo nzi ncociyandika kumuswiilila alimwi akutondezya bulemu?

⁷ Mucikozyanyo, mulakonzya kutalika kwiinda mukwaambila mukamwiniŋanda kuti: “Inga ndayanda kumvwa mbomuyeeya kujatikizya makani aamwi. Mapenzi aatusikila mazuba aano alabasikila bantu boonse munyika. Sena muyeeya kuti tuyandika mfwulumende iikonzya kweendelezya nyika yoonse kutegwa imane mapenzi aali munyika?” Mpoonya mulakonzya kubandika lugwalo lwa Daniele 2:44. Ambweni mulakonzya kubuzya mukamwiniŋanda kuti: “Ninzila nzi iinda kubota njomukonzya kubelesya kutegwa mubakomezye kabotu bana banu? Inga ndakkomana kumvwa mbomuyeeya kukaambo aaka.” Mpoonya amubandike lugwalo lwa Deuteronomo 6:6, 7. Kufwumbwa makani ngomuyanda kuyoobandika, amuyeeye kujatikizya bantu ibayakwaakkomanina. Amweezeezye kujatikizya mbobayoogwasyigwa kuti bazyiba cini Bbaibbele ncoliyiisya. Ciindi nomubandika ambabo, inga cabota kubaswiilila alimwi akwiilemeka mizeezo yabo. Ikuti mwacita oobo, muyoozizyiba nzyobayeeya, mpoonya abalo bayoomuswiilila.

8. Nkaambo nzi ncotweelede kuzumanana kupilukila kubantu?

⁸ Muntu uumwi katanasala kutalika kwiiya Bbaibbele, mweelede kupilukila ziindi zinji. Nkaambo nzi? Nkaambo kakuti ambweni tatukonzyi kubajana bantu ciindi notwapilukila. Kuyungizya waawo, inga mwayandika kupilukila ziindi zinji mukamwiniŋanda katanaanguluka kwiiya Bbaibbele. Amuyeeye kuti, cisyango cilakomena kabotu ikuti kacitilailwa lyoonse. Mbubwenya buyo, luyando ndwajisi muntu kuli Jehova alimwi a Kristo lulakonzya kukomena ciindi notubandika kujatikizya Jwi lya Leza anguwe lyoonse.

SENA BANAKRISTO BOONSE BALIJISI LUBAZU MUKUGWASYA BANTU KUBA BASIKWIIYA?

9-10. Nkaambo nzi ncotwaambila kuti Munakristo uuli woonse ulijatikizyidwe mukuyandaula baabo beelela?

⁹ Mubelesi Munakristo uuli woonse ulijatikizyidwe mukuyandaula bantu beelela. Mulimo ooyu tulakonzya kuukozyanisya kukuyandaula mwana iwasweeka. Munzila nzi? Amubone cakacitika kumwana iwakajisi myaka yotatwe iwakasweekede. Bantu basika ku 500 bakali kumuyandaula. Mpoonya nokwakainda mawoola aatandila ku 20 kuzwa ciindi naakasweeka, muntu umwi wakamujana mwana ooyo mumuunda. Muntu ooyo wakakaka kulumbaizyigwa akaambo kakujana mwana ooyo. Wakaamba kuti: “Mbanji bantu bakabeleka kutegwa mwana ooyo ajanike.”

¹⁰ Bantu banji bali mbuli mwana ooyo, balisweekede. Tabajisi bulangizi, aboobo bayandika lugwasyo. (Ef. 2:12) Bakamboni ba Jehova ibainda ku 8 miliyoni balijatikizyidwe mukuyandaula bantu aaba ibeelela. Ambweni inga tiimwacikonzya kujana muntu uuyanda kwiiya Bbaibbele andinywe. Pele basikumwaya bamwi ibakambaukila mucilawo mumwenya balakonzya kujana bantu bamwi ibayanda kwiiya kasimpe kamu Jwi lya Leza. Aboobo ciindi mukwesu naa mucizyi naajana muntu umwi iwaba sikwiiya wa Kristo, boonse aabo ibakatola lubazu mukuyandaula balijisi kaambo kabotu ikeelede kubapa kukkomana.

11. Nokuba kuti tamusololeli ciiyo ca Bbaibbele, muunzila nzi momukonzya kugwasya bantu kuba basikwiiya?

¹¹ Nokuba kuti lino kunyina ciiyo ca Bbaibbele ncomusololela, mulakonzya kubagwasya bantu kuba basikwiiya munzila zimwi. Mucikozyanyo, mulakonzya kubatambula bapya alimwi akuba balongwe babo ciindi nobaboola ku Ŋanda ya Bwami. Munzila eeyi, mulakonzya kubagwasya kubona kuti luyando lulatuzyibya kuti tuli Banakristo bakasimpe. (Joh. 13:34, 35) Bwiinguzi mbomupa lyamiswaangano, tacikwe makani naa mbufwaafwi, bulakonzya kukulwaizya bapya kutondezya lusyomo lwabo kwiinda mukwiingula lyamiswaangano cakusinizya alimwi munzila yabulemu. Kuyungizya waawo, mulakonzya kubeleka amupya mumulimo wakukambauka alimwi akumutondezya mbwaabelesyegwa Magwalo kuyiisya bantu. Kwiinda mukucita boobo, munoomugwasya kwiiya Kristo.—Lk. 10:25-28.

12. Sena tuyandika luzyibo lwaalubazu kutegwa tugwasye bantu kuba basikwiiya? Amupandulule.

¹² Kunyina akati kesu iweelede kulimvwa kuti tuyandika luzyibo lwaalubazu kutegwa tugwasye bantu kuba basikwiiya ba Jesu. Nkaambo nzi? Amubone cikozyanyo caba Faustina, ibakkala kucisi ca Bolivia. Tiibakacizyi kubala ciindi nobakatalika kuyanzana a Bakamboni ba Jehova. Kuzwa ciindi eeco, ba Faustina bakaiya kubala asyoonto. Lino bakabbapatizyigwa alimwi balakukkomanina kuyiisya bamwi. Kanji-kanji, balasololela ziiyo zya Bbaibbele zyosanwe nsondo ansondo. Nokuba kuti ba Faustina tabanacizyiba kabotu kubala mbuli mbobabala bantu banji aabo mbobayiisya, bagwasya bantu basika kucisambomwe kweelela kubbapatizyigwa.—Lk. 10:21.

13. Nokuba kuti tujisi bubi kapati, nzilongezyo nzi zimwi nzyotukonzya kujana ciindi notugwasya bantu kuba basikwiiya?

¹³ Banakristo banji bajisi bubi kulanganya mikuli iiyandika kapati. Nokuba boobo, balajana ciindi cakusololela ziiyo zya Bbaibbele alimwi balakkomana kapati kucita boobo. Amubone cikozyanyo caba Melanie. Bakali muzyali uuli alikke alimwi bakali kulanganya mwanaabo musimbi iwakajisi myaka iili lusele kucisi ca Alaska. Kuyungizya waawo, bakali kubeleka mulimo wakumubili alimwi bakali kulanganya bausyi ibakali kuciswa bulwazi bwakkansa. Ba Melanie mbabakali Bakamboni balikke mudolopo eelyo ilyakali kulamfwu. Bakali kupaila lyoonse kulomba nguzu kutegwa bacikonzye kuunka kuyookambauka nokuba kuti kwakali kutontola akaambo kakuti bakali kuyanda kuti bajane muntu ngobakali kukonzya kwiiya limwi Bbaibbele. Mukuya kwaaciindi bakajana ba Sara, balo ibakakkomana kapati nobakazyiba kuti Leza ulijisi zina limugeme. Nokwakainda ciindi, ba Sara bakazumina kwiiya Bbaibbele. Ba Melanie bakaamba kuti: “Muli Bwasanu kumangolezya ndakali kukatala kapati, pele mebo alimwi amwanaangu twakali kugwasyigwa kapati ciindi notwakali kuunka kuyoosololela ciiyo eeci. Twakali kukkomana kuvwuntauzya kutegwa tujane bwiinguzi kumibuzyo yaba Sara alimwi twakakkomana kapati kubona kuti bakaba balongwe ba Jehova.” Cabusicamba, ba Sara bakaliyumya kukukazyigwa, bakacileka kuunka kucikombelo cabo, mpoonya bakabbapatizyigwa.

KUGWASYA BANTU KUBA BASIKWIIYA KUYANDIKA KUKKAZIKA MOYO

14. (a) Mbuti mulimo wakugwasya bantu kuba basikwiiya mboukozyenye amulimo wakuzuba nswi? (b) Ino majwi aa Paulo aalembedwe kulugwalo lwa 2 Timoteyo 4:1, 2 amujatikizya buti?

¹⁴ Nokuba kuti mulimo wanu ulibonya kutazwidilila, mutalimvwi kuti kunyina nomuyakujana bantu bayanda kwiiya. Amuyeeye kuti Jesu wakakozyanisya mulimo wakugwasya bantu kuba basikwiiya kukuzuba nswi. Basikuzuba nswi balakonzya kubeleka mawoola manji kabatanajaya nswi noiba yomwe. Kanji-kanji balabeleka masiku naa kubucedo alimwi zimwi ziindi balaunka kumasena aali kulamfwu. (Lk. 5:5) Mbubwenya buyo cakukkazika moyo, Banakristo bamwi balabeleka mawoola manji kabali “mukuzuba” muziindi ziindene-indene alimwi amumasena aayindene-indene. Nkaambo nzi ncobacitila boobo? Kutegwa bajane bantu banji. Aabo ibabeleka canguzu munzila eeyi, kanji-kanji balalongezyegwa kwiinda mukujana bantu ibajisi luyandisyo kumulumbe wesu. Sena inga mwasoleka kukambauka aciindi ncomukonzya kujana bantu banji naa kubusena nkobalangilwa kujanwa?—Amubale 2 Timoteyo 4:1, 2.

15. Nkaambo nzi kusololela ziiyo zya Bbaibbele ncokuyandika kukkazika moyo?

¹⁵ Nkaambo nzi kusololela ziiyo zya Bbaibbele ncokuyandika kukkazika moyo? Kaambo kamwi nkakuti tuyandika kucita zinji kunze buyo lyakugwasya sikwiiya kuzyiba alimwi akuyanda njiisyo zyamu Bbaibbele. Tweelede kumugwasya sikwiiya kumuzyiba alimwi akumuyanda Mulembi wa Bbaibbele, Jehova. Kunze buyo lyakuyiisya sikwiiya kujatikizya ncayanda Jesu kuli basikwiiya bakwe, tweelede kumugwasya ikuzyiba mbwayelede kupona Munakristo wakasimpe. Cakukkazika moyo, tweelede kumugwasya ciindi nasoleka kubelesya njiisyo zyamu Bbaibbele. Basikwiiya bamwi balakonzya kucinca mbobayeeya alimwi abukkale bwabo mumyezi misyoonto buyo; pele bamwi bayandika ciindi cinji kutegwa bacince.

16. Ncinzi ncomwaiya kucikozyanyo caba Raúl?

¹⁶ Kucisi ca Peru, misyinali umwi wakacitikilwa cintu cimwi icitondezya mbocigwasya kukkazika moyo. Misyinali ooyu wakaamba kuti: “Twakaiya mabbuku obilo aba Raúl. Pele bakacili abuyumuyumu. Kwakali mapenzi lyoonse mulukwatano lwabo, bakali kubelesya majwi mabi alimwi bana babo tiibakali kubalemeka akaambo kabukkale bwabo bubyaabi. Nokuba boobo, bakali kujanika kumiswaangano lyoonse, aboobo ndakazumanana kubaswaya kutegwa ndibagwasye balo alimwi amukwasyi wabo. Nokwakainda myaka yotatwe kuzwa nondakatalika kwiiya ambabo, bakeelela kubbapatizyigwa.”

17. Ncinzi ncotuyoobandika mucibalo citobela?

¹⁷ Jesu wakatwaambila kuti “kamuya mukayiisye bantu bazisi zyoonse kuti babe basikwiiya.” Aboobo kutegwa tuuzuzikizye mulimo ooyu, ziindi zinji tulabandika abantu ibasyoma zintu ziindene anzyotusyoma. Bamwi tabajisi cikombelo nkobazulilwa, mpoonya bamwi tabasyomi muli Leza. Mucibalo citobela tuyoobona mbotukonzya kukambauka makani mabotu kubantu aaba ibajisi bukkale bwiindene-indene.