Sena Mulizyi?

Ino babanzi bakali kubeleka mulimo nzi kaindi?

KAINDI, babanzi bakali kulanganya ŋanda naa zintu zyamuntu umwi. Ibbala lya Chihebrayo alimwi alya Chigiriki ilyakasandululwa kuti “mubanzi” zimwi ziindi lyaamba mulangizi naa muntu uulanganya bamuŋanda.

Ciindi Josefa mwana wa Jakobo naakali muzike mu Egepita, wakaba mubanzi wamuŋanda yasimalelaakwe. Mane buya, simalelaakwe “zintu zyakwe zyoonse wakazipa Josefa kuti kazilanganya.” (Matl. 39:2-6) Kumbele, Josefa naakaba mweendelezi mu Egepita, awalo wakabikka mubanzi iwakali kulanganya ŋanda yakwe.—Matl. 44:4.

Mumazuba aa Jesu, bantu ibakajisi myuunda kanji-kanji bakali kukkala muminzi iyakali kule amyuunda yabo. Aboobo bakali kusala babanzi ibakali kulanganya myuunda yabo.

Ino mbaani ibakali kweelela kuba babanzi? Mulembi muna Roma wamumwaanda wamyaka wakusaanguna wazina lyakuti Columella wakaamba kuti, muzike iwakali kubikkwa kuba mulangizi, naa mubanzi, wakeelede kuba yooyo “iwakaiya kuubeleka kabotu mulimo.” Wakeelede kuba muntu ooyo “iwakali kuba masimpe kuti babelesi balabeleka pele katali silunya.” Mulembi wakayungizya kuti: “Icakali kuyandika kapati kumubanzi ncakuti tanaakeelede kuyeeya kuti ulizizyi zintu zyoonse alimwi lyoonse wakeelede kuyandisya kwiiya zintu zipya.”

Ijwi lya Leza libelesya cikozyanyo camubanzi kupandulula milimo imwi iicitwa mumbungano ya Bunakristo. Mucikozyanyo, mwaapostolo Petro ukulwaizya Banakristo kubelesya busongo bwakucita zintu mbwaakabapa Leza “mukubelekelana mbuli babanzi babotu baluzyalo lwa Leza.”—1Pet. 4:10.

Jesu wakabelesya cikozyanyo camubanzi mucikozyanyo icili kulugwalo lwa Luka 16:1-8. Aboobo, mubusinsimi bujatikizya citondezyo cakubako kwakwe kali Mwami, Jesu wakasyomezya basikumutobela kuti wakali kuyoosala “muzike uusyomeka alimwi uucenjede,” naa “mubanzi uusyomeka.” Mulimo mupati wamubanzi wakali kuyooba wakupa basikutobela Kristo boonse cakulya cakumuuya ncobayandika muciindi camamanino. (Mt. 24:45-47; Lk. 12:42) Aboobo tulikkomene kapati kuti tulakonzya kutambula mabbuku aayumya lusyomo aayo aabambwa amubanzi uusyomeka alimwi akupa kuti kaajanika nyika yoonse.