Ikwiibelesya Munzila Mbotu Kkompyuta
1 Imwaapostolo Paulo wakakulwaizya Banakristo bamumwaanda wamyaka wakusaanguna ikuti batanyonganizigwi akaambo kakuti “ciindi [ciceede] ncifwiifwi.” (1 Kor. 7:29) Mbwaayaabuswena afwaafwi mamanino aabweende bwazintu obu, kulayandika kapati kuti ‘tusaangune kuyandaula Bwami bwa-Leza abululami bwakwe’ alimwi ‘akujana ciindi’! Ciindi ncintu ciyandika kapati.—Mt. 6:33; Ef. 5:15, 16.
2 Kusumpuka muzintu zyakupanga-panga kwagwasya kapati mukucita zintu cakutasowa ciindi. Mucikozyanyo, kwiinda mukubelesya muncini wakkompyuta, sikuubelesya ulakonzya kujana makani manji aayindene-indene mukaindi kasyoonto buyo. Mukulaba buyo kwalisyo kkompyuta ilakonzya kucita mulimo mupati uukonzya kutola mawoola manji naa mvwiki ikuti naa kwabelesyegwa nzila zimbi kuucita. Ikuti mincini eyi yabelesyegwa kabotu, nzibelesyo zigwasya kapati.
3 Sena Tiikamunyonyweedi Ciindi?: Pele kusumpuka oku muzyakupanga-panga kulakonzya kumusowela mali manji alimwi aciindi. Muyooyandika ciindi cakwiiya mboyeelede kubelesyegwa kkompyuta kutegwa icite zintu zimwi. Kunze lyaboobo, muntu ulakonzya kunonezyegwaa luzibo oolu lwasayaansi calo cikonzya kumusowela ciindi ncaali kunoobelesya kucita zintu zimwi zigwasya. Tweelede kuzilanga kabotu zintu, katuyeeyede njiisyo yalulayo ndwaakapa mwaapostolo Paulo lwakuti katweenda ‘mbuli basimaanu, akujatisya loko ciindi cesu coonse.’—Amubone 1 Ba-Korinto 7:31.
4 Kabajisi makanze mabotu, ibantu bamwi babikka makani aajatikizya mbungano mukkompyuta yabo kuŋanda. Inzya, cili kuli umwi aumwi kulisalila mbwayelede kubelesya kkompyuta yakwe. Nokuba boobo, imakani aajatikizya mbungano alo aajisi mafoomu aawo mwaayelede kubikkwa, tayeelede kubikkwa mukkompyuta pe, mbwaanga ibana naa ibantu bamwi buyo batazumizidwe balakonzya kwaabala. Makani aambungano oonse—makani amaakkaunti, kkaadi Yambungano Aalembelwa Zyasikumwaya aambi buyo—ayelede kuyobolwa mumafoomu aakapegwa aba Sosaiti, alimwi makani aaya aali mumafoomu aambungano taayelede kuyobolwa mukkompyuta pe. Munzila eeyi makani aambungano aamaseseke ayookwabililwa.
5 Balangizi bajisi mikuli beelede kubaa bupampu eelyo nobaabila bakwesu zibeela zyapulogilamu yamu Cikolo Camulimo Wateokrasi alimwi aya Muswaangano Wamulimo. Beelede kuti kabaazi kale makani aajatikizidwe mucibeela cimwi acimwi. Mucikozyanyo, mucikolo kuli makani aamwi aatakonzyi kupegwa kuli sicikolo uli woonse. Njiisyo iiyiisigwa mumakani aayo alimwi azyeelelo zyamuntu alimwi ambwaabede makani zyeelede kubikkwa mumizeezo. Tabeelede kulekela kkompyuta kuti isale njiyo mumakani aya.
6 Imukwesu wapegwa cibeela cakuyookanana kumiswaangano yambungano tayelede kubelesya makani aakavwuntauzigwaa muntu umbi, ikapati imuntu ngwatazyi akuzi, akaambo buyo kakuti nkwaali mukkompyuta akuti eeci cilakonzya kumugwasya nkaambo tacikamumanini ciindi kulibambila. Banakristo basyomeka tabalibambili makani aa Bbaibbele naa zibeela zyamuswaangano akwaabikka mukkompyuta kutegwa bakaabelesye bamwi. Nokuba boobo, kkompyuta alimwi a Watchtower Library iili aa CD-ROM ya Sosaiti, nzibelesyo zigwasya kapati kumukwesu umwi aumwi, zilagwasya kuvwuntauzya makani muciindi cisyoonto buyo.
7 Kujatikizya kugwisya makani aabikkidwe mukkompyuta kubikkilizyaa makani aambi buyo akwaabila bakwesu, ikulibambila akwaabila makani azibeela zya Muswaangano Wamulimo alimwi a Cikolo Camulimo Wateokrasi kwiinda mukwaatuma akkompyuta naa kubelesya nzila zimbi, kanjikanji cilainda kugwasya kuti bakwesu balibambila makani aabo beni, kababikkilide maanu kukugwasya bantu ooko nkobabede. (1 Tim. 4:13, 15) Takwe nomweelede kubelesya mbungano mukulijanina mali.
8 Ino mbuti kujatikizya makani aakusimba tupepa akkompyuta tujisi magwalo aabelesyegwaa Ciiyo ca Ngazi Yamulindizi naa ku Ciiyo Cabbuku Cambungano akutwaabila bakwesu? Inga cainda kubota kuti basikumwaya kabalilembela majwi aabo beni akulyeengela mu Bbaibbele alimwi amubbuku lili mukuyiigwa. Ikubelesya tupepa tusimbidwe akkompyuta tujisi Magwalo aali mumabbuku naa mamagazini kumiswaangano kulakonzya kubaletela butolo bantu mukubelesya Bbaibbele lini kujana magwalo. Pele ikubala Magwalo notwiiya Bbaibbele naa notuli kumuswaangano wambungano ncibeela calwiiyo ndotuyiisigwa, icitugwasya kuciziba kabotu kubelesya Bbaibbele mumulimo wamumuunda. Bunji bwaziindi, ikapati kujatikizya zibalo zilamfwu, ikubala cacigaminina kuzwa mu Bbaibbele cilagwasya kapati, ikapati eelyo baswiilizi nobakulwaizigwa kutobelezya muma Bbaibbele aabo nokubalwa cibalo.
9 Intenda Zimbi Zijanika: Mbuli mbokwakaambwa mu Ngazi Yamulindizi yamu Chichewa yamu August 1, 1993 apeeji 17, ikuswaanganya kkompyuta yanu ku electronic bulletin board (cibeela mobakonzya kutambikana makani bantu kwiinda mukkompyuta) kulakonzya kujula nzila kuntenda zikonzya kumuyambukila munzila yakumuuya. Mbweena muntu mumpelenge mbwakonzya kutuma makani aamwi mu bulletin board amuzeezo wakunyonganya alimwi akubisya makani mumafailo aabamwi mukkompyuta, basiluleyo, basololi bazikombelo alimwi abambi buyo ibayanda kubisya bukkale bwabamwi amunzila zimbi buyo, balakonzya kutuma makani aabo mabyaabi aanyonganya muma bulletin board. Ccita kuti bulletin board noliba leelyo lilembedwe kuti “JW Only” kalyeendelezyegwa kabotu, kayibelesyegwa buyo ababelesi ba Jehova basimide alimwi basyomeka, ilakonzya kupa Banakristo bayibelesya ikuyanzana “abamineme.” (1 Kor. 15:33) Iba Sosaiti batambula malipooti aakuti bantu bamwi batambikizyanya makani aakkompyuta bali mukwaamba mizeezo yabo kujatikizya makani aakumuuya alimwi akupa lulayo lutali kabotu, ikumwaya makani aakuvwiya amakani aakubeja, akubikka mizeezo iinyongene, ikubuzya mibuzyo alimwi akuzumbauzya kujatikizya makani aamwi calo capa kuti ibamwi baleke kusyoma, alimwi bamwaya mizeezo yabo beni kujatikizya bupanduluzi bwa Magwalo. Makani aaya alakonzya kuboneka mbuli kuti ali buyo kabotu alimwi alayiisya, pele alakonzya kaajisi makani amwi mabyaabi. Banakristo bapegwa cakulya cakumuuya aciindi ceelede alimwi balasalalilwa twaambo kwiinda mu “muzike musyomesi uucenjede.” (Amubone Ngazi Yamulindizi yamu July 1994 amapeeji 9-11.) Munakristo uuli woonse weelede kubona kuti wakwabilila lusyomo lwakwe kukuyungwa kubyaabi alimwi iciyandika kapati weelede kucenjela kujatikizya bantu mbayanzanaa mbabo.—Mt. 24:45-47; 2 Joh. 10, 11.
10 Ngazi Yamulindizi njoona eeyi yakakankaizya mbociyandika ikulemeka milawo iikasya kulembulula kuli koonse. Bunji bwamakkampani aayo abamba alimwi akuulisya mapulogilamu aamukkopyuta alizumizidwe kulembulula mapulogilamu aaya, eelyo alapa pepa lizumizya litondezya mbwayelede kubelesyegwa mapulogilamu kweelanaa mulawo. Kanjikanji laisensi eeyi ikasya muntu wakaula pulogilamu eeyo ikupa bamwi makkopi aapulogilamu; alimwi tacili mumulawo ikucita boobo kweelana ambowaamba mulawo wamasi oonse uukasya kulembulula. Ibantu banji mbalyatu alimwi tabayoowi kutyola mulawo. Nokuba boobo, Banakristo beelede kwiitobela milawo, ikupa Kaisara zintu zya Kaisara.—Mt. 22:21; Rom. 13:1.
11 Makkampani amwi mapati asambala makkompyuta akabikkwa kale mapulogilamu aaya akupegwa pepa lizumizya kwaabelesya. Nokuba boobo, zintoolo zimwi mobaulisya makkompyuta tababikkilizyi amapepa aazumizya kwaabelesya akaambo kakuti mapulogilamu ngobakabikkila limwi taazumizidwe amulawo pe, caamba kuti ooyo uula utyola mulawo nabelesya mapulogilamu aaya. Kweelana aceeci, Banakristo tabeelede kubikka naa ikugwisya makani akasidwe kulembululwa (mbuli mbokulembedwe mumabbuku aa Sosaiti) kuzwa muma electronic bulletin board kubikkilizyaa yaayo akalembululwa kakunyinaa kuzumizigwa mumulawo abalaayo.—Heb. 13:18.
12 Ibubotu bwacibelesyo cili coonse cakapangwaa luzibo lwasayaansi bweelede kulangwa-langwa kweelanaa ntenda zilangilwa kuletwa kwiinda mukucibelesya. Mbubwena buyo mbuli cipekupeku mbocikonzya kubelesyegwa kabotu, pele akaambo kazintu zitondezyegwa ibukkale bwabantu sunu bwasofwaala cini-cini calo capa kuti abantu bakunyika lino batalike kulibilika. Mulongo wamakkompyuta alajakizyanya nyika yoonse mbwiizulwa alimwi alakonzya kuleta makani manji kapati aagwasya muŋanda yanu naa kumilimo. Alagwasya kapati kuli baabo bacita makwebo alimwi akumbunga kubikkilizyaa kuli umwi aumwi ooyo uuyanda kuziba zicitika munyika kujatikizya makani ngayanda mwini naa aamakwebo kujatikizya lusumpuko luliko kweelanaa ciindi. Pele makkompyuta ngeenaaya alijisi amakani mabyaabi mbuli azisapi, makani aakubeja aazwanganya bantu, alimwi amakani ayiisya mbokucitwa zintu zibyaabi alimwi zitaluleme.
13 Aboobo kuli twaambo tunji tuyandika kapati Munakristo ncayelede kwaalanga munzila mbotu makani aajatikizya kuyaambele kwamincini yamakkompyuta. Bunji bwabantu balikkomene a New World Translation, mavolyumu aa Insight alimwi apulogilamu iitegwa GetVerse, (kujana kapango cakufwambaana) iili muma diskette aakkompyuta aakabambwa aba Sosaiti. Ibamwi bagwasigwa kapati a Watchtower Library aa CD-ROM yakabambwa aba Sosaiti yalo ibikkilizyaa makani aayungizidwe akuvwuntauzya. Nokuba kuti tuliizi mpindu iikonzya kujanwa kwiinda mukubelesya mincini yakapangwaa basayaansi, muntu uubelesya mincini eeyi kutegwa imugwasye weelede kulikwabilila mwini alimwi abamwi kuntenda zikonzya kujanika. Tweelede kwaalanga kabotu makani aya aakubelesya mincini eyi ikutegwa neliba leelyo notwiibelesya munzila iigwasya tutasowi ciindi cesu caabilidwe zintu ziyandika kapati naa kunyonganya mulimo wesu mupati alimwi ambaakani nzyotujisi.—Mt. 6:22; 28:19, 20.