Amumutobele Jesu Cakutaleka
1 Aciindi cimwi Jesu wakati: “Kuti muntu kayanda kunditobela, aliimye, abweze [cisamu cakwe cakupenzezya, NW] elyo ulanditobela [cakutaleka, NW].” (Mt. 16:24) Aboobo tuyanda kwaatobela majwi aa Jesu camoyo woonse. Atulange-lange zijatikizidwe mukaambo kamwi akamwi mubwiite bwakwe.
2 “Aliimye”: Ciindi notwalyaaba kuli Jehova, tulaliimya. Bupanduluzi butaanzi bwabbala lya Cigiliki lyasandululwa kuti “aliimye” ategwa “nkwaamba kuti peepe.” Eci cipandulula kuti mukuliyandila twaleka makanze esu, kusukama, bukkale bubotu, akulikondelezya kwakulidomenena—kuba bantu bakanzide kubotezya Jehova kukabe kutamani.—Rom. 14:8; 15:3.
3 “Abweze Cisamu Cakwe Cakupenzezya”: Buumi bwa Munakristo mbwakubweza cisamu cakupenzezya cakulyaaba mumulimo wa Jehova. Inzila yomwe muuya wakulyaaba mounga watondezegwa nkwiinda mukubeleka acanguzu mumulimo wakumuunda. Kusikila aciindi camwaka ano, bunji bwabasikumwaya balimukukkomana mumulimo wa bupainiya bwakugwasilizya. Ndiza muli bamwi babaabo alimwi inga mwazuminizya kuti zileleko nzyomujana nzinji kwiinda kulisungula nkomucita. Aabo batakonzyi kubeleka kabali bapainiya bakugwasilizya kanjikanji balibambila kubelesya ciindi cabo cinji mumulimo wakukambauka kabali basikumwaya bamumbungano. Makanze aaya acitya kuti, mbungano zimwi zicitye miswaangano yamumulimo wakumuunda kufwambaana amaminiti masyoonto buyo kwiinda mbobakali kucita ciindi camana. Bamwi bajana bubotu bunji nobayeeya kuswaya ‘imbi ŋanda yomwe buyo kabatana kotoka’ naa ‘kuyungizya maminiti masyoonto buyo kabatana kotoka.’
4 Inzila iimbi muuya wakulyaaba mowatondezegwa nkwiinda mukulibikkila mbaakani. Kwiinda mukulibambila kubotu akwiinda mukubambulula ciindi cakubeleka milimo yabo, bamwi baba bapainiya baciindi coonse. Bamwi bakonzya kulibambila kutegwa banjile mumulimo wabumisyinali naa waku Beteli. Bamwi balongela kubusena bubulide basikumwaya ba Bwami.
5 ‘Anditobele Cakutaleka’: Nokuba kuti basiciiya ba Jesu bakanjila mumasunko manji, bakakulwaizigwa abusungu bwa Jesu alimwi alukakatilo lwakwe mumulimo wakumuunda. (Joh. 4:34) Bakalimvwa kukulwaizigwa kapati munzila yakumuuya ciindi nobakali aanguwe akuteelela mulumbe wakwe. Nkakaambo kaako aabo bakali kumuccilila ncobakatondezya kukkomana kupati. (Mt. 11:29) Aswebo mbubwena atukulwaizyanye kutegwa tukakatile mumulimo wiinda yoonse kuyandika wakukambauka Bwami akucitya bamwi kuba basikwiiya.
6 Toonse atukutambule cakukondwa kwiita kwa Jesu kwakumutobela cakutaleka kwiinda mukubaa muuya wakulisungula mukulyaaba. Elyo notucita boobo, tula kukkomana kapati lino alimwi inga twalangila zileleko zinji kumbele.