Amujanike Aamiswaangano “Lyoonse Mbomukubwene”
1 Kuswaangana cali cintu cipati lyoonse kubantu ba Jehova. Intempele azikombelo ngaakali masena bana Israyeli nkobakali kucitila bukombi bwakasimpe, kuyiila lwiiyo lwabunaleza alimwi akuyanzana kukkomanisya. Mbubwena buyo abalo Banakristo bakusaanguna kwiina nobakaleka kuswaangana. Imapenzi amasunko mbwaayabwiindila mumazubaano aakumamanino aakatazya, andiswe tuyandika kuyumizigwa kumuuya ikujanika mumiswaangano yesu yambungano—alimwi tulikweelede kapati ono mbuli ‘mbotukubwene.’ (Heb. 10:25) Amulange twaambo totatwe ncotujanikilaa miswaangano.
2 Kutegwa Tuyanzane: Imagwalo atulailila kuti “ka[t]uciya bugwasyanya akuyakana.” (1 Tes. 5:11) Ikuyanzana kwabunaleza kucitya kuti mizeezo yesu kaili buyo iiyaka alimwi kutukulwaizya kucita milimo mibotu. Pele kuti naa twalipambukanya, tuyoofwambaana kubaa mizeezo mibyaabi, yakuliyanda noyiba iisofweede.—Tus. 18:1.
3 Kutegwa Tulaililwe: Miswaangano ya Bunakristo itugwasya kuzumanana kujana lwiiyo lwamu Bbaibbele ilwakuti kalusololela luyando lwa Leza mumyoyo yesu. Ipa busololi bugwasya bwakutobela “zyoonse Leza nzyayanda.” (Mil. 20:27, Ci) Miswaangano ituyiisya mbotunga twakambauka kabotu akuyiisya makani mabotu, izintu ziyandika cini-cini, ikapati ono ikutegwa tubaalukkomano lutaambiki lwakujana akugwasya baabo bazumina kasimpe ka Bbaibbele.
4 Kutegwa Tukwabililwe: Munyika ino mbyaabi, imbungano mbusena bwini-bwini bwakuyubila munzila yakumuuya—mwalo mujanika luumuno aluyando. Notujanika aamiswaangano yambungano, imuuya wa Leza uusalala ulatweendelezya, ucitya kuti tube aa “luyandano, lukondo, luumuno, busicamba, buuya, bubotu, lusyomo, lubombo, kulyeendelela.” (Gal. 5:22, 23) Miswaangano itukulwaizya kuyuma akukakatila mulusyomo. Itucitya kuti tulibambile kabotu mumasunko aazya kumbele.
5 Kwiinda mukujanika lyoonse aamiswaangano, tuba muciimo cakaambwaa sintembauzyo, mbuli mbokulembedwe ku Intembauzyo 133:1, 3 kuti: “Ncobeni ncintu cibotu cibotezya, na babunyina bakala kabotu antoomwe.” Kufwumbwa bantu ba Leza nkobamubelekela akuswaangana antoomwe mazubaano, “nkukooko Jehova nkwaakalailila kuti kube coolwe, nkokuti coolwe cabuumi butamani.”