“[Banakazi] Basimilimo Basungu ba-Mwami”
1 Paulo wakabelesya majwi alaatalaawa kupandulula bacizi bobiloba ba Trufena a Trufosa, basimilimo basungu mumbungano yaku Roma. Kujatikizya uumbi wazina lya Persida wakati: “Oyo iwakabeleka loko cabusungu mu-Mwami.” Mbubwena buyo akuli Febe wakamulumbaizya kuti wakali ‘mugwasyi wabantu banji.’ (Rom. 16:2, 12) Mu Magwalo, Dorika ngomukaintu alikke waambwa kuti “wakalizywide milimo mibotu, aluzyalo.” (Inc. 9:36) Elo ndulongezyo kaka ikubaa banakazi basimide munzila yakumuuya mumbungano!
2 Sena tulabalumba ibacizi babeleka cabusungu mumbungano yesu? Bacita mulimo mupati kapati wakukambauka akweendelezya ziiyo zya Bbaibbele zinji alimwi akugwasya baabo bapya. Alimwi balajana ciindi cakuyiisya bana kuti bayaambele munzila yakumuuya. Banakazi Banakristo bazuzikizya mbazu zyabo mukukulwaizya bukkale bwaluyando, lukkomano aluumuno kubikkilizyaa bunkutwe mumbungano. Balabagwasilizya kapati balumi babo abamwi bamumukwasyi wabo kutegwa bayaambele mumulimo wa Jehova.
3 Ibacizi Babeleka Mulimo Waciindi Coonse: Akati kabaabo babeleka cabusungu mumulimo wa Mwami kuli bacizi bamisyinali, ibunji bwabo bakabeleka cabusungu kutolaambele mulimo mumasi aali kule ankobazwa. Bamakaintu babalangizi beendeenda abalo bajisi bubi mumulimo wamumuunda kukulwaizya bacizi mumbungano omo balumi babo mobabelekela. Abalo bacizi babelekela ku Beteli beelede kulumbwa akaambo kamulimo ngobacita cakulyaaba kutegwa bagwasilizye mumbunga ya Jehova. Bacizi babeleka mulimo wabupainiya abalo bali mukutembaula Leza kwiinda mumulimo wabo ngobacita cakusyomeka, aboobo bali mukugwasya zyuulu-zyuulu zyabantu kwiiya kasimpe.
4 Banakazi aaba basyomeka balikkomene kapati abuumi mbobapona ibwakulyaaba. (1 Tim. 6:6, 8) Bayandika kubalumba akubakulwaizya alimwi akubayumya munzila iili yoonse njotunga twacita.
5 Banakazi Banakristo balaa mulimo mupati kapati ngobacita cakusyomeka alimwi uugwasya mumbunga ya Jehova akubantu boonse. Atubalumbe banakazi aaba akubapailila kuti Jehova abalongezye ‘mumulimo ngobabeleka cabusungu mu Mwami.’