Kabbokesi Kamubuzyo
◼ Ino mbuti basikugwasilizya mbobanga babagwasya bazyali kuti bagwasye bana babo ikulilemeka ciindi nobali kumiswaangano?
Ikusobana ncilengwa buya kubana, tabazyibide kukkala buyo kwaciindi cilamfwu. Mbuwamanina buyo muswaangano, ibana balatalika kubalika-balika akutandilana abana bamwi mbuli kuti balaangidwe buya mu Ŋanda ya Bwami naa mumasena aambi muswaanganinwa, musiigwa myootokala naa mutuzila mwiinda bantu. Nokuba boobo, nkamasimpe ikasimpi kakuti: “Mwana uulekelelwa buyo ulausya banyina insoni.”—Tus. 29:15.
Ncintu cuusisya kubona kuti kuli bakwesu alimwi abacizi bamwi bacembeede balicisa kapati akaambo kakutonkwa akuwisigwa abana babalika-balika. Eci taciyandiki alimwi cipa kuti bazyali alimwi ambungano kabanyonyoona mali manji. Akaambo kabubotu bwabo alimwi abamwi, mutabalekeli bana kubalika-balika alimwi akusobana mukati naa anze lya Ŋanda ya Bwami.
Bazyali balaa mukuli wamu Magwalo wakuyiisya bana babo ikulemeka masena eesu aabukombi. (Muk. 5:1a) Kumiswaangano yesu ya Bunakristo misyoonto alimwi amipati, basikugwasilizya bapegwa mulimo wakubona kuti ‘zintu zyoonse buyo zyacitwa kabotu akucililana’ alimwi akubona kuti kuli ‘bubambe buli kabotu.’ (1 Kor. 14:40; Kol. 2:5) Beelede kubalanganya kabotu bana kaitanatalika, anoicitwa alimwi anoyamana pulogilamu, mukati alimwi anobazwaanze. Ikuti mwana kabalika-balika naa katamvwi kwaambilwa, caluyando sikugwasyilizya ulakonzya kumulesya kucita ncacita mwana ooyo akumupandulwida ncocili cibi kucita boobo. Bazyali bamwana abalo beelede kwaambilwa caluyando kujatikizya penzi eli akuti beelede kumulanganya mwana wabo. Bazyali beelede kubona kuti bacita kweelana ambobaambilwa.
Inzya kuli ziindi zimwi bana bavwanda alimwi abana bakomena-komena nobalila naa kunyonganya miswaangano. Basikugwasilizya beelede kuti kabasika kakucili maminiti aali 20 kaitanatalika pulogilamu, balakonzya kusiya zyuuno zyakusyule zili mbozibede kucita kuti bazyali balaa bana babo baniini bakkale mpawo. Swebo tobamwi tweelede kubamvwida aaba basikugwasilizya akutakkala aawo mpobasiya kuti kukkale baabo balaa bana baniini.
Eelyo nokuli mwana uunyonganya bantu, muzyali weelede kubweza ntaamu. Ikuti naa muzyali tamulanganyi mwana ooyo amana wazumanana kunyonganya bantu, sikugwasyilizya weelede kumwaambila muzyali caluyando kuti amutole anze mwana ooyo. Notutamba bantu bapya bajisi bana baniini kumiswaangano, atukkale munsi lyabo akubagwasya eelyo bana nobalila naa kunyonganya bantu munzila iili yoonse.
Cilatukkomanisya ikubona bana baziimo zisiyene-siyene ku Ŋanda ya Bwami alimwi akubona mbobalilemeka muŋanda ya Leza. (1 Tim. 3:15) Kwiinda mukulemeka bubambe bwa Jehova bwakukomba, bapa bulemu kulinguwe Leza alimwi balalumbwa kubantu boonse mumbungano.