Nobazyali—Amuyiisye Bana Benu Ziyanza Zigwasya
1 Ziyanza zibotu tazili zyakuzyalwa anzizyo alimwi tazibooli buyo mucoolwe pe. Aboobo, ikuyiisya bana ziyanza zigwasya kutola ciindi. “Kuyiisya” caamba “ikuzibya aasyoonto-syoonto” naa “ikubikka aaniini-niini.” Cilayandika kapati kuti bazyali kabatalengaani kutegwa “balele [bana babo] mulwiiyo lwa-Mwami amumilazyo yakwe.”—Ef. 6:4.
2 Amutalikile Kubuvwanda: Imaanu ngobajisi bana basyoonto aakwiiya alimwi akucita zintu zimwi zipya alagambya. Nokuba kuti bapati kanjikanji cilabayumina ikwiiya mwaambo umwi mupya, ibana batanatalika kuunka kucikolo balakonzya kwiiya myaambo yobile naa yotatwe aciindi comwe. Mutayeeyi kuti mwana wanu ucili muniini akuti takonzyi kwiiya ziyanza zigwasya. Ikuti naa mwana mwamufwambaanina kumuyiisya Bbaibbele akuzumanana mbwanooyaabukomena, mizeezo yakwe inoozwide luzibo ‘luyoomusongwaazya mukufwutulwa.’—2 Tim. 3:15.
3 Acibe Ciyanza Canu Kuunka Mumulimo Wamumuunda: Eelyo mwana nayaabukomena weelede kuyiisigwa ciyanza ciyandika kapati lyoonse cakukambauka makani mabotu aa Bwami bwa Leza. Bazyali banji balatalika kucita oobo kwiinda mukubatolelela bana babo mumulimo wakuŋandaa ŋanda eelyo nobacili bavwanda. Ikutola lubazu kwabazyali lyoonse mumulimo wakukambauka kulabagwasya bana babo ikulumba alimwi akusungwaalila mulimo. Bazyali balakonzya kubatondezya bana mbobanga batola lubazu mukupa bukamboni mumbazu ziindene-indene zyamulimo wamumuunda.
4 Ikulilembya mu Cikolo Camulimo Wateokrasi akwalo kulabagwasya bana. Cilabayiisya ziyanza zigwasya zyakuliyiisya alimwi ambobakonzya kuzimvwisya nzyobabala. Balaiya kutalisya mubandi wamakani aamu Bbaibbele, kucita nyendo zyakupilukila alimwi akweendelezya ziiyo zya Bbaibbele. Lwiiyo oolu lulakonzya kubakulwaizya kubeleka mulimo wabupainiya alimwi akubelekela zyoolwe zilibedelede zyamulimo. Bamumukwasyi wa Beteli alimwi abamisyinali balayeeya kabotu-kabotu ciindi cakusaanguna nobakali mucikolo camulimo alimwi bacibona kuti eeci cipego ncicakabagwasya ikubaa ziyanza zigwasya.
5 Toonse tuli buyo mbuli bulongo ibuli mumaanzaa Mubumbi Mupati Jehova. (Is. 64:8) Ciindi bulongo nobucili butete, tabukatazyi pe ikububelesya. Ikuti naa twabulekela bwayuma, buyootukatazya kububelesya. Mbubwenya oobo mbobabede abantu. Nacili muniini mwana taakatazyi kunyona pe—alimwi nceciindi cibotu cakumuyiisya. Mumyaka eeyo njemyaka njobakonzya kululamikwa kububotu naa kububi. Kuba muzyali uubikkila maanu, amufwambaane kutalika kuyiisya bana benu ziyanza zigwasya mumulimo wa Bunakristo.